1-3. (a) Stefanus ngchelebangel er a ngera el omekdakt el blekeradel, engdi ngua ngera omerellel? (b) Ngera el ker a bo dosaod?

 A STEFANUS a dechor er a medal a kort. Tiang a delemerab el kmeed er a templo er a Jerusalem. Te dengchokl el meliuekl er ngii a re 71 el chad. Ngkmal sebeched el mo feel er a klou el dakt er ngii. Ngkort er a Sanhedrin el mocha oukerekeriil er a Stefanus. Tirka el chad er a kerrekeriil a klou a klisichir er a beluu e oumesingd er tir omes er ngika el disaiplo er a Jesus el diak el ngerang. Ngike el chad el rirellii tia el kerrekeriil a Ngarbab el Prist Kaifas el mle president er tia el olbiil er a lotelecheklii a Jesus Kristus e lokodir er a sesei el buil er uchei. Me a Stefanus ngmedakt?

² Ngmera el ileakl a medal a Stefanus er tiakid el taem. Tirke el rokui el mle dengchokl a milsa el kmo a medal a “ua medal a anghel.” (Rel. 6:15) A rechanghel a olab a klemechel a Jehovah el Dios a uchul me te diak el medakt e chelellakl e budech a rengrir. Tiaikid a lomelechesiu er ngii a Stefanus. Mo lmuut er tirka el loukerrekeriil el kmal chetirir ngii me ngsebechir el mesang. Ngera uchul me ngkmal chelellakl a rengul?

³ A Rekristiano er chelecha el taem a sebechir el suub a betok er a nger er tia el ker. Kid me ngdirrek el kired el mo medengelii a uchul me a Stefanus a mlo chobengelii tia el kmal meringel el blekeradel. Ngmilekera losebechakl er a klaumerang er ngii er uchei? E oeak a ngera el rolel e ngsebeched el loukerebai er ngii?

4, 5. (a) Ngera uchul me a Stefanus a mle mekreos el ngeso el mora ongdibel? (b) Ngoeak a ngera el rolel e a Stefanus a mle “mui ra grazia ma klisiich”?

⁴ Kede mla suubii el kmo a Stefanus a kmal mle mekreos el ngeso el mora dirk milteketek el ongdibel er a Rekristiano. Ngar er a uleak uchei el bliongel er tia el babier e kede milsa el kmo ngmle ta er tirke el teuid el chad el kilengei er a ileakl el ngerachel el mlara rechapostol.  Me ngkmal utebengall a klengariourreng er ngii sel dolatk aike el sengk er a Dios el lemlukngeltengat er ngii. Ngar er a Rellir 6:8 (BT) e kede menguiu el kmo a Dios a milsa klisichel el meruul a “mekloul ongasireng ma cholangch” el ua rebebil er a rechapostol. Ngdirrek el louchais er kid el kmo ngmle “mui ra grazia ma klisiich.” Ngera mle belkul tiang?

⁵ A tekoi er a Grik el moiuid el “grazia” a dirrek el sebechel moiuid el “delemedemek.” Me a Stefanus a mle ungil a blekerdelel e medemedemek me a rechad a mle sorir ngii. A rolel er a longedecheduch a milengesuseu er a rulerrenges er ngii, e mle sebechir el mtebengii el kmo ngmera el mle bliochel a rengul me a klemerang el lolisechakl er tir a mo uchul a klungiolir. Ngmle mui er a klisiich e le chedaol reng er a Jehovah uluureor er ngii, e le ngii el mle ngariou a rengul loltirakl er a ulekrael er a chedaol reng. A sengk me a duch el lengilai a dimlak lerellii el mo kedidai a rengul e ngbai ngilai a rokui el odanges el msang a Jehovah e ulechotii el mora rechad lulengedecheduch er tir el kmo ngbetik a rengul er tir. Me ngsebeched el mesa uchul me a rumtok a kmal mle chetirir ngii!

6-8. (a) Ngera el teblo el ultelechakl a luluusbech a rumtok loltutakl er a Stefanus, e ngerang? (b) Ngera uchul me a kerebil a Stefanus a sebechel ngosuterir a Rekristiano er chelecha el taem?

