1. Ngera el turrekong er a klereng a soad el meruul?

 KID el mera el Kristiano a kmal betik a rengud er a Jehovah. Ngsoad a omesiunged el mo er ngii a bo lekot el ungil. Engdi a lsekum e ngsoad el meruul a rokui el tekoi el kirel a Jehovah e ngkired el meruul a turrekong er kid er a klereng, el ua domekeroul a blekerdelir a Rekristiano, mesuub el mo er ngii a duch er kid, e dosiik a rolel e kede mesiou er a rebebil. *

2. Ngera uchul me ngkired el meruul a turrekong er a klereng e mo blak a rengud el oltaut?

² Ngera uchul me kede semeriar el olengeriakl er a tekoi er a klereng? E le ngsoad el odeuir a rengul a betik er a rengud el Demad. A Jehovah a dmeu a rengul sel lesekid el ousbech a duch er kid el mo ungil mesiou er ngii. A lmuut el tang, ngsoad el olengeriakl me bo el sebeched el mo ungil ngosuterir a rudam me a rudos er kid. (1 Th. 4:9, 10) Malta kede mla ngar er a klemerang el kemanget el taem engdi kid el rokui a sebeched el olengeriakl er a tekoi er a klereng. Me bo desa rolel e ngsebeched el meruul er tiang.

3. A doltirakl er a 1 Timothy 4:12-16, e a apostol Paulus ngmillisiich er a Timothy el mo mekerang?

³ A apostol Paulus er a llechesii a kot el babilengel el mora Timothy e ngika el kekerei el chad a mla mesiou el ta er a remechuodel el telkib el taem. Me nguaisei engdi a Paulus a millisiich er ngii el mo melemolem el olengeriakl er a tekoi er a klereng. (Monguiu er a 1 Timothy 4:12-16, BT. *) Me sel molatk  aika el tekingel a Paulus, e ke mo mtebengii el kmo ngmle soal a Timothy a lolengeriakl el oeak a eru el rolel: sel lomekeroul a blekerdelir a Rekristiano el ua bltikerreng, blakerreng, me a klikiid el klechad e dirrek el lluut el mo meduch el menguiu, mengelechel, e olisechakl. Kede mo mesaod er a kerebil a Timothy me bo desa rolel e a doruul a turrekong e ngsebechel ngosukid el mo olengeriakl er a tekoi er a klereng. Kede dirrek el mo mesaod a bebil rolel e ngsebeched el menglou er a omesiunged.

4. A doltirakl er a Filipi 2:19-22, e ngera rirellii a Timothy el mo ungil mesiungel a Jehovah?

⁴ Ngera rirellii a Timothy el mo ungil mesiungel a Jehovah? Aike el kmal ungil blekerdelel el Kristiano. (Monguiu er a Filipi 2:19-22, BT. *) Ngsebeched el mesa er a tekingel a Paulus el kmo a Timothy a mle ngariou a rengul, blak a rengul, meduch loureor, e sebeched el ultuil er ngii. Nguleba bltikerreng e kmal ulemekerreu er a rudam me a rudos. Sei a uchul me a Paulus a kmal mle betik a rengul er ngii e dimlak lomai er a rengul omsa meringel el ngerachel. (1 Ko. 4:17) Me ngdi osisiu, a Jehovah a mo betik a rengul er kid me kid a mo usbechall el mora ongdibel sel domekeroul a blekeradel el odeuir a rengul.​—Psa. 25:9; 138:6.

5. (a) Ke mekera medengei el kmo ngera el blekeradel a sebechem el omekeroul er ngii? (b) Ngmekera ngike el kekerei el odos e oureor er a turrekong er ngii el lmuut el mo chubechubechad el ua lolecholt er ngii a siasing?

⁵ Mngiltii a turrekong el soam. Moluluuch e molatk el kmo ngera el blekeradel a soam el mo ungil olecholt er ngii. Mngiltii a di ta el blekeradel. El ua tiang, ngsoam el lmuut el mo chubechubechad me a lechub e ngmo er ngii a mesisiich el urungulem el olengeseu er a rudam me a rudos? Ngsoam el mo chad er a budech me a lechub e ke mo meduch el ousubes? Nglocha mo ngosukau a omolengit er a kmeed el sechelim me louchais er kau a rolel omolengeriakl.​—Osi. 27:6.

