1, 2. (a) A Elifas me a Bildad, te dilu el kmo ngerang el kirel a osengel a Dios el kirel a omesiunged? (b) E ngera ngdilu Jehovah el kirel a tekingir?

A IRECHAR, e a retedei el chad a mlo mengedecheduch er a blak a rengul el mesiungel a Dios el Job. E a ta er tir el Elifas el Temanait a uleker er a Job a ker el kmo: “A chad el mo lmuut er a kmal mellomes a rengul chad ng ngar ngii a ultutelel er a Dios? A cho moruul el melemalt ng mo klungiolel a Dios, ma lechub e a ungil blekerdelem ng telkib el ngosuir?” (Job 22:1-3) A Elifas a kmal ulemdasu el kmo ngmo onger el kmo ngdiak. E a ta er tirka el chad a Bildad el Suhait, a dirrek el dilu el kmo ngkmal diak el sebechel a chad el mo melemalt er osengel a Dios.​—Monguiu er a Job 25:4.

² A Elifas me a Bildad a millasem el meruul er a Job el mo omdasu el kmo, a blakerreng er ngii el mesiou er a Jehovah a kmal diak a belkul. Tirka el chad a mle sorir a Job a bo lomdasu el kmo, ngkmal diak a ultuteled er a Dios el di ua bangikoi me a chiekl me a chulad. (Job 4:19; 25:6) Me tirkang, te uleba klengariourreng er sera lolekoi aika el tekoi? (Job 22:29) Ngmera el tekoi, a Jehovah a imong el kedidai el Dios me kid a kmal mekekerei sel domekesiu er kid el mo er ngii. Me a lsekum kede ngar er a chetebtel a rois me a lechub  e kede ngar er a skoki el omes el bedul iou, e kede mera el mo medengei el kmo ngkmal diak a ultuteled. Engdi tiang, ngmera el uldesuel a Jehovah el kirel a blakerreng er kid el mesiou er ngii me a meringel el urered el kirel a Rengedel? Ngkmal diak! A Jehovah a dilu er a Elifas me a Bildad me ngike el ongedei el chad el Sofar el kmo te di millekoi a blulak. E sola e dilu er a Job el kmo, ngkmal dmeu a rengul er ngii me ngulemekedong er ngii el ‘mesiungel.’ (Job 42:7, 8) Me ngulterekokl a rengud el medengei el kmo, a Dios a omes er a chad el “ngar ngii a ultutelel.”

3. Ngera ngdilu Elihu el kirel a blakerreng er kid el mesiou er a Jehovah? E ngera mle belkul a tekingel?

³ A kekerei el chad el Elihu a ulerrenges a cheldechedecherir tirka el tedei el chad me a Job. Me sera bo lemerek, e a Elihu a uleker er a Job el kirel a Jehovah el kmo: “Ke ngosuir a Dios cho msal mo melemalt? Ng diak a ngeral lousbech er ngii er kau a Dios.” (Job 35:7) Me a tekingel a Elihu, ngua lullasem el mesaod el kmo a blakerreng er kid el mesiou er a Dios a diak a belkul? Ngdiak leuaisei. A Jehovah a dimlak losmechokl er a Elihu el ua lurruul el mo er tirke el tedei el chad. A Elihu a mle ngodech a omesodel er a tekoi, el belkul a tekingel a kmo a Jehovah a diak lousbech er kid el mo mengull er ngii, e le Ngii a cherrungel el Dios. Ngdiak el sebeched el rullii el lmuut el mo meteet, me a lechub e nglmuut el mo mesisiich. E le rokui el ungil el blekeradel me a duch, a dengilai er a Dios e ngii a omes er kid er sel rolel a dousbech aika el tekoi.

4. Ngmo uangera uldesuel a Jehovah sel doruul a ungil el mo er a rechad?

⁴ Sel dochotii a bltkil a rengud el mo er tirke el mengull er a Jehovah, e ngomes aika el omerelled el ua durruul el mo er Ngii. A Osisechakl 19:17 a kmo: “Ngikel bekokuii el mor a chebuul chad a rullii a Dios el mo belsel, ma Dios a mo omtechei a sulel el kirel omerellel.” Me a Jehovah a ungil el medengei aike el taem el molecholt er a klechubechub el mo er a rebebil. Me alta e ngii ngike el Ulemeob er tia el rokir el melidiul me a chutem, engdi ngkongei el omes aika el ungil lomerelled el ua durruul el mo er ngii me ngmo belsed, e mo omekngeltengat er kid er a betok el ungil el sengk. E a Ngelekel a Dios el Jesus a liluut el osichii tia el tekoi.​—Monguiu er a Lukas 14:13, 14.

