1-4. Ngera el meringel el blekeradel a lengar ngii a Petrus, e mo uangerang a feeling er kau omko ke mle ngii?

 A KLOU el oberaod el deel el chesmerel a siseball a kosebakl er ullel a Petrus. Ngrrengodel er a bombatel e a reteru el mengkar el chad er a Rom a obang el mora blil a kelebus. Ngar tiang e ngmengiil el betok el sikang e locha mo betok el klebesei, el longiil el mo medengei el kmo ngngera mo duubech el mo er ngii. Ngdi sebechel lomes a kboub me a bars er a blil a kelebus me a bombatel me a remengkar.

² A chais el lenguu a diak lungil. King Herodes Agripa I a mla rullii er a rengul a mo omekoad er a Petrus. a Ngika mo oba Petrus el mo er mederir a rechad er a uriul er a Baskua me a okodellel a sengk el mo er tir. Tia diak el kora di ulekdakt. A Herodes a ngar ngii a klisichel el mekodir. Ngika kmal dirk milekodir a Jakobus el ta er a apostol.

³ Ngkebesengei er sel sils er uchei er a okodellel a Petrus. Ngera ngmelatk el di ngii el tang er a chelsel tia el milkolk el blil a kelebus? Ngika ngmelatk el kmo a betok el rak er uchei e a Jesus a dilu er ngii el kmo a ta er a klebesei e te mo rongedii e nguu el mekodir? (Jn. 21:18, 19) Kele el blo lolatk el kmo ngmla mei ngii el taem.

⁴ Omko ke mle Petrus, e ngngua ngera feeling er kau? A rebetok el chad a locha kmal mo mechitechut a rengrir e omdasu el kmo ngdiak a hope. Me nguaisei, engdi a remera el oltirakl er a Jesus Kristus, ngmera el mo diak omeltkir er a chelsel a bebil el blekeradel? Ngera sebeched el suub er a omerellel a Petrus me a rekldemel el Kristiano er a lengai odechelakl? Ka mei e dosaod.

5, 6. (a) Ngera uchul me a King Herodes Agripa I uleldechelakl er a ongdibel er a Rekristiano, e milekera loruul er tiang? (b) Ngera uchul me a okodellel a Jakobus a mle omeasem el mora ongdibel?

⁵ Ngua desilubii er a uleak uchei el bliongel er tia el babier, a beltel a Kornelius el chad er a Chisentael me a telungalek er ngii a kmal mle ileakl el tekoi el kirel ongdibel er a Rekristiano. Me nguaisei engdi Rechijudea a locha kmal mlo mechas a rengrir er a bo lodengei el kmo a rebetok el Chijudea el mla mo Kristiano a mengull el lobengterir a rediak el chad er a Chijudea.

⁶ A Herodes a mle mellomes a rengul el chad er a balatiks me ngmilsa el kmo tia techall el sebechel lousbech er ngii el lochau a rengrir a Rechijudea. Me ngulemuchel el loumekngit el mora Rekristiano. Ngulterekokl el mlo medengei el kmo a apostol Jakobus a kmal mle close er a Jesus Kristus. Me a “Jakobus el tar a Johanes a lulekodir er a saider” a Herodes. (Rel. 12:2) Tia omeasem el mlora ongdibel! A Jakobus a ta er tirke el tedei el milsa Jesus er a lemengodech me a lmuut el bebil er a ongasireng el dimlak leues tirke el kuk bebil er a rechapostol. (Mt. 17:1, 2; Mk. 5:37-42) A Jesus ulemekedong er ngii me a ta er ngii er a Johanes el kmo te “re ngelekel a Derumk” e le ngmle smiich a blekerdelir. (Mk. 3:17) Me sera lokodir, e a ongdibel urridii a odam el kmal uleba blekeu me a blakerreng e betik er a rengrir el apostol.

7, 8. Ngmilekera ongdibel er a lemekelebus a Petrus?

 ⁷ Ngkmal mlo ungil a rengrir a Rechijudea er a lokodir a Jakobus, el ua mle urungulel a Agripa. Tia silsichii a rengul el mo oldechelakl er a Petrus. Ngua dulsaod er ngii er a uchelel, ngngiluu a Petrus el mo kelebus. Engdi Agripa ulterekokl el dirkak lobes el kmo a rechapostol a mlo mimokl er a uchei loeak a mengasireng el rolel, el ua dulsang er a 5 el bliongel er tia el babier. Me ngrirengedii a Petrus er a bombatel e loia er a delongelir a reteru el mengkar e le ngdimlak el soal a lebo er ngii a techellel el chemiis. Ngdirrek el mla er ngii a re 16 el mengkar el kaititechei el lomes er ngii er a llomes me a klebesei. E a lsekum a Petrus a chemiis e tirka el mengkar a mo okodall. Chelsel tia el kmal meringel el blekeradel e ngera sebechir a rekldemel a Petrus el Kristiano el meruul er ngii?