6. Ngmekera omoureor el mo otutii a turrekong er kau el kirel a blekeradel el soam lomekeroul er ngii?

⁶ Moureor el mo otutii a turrekong er kau. Ngmekera omoruul er tiang? A ta er a rolel oeak sel mosuub el kirel tia el blekeradel. El ua tiang, ngsoam el mo beot er kau a ousubes er a rebebil. Me ke omuchel loeak a omonguiu  el kirel e molebedebek er tirke el ngar er a Biblia el mle beot er tir a ousubes er a rebebil me tirke el dimlak. Molatk er a kerebil a Jesus. Ngkilengei el ousubes er a rebebil. (Lk. 7:47, 48) Ngulemes el engelakl a chelitecheterir e ulemes aike el sebechir el kutmokl. Engdi a Refarisi a ‘miltengel osengir er a re bebil er a re chad.’ (Lk. 18:9) Uriul er a omolebedebek aika el kerebai, e di lekau el oker: ‘Ngera el blekerdelel a chad a kumes?’ A lsekum e ngmeringel er kau a ousubes, e molasem el lmuches a ungil blekerdelel ngii el chad el sebechem el mdasu. E di lekau el oker: ‘Ngua ngera osengel a Jesus el kirel ngika el chad? Ngmo ousubes er ngii?’ A chouaitia el rolel a omesuub a sebechel ngosukau el meklemeltii a uldesuem. A kot, e nglocha kired el meringel loureor el mo ousubes er a chad el tilemellii a rengud. Engdi a dolemolem el oureor el kirel, e a cherengel a taem e ngmo beot er kid a ousubes er a chad.

7. A doltirakl er a Osisechakl 22:29, e ngoeak a ngera el rolel e a Jehovah ousbech er a remeduch el chad er a ureor er chelecha el taem?

⁷ A ta er a turrekong el sebechem el rullii a mesuub el mo er ngii a duch er kau. Molatk er a ildisir a rechad el ousbech el omekedechor a blai er a Bethel, Assembly Hall, me a Blil a Ongdibel. A rebetok er tir a mlo er ngii a duch er tir er a loureor lobengterir a remeduch el chad er a ureor. Ngua lolecholt er ngii a siasing, a rudam me a rudos a mesuub a rolel a ureor me bo el sebechir el maintain a Assembly Hall me a Blil a Ongdibel. Ngoeak aikang me a kuk bebil rolel e a Jehovah el Dios el “King . . . el mo cherechar” me a Kristus Jesus el “King er a re king” a ousbech er tirka el meduch el chad er a ureor el mengetmokl a meklou el tekoi. (1 Ti. 1:17; 6:15; monguiu er a Osisechakl 22:29.) Ngsoad el meringel el oureor lousbech a duch er kid el mengebkall er a Jehovah el diak dongebkall er kid.​—Jn. 8:54, BT.

8. Ke mekera mo medengei el kmo ngera el tekoi a sebechem el mo meduch er ngii?

⁸ Mngiltii a turrekong el soam. Ngera sebechem el mo meduch er ngii? Molengit er a remechuodel me a circuit overseer me louchais er kau er a tekoi el sebechem el oureor er ngii. El ua tiang, a lsekum te kmo ngsebechem el lmuut el mo meduch el mengedecheduch me a lechub e kolisechakl, e moker el kmo ngera el ileakl el tekoi a kirem el oureor er ngii. E bo leblak a rengum el oureor el olengeriakl er tia el tekoi. Ngmekera omoruul er tiang?

9. Ngmekera omoureor el mo otutii a turrekong er kau el kirel a tekoi el soam el mo meduch er ngii?

⁹ Moureor el mo otutii a turrekong er kau. El ua tiang, ngsoam el olengeriakl er a rolel a omolisechakl. Ngsebechem el mesuub er a brochure el Mosuub el Mo Ungil Menguiu e Molisechakl. Sel lebo er ngii a part er kau er a miting er kid er a Subeled er a Miting e ngsebechem el olengit er a odam el mo orrenges er kau er a uchei e ouchais er kau aike el sebechem loureor er ngii. Bo lodengelkau a rechad el kmo ngar ngii a decham e blak a rengum e sebeched el ultuil er kau.​—Osi. 21:5; 2 Ko. 8:22.