5. Kede mo mesaod a ngera el ker?

⁵ A irechar e a Jehovah a milekedongii a profet el Isaia el mo omtechei, e dirrek el mo mesiou er ngii el ngar er a ileakl el rolel. (Isaia 6:8-10) Me a Isaia a di mle mereched el kongei e dilu el kmo: “Ng ngak a mong! Moderchak!” Me chelecha el taem, e a Jehovah a mesterir a reblak a rengrir el chad a techellir el mo teloi er tia el ureor. Me a rebetok el telael el mesiungel a Jehovah a olecholt er a osisiu el uldasu el ua Isaia. Te kongei a ngii di el ngerachel el moterekokl er tir er a omesiungir el mo er a Jehovah el oeak a kakerous el rolel, me a kakerous el beluu er a chelsel a meringel el blekeradel me a dirrek el omelsemai. Engdi a chad a locha mo melatk el kmo: ‘Ngak a dmeu a renguk er tia el techellek el kongei el mesiou er a Jehovah, engdi a tekoi el kuruul, ngar er ngii a ultutelel?’  A bo kcheroid, me ngkora di sebechel a urerel a Jehovah el meketmokl?’ Ngmla ta el bo momdasu el uaisei? Me bo dosaod a bebil el tekoi el dilubech el kirel a klengar er a reteru el mesiungel a Jehovah er a irechar el Debora me a Barak, el sebechel el ngosukid el mo medengei a nger er aika el ker.

6. Ngera me ngsebeched el mesang el kmo, a resoldau er a Jabin a mle beot er tir el mo mesisiich er a rechad er a Israel?

⁶ A Barak a mle soldau el chad er a Israel, e a Debora a mle profet el dil. Ngmle 20 el rak el king el Jabin el chad er a Kanaan a “kmal mle meringel a tekingel e meterekakl omerellel” el mo er a rechad er a Israel. A resoldau er ngii a kmal mle mekngit a omerellir el mo er a rechad er a Israel el kiliei er a beluu, me te kmal mle medakt me ngdimlak el sebechir el mo tuobed er a blirir. Ngika el Jabin a mla er ngii a 900 el mlai er a mekemad el rredomel er ngii a klekedall el scythe. Engdi a rechad er a Israel a dimlak a ungil klekedellir er a mekemad, me a lechub e ngklekedall el ousbech el mo omekerreu er tir.​—Mengeteklel 4:1-3, 13; 5:6-8. * (Momes er a footnote.)

7, 8. (a) Ngera mle kot el tekoi el ledilu Jehovah el mo er a Barak? (b) Te milekerang a rechad er a Israel e mo kats er a Jabin me a resoldau er ngii? (Momes er a siasing er a uchelel a suobel.)

⁷ Me sel domekesiu er a resoldau er a Israel el mo er a resoldau er a Jabin, e a rechad er a Israel a ua lemechitechut. Engdi Jehovah a uluusbech er a profet el Debora el dmu er a Barak el kmo: “Bong e mchetikikterir a re soldau er kau el mor a Rois Tabor. Mngititerir a re 10,000 el soldau er a klebliil er a Naftali ma Sebulun. Ak mo nguu el mei a Sisera, el mengeteklel a cheldebechel el soldau er a Jabin, me ng mo oumekemad er kemiu er Omoachel Kison. Ng mo olab a kuruma ma re soldau er ngii, e ngdi krullau el mo mesisiich er ngii!”​—Mengeteklel 4:4-7.