⁸ A ongdibel a kmal mle medengelii a kirir el meruul er ngii. A Rellir 12:5 (NW) a kmo: “Me a Petrus a le chilsmerii er a kelebus engdi rechedal ongdibel a kmal mle blak a rengrir el meluluuch el mora Dios el kirel.” Te mle meringel el meluluuch el ngar er a rengrir el kirel ngika el betik er a rengrir el odam er tir. A kodellel a Jakobus a dimlak lechoitechetur a klaumerang er tir, me a lechub e lerelleterir el mo omdasu el kmo a nglunguuch a diak a ultutelel. A nglunguuch a kot el klou a ultutelel er a Jehovah. A lsekum e ngoltirakl er a soal e ngmo onger. (Heb. 13:18, 19; Jak. 5:16) Tiakid a klou a ultutelel el tekoi el bla desuubii el kirir a Rekristiano er chelecha el taem el loia er a rengrir.

 9. Ngera sebeched el suub er a kerebai er a rekldemel a Petrus el Kristiano el kirel a nglunguuch?

 ⁹ Kau, ke medengelterir a Rekristiano el chelebangel a betok el ringel? Te locha outekangel a odechelakl, terebengel a urered, me a lechub e ngtelemellel a beluu. Ngsebechem el meluluuch el kirir. Ke locha dirrek el medengelterir a rebebil el chelebangel a ringel el diak el sebeched el bleketakl el mes, el ua mondai er a telungalek, chelitechetul a reng, me a lechub nglmuut el bebil er a omeasem er a klaumerang er tir. A lsekum ke melebedebek er a uchei er a moluluuch e ke locha mo lotketerir a rebetok el chad e ousbech a ngklir sel moluluuch el mora Jehovah, el “ngike el lorrenges a nglunguuch.” (Psa. 65:2, NW) Kau me ke dirrek lousbech er a rudam me a rudos el mo meluluuch el kirem obo mchebangel a ringel.

10, 11. Mosaod er a rolel e a anghel er a Jehovah ulsebelii a Petrus er a blil a kelebus.

¹⁰ A Petrus, ngmlo ouedikel a rengul er a tekoi el mo duubech el mo er ngii? Alta ngdiak dodengei engdi kede medengei el kmo tia el ulebongel el kesus er ngii e ngiliit a medal er a delongelir a reteru el chad el kmal mle blak a rengrir el mengkar. Ngika mla er ngii a klaumerang er ngii e mle ulterekokl a rengul el kmo a ngii di el tekoi el mo duubech e ngulekerreu er chimal a Jehovah. (Rom 14:7, 8) Me nguaisei engdi ngulterekokl el dimlak lolatk el kmo a blekeradel a mo uai a tekoi el dilubech. Ngmlo er ngii a medidiich el llomes er a blil a kelebus el lengar ngii. A anghel a dilechor engdi remengkar a dimlak el sebechir el mesang. Ngulekisii a Petrus me aike el bombatel el llechotel er ngii el diak el sebechel metemall a di rirebet!

¹¹ A anghel a dilu er a Petrus me loruul a bebil el tekoi: “Mereched el mekiis . . . Mutuchulau e moueacher . . . Mlia ikrel a bilem.” Me a Petrus a di mle mereched el mo remuul aike el lolekoi. E a anghel a kmo: “Mokiuellek.” Me a Petrus uleltirakl er ngii. Me te mirrael el tuobed er a blil a kelebus lengelakl er a resoldau el milengkar e merael el bedul sel klou el deel el chesmerel a siseball. Te mekera tuobed? A lsekum tia mlara uldesuel a Petrus e ngkmal dimlak lolechedech el kemanget el taem. Te merrael el bedul a siseball e “ngdi mle ngii lobkais.” Me te tilobed er a siseball el mora rael e a anghel a mo dibus. A Petrus a di mle ngii el tang el dechor er a rael e mocha mtebengii el kmo tia el tekoi a mera el dilubech ngdiak el ues. Ngmla mo mimokl!​—Rel. 12:7-11, BT.