10. Mosaod er a rolel e ngsebeched el melemolem el oureor el mo meduch er a tekoi.

¹⁰ Engdi ngkuk mekerang a lsoam el omekeroul er a duch el meringel er kau? Di molemolem el oureor er ngii! A odam el Garry a kmal mle meringel er ngii el menguiu. Ngdirk melatk er ngii el kmal mle merur er a lolasem el menguiu el klou a ngerel er a miting. Engdi ngdi millemolem el oureor er tiang. Chelechang e ngmelekoi el kmo, a training el ngiluu a mla ngosuir me ngsebechel loltobed a cheldecheduch  er a Blil a Ongdibel, circuit assembly, me a convention!

11. Ngera mo ngosukid el mo olab a betok el ngerachel el di ua Timothy?

¹¹ Me a Timothy ngkmal mlo meduch el oltobed a cheldecheduch me a lechub e ngolisechakl? A Biblia diak lolekoi. Engdi ngulterekokl a rengud el kmo ngmillemolem el olengeriakl e mlo ungil kutmokl a ngerechelel e le ngii el ultireklii a ulekrael er a Paulus. (2 Ti. 3:10) Me ngdi osisiu, a lsekum kede omekeroul a duch er kid e ngmo sebeched el ngmai a lmuut el betok el ngerachel.

12. Ngera el klungiaol a bla mngai er aike el loruul a rebebil el kirem?

¹² Kid el rokui a ngmai a klungioled er aike el loruul a rebebil. Sel dengar er a osbitar e kede oba omereng el saul sel be loldingel er kid a remechuodel el ngar er a Hospital Liaison Committees me a lechub a Patient Visitation Groups. Sel dechelebangel a meringel el blekeradel, e kede oba omereng el saul sel lorrenges er kid a ta er a remechuodel e lolisiich er kid. Sel dousbech a ngeso er a study er kid e ngdmeu a rengud sel lekengei el me obengked a ta er a meketeketang el pioneer e lomeskid a ngeso er a uldasu. Tirka el rokui el rudam me a rudos a kmal dmeu a rengrir el olengeseu er kid. Ngsebeched el mo oba chouaisei el deurreng a lsekum e kede kongei el mo mesiou er a rebebil. A Jesus a dilu el kmo: “Ng bai klou el deurreng a dorous er a dolai.” (Rel. 20:35) A lsekum ngsoam el menglou er a omesiungem el oeak aikang me a kuk bebil rolel, e ngera mo ngosukau el otutii a turrekong er kau?

13. Sel moruul er a turrekong er kau, e ngera kirem el melatk er ngii?

¹³ Moterekeklii a turrekong er kau. El ua tiang, ke locha omdasu el kmo, ‘Ngsoak el meruul a lmuut el betok el olengeseu er a ongdibel.’ Engdi ngsebechel mo meringel er kau el mo medengei el kmo ngmekera motutii tia el turrekong e oingerang e ke ultutii. Me mngiltii a ileakl el turrekong. Nglocha sebechem el luchesii me a rolel e ke mo otutii.

14. Ngera uchul me ngkired el kongei el melodech a bebil tekoi sel doruul a turrekong er kid?

¹⁴ Ngdirrek el kired el kongei el melodech a bebil tekoi sel doruul a turrekong er kid. Ngera uchul? E le ngdiak a klisiched er a tekoi el mo duubech er a klengar er kid. El ua tiang:  A apostol Paulus a ullengeseu el toketekii a beches el ongdibel er a mats er a Thesalonika. E ulterekokl el mla er ngii a turrekong er ngii el di kiei er sei e olengeseu er tirka el beches el Kristiano. Me nguaisei engdi a rumtok a ulerrimel er ngii el tuobed er a mats. (Rel. 17:1-5, 10) A lsekum e ngdi kiliei e ngmle sebechel mo uchul a telemellir a rudam er ngii. Me nguaisei engdi ngdimlak lemeterob lolengeseu er tir. Ngbai mirruul a tekoi el oltirakl er a blekeradel el mla er ngii. Uriul e ngulderechii a Timothy el mo omekerreu er a klereng er tirka el beches el mlo oumerang er a Thesalonika. (1 Th. 3:1-3) Tirka ulterekokl el kmal mle dmeu a rengrir e le Timothy a kilengei el mo mesiou er aike el basio el lousbech er ngii.

