1. Kede oureng er a ngerang el kirir a rechedad?

A ODOS el ngklel a Pauline * a melekoi el kmo: “Sera kumuchel el mo medengelii a klemerang, e ngmle soak a rokui el chad er a telungalek er ngak a bo lobengkek el ngar er a Baradis. Ngkmal mle soak a bechik er a Wayne, me a kekerei el ngelekam el sechal a bo losiou er a Jehovah el obengkek.” Kau, ngar ngii a rechedam el dirkak bo lodengelii e bo lebetik a rengrir er a Jehovah? Ke locha di ua uldesuel a Pauline el soam a rechedam a bo losiou er a Jehovah lobengkem.

2. Ngera el ker a bo dosaod er tia el suobel?

² Ngdiak el sebeched el orrimel er a rechedad el mo kongei er a ungil chais, engdi ngsebeched el melisiich er tir el mo omdasu el kirel a klumech er a Biblia. (2 Ti. 3:14, 15) Me ngera me ngkired el ousioning el mora rechedad? E ngera uchul me ngkired el melasem el mo medengei a uldesuir? Ngera sebeched el rullii el ngosuterir el mo betik a rengrir er a Jehovah el di uai kid? E te mekera rokui el chad er a ongdibel e ngosukid?

3. A doltirakl er a 2 Petrus 3:9, e ngera uchul me ngkired el ousioning el mora rechedad?

³ Ngdi kmedung, e a Jehovah a mo olekngemed er tia el blekeradel er a beluulechad. Me ngdi tirke el “rredemelel a diak a ulebengelel el klengar” a mo suobel. (Rel. 13:48, NW) Kede mengoit er a klou el temed me a klisiched el omerk er a klumech el mora rechad el diak dodengelterir el ngar er a beluad, me ngulterekokl el dirrek el soad el omerk er a klumech el mora rechedad me bo el sebechir  el mesiou er a Jehovah el obengked. A betik a rengul el Demad el Jehovah a “diak el soal a ngii di le chad a leriid, e bai soal a rokui el chad a lobult el mo imikr a kngterir.”​—Monguiu er a 2 Petrus 3:9.

4. Ngsebeched el remuul a ngera el cheleuid sel dousioning el mora rechedad?

⁴ Ngkired el melatk el kmo ngar ngii a melemalt me a diak el melemalt el rolel a domerk er a klumech el kirel a osobel. El ua tiang, nglocha ungil a cheldechedechad sel dousioning el mora chad el diak dodengelii, engdi nglocha kmal meringel a tekinged sel dousioning el mora rechedad.

5. Ngera kired el melatk er ngii er a uchei er a dongedecheduch er a rechedad el kirel a klemerang?

⁵ Sel dolatk er sel kot el taem el dullasem el ousioning el mora rechedad, e a rebetok er kid a locha mo ouuchel a rengrir er sel rolel e te mirruul er ngii e mo oureng ulekum e te mirruul er ngii el oeak a kuk ngodech el rolel. A apostol Paulus a milellach er a Rekristiano el kmo: “Ma tekoi el tuobed er a ngeriu bo lungil a delecherul e lomeksemeriar a reng, e bo mungil el medenge el kmo ng kirel el ua ngera cho monger er a re bek el chad.” (Kol. 4:5, 6) Ngungil a dolatk er tiang sel dongedecheduch er a rechedad. E le lak, e kede locha mo ongasech a rengrir er a bai dengesuterir.

6-7. Mosaod er a tekoi el dilubech el ochotii a klungel a ultutelel a dolatk er a uldesuel a buch el diak losiou er a Jehovah.

⁶ Bo molatk a uldesuir. A Pauline el dulsaod er ngii er a uchei a melekoi el kmo: “A kot, e ngkmal mle soak el di mesaod a tekoi er a klereng el mora bechik. Kemam el obekel a dimlak ki blechoel el mesaod el kirel a tekoi er a bek el sils.” Engdi a bechil a Pauline er a Wayne a dimlak a kmal klemedengei er ngii er a Biblia e dimlak lodengei aika el tekoi el losaod a Pauline. Me ngmlo omdasu el kmo ngika el Pauline a di melatk el kirel a klechelid er ngii. Me ngmlo bekikl e mlo omdasu el kmo  ngmla mecheblad e mo chedal a kdekudel el cheldebechel.

⁷ A Pauline a melekoi el kmo ngmlo telkib el taem el longoit er a klou el temel el teloi er a rudam me a rudos er ngii sel lekebesengei me a le weekend, me sel lengar er a miting, e loldingel, e lekldibel. Me ngmelekoi el kmo: “A lebebil er a taem, e a Wayne a me remei el di ngii el tang el ngar er a blai me ngmlo sabisi.” Me ngulterekokl a Wayne el mlo oureng er a bechil me a ngelekel. Ngdimlak a klemedengei er ngii el kmo tirka el beches el sechelil a bechil te rua techang, me ngmlo omdasu el kmo tirkang a kmal meklou a ultutelir er a rengul a Pauline. Me tiang a rirellii a Wayne me ngmlo soal merort er a chebechiielir. Ngsebechem el mdasu a bebil el rolel e ngmle sebechel a Pauline el mo melatk er a bechil?

8. A doltirakl er a 1 Petrus 3:1, 2, e ngmekera blekerdeled e ngar ngii a lerellii er a rechedad?

⁸ A blekerdelem bo lungil kerebai. Ngblechoel a tekoi el doruul el klou a lerellii er a uldesuir a rechedad er aike el tekoi el dolekoi. (Monguiu er a 1 Petrus 3:1, 2.) A Pauline a mlo melechesuar tia el tekoi. Ngmelekoi el kmo: “Ak mle medengei el kmo a Wayne a betik a rengul er kemam e dimlak el mera el soal el merort er a chebechiielam. Engdi tia el tekingel a rirellak el mo mesang el kmo ngmla mo kirek el omuchel el meruul a tekoi el oltirakl er a rolel a Jehovah. Me ngbai diak di kungedecheduch, e ngmle kirel a blekerdelek el mo olecholt er a ungil kerebai.” A Pauline a mlo diak lorrimel er a Wayne el mo orrenges er ngii el mesaod er a Biblia, ngbai mlo omