A oberaod el telbiil a “sel detibir el mo meruul er a tekoi e a Dios a Sioning el kired.” Tia sebechel di ngar er a rolel a ngor me a lechub e ngomeluches.

A rebebil a omdasu el kmo ngmekngit a doruul er tiang e le Jesus a dilu el kmo: “Mdu el kmo ‘Choi’ ma lechub e mdu el kmo ‘Ng diak’, a ngodech el tekoi el bo molekoi a ngar ngikel Mekngit el mei.” (Mt. 5:33-37) Nguaisei el Jesus a mle medengei el kmo ngar er a cheungel a Llach er a Moses e ngmla er ngii a ileakl el telbiil el kirir el meruul, e a reblak a rengrir el mesiungel a Dios a mirruul aika el telbiil. (Gen. 14:22, 23; Exo. 22:10, 11) Ngdirrek el mle medengei el kmo a Jehovah a mirruul a oberaod el telbiil. (Heb. 6:13-17) Me a Jesus a dimlak ledu el kmo ngdiak el kired el meruul a oberaod el telbiil. Ngbai milengelechel el kmo lak moruul a telbiil el diak a belkul. Ngkired lomes a telbiled el oberaod el ngerachel. Ngkired el mo remuul aike el de dung.

Me ke mo mekerang a lsekum e ngmo kirem el meruul er a oberaod el telbiil? A kot e moterekeklii el kmo ngsebechem el rullii a telbilem. A lsekum e ngdiak lulterekokl a rengum e lak moruul er ngii. A Tekingel a Dios a mengelechel er kid el kmo: “Ng bai ungil a lak moruul a telbiil er a cho moruul a telbiil e lak moltaut.” (Oli. 5:5) A ongingil e momes a omellach er a Biblia el ngii a melutk er a telbiil el moruul er ngii e moureor loltirakl er a mla muksau el ukltkem. Ngngera bebil er aika el omellach er a Biblia?

A bebil oberaod el telbiil a diak lomtok er a soal a Dios. El ua tiang, a Resioning a remuul a telbilir sel bo lebechiil. Aika oberaod el telbiil. Ngar medal a Dios me a rechad e tirka el mo bechiil a tibir el kmo te mo kaubltikerreng e kakull e mo meruul el uaisei “er a klemengetel a klengar er [tir] el rokir.” (A rebebil lobekel a locha diak bo lolekoi aika el osisiu el tekoi engdi te dirk meruul er a telbilir er medal a Dios.) Te mungakl el bechiil el sechal me a bechiil el redil e kirir el bechiil er a klemengetel a klengar er tir el rokir. (Gen. 2:24; 1 Ko. 7:39) Tia ungil telbiil e oltirakl er a soal a Dios.

A bebil oberaod el telbiil omtok er a soal a Dios. A mera el Kristiano a diak bo loruul er a telbiil el mo ousbech a klekedall er a mekemad e mo oumekemad el kirel a beluu me a lechub e bo lotngeklii a klaumerang er ngii er a Dios. Tia omtok a llechul a Dios. A Rekristiano a ‘dikea el chedal . . . a beluulchad’ me ngkmal diak bo leteloi a mekemad.​—Jn. 15:19; Isa. 2:4; Jak. 1:27.

A bebil oberaod el telbiil a di mo oltirakl er a ukltkel a chad. A lebebil e nglocha mo kired el merriter er a telbiil loltirakl er a tekingel a Jesus el kmo, “bsa Emperor er a Rom a ikel kloklel, ma ikel kloklel a Dios mngai el msa Dios.”​—Lk. 20:25.

 Omko a Kristiano apply a citizenship me a lechub e ng passport e metik el kmo ngkirel rullii a telbilel el moba blakerreng el mora beluu. A lsekum a telbiil loruul er ngii el mora beluu a mo omtok a llechul a Dios e a mla muksau el ukltkel loeak a Biblia rullii me ngdiak bo loruul er tia el telbiil. Me nguaisei, a kabelment a locha mo ngmodech a tekoi el lluches er tia el telbiil me lak bo longesang er a ukltkel.

A meruul er a oberaod el telbiil el mla mengodech a tekoi el lluches er ngii el moba blakerreng el mora beluu a sebechel loltirakl er a omellach el ngar er a Rom 13:1 el ngii a melekoi el kmo: “A re bek el chad a kirir el oltirakl er a re merreder er a beluu.” Me a Kristiano locha mo melilt el kmo ngdiak a kngtil a loruul er a telbiil el ngii a oltirakl er a tekoi el Dios a soal a doruul er ngii.

A ukltkel a chad a dirrek el locha mo mengesang er ngii a lsekum e te olengit er ngii el mo meruul er a telbiil lousbech er a klalo me a lechub e ngrolel omchim. A rechad er a Rom me a Scyth er a ngar er a mong a mirruul a telbilir lousbech a saider, el belkul a kmo te uluusbech er a okesiul a dios er a mekemad el lolterekokl er a klaumerang er tir er a chad. A rechad er a Grik uldars chimorir el bedul a eanged sel loruul a telbiil. Tia mle olechotel a kmo te medengei el kmo ngngar ngii a lmuut el ngarbab el klisiich el ngii omes a dolekoi me a doruul e a rechad el rokui a kirir el mo onger er ngii.

Nguaisei el mesiungel a Jehovah diak bo loruul er a telbilel lousbech a ngii di el ngerang el chelsechusem er a klsuul el omengull. Engdi ke mo mekerang a lsekum a kort a mo dmu er kau el mo loia chimam er bebul a Biblia e tibir el kmo ke mo ouchais a klemerang? A leuaisei e ngsebechem el meruul er tiang e le Biblia ouchais el kirir a reblak a rengrir el chad er a ngar er a mong el tir a mirruul a ileakl el tekoi e riruul a telbilir. (Gen. 24:2, 3, 9; 47:29-31) Ngklou a ultutelel bo modengei el kmo sel mrellii tia el telbiil e ke tibir er medal a Dios el kmo ke mo ouchais a klemerang. Ngkirem el kltmokl el ouchais a klemerang el kirel a ngii di el ker loker.

Kid el lomes er a deleuill er kid me a Jehovah el kmal mekreos a uchul me ngkired el meluluuch e kerekikl el melatk er a uchei er a bo doruul a ngii di el oberaod el telbiil, e oterekeklii el kmo ngdiak bo el temellii a ukltked me a lechub e ngomellach er a Biblia. A lsekum e ke ngiltii el mo meruul er a oberaod el telbiil e ngkirem lotireklii.​—1 Pe. 2:12.