Sel momes er a ungil a chiro er ngii el bung, me a eanged el betok a btuch er ngii, me a lechub e ngklebokel el taki, e ke mes a urerel ngike el Ulemeob? Aika el blebelel a Jehovah el iliuekl er kid a ocholt aike el diak el moues el blekerdelel. (Rom 1:20) Me sel bo dechelellakl e domtab aike el deues, e ngmo sebeched el mtebengii a klisichel a Dios, me a bltkil a rengul, me a llemesel a rengul, me a melemalt el omerellel el mo lmuut er a blekeruraurreng er ngii.​—Psa 104:24.

Ngera bebil er a blebelel a Jehovah el mues er a bek el sils? Ngmo lmuut me a lsekum ke kiei er a chelsel a mats me kau a locha mes a suebek el charm me a lechub e ngkerrekar. Me a bo dungil el omtab a blebelel a Jehovah, e ngsebechel el ngosukid me ngdiak el lsal suebek a rengud, e mo ultaut a osenged er a meklou a ultutelel el tekoi, e smisichii a klaumerang er kid el kmo a Jehovah a mo omekerreu er kid el mo cherechar. (Mt 6:25-32) Me a lsekum ke oungalek, e mngesuterir a rengelekem el mo omtab a mengasireng el blekerdelel a Jehovah. E sel lemukeroul a omereng el saul er kid el kirel aika el blebelel el iliuekl er kid, e kede mengal mo kmeed er ngike el Ulemeob.​—Psa 8:3, 4.

MOMES ER A VIDEO EL THE WONDERS OF CREATION REVEAL GOD’S GLORY​—LIGHT AND COLOR, E MONGER AIKA EL KER:

• Ngera uchul me kede mes a chiro?

• Ngera sel remuul a blebelel a Jehovah el mo er ngii a mengeldechel?

• Ngera uchul me kede mes a kakerous el chiro er a melidiul?

• Ngera el mengasireng el chiro el ngar er a blebelel a Jehovah a bla mues er bita er a blim?

• Ngera uchul me ngkired el ousbech a taem el mo ungil omtab er tia el beluulechad?