1, 2. Ngmekera Jehovah a longelaod er kid er sel taem el dechelebangel a ringel? E ngera el telbiil a debetik el ngar er a Tekingel?

 A TA el mesobil el kekerei el chad a melatk er a bades er a 1 Korinth 7:28 el mesaod el kmo, tirke el mo bechiil “a mo metik a rengelel a klechad.” Me nguleker er a ta el chudela el bechiil el ta er a remechuodel er a ongdibel el kmo: “Tiang ngera el ‘ringel,’ e mekerang a kusmechokl er ngii a lsekum ak mo bechiil?” Me ngika el chuodel el odam er a uchei er a longer er ngika el odam, e ngdilu er ngii me ngmelatk er a tekoi el lulluches er ngii a Paulus el kmo: A Jehovah a “Dios er a bek longelaod, el mengelaod er kid sel de ngara chelsel a ngiidil ringel” me a lechub e ngbetok el ringel.​—2 Korinth 1:3, 4, BT.

² Kid a medengei el kmo a Demad el Jehovah a kmal betik a rengul er kid, e dirrek el mengelaod er kid er sel taem el bo dechelebangel a ringel. Kede locha mo lmatk a bebil el taem el Jehovah a ngilsukid, el ulemekrael er kid el okiu a Tekingel. Me ngsebechel el mo ulterekokl a rengud el kmo, ngkmal soal el meruul a tekoi el di  mo uchul a klungioled el ua omerellel el mo er a remesiungel er a irechar.​—Monguiu er a Jeremia 29:11, 12.

3. Ngera el ker a bo donger er tia el suobel?

³ Me nguaisei, engdi ngblechoel el mo beot er kid el outekangel a mondai me a ringel sel dodengelii a mle uchul e ngdilubech a mondai. Me ngera uchul me ngmo er ngii a mondai er a chebechiieled me a lechub a telungalek er kid? E ngera el kerebai el ngar er a Biblia me a dirrek el chelecha el taem er kid, a sebechel el ngosukid el mo metik a ongelaod el dousbech? Me bo donger aika el ker, e desa sel rolel e ngmo sebeched el outekangel a mondai el bo dechelebangel.

4, 5. Ngera el ringel a bo lechelebangel a rebechiil el chad?

⁴ A Jehovah er a uriul er a lebebii a kot el redil, e ngiluu el mo msa sechal me ngmlo bechil. Seikid e ngdilu el kmo: “Isei a uchul ma sechal a mecherei a demal ma delal e mo obengkel a bechil, me bo letal chelechad.” (Genesis 2:24) Me nguaisei, engdi chelecha el taem e kid el rokui a diak demecherrungel. (Rom 3:23) Tiaikid a uchul me a rechad el mo bechiil a medengei el kmo, ngmo er ngii a mondai er a chelsel a chebechiielir. El ua tiang, a redil er a uchei er a bo lebechiil e ngmle kirel el olengesenges er a demal me a delal. Engdi a Tekingel a Dios a kmo, sel bo el bechiil a redil e a sechal a mo bdelul. (1 Korinth 11:3) Me ngar er a uchelel a chebechiil, e nglocha mo meringel er a sechal el omekrael er a bechil. Me a bechil a dirrek el locha mo meringel er ngii el olengesenges a ulekrael er a bechil el diak el demal me a delal. Ngdirrek a rechad sel lekot el mo bechiil, e nglocha mo er ngii a betok el chetituokel er a delongelir tir me a rechad er a blirir a rebecherir, e tiang a dirrek el ta er a ringel er a chelsel a chebechiil.

⁵ Me a lmuut el tang, a chad me a bechil a mo medengei el kmo te mocha oungalek. Me alta e ngkmal dmeu a rengrir, engdi te dirrek el kora bekikl. Te locha melatk el kmo ngdi mo ungilbesul a kldiull er a bechil, e dirrek el locha di melatk el kirel a klisichel a bedengel a ngelekir. Te dirrek el ungil el medengei el kmo, nglmuut el mo klou a omengitel a udoud er chelechang. E sel lemechell a ngalek, e ngmocha kirir el terung el melodech a bebil el blekeradel er a klengar er tir. Me a chedil a mocha kirel el mengoit er a klou el temel el omekerreu er a ngelekir. Me ngdikea kmal temir el terung ngii me a bechil el dmak el ua ngar er a mong. Me a chedam a lmuut el medechel a ngerechelel. E le ngmocha kirel el osiik aike el lousbech a bechil me a ngelekel el dirrek.

6-8. Nglocha mo uangera uldesuir a rubekel sel bo lodengei el kmo ngdiak el sebechir el mo oungalek?

⁶ A rebebil er a rubekel a kuk ngar er ngii a ta er a ringel el lechelebangel er ngii. Te kmal sorir el oungalek engdi ngdiak el sebechir. Me a lsekum a bechiil el redil a diak el sebechel el mo dioll e nglocha dirrek el kmal mo mekngit a rengul me a uldesuel. (Osisechakl 13:12) Ngar er a taem er a Biblia, e ngkmal mle klou a ultutelel el kirel a redil el mo bechiil e mo oungalek. Tiaikid a uchul me a Rahel el bechil a Jakob a kmal mlo chuarm a uldesuel er sera bo lodengei el kmo ngdiak el sebechel el mo oungalek el ua chudelel. (Genesis 30:1, 2) E ngar er a chelsel a bebil el beluu er chelechang e a rebetok a oumerang el kmo ngkmal klou a ultutelel el lebo er ngii a rebetok el ngeleked. Me a rechad a blechoel el oker er a remisionari er kid el kiei er aike el belurir er a uchul me ngdiak bo loungalek. Me alta tirka el missionari er kid a melasem el mesaod er a uchul me ngdiak loungalek, engdi a rebebil er tirka el chad er a beluu  a melekoi er tir el kmo, “Becherei e aki mo meluluuch el kiriu!”

⁷ Ka molatk er tiang. A ta el odos er kid el ngar er a England a kmal mle soal mo oungalek, engdi sera bo lodengei el kmo ngdiak el sebechel el mo oungalek er chelecha el taem, e ngkmal mlo mekngit a rengul. Me ngkilengei ngii me a bechil el mo rodelii a ngalek. Engdi a lebebil er a taem engdi mekngit a rengul, me ngdmu el kmo, “Ak ungil medengei el kmo, a omerodel a kuk ngodech er sel kuchellii a ngelekek.”

⁸ A Biblia a kmo, a “redil a mo suobel a lomechell er a re ngalek.” (1 Timothy 2:15) Engdi tiang a diak lebelkul a kmo, ngmo kiei el mo cherechar e le ngii el oungalek. Me ngera belkul tia el bades? A chedil a kmal mechesang el ngar er a blai e omekerreu er a rengelekel. Me tiang a mo uchul me ngdiak bo el mechesang el kirel a tekoi el ua telulechoid, me a lechub e bo longesechusem er ngii er a diak a ultutelel er ngii el tekoi. (1 Timothy 5:13) Me nguaisei, engdi ngdirk mo er ngii a mondai er a chelsel a chebechiielel me a dirrek el telungalek er ngii.

9. Ngera bebil er a ringel el dirrek el sebechir a rubekel el mo chelebangel?

⁹ A ta er a kmal klou el ringel el rebebil el bechiil a mo chuarm er ngii a sel lemad a rebecherir. Alta e ngkmal dimlak lomdasu el kmo tia el tekoi a bo lechelebangel er ngii, engdi a rebetok a mla chormii tia el meringel el tekoi. Me a telungalek el Kristiano a oumerang er a telbiil el kirel a okiis, e tiang a kmal mengelaod er tir. (Johanes 5:28, 29) Ngar er a Tekingel, e a Demad el Jehovah a mla remuul a betok el telbiil el mo mengelaod er kid er a chelsel chouaika el meringel el taem. Me chelechang e bo domes a bebil el rolel e a remesiungel a Jehovah a mlo mechelaod, me sel rolel e ngmlo sebechel el ngosuterir.

10. Ngmilekera e mo mechelaod a rengul a Hana? (Momes er a siasing er a uchelel a suobel.)

¹⁰ Ka me dolatk er a tekoi el dilubech el mo er a Hana el bechil a Elkana. Ngkmal mle soal el mo oungalek engdi ngdimlak el sebechel. Me nguaisei, engdi ngike el ta er a bechil a Elkana el Penina a mle betok a rengelekel. (Monguiu er a 1 Samuel 1:4-7.) E ngikang a rirellii a klengar er a Hana el kmal mlo meringel e le ngmle “bek el rak” el di lomekrur er a Hana e le ngii el dimlak a ngelekel. E tiang a kmal millemall er a rengul a Hana. Me ngmilekerang e mo mechelaod a rengul? Ngmilluluuch el mo er a Jehovah. Ngmlo er a templo er a Jehovah me ngmeluluuch el kemanget el taem. Ngullengit er a Jehovah me lebsa ngelekel el sechal, e kmal uluumerang el kmo a Jehovah a mo ngosuir. Me sera bo lemerek el meluluuch e ngmlo mechelaod a rengul e “dikea le mekngit a rengul.” (1 Samuel 1:12, 17, 18) Ngmle ungil medengei el kmo a lsekum a Jehovah a diak bo lebsa ngelekel, e ngulterekokl el mo chemolodii el okiu a kuk ta er a rolel.