⁸ Me a okedong a mlo er a 10,000 el sechal el mo kldibel er a Rois Tabor. E sola, e a Barak me a resoldau er ngii a mirrael el mo oumekemad er a recheraro el ngar er a basio el ngklel a Taanak. (Monguiu er a Mengeteklel 4:14-16.) Me a Jehovah, ngilsuterir a rechad er a Israel? Ochoi, ngmlo er ngii a kmal klou el chull me ngdilemedemekii tia el cheliliik el beluu el di mlo ngelengelotel. Me tiang a mlo uchul a techellir a rechad er a Israel el oltoir er a resoldau er a Sisera el 15 el mael (24 kilometer), el mo er a basio el ngklel a Haroseth. E ngar tia el omerael, e a mlil a Sisera a ngilelt er a dechudech me ngmlo diak lorael. Me ngmiltengel e chemiis el mo er a Saananim, el locha beluu er a Kedes. Ngmlong el mo mertii er a chelsel a tento er a redil el ngklel a Jael. Ngkmal mle mesaul a bedengel a Sisera me ngmlo mechiuaiu. E sera leiit a medal e a Jael a milekodir. (Mengeteklel 4:17-21) Me a Jehovah a rirelleterir a rechad er a Israel el mo kats er a mekemad! * (Momes er a footnote.)

9. Ngera kede suubii er a Mengeteklel 5:20, 21 el kirel a mekemad er a delongelir a rechedal a Dios me a Sisera?

⁹ Kede suub a lmuut el betok el kirel tia el tekoi el dilubech el ngar a 4 el bliongel er a Mengeteklel el okiu sel donguiu er a ongingil el bliongel. Ngar er a Mengeteklel 5:20, 21 e ngmesaod el kmo: “Ma btuch a mlar a eanged e oumekemad; sel lorael er a eanged el kuk mor a bitang e tuluumekemad el omtok er a Sisera. A  eeleb er Omoachel Kison a milecheklterir.” Me tiang ngbelkul a kmo, a rechanghel a ullengeseu er a rechad er a Israel er sel taem el loumekemad, me a lechub e ngkuk di mlo er ngii a chull el bad? A Biblia a diak lebeketeklii tiang, engdi ngungil a dolatk el kmo a Jehovah a ulsebelterir a rechedal er a lotengelii a klou el chull er sel basio er sel taem me bo lemeringel er aike el 900 el mlai er a mekemad el chemiis. E le ngar er a Mengeteklel 4:14, 15, e kede menguiu el edei el taem el kmo a Jehovah a ngiluu a chetengakl el kirel a klisichir a rechad er a Israel. Me ngdiak a ta er tirke el 10,000 el soldau er a Israel el nguu a chetengakl el kirel tia el klisichir.

10, 11. Ngerang a Meros? E ngera me ngmildebeakl?

¹⁰ Me chelechang e bo dosaod er a ta el ileakl el tekoi. A uriul er a bo lekats a rechad er a Israel, e a Debora me a Barak a milengitakl el oldanges er a Jehovah el kmo: “‘Mdebeklii a Meros,’ ng dilu anghel er a RUBAK, ‘A dellebeakl, choi a dellebeakl le bor tirkel kiei er isei. Ng dimlak le mei el olengeseu er a RUBAK, el mei el ua soldau el oumekemad el kirel.’”​—Mengeteklel 5:23.

¹¹ Ngerang a Meros? Ngdiak dodengei el kmo ngerang. Engdi sel dellebeakl el mlo er a Meros a locha kmal mle bedochel a uchul, me ngdiak debetik er ngii e le ngdi mlo dibus. A Meros a locha sel beluu el rechad er ngii a dimlak lekengei el mo oumekemad el obengkel a Barak. Sera letobed tirke 10,000 el kilengei el mo oumekemad er a rechad er a Kanaan, e a rechad er a Meros a locha rirenges a chisel tia el ongit. Me a lechub a Meros a locha sel beluu el Sisera a rirurt er a chelsel el melasem el chemiis er a Barak. Me a rechad er a Meros a locha mle sebechir el mdechemii a Sisera engdi ngdimlak loruul uaisei. Ka di molatk er tir el omes er ngika el kdekudel el chad er a mekemad el remurt er a rael er tia el beluu el lomart er ngii! Me ngmle sebechir el rullii a ta el tekoi el olengeseu el oltaut er a moktek er a Jehovah. Oleko te mirruul uaisei, e a Jehovah a mo omekngeltengat er tir. Engdi sera lebo er ngii a techellir el rullii a ta el tekoi el mo er a Jehovah, e ngdimlak lokerang. Me ngsebeched el mesang el kmo, a rechad er a Meros a kmal mle ngodech a uldesuir er a Jael el ngii a mle bekeu el mekodir a Sisera.​—Mengeteklel 5:24-27.