12. Ngera uchul me ngmengelaod er kid sel dolatk er a rolel e a Jehovah ulsebelii a Petrus?

¹² Ngkmal mengelaod er kid sel dolatk er a diak a telkelel el klisichel  a Jehovah el lolsobel er a rechedal. A Petrus a lekilebsengii a king el oba ngelsuil sel kot el mesisiich el renged er a beluulechad. Me nguaisei a Petrus a di mirrael el tuobed er a kelebus! E klemerang el Jehovah diak loruul ongasireng el tekoi el kirir a rokui el mesiungel. Ngdimlak loruul el uaisei el kirel a Jakobus e dimlak loruul el uaisei el kirel a Petrus er uriul, er a letaut a tekingel a Jesus el kirel. Me a Rekristiano er chelecha el taem a diak el expect a mengasireng el rolel osobel. Engdi ngdirkak dobes el kmo a Jehovah dirkak el mengodech. (Mal. 3:6) Ngdi kmedung e ngmo ousbech er a Ngelekel el loltobed er a rechad er a blil a kelebus el kora ua lak el sebeched el mimokl er ngii, el ngii a kodall. (Jn. 5:28, 29) Aika el telbiil a sebechel ngosukid el mo oba klou el blekeu sel bo dechebangel a ringel.

13-15. (a) A rechedal ongdibel el mle kldibel er a blil a Maria te milekerang er a lebong a Petrus? (b) A babier er a Rellir e ngmocha mesaod er a ngerang, e a Petrus e ngmillemolem el mekerang el kirir a rudam me a rudos er ngii?

¹³ A Petrus a dilechor er a milkolk el rael e melatk el kmo ngmo er chelechang, e mlo medengelii a lebo er ngii. Ngar ngii a redil Kristiano el Maria el kmeed a blil. Ngika melakl el dil e mle merau me ngmla er ngii a klou el blil el sebechel ongdibel el mo kldibel er ngii. Ngdelal a Johanes Markus, el kot el taem el babier er a Rellir a mesaod er ngii er tiang, el uriul e ngmlo ua le ngelekel a Petrus. (1 Pe. 5:13) Tia el kesus e te betok er a rechedal ongdibel a mlara blil a Maria alta ngmla mo chosoi el blak a rengrir el meluluuch. Te ulterekokl el milluluuch me bo lemimokl a Petrus engdi te dimlak el kltmokl er a rolel e a Jehovah mo onger er tir!

¹⁴ A Petrus a millengod er a chesmerel a siseball er a medal a berangdang er a blai. A ta el mesiou el redil el ngklel a Roda, el haeri el ngakl er a Grik el belkul a kmo “Bara,” a mlora chesmerel a siseball. Ngkmal mle meringel er ngii oumerang el kmo ngngerel a Petrus! Ngdimlak el lebekengii a chesimer me a Petrus a di dilechor er a rael, e ngii a remurt el lmuut el mora blai el kmal ungil a rengul el mo ouchais er a rechedal ongdibel el kmo Petrus a ngar rikl. Te dilu er ngii el kmo ngdi mengesengsang engdi ngii a di uluutekangel. Me a rebebil a mlo melekoi el kmo nglocha anghel er a Petrus. (Rel. 12:12-15) Me te uaisei er a chelsel a blai e a Petrus a di millengod me te mocha er a siseball el mo melai er a chesimer.

¹⁵ Te ngiluu a chesimer “e mesang me ng mlo mechas a rengrir”! (Rel. 12:16) Ngkmal mle ungil a rengrir me a Petrus a mle kirel olengit er tir me lak longerodech me bo lsebechel louchais a tekoi el dilubech e bo louchais er a disaiplo el Jakobus me a rudam el kirel, e lorael er  a uchei er a bo lsebechel metik er ngii a resoldau er a Herodes. Me a Petrus a mirrael el mo mesiou er a kuk ta er a basio el safe. A lmuut el ta er a taem el donguiu el kirel a Petrus a ngar er a 15 el bliongel er a Rellir, er a losmechokl er a mondai er a botk, engdi tiang a mo ulebongel el omesodel er a babier er a Rellir. Chelechang a babier er a Rellir a mocha mesaod er a urerel me a omerollel a apostol Paulus. Me nguaisei, engdi ngulterekokl a rengud el kmo a Petrus a millisiich er a klaumerang er a rudam me a rudos er a basio el leblo er ngii. Sera letobed er a blil a Maria, e a rechad a kmal mle dmeu a rengrir.

16. Ngera uchul me ngsebechel mo ulterekokl a rengud el kmo nglmuut el mo betok a taem er a klou el deurreng er a ngar medad?

¹⁶ A lebebil e a Jehovah omesterir a remesiungel a tekoi lengelakl er aike el lullatk, me a deurreng er tir a diak el motekau. Tiakid a lulemelechesiu er ngii a rudam me a rudos er a Petrus er tia el kesus. Ngdirrek el tekoi el bo domelechesiu er ngii er chelecha el taem sel de experience a klengeltengat er a Jehovah. (Osi. 10:22) A ngar medad e kede mo mes a telbilel a Jehovah el tmaut er a beluulechad el rokir. Aika mo engelakl er a ngii di el tekoi el dengai er chelechang. Me a lsekum kede melemolem loba blakerreng e ngkmal sebechel mo ulterekokl a rengud el kmo a lmuut el klou el taem er a deurreng a merael el mei.