11. Ngmekerang a nglunguuch e chemolodid?

¹¹ Me kid el diak demecherrungel, e dirrek el kiei er a chelsel tia el mekngit el beluulechad er a Satan a uchul, me kede melemolem el chuarm er a ringel. (1 Johanes 5:19) Engdi  ngar er ngii a ngeso el sebeched el nguu. Ngsebeched el meluluuch el mo er a Jehovah el ngii a “Dios er a bek el ongelaod.” Tiaikid a lurruul er ngii a Hana. Nguluuchais er a Jehovah el kirel aike el meringel er a uldesuel, e ullengit er Ngii me lengesuir. Me ngdi osisiu, a lsekum kede mo chuarm e ngkmal kired el ouchais a mondai er kid el mo er a Jehovah. Ngdirrek el kmal kired el olengit er ngii me lengesukid, e subedii er aike el dmolech el uldesued.​—Filipi 4:6, 7.

12. Ngera ngilsuir a Hana el mo outekangel a ringel el lechilebangel?

¹² Ngdirrek el mo mekngit a rengud a lsekum ngdiak a rengeleked me a lechub e ngmad a betik er a rengud. Engdi ngdirk sebeched el metik a ongelaod. Ka molatk er a Hana el kiliei er a taem er a Jesus. Ngdi mle euid el rak el lebechiil e ngmad a bechil, e locha dimlak a rengelekel. Engdi ngera ngilsuir? Ng “kmal dimlak bo le cheroid er a Templo.” Ngmo lmuut er sel taem el bocha el 84 a rekil, me ngdi millemolem el mo er a templo el mo meluluuch e mengull er a Jehovah. (Lukas 2:37) Tia el blekeradel a milengelaod er ngii e ngilsuir me ngmlo sebechel el outekangel a ringel el lechilebangel.

13. Te mekerang a remera el sechelid e mengelaod er kid a lsekum a rechedad a tomall a rengud?

¹³ Ngdirrek el sebeched el metik a ongelaod el okiu a remera el sechelid el tirke el ngar er a chelsel a ongdibel. (Osisechakl 18:24) A Paula a di mle eim a rekil, e a delal a mo diak losiou er a Jehovah. Me ngkmal mlo meringel er ngii, e dirrek el kmal mlo mekngit a rengul. Engdi ngmla er ngii a ta el odos el pioneer el Ann el millisiich er ngii, e ulechotii a klemeriarreng er ngii el bedulngii. Me a Paula a kmo: “Alta e a Ann a diak el chedak, engdi ngkmal milengelaod er ngak, e ngilsukak me ak millemolem el mesiou er a Jehovah.” Me chelechang e a delal a mla lmuut el mei er a ongdibel, e tiang a kmal lodeuir a rengul a Paula. Me a Ann a dirrek el kmal dmeu a rengul, e le ngmlo sebechel ngosuir a Paula me ngmelemolem el mesiou er a Jehovah.

14. Ngmo uchul a ngera el klungioled sel dongelaod er a rebebil?

¹⁴ Me sel demechesang el meruul a ungil el mo er a rebebil, e kede blechoel el obes a mondai  er kid. El ua tiang, a rebetok el odos er kid el bechiil me a lechub e te mesobil a ungil medengei el kmo, sel lomerk er a ungil chais el kirel a Rengedel a Dios el mo er a rechad, e te oureor el obengkel a Jehovah, e dirrek el meruul a soal. E tiang a rulleterir me ngkmal dmeu a rengrir. Me ngmera el tekoi, kede rokui el sebeched el ochotii a klemeriarreng er kid el mo er a rechad el okiu sel domerk er a ungil chais el mo er tir. Ngdirrek el kmal okesengii a deleuill er kid me a rudam me a rudos er kid sel doruul a ungil el tekoi el mo er tir. (Filipi 2:4) Tiaikid el blekeradel a lurruul er ngii a Paulus, el ulemekerreu er a rebebil “el ua tal chedil a lomekeroul er a re ngelekel.” Ngdirrek el milengelaod e melisiich er a rudam er ngii “el ua demal a ngalek a lomekerreu er a ngelekel.”​—Monguiu er a 1 Thesalonika 2:7, 11, 12.