12. Ngera el kakerous el uldasu a sebeched el mesang er a Mengeteklel 5:9, 10? E tiang ngera ngrullii el kired?

¹² Ngar er a Mengeteklel 5:9, 10, e kede mesang a klekakerous er a uldesuir tirke el 10, 000 el kilengei el mo oumekemad me tirke el dimlak lekengei el mong. A Debora me a Barak a chilat er a “re mengeteklel a mekemad er a Israel” el mle “dmeu a rengrir el di tir el mong.” Ngkmal mle kakerous a uldesuir el dimlak el ua uldesuir tirke el “ngar a becheleleu el donkey” el ulemdasu el kmo, te kmal ngarbab el chad me ngdiak el kirir el meruul a chouaika el ngariou el ureor. A Bades a mesaod er tirka el chad el “dengchokl er a kingall” me tirke el “di merael” el kmo ngungilbesul a klengar er tir. Me te mle kakerous tir me tirke el kilengei el mo oumekemad el obengkel a Barak el ngar er a bukl el beluu er a Tabor, me a ngelengelotel el dellas er a beluu er a Kison. Me a uleklatk a mlo er tirke el mle sorir a beot el klengar el kmo, ngkmal mle kirir el omtab a tekoi! Ngmle kirir el mo kerekikl el melatk aike el techall er a ureor el kirel a urerel a Jehovah el blo lechib er ngii. Me chelecha el taem, e ngdirrek el kmal kired el lmuut el mo ungil merriter er a  uldesued el kirel a omesiunged el mo er a Dios.

13. Ngera klekakerous er a uldesuir a rechad er a kebliil er a Ruben me a Dan me a Aser el mo er tirke el chad er a Sebulun me a Naftali?

¹³ Tirke el 10,000 el kilengei el mo oumekemad a mlo er ngii a techellir el mesa sel rolel er a Jehovah a lochotii el kmo, ngii ngike el Ngarbab el Merreder er a eanged me a chutem. Me ngmlo sebechir el ouchais el kirel aike el lulemes sel “ouchais a chisel a RUBAK.” (Mengeteklel 5:11) Me te kmal ngodech er a rechad er a kebliil er a Ruben, me a Dan, me a Aser el bai di mle mechesang el kirel a kerruul er tir el ua delebechel el chermir me a dillir me a olekerodel er tir, me ngdimlak a ngera el lerellii el kirel a urerel a Jehovah. (Mengeteklel 5:15-17) Engdi ngdiak el rokui el kebliil a mle uaisei a omerellir, e le kebliil er a Sebulun me a Naftali a “mlo ocherur a kodall el ngar a mekemad” el olengeseu er a Debora me a Barak. (Mengeteklel 5:18) Me kede nguu a klubeled er a kakerous el uldesuir a rechad el kirel a omesiungir el mo er a Jehovah.

14. Kede mekerang e ochotii el kmo, kede olengeseu el melisiich er a omengederederel a Jehovah er chelechang?

¹⁴ Chelecha el taem, e ngdiak dolengeseu el melisiich er a omengederederel a Jehovah el oeak a odechelakl. Ngbai blak a rengud e oba blekeu el omerk er a klumech er a ungil chais. Me a urerel a Jehovah a dirk ousbech er a relmuut el betok el chad er a ureor. Me a rebetok el miliol el rudam me a rudos, me a remekekerei el chad, a kongei el mo teloi a kakerous el rolel a mui el taem el omesiou. El ua tiang, a rebetok a mesiou el pioneer, me a ruureor er a Bethel, me a rumekedechor a Blil a Ongdibel, me a reteloi a ureor el ngar er aike el meklou el ongdibel er kid. A rebebil er a remechuodel a chedal a Hospital Liaison Committee me a dirrek el ngar er ngii a ruungerachel a meklou el ongdibel. Me ngulterekokl a rengud el kmo, a Jehovah a kmal dmeu a rengul er kid el kongei el mesiou er ngii el ngar er a bek el rolel, me ngkmal diak lobes a blakerreng er kid.​—Hebru 6:10.