17, 18. Ngera uchul me a seked a millad er a Herodes?

¹⁷ A Herodes a dirrek el kmal mlo mechas a rengul er a Petrus el mlo sebechel chemiis er a kelebus, e kmal mlo kesib a rengul. Me ngultebedii a tekoi el mo osiik er a Petrus e uluukerrekeriil er tirke el milengkar er a Petrus. Ng “ultebedii a tekingel el kmo te mo okodall.” (Rel. 12:19) A Herodes Agripa dimlak el chubechubechad. Ngika el mekngit el chad ngulebals?

¹⁸ A Agripa locha kmal mlo merur le ngdimlak el sebechel mekodir a Petrus. Engdi ngdi mle mereched el mo er ngii a techellel el meruul er a tekoi el mengedidai er ngii. A rebebil er a recherrouel a mlei el me omes er ngii le ngsorir el meruul er a budech lobengkel. Tia milsa techellel el mo mengedecheduch er a klou el seked. A Lukas a kmo a Herodes a kiltmeklii e “mililii er a bilel a king.” A Chijudea el chad er a reksi el Josephus a milluches el kmo a bilel a Herodes a bail el rruul er a silber me a llomes sel sebechii er ngii e ngmelidiich el ua klebkellel a Dios. Ngika el chibatter el chad er a balatiks a mlengedecheduch. Me a seked a meldelad er ngii el kmo: “Tia ngerel a chelid, el diak le ngerel a chad!”​—Rel. 12:20-22, BT.

19, 20. (a) Ngera uchul me a Jehovah milelsii a Herodes? (b) Ngera uchul me a kodellel a Herodes Agripa sebechel mengelaod a rengud?

 ¹⁹ Chouaitia el klebkall a di mora Dios, me a Dios ulemes! A Herodes a mla er ngii a techellel loibngii er a telemall. Ngmle sebechel sumecheklii a seked me a lechub e ngdimlak lekengei a tekingir. Engdi ngika bai mlo otutii tia el osisechakl el kmo: “A kldidairreng a ngoikau el mor a tellemall.” (Osi. 16:18) Ng “dimlemereched a anghel ra Rubak el cholebedii,” me ngii el kedidai a rengul el chad a mlad er a mekngit el kodall. A Herodes a “[mleka] ra chiekl e mad.” (Rel. 12:23, BT) A Josephus a dirrek el dilu el kmo a Agripa di mle kiul el mo smecher e mlo mtebengii el kmo ngmedkung lengii el kilengei er a ilad er a seked. A Josephus a kmo a Agripa mle smecher el eim el klebesei e mad. b

²⁰ A lebebil e a remedengerenger a kora diak lobals er a mekngit el omerellir. E diak lemechas a rengud e le “beluulchad el rokir a ngar eungel Ngikel Mekngit.” (1 Jn. 5:19) Me nguaisei a reblak a rengrir el mesiungel a Dios a dirrek el mo mengesang er tir sel lomes er a remekngit el diak lobals er a omerellir. Tiakid a uchul me a cheldecheduch er a Biblia el uai tiang a mengelaod er kid. Ngochotii el kmo a Jehovah oukerrekeriil er a remedengerenger e omeklatk er a rokui el mesiungel el kmo ngbetik a rengul er a llemalt. (Psa. 33:5) Ngmo meruul er a llemalt.

21. Ngera sel kot el klou a ultutelel el tekoi el desuubii er a 12 el bliongel er a Rellir, e ngera uchul me ngsebechel mengelaod er kid er chelecha el taem?

²¹ Orokiolel tia el cheldecheduch a dirrek el kmal lmuut el melisiich er kid: “A tekingel a Dios a mengal uleberk e merael el mo klou.” (Rel. 12:24) Tia el report er a klungel a berkel a klumech omeklatk er kid er a rolel e a Jehovah dirrek el omekngeltengat er tia el osisiu el ureor er a taem er kid. Me ngbleketakl el kmo aike el llechukl er a 12 el bliongel er a Rellir a diak di losaod er a kodellel a ta er a apostol me a chiis er a tang. Ngosisecheklid el kirel a Jehovah me aike el lurruul el merrob er a Satan me ngdiak el temellii a ongdibel er a Rekristiano me a blakerreng er tir el lomerk er a klumech. Aika el odelecheklel a Satan a dimlak loureor me a rokui el omeasem el uai ngii me ngdiak el bo loureor. (Isa. 54:17) Engdi tirke el dechor el kirel a Jehovah me a Jesus Kristus a teloi er a ureor el kmal diak bo lemeterob. Tiang ngdiak el sal kmal melisiich er kid? Kede mera el oba ileakl el techall el omerk er a “tekingel a Dios” er chelecha el taem!