15. Ngtecha ngerechelel el mo olisechakl er a remekekerei el kirel a Jehovah?

¹⁵ Ngmekerang a dongelaod er a telungalek el ngar er a chelsel a ongdibel? A lebebil er a taem, e tirke el beches el mle soiseb er a ongdibel a locha mo olengit a ngeso er kid el olisechakl er a rengelekir el kirel a Jehovah, me a lechub e kede mo mesuub a Biblia el obengterir a remekekerei el ngelekir. Engdi a Biblia a meketeklii el kmo, a Jehovah a mla mesterir a ruungalek a ngerechelir el mo olisechakl e omekrael er a rengelekir. (Osisechakl 23:22; Efesus 6:1-4) Me alta e ngmo er ngii a techelled el olengeseu, engdi ngkmal klou a ultutelel el kirir a ruungalek el mo olisechakl er a rengelekir. Ngkmal kirir el mengedecheduch er a rengelekir er a bek el taem.

16. Ngera el tekoi a kired el melatk er ngii sel dolengeseu er a remekekerei el ngalek?

¹⁶ Me a lsekum a ruungalek a olengit er kid el mo mesuub a Biblia lobengterir a rengelekir, e lak dobes el kmo ngdiak a llemelted el mengedereder er a rengalek el ua redemerir me a rederrir. A lebebil er a taem e kede mo mesuub lobengterir a rengalek el redemerir me a rederrir a diak lengar er a klemerang. Me sel dosuub lobengterir, e ngungil el dosuub el ngar er a blirir er sel taem el lengar er a blai a redemerir me a rederrir, me a lechub e ngar er ngii a ta er a klou el chad el Sioning lobengked, me a lechub e kede mesuub er a basio el sebechir a rechad el mesekid. Seikid e ngdiak bo lengodech a uldesuir a rechad el bedulkid. E a cherengel a taem, e nglocha mo sebechir a rechad er a blirir el mo mesuub el kirel a Jehovah lobengterir a rengelekir.

17. Te mekerang a rengalek e mo sebechir el mengelaod er a rechad er a blirir?

¹⁷ A remekekerei el mla mesuub el mo betik a rengrir er a Jehovah a kmal sebechir el mengelaod, e melisiich er a rechad er a blirir. El mekerang? Ngoeak sel lolecholt a omengull el mo er a redemerir me a rederrir, e leblak a rengrir el olengeseu el meruul a urerir er a blai me a delengcheklir. Ngdirrek a rengalek el melemolem el blak a rengrir el mo er a Jehovah a mo uchul a omelisiich el mo er a rokui el chedal a telungalek er tir. A uchei er a lemei a Ieleb, e a Lamek el milengull er a Jehovah a dilu tekoi el kirel a ngelekel er a Noah el kmo: “Ngikal mechellang er tial beluu el mildebeakl er a RUBAK mo odoseb a rengud er a rengelel a bek el urered.” Me tia el ulaoch a tilaut er a uriul er a Ieleb el ngii a mle taem el Jehovah a ulemekngeltengat er a chutem. (Genesis 5:29; 8:21) Me chelecha el taem, e a rengalek el melemolem el blak a rengrir el mo er a Jehovah a dirrek el sebechir el mengelaod er a rechedal a telungalek er tir. Ngkmal sebechir el ngosuterir a rokui el ngar er a telungalek er tir el mo outekangel a ringel er chelechang, me a dirrek el ngar medad el klebesei.

18. Ngera sebechel el ngosukid el mo outekangel a ngii di el ringel?

¹⁸ A rechedal a Jehovah er chelechang a metik a ongelaod el okiu a nglunguuch, me sel lolatk aike el kerebai er a rebebil el ngar er a Biblia, me a dirrek el kmes el deleuill er tir me a rudam me a rudos er tir. (Monguiu er a Psalm 145:18, 19.) Me kede ungil el medengei el kmo a Jehovah a di blechoel kltmokl el mo mengelaod er kid, e dirrek el kmal ulterekokl a rengul el mo ngosukid el outekangel a ngii di el ringel el bo dechelebangel!