15. Ngmekerang e mo sebeched el diak doridii sel klemeriarreng er kid el kirel a urerel a Jehovah el doruul er ngii?

 ¹⁵ Ngkired el mo ungil merriter er a uldesued el kirel a omesiou el dekilengei el mo meruul er ngii. Ngsebeched el melatk el kmo: ‘Ngak ngdi diak a ngera el kuruul er ngii el kirel a omesiungek? Ak di kerekikl el osiik a klalo el kuk ngaruchei er a omesiungek el mo er a Jehovah? Me a lechub, ak oukerebai er a klaumerang me a blekengel a Barak, me a Debora, me a Jael, me tirke el 10,000 el soldau, el kongei el ousbech aike el rokui el ngar er ngii er ngak el mesiou er a Jehovah? Ak melatk el mo melukl el mo er a ta er a beluu me bo lsebechek el korker a lmuut el betok el udoud me bo lungil a klengar er ngak? A leuaisei, e ak meluluuch el mo er a Jehovah el kirel tia el omelukl er ngak me sel telemellel er a telungalek er ngak me a ongdibel er ngak?’ * (Momes er a footnote.)

16. Alta Jehovah a diak a ngera el lengesonges er ngii, engdi ngera sebeched el msang?

¹⁶ A Jehovah a meskid a kmal ileakl el techall el kongei er kid el mo olengeseu el melisiich er a omengederederel. Ngulemuchel er sel taem er a Adam me a Eva, e a Diabelong a dirk soal el mengesuseu er a rechad el mo omtok er a Jehovah. Engdi sel dolemolem el olengeseu el melisiich er a omengederederel a Jehovah, e kede ochotii er a Satan el kmo kede kongei el obengkel a Jehovah. Me a klaumerang me a blakerreng er kid a uchul, me kede kongei el mo mesiou er a Jehovah, e tiang a kot el odeuir a rengul. (Osisechakl 23:15, 16) A Dios er kid a mo sebechel el ousbech er a blakerreng er kid el olengeseu er ngii, me a blekongesenges er kid el mo onger er a mekngit el uldesuel a Satan. (Osisechakl 27:11) Me a blekongesenges er kid a tekoi el sebeched el nguu el msang a Jehovah el ngii a kmal mekreos er a osengel, e dirrek el mo odeuir a rengul.

17. Ngera ngouchais er kid a Mengeteklel 5:31 el kirel aike el mo meketmokl er a ngar er medad el taem?

¹⁷ Ngdi kmedung e a rokui el chad el ngar er tia el chutem a mo kongei er a di ta el omengederederel a Jehovah. Me ngkmal dmeu a rengud el omes el bedul uchei er seikid el taem! Kede di ua uldesuel a Debora me a Barak , el milengitakl el kmo: “Misei e RUBAK, e le mad a rokui el cherrouem, e ngdi tirkel betik a rengrir er kau bo le diich el ua ngesechel a sils!” (Mengeteklel 5:31) Tiang a mo meketmokl er sel taem el Jehovah a mo okngemedii tia el mekngit el beluulechad er a Satan. Me sel lomuchel a mekemad er a Armakedon, e a Jehovah a diak bo lousbech er a ngii di el chad el mo olekngemed er a recherraro. Kede bai di mo ‘obechobech e mengiil’ me bo desa klisiich el omeskid a Jehovah. (2 Kronika 20:17) Chelecha el taem, e kede oba ileakl el techall el mo olengeseu er a omengederederel a Jehovah el oba blekeu me a blakerreng.

18. Ngmekerang a blakerreng er kau er a omesiungem e mo uchul a klungiolir a rebebil?

¹⁸ A Debora me a Barak a ulemuchel el mengitakl er a chelitakl er a odanges el oldanges er a Jehovah el diak el rechad. Te milengitakl el kmo: “Odanges le bor a RUBAK!  . . . A re chad a kmal mle ungil a rengrir e di mle tir el mong!” (Mengeteklel 5:1, 2) Me ngdi osisiu, sel dosiou er a Jehovah el ngar er a ngii di el rolel, e a rebebil me te dirrek el mo oldanges er a Jehovah!