⁶ A rebebil er a rechad a millasem el mengaititekangel er a Stefanus engdi ng “mlo diak el sebechir el mtekengelii a llomeserreng ma Reng el longedecheduch.” a “Me te kildmeklterir” a rechad el mo omulak loltelechakl er ngika el diak a telemellel el ta er a rultirakl er a Kristus. Te dirrek el “rirelleterir a re chad . . . el mo ouedikel,” me a remechuodel, me a resensei er a Llach. Me a Stefanus a mlengai el mora medal a Sanhedrin. (Rel. 6:9-12, BT) A rumtok a ultuteklii er a teblo el tekoi: Ngoltuub er a Dios me a Moses. Loeak a ngera el rolel?

⁷ Tirka el omulak el oltelechakl a kmo, a Stefanus oltuub er a Dios le ngii el omtok er a “chedaol Templo” er a Jerusalem. (Rel. 6:13) Te kmo ngoltuub er a Moses le ngii el omtok er a Llach er a Moses e melodech a siukang el Moses ullisechakl er a rechad. Tia mle oberaod el ultelechakl e le templo, llach er a Moses, me a siukang el mlo uldimukl er a Llach a kmal mle meklou a ultutelel er a rechad er a Chijudea er tiakid el taem. Me te oltutakl el kmo, a Stefanus a kengaol el kirel a klechelid er tir e kirel okodall!

 ⁸ Ngklengiterreng e le rechad er a klechelid a blechoel el lousbech chouaika el teletael el lomuchel a mondai el kirir a rechedal a Dios. Mo lmuut er chelecha el taem me a remengeteklel a klechelid a meruul er a rechad er a kabelment el mo oldechelakl er a Resioning er a Jehovah. Kede mo mekerang sel lousbech a blulak el ultelechakl loltutakl er kid? Ngkmal sebeched el ngmai a klubeled er a Stefanus.

9, 10. A rechad ngera te melekoi el kirel a tekingel a Stefanus el mora Sanhedrin, e ngera kired el melatk er ngii?

⁹ Ngua dulsaod er ngii er a uchelel, a Stefanus a mle chelellakl e budech a medal el di ua medal a anghel er a lorrenges a ultelechakl el mo er ngii. Chelecha Kaifas a mocha omes er ngii e kmo: “Ng mera ikel lolekoi?” (Rel. 7:1) Ngtemel a Stefanus el mengedecheduch. E kmal klou a klisichel a tekingel!

¹⁰ A rebebil er a rechad a oukerrekeriil a tekingel a Stefanus e melekoi el kmo alta ngmle kemanget a cheldechedechal engdi ngdimlak longer er a ultelechakl el mlo er ngii. Me nguaisei a Stefanus a bai kiltmeklii a ungil kerebai el kired er a rolel e kede “smodii” a ungil chais. (1 Pe. 3:15, BT) Molatk, a Stefanus a mlotelechakl el kmo ngoltuub er a Dios le ngmelekoi a mekngit el kirel a templo e oltuub er a Moses le ngomtok er a Llach. A tekingel a smaod a edei el blingelel a taem er a reksi er a rechad er a Israel, e ngar ngii a ileakl el tekoi el lolisiich. Ka me dosaod a derta er aika el blingelel a taem.

11, 12. (a) Ngmilekera Stefanus e ousbech er a kerebil a Abraham? (b) Ngera uchul me a Stefanus uluusbech er a Josef el ngar er a cheldechedechal?

¹¹ Taem er a ruchelir a rechad er a Israel. (Rel. 7:1-16) A Stefanus ulemuchel el mesaod er a Abraham, el Rechijudea kmal milengull er ngii el kirel a klaumerang er ngii. Nguluusbech er tia el tekoi el lekilengei er ngii el rokui e millisiich el kmo a Jehovah el “Dios ra klebkall” a mle kot el mo duum er a Abraham er a lengar er a Mesopotamia. (Rel. 7:2, BT) Ngika mle chad er a ngodech el beluu er a lebora Beluu er a Nglat. Ngdimlak a templo me a Llach er a Moses. Me ngmekera chad e sebechel melekoi el kmo a blakerreng el mora Dios a ultuil er aika el tekoi?

