Ngar tia el blekeradel e a ongdibel a mo omes er sel kot el chebechiil el kmo ngmlo merek er sel taem el chad a liluut el mo bechiil e mo omes er a beches el chebechiielel el beches el telbiil. Me domes aike el lolekoi a Jesus el kirel a dertel a chebechiil me a beches el chebechiil el mo mesa uchul me kede melekoi el uaisei.

A Jesus a ouchais er kid el ngar er a Mateus 19:9 er a dertel a chebechiil el lekengei er ngii a Biblia. Ngdilu el kmo: “A sechal el mengoit er a bechil el diak le laokreng a uchul, a mor a laokreng a lsekum ngmo bechil a tar a redil.” Ngoeak a tekingel a Jesus e kede suubii el kmo (1) ngdi laokreng a uchul a dertel a chebechiil el lekengei er ngii a Biblia e a (2) chad el dortii a bechil el diak lemengai a uchetemel er a bades a mora laokreng. *

Me a tekingel a Jesus ngbelkul a kmo a sechal el mora laokreng e dortii a bechil, a doltirakl er a Bades e ngsebechel lmuut el mo bechiil? Ngdiak el uaisei a belkul. Sel leduubech a laokreng e ngike el diak a telemellel a mo melilt el kmo ngmo ousubes er a bechil me a lechub e ngdiak. A lsekum e ngdiak lousubes er ngii me te ngiltii el mo merort er a chebechiielir e te du el sebechir el lmuut el mo bechiil sel lebo el merek a babier er a dertel a chebechiil.

Engdi ngike el diak a telemellel a locha diak el soal merort er a chebechiielir me ngdmu er a bechil el kmo ngousubes er ngii. Ngngera duubech a lsekum ngika el mlora laokreng a otngeklii a klausubes er a bechil e ngiltii el mo merort er a chebechiielir? A bechil el kongei lousubes er ngii e soal melemolem er a chebechiielir a uchul me ngika el mlora laokreng a doltirakl er a Bades e ngdiak el sebechel lmuut el mo bechiil. A lsekum e ngmelemolem er tia el blekeradel e otngeklii a Bades e mo bechil a kuk ta er a chad, e ngbelkul a kmo ngmla lmuut el mora laokreng el uchul me a remechuodel a kirir el lmuut el mo oukerrekeriil er a kngtil.​—1 Ko. 5:1, 2; 6:9, 10.

A lsekum a chad a doltirakl er a Bades e ngdiak el sebechel mimokl el lmuut el mo bechiil engdi nglmuut el mo bechiil, e ngua ngera osengel a ongdibel el kirel sel kot chebechiil me a chebechiielel er chelechang? A doltirakl er a Bades, e sel kot el chebechiil ngdirk melemolem? Ngsebechel ngike el kot bechil el dirk melilt el mo ousubes er ngii me a lechub e ngchoitii? Tia el beches el chebechiil ngngar er a laokreng?

A ngar er a mong e a ongdibel ulemes er tia el chebechiil el kmo ngngar a laokreng a lsekum ngike el dimlak a telemellel a dirk chad e dirkak el lluut el mo bechiil e dimlak lebora deleboes. Me nguaisei engdi a Jesus a dimlak a ta losaod el kirel ngike el diak a telemellel er a lolekoi el kirel a dertel a chebechiil me a beches el chebechiil. Ngbai di silodii el kmo a chad el dortii a chebechiielel  el ngii a diak el lemengai a uchetemel er a Bades a mora laokreng. Me a leuaisei e a dertel a chebechiil me a beches el chebechiil el mlo er ngii el laokreng a uchul a torrebengii sel kot el chebechiil.

Sel lemedort a chebechiil e lluut el mo bechiil a chad, e ngike el diak a telemellel a mla mo diak el sebechel lousubes me a lechub a leko ngmengoit er ngii el chad. Ngmla mo diak bo loruul er a meringel el omelilt el mo ousubes er ngii me a lechub e ngchoitii. Me a dirrek a lsekum e ngike el diak a telemellel a mad, lmuut mo bechiil, me a lechub e ngmora deleboes me ngii a diak lengedechii a osengel a ongdibel el kirel tia el beches el chebechiil. *

Me kede milsaod el kirel a lsekum a bechiil el sechal a mlora laokreng el luchul me a chebechiil a mildort. Engdi ngmekerang a lsekum e ngdimlak el bora laokreng e dortii a chebechiielel e lmuut el mo bechiil? Me a lechub e a bechiil el sechal a dimlak el bora laokreng er uchei er a dertel a chebechiil engdi ngrirellii er uriul er a ledertii e lmuut el mo bechiil alta ngike el dimla bechil a kilengei lousubes er ngii? Ngar er aika el rokui el blekeradel e a dertel a chebechiil me a beches el chebechiil el ngii a uchul a laokreng a torebengii sel kot el chebechiil. Tia el beches el chebechiil a kutmeklii a beches el telbiil loltirakl er a llach. Ngua losaod er ngii a November 15, 1979, el The Watchtower er a 32 el llel, “ngika mla soiseb er a beches el chebechiil me ngdiak el sebechel torebengii e lmuut el mo er ngike el kot el bechil. Sel kot el chebechiil a mlo merek er a lemedort a chebechiil, e lebora laokreng, e lluut el mo bechiil.”

A ngeldechel tia el klemedengei a diak longebekakl er a cheledolel a chebechiil me a lechub e longkekerei er a berredel a laokreng. A chad el dortii a chebechiielel el diak loltirakl er a Bades e mo bechil a kuk tang alta ngdiak a ilmeklel el meruul el uaisei a mo mukerrekeriil el kirel a laokreng. (A lsekum ngike el beches el bechil a Kristiano e ngii el redil me ngdirrek el kirel mo mukerrekeriil el kirel a laokreng.) Alta tia el beches el chebechiil a diak lengar er a laokreng engdi ngika el sechal a diak el sebechel mo ngmai a ileakl ngerachel er a ongdibel el betok el rak e dirrek el dimerekmo rechad bo lak el kesib a rengrir el kirel a kngtil e bo lak lomdasu el kmo ngdiak el rredemelel a nguu omengull. E a uchei er a bo lomsa ileakl el ngerachel, a remechuodel a mo melatk er ngike el mle kot el bechil me a ngii di el kekerei el ngelekir el tir a milechoit er ngika el mlora laokreng.​—Mal. 2:14-16.

A dertel a chebechiil me a beches el chebechiil a kmal oberaod el tekoi me a Rekristiano kirir el suubii el mo oba uldesuel a Jehovah el omes er a chebechiil el chedaol.​—Oli. 5:4, 5; Heb. 13:4.