15. Ngmekera tekoi el diak a klisiched er ngii e ngar ngii a lerellii er a turrekong er kid? Mosaod.

¹⁵ Ngar ngii a desuubii er a Paulus er a lengar er a Thesalonika. Kede locha mla rullii a turrekong er kid engdi a blekeradel er a klengar er kid a rullii el mo meringel er kid a otutii. (Oli. 9:11) A leuaisei, e bo mkengei el mo ngiltii a kuk ta er a turrekong el sebechem el otutii. Tiakid a lurruul er ngii a Ted me a Hiedi. Ngmlo diak el ngar er a Bethel el secher a uchul. Engdi a bltkil a rengrir el mora Jehovah a rirelleterir el mo osiik a kuk bebil rolel el mo menglou er a omesiungir. A kot e te mlo pioneer. Cherengel a taem e te mlengilt el mo special pioneer, e a Ted a ble le train er ngii el mo substitute circuit overseer. E ngii a mengodech a rekrir tirke el mesiou el circuit overseer. A Ted me a Hiedi a miltebengii el kmo ngdikea el sebechir el ngar tia el ileakl el omesiou. Me alta ngmlo mekngit a rengrir engdi te miltebengii el kmo ngsebechir el mesiou er a Jehovah er a kuk bebil rolel. A Ted a kmo, “Aki siluubii el kmo ngdiak el kiram el di ultaut a osengam er a di chimo el bedengel a omesiou.”

16. Ngera sebeched el suubii er a Galatia 6:4?

¹⁶ Ngdiak a klisiched er a rokui el tekoi el duubech er a klengar er kid. Me ngklou a ultutelel a lak domes er a kerresed loeak a techall er a omesiou el dolab me a lechub e domekesiu a techall el dolab er a techall el lolab a rebebil. Hiedi a kmo, “Ngmo diak el budech a uldesuem a lsekum ke omekesiu er a klengar er kau er a klengar er a rebebil.” (Monguiu er a Galatia 6:4.) Ngkmal klou a ultutelel a dosiik a rolel e ngsebeched el mo usbechall. *

17. Ngera sebechem el meruul el mo ngmai a techall er a omesiou?

¹⁷ Ngmo sebechem el meruul a betok el ngar er a omesiungem el mora Jehovah a lsekum ke omekbeot er a klengar er kau e diak momals  er kau. Mruul a mekekerei el turrekong el mo ngosukau el oltaut a meklou el turrekong. El ua tiang, a lsekum a ta er a klou el turrekong er kau a mo regular pioneer, e ngsebechem el blechoel auxiliary pioneer er a bek el buil? A lsekum a turrekong er kau a mo ministerial servant, e ngsebechem el mengoit a klou el taem el omerk er a klumech e oldingel er a resmecher me a remechudelang? Aike el omsuub er chelechang a sebechel mekengii a techall el kirel a omesiou er a ngar medam. Mrellii er a rengum el mora tkurrebab el sebechem el kutmokl a ngii di el ngerachel el mngai.​—Rom 12:11.

18. Ngera ke suubii er a kerebil a Beverley el ua lolecholt a siasing?

¹⁸ Ngdirk sebeched el meruul a turrekong er kid alta kede mla mo mechuodel. Ka molatk er a odos el Beverley el 75 a rekil. Ngmla er ngii a secherel el rirellii el mo meringel er ngii a merael. Engdi ngkmal mle soal el olengeseu er a omerusel a invitation el kirel a Chedaol Belsoil. Me ngriruul a ileakl el turrekong er ngii. Me sera lotaut aika el turrekong, e ngkmal mle dmeu a rengul. A blakerreng er ngii a millisiich er a rebebil el mo blak a rengrir el meruul er a omesiungir. A Jehovah mengreos er a urerir a remechudela el rudam me a rudos alta blekerdelel a klengar er tir a rullii el mo meringel er tir el mo meruul a betok.​—Psa. 71:17, 18.

19. Ngera bebil turrekong er kid er a klereng el sebeched el meruul?

¹⁹ Moruul a turrekong el sebechem el oltaut. Momekeroul a blekeradel el odeuir a rengul a Jehovah. Mosuub el mo er ngii a duch er kau el rullau el mo usbechall er a Dios me a cheldebechelel. Mosiik a rolel e ke mo mui el mesiou er a rudam me a rudos er kau. * Ngokiu a klengeltengat er a Jehovah e a “re bek el chad bo lomes er a ulekerulem er omesiou ma rolel cho moumerang” el di ua Timothy.​—1 Ti. 4:15.