¹² A Josef el uldidellel a rsechel a Abraham a dirrek el kmal lulengull er ngii tirka lorrenges er a Stefanus. Me nguaisei ngulemeklatk er tir el kmo a rubekul a Josef, el demerir aike el klebliil er a Israel, a mle mekngit er ngika el melemalt el chad e ulterur el mo sibai. Engdi Dios a uluusbech er ngii el losebelii a telungalek er a Israel er a bosech er a kall. A Stefanus a ulterekokl el mle sebechel bleketakl el mesang a klaisisiu er a Josef me a Jesus Kristus, engdi ngdimlak lousbech er tiang er a cheldechedechal le ngmle soal a bo lemeketeket el lorrenges er ngii.

13. Ngmilekera tekingel a Stefanus el kirel a Moses e onger er a ultelechakl el mlo er ngii, e ngera el tekoi a lulekekokil lomeketakl er ngii?

 ¹³ Taem er a Moses. (Rel. 7:17-43) A Stefanus a milsaod a betok el kirel a Moses e kmal lolechotel a llomeserreng e le rebetok er a chedal a Sanhedrin a mle Sadusi el tir a ultngakl aike el bebil er a babier er a Biblia e di kongei aike el lulluches a Moses. E dirrek lak mobes el kmo a Stefanus a mlotelechakl el kmo ngoltuub er a Moses. A tekingel a Stefanus a mileketeklii el kmo ngdimlak el klemerang a ultelecheklir e le ngulechotii el kmo ngkmal klou omengull er ngii el mora Moses me a Llach. (Rel. 7:38) Ngdilu el kmo a Moses me te dirrek lultngeklii tirke el lullasem el lolsobel er tir. Te ultngeklii er a le 40 a rekil. Betok er a 40 el rak er uriul e te mlo betok el di bo lomtok er ngii. b Ngar tiakid el rolel e a Stefanus a milekekokil lomeketakl er a tekoi el loruul er ngii a rechedal a Dios: Te oltngakl er tirke el Jehovah mla tutketerir el mo omekrael er a rechedal.

14. A Stefanus er a lousbech er a kerebil a Moses e ngulemeketakl er a ngera el kmal klou a ultutelel el tekoi?

¹⁴ A Stefanus ulemeklatk er a rurrenges er ngii el kmo a Moses ulemlaoch el kmo a Dios a mo okisii a profet el uai ngii er a Israel. Ngika ngtechang e ngera mo uldesuir a rechad el kirel? A Stefanus a dimlak longer aika el ker el dimerekmo lebora orokiolel a cheldechedechal. Ngbai millisiich er a lmuut el ta er a klou a ultutelel el tekoi: A Moses a silubii el kmo a ngii di el basio a sebechel mo chedaol, el ua sel chutem el mla er ngii a kmard el kerrekar e a Jehovah mengedecheduch er ngii. Me a omengull el mora Jehovah ngdi sebeched el meruul er a chimo el basio, el ua templo er a Jerusalem? Ka domes.

15, 16. (a) Ngera uchul me a Stefanus a milsaod er a chedaol tento? (b) Ngmilekera Stefanus e ousbech er a templo er a Salomon el ngar er a cheldechedechal?

 ¹⁵ Chedaol tento me a templo. (Rel. 7:44-50) Stefanus ulemeklatk er a kort el kmo a uchei er a lebo er ngii a templo er a Jerusalem e a Dios a dilu er a Moses me lerellii a chedaol tento el kirel omengull, el tento el beot er kid a meleklukl er ngii. Me ngtecha mo kmo a chedaol tento el lulengull er a Dios er ngii a Moses a ngariou kerresel er a templo?

¹⁶ Uriul er a lokedecherur a templo er a Jerusalem a Salomon, e ngmlukreng el mo ouchais el ngar er a nglunguchel a kmal klou a ultutelel el tekoi. Ngua lolekoi a Stefanus, a “Kot el Ngarbab el Dios a diak le kiei a blai el rruul er a re chad.” (Rel. 7:48; 2 Kr. 6:18) A Jehovah locha mo rullii a templo el kirel a moktek er ngii, engdi moktek er ngii a diak lultuil er a templo. Me ngera uchul me a remengull er ngii a omdasu el kmo a bliochel el omengull a ultuil er a blai el rruul er chimorir a rechad? Me a Stefanus a rirekir tia el point er ngii loeak a tekoi el ngar er a babier er a Isaia: “A Rubak a kmo a eanged a kingellek, ma beluulchad a le kldoel ochik er ngii. Ng ua ngeral blai cho bo momekedechor er ngii el kirek? Ngar ker sel bo kkiei er ngii? Ng diak le chimak a riruul a ikal rokui?”​—Rel. 7:49, 50; Isa. 66:1, 2.

17. Ngmilekera cheldechedechal a Stefanus e (a) omeketakl el kmo ngdimlak el melemalt a uldesuir a rulerrenges er ngii e (b) ochotii el kmo ngdimlak a mekngit el lerellii?

¹⁷ Sel dolatk aika el bla ledung a Stefanus e kede mesa el kmo, ngmileketeklii el kmo tirka el oltelechakl er ngii a diak lemelemalt a uldesuir. Ngulechotii el kmo a Jehovah a diak el meringel a tekingel me a lechub e loruul a tekoi el loltirakl a siukang e ngbai sebechel meldelodech er ngii el mo oltaut er a soal. Tirke el mle betik a rengrir er a templo er a Jerusalem me a siukang er a rechad el mlo dechelel a Llach er a Moses a dimlak lotebengii a belkul a Llach me a templo! Me a Stefanus a ua luleker el kmo: A kot el lungil el rolel e kede kobkellii a Llach me a templo, ngdiak el loeak a dolengesenges er a Jehovah? A tekingel a Stefanus ochotii el kmo ngdimlak a mekngit el lerellii, e le ngullengesenges er a Jehovah el mora kot el tkurrebab el klisichel.

18. Ngoeak a ngera el rolel e ngungil doukerebai er a Stefanus?

¹⁸ Ngera kede suub er a cheldechedechal a Stefanus? Ngika kmal mle ungil medengei a Bades. Kid me ngdirrek el kired el mo dmolech el mesuub er a Tekingel a Dios a lsoad el mo ‘melemalt el mesaod a klemerang el dolisechakl.’ (2 Ti. 2:15) Kede dirrek el suubii er a Stefanus a delemedemek me a omengull. Tirke el ulerrenges er ngii a kmal mle mekngit omerellir! Engdi ngmillemolem el mengedecheduch er tir el kirel a tekoi el ngii me tir a kongei e meklou a ultutelel el tekoi  er osengir. Ngdirrek lulemekedong er tir el “chedam.” (Rel. 7:2, BT) Kid me ngdirrek el kired el louchais a klemerang er a Tekingel a Dios loba “delemedemek ma chomeluu.”​—1 Pe. 3:15, BT.

19. Ngmilekera Stefanus e bekeu louchais er a kerrekerilel a Jehovah el mora Sanhedrin?

¹⁹ Me nguaisei engdi ngdiak el kired el mecherei a uldasu el kmo ngchetid el longasech a rengrir a rechad me lestob er kid a ouchais a klemerang er a Tekingel a Dios, me a lechub e domekbeot a klemechel a Jehovah er a kerrekeriil. A Stefanus a ungil kerebai el kired. Ngika miltebengii el kmo a rokui el sioko el lullecholt el mora Sanhedrin a dimlak a ngera el lerellii er a rengrir tirka el chad er a kerrekeriil. Me ngoeak a ulekrael er a chedaol reng, e ngrirekir a cheldechedechal loeak a lebekeu louchais er tir el kmo te kmal di ua ruchelir el tir ultngeklii a Josef, Moses, me a rokui el profet. (Rel. 7:51-53) Tirka el chedal a Sanhedrin a milekodir a Mesias el Moses me a rokui el profet ulemlaoch er a demiel. Me tirka dimlak lolengesenges er a Llach el ngar sel kot el mekngit el rolel!

20, 21. Te milekera Sanhedrin er a tekingel a Stefanus, e milekera Jehovah e smisichii?

²⁰ Klemerang el tekingel a Stefanus el diak el sebechir el mtekengii a uchul me ngkmal mlo kesib a rengrir tirka el chad er a kerrekeriil. Te dimlak el sebechir loreked a rengrir me a ungelir a mlo olengchongch el bedul a Stefanus. Ngika el blak a rengul el odam a locha mlo mtebengii el kmo ngdi ua Mastang er ngii el Jesus, ngii me ngdiak bo lenguu a klechubechub er tir.

²¹ A Stefanus uluusbech er a blekeu el mo outekangel a tekoi el mo duubech, me ngulterekokl el ngilai omelisiich er a ues el lebilsang a Jehovah. A Stefanus a milsa klebkellel a Dios me a Jesus el dechor er a kadekmel chimal a Jehovah! Me ngmocha mesaod er tia el ues el mora rechedal a Sanhedrin engdi te ullab chimorir el melinget a dingerir. E ngerang? E le Jesus luluuchais er tia el osisiu el kort el kmo ng Mesias e di kmedung ngmo er bita er a kadekmel chimal a Demal. (Mk. 14:62) Me a ues el lilsang a Stefanus ulechotii el kmo a Jesus a millekoi a klemerang. Me tia el Sanhedrin a dimlak lochotii a blakerreng er tir el mora Mesias e milekodir! Me te rokui el di mle mereched el nguu a Stefanus el mo metechii er a bad el mekodir. c

22, 23. Ngoeak a ngera el rolel e a kodellel a Stefanus a di ua kodellel a Mastang er ngii, e mekera Rekristiano er chelecha el taem e sebechir el mo oba ulterekokl el reng el lulebang a Stefanus?

 ²² Me a Stefanus a mlad er a osisiu el rolel e a Mastang er ngii a mlad. Ngmle budech a rengul e mui loumerang er a Jehovah, e uluusubes er a remilekodir. Ngdilu el kmo, “Rubak el Jesus, ak uterekeklii a klengar er ngak er kau,” e locha dirk ulemes er a Ngelekel a Chad el lobengkel a Jehovah er a ues. A Stefanus ulterekokl el dirk mle medengei a tekingel a Jesus el kmo: “Ngak a okiis er a kodall e klengar.” (Jn. 11:25) A ulebongel e a Stefanus a milluluuch el klou a ngerel el mora Dios el kmo: “Jehovah lak momasech er tia el klengit er tir.” Ngdi dillii tiang e mo mechiuaiu el mlad.​—Rel. 7:59, 60, NW.

²³ Me a Stefanus a ngike el kot el disaiplo er a Jesus el mlad er chimorir a rumtok er ngii. (Momes er a baks el “ A Stefanus a Mlad Lengii el Mle Sioning el Kirel a Jesus.”) Ngklengiterreng e le Stefanus a dimlak el ulebongel er tir. Ngar er aika el mla mo merek el rak e a rebebil er a mesiungel a Jehovah bla lokodeterir a rechad er a klechelid, balatiks, me a lmuut el bebil er a rumtok. Me nguaisei engdi ngsebechel mo ulterekokl a rengud el ua Stefanus. A Jesus a mengedereder el King er chelechang, e a Demal a mla msang a ileakl el klisiich. Ngdiak a ngera el mo stob er ngii el lolekiis er a reblak a rengrir el oltirakl er ngii er a kodall.​—Jn. 5:28, 29.

24. Ngera ngmirruul er ngii a Saulus er a lokodir a Stefanus, e ngera ungil tilobed er a okodellel?

²⁴ A kekerei el chad el Saulus ulemes aika el rokui el tekoi. Ngkilengei er a okodellel a Stefanus, e ulemes a bilir tirke el ulemetech er ngii er a bad. Kedeb el taem er uriul ngulemuchel el meringel el loldechelakl er a redisaiplo er a Jesus. Engdi kodellel a Stefanus a mlo uchul a betok el lungil el tekoi. A kerebil a silsicheterir a Rekristiano el mo melemolem loba blakerreng el mora kodall. Me a lmuut kung a Saulus, el uriul e kede mlo medengelii el Paulus, a mo melatk er a kodellel a Stefanus e kmal mo uuchel er a rengul el kirel. (Rel. 22:20) Ngika ullengeseu er a okodellel a Stefanus engdi uriul e ngmo mtebengii el kmo: “Ngara mong e ak uleltuub ra Dios e oldechelakl e meruul a rikl.” (1 Ti. 1:13, BT) Me a Paulus a kmal dimlak lobes er a Stefanus me a klisichel a tekingel er seikid el sils. A bebil er a cheldechedechal a Paulus me a babilengel a mesaod a tekoi el mlara cheldechedechal a Stefanus. (Rel. 7:48; 17:24; Heb. 9:24) Cherengel a taem e a Paulus a silubii el mo oltirakl er a klaumerang me a blekeu el lulechotii a Stefanus, el chad el “mui ra grazia ma klisiich.” A ker a kmo, Kede dirrek el mo oltirakl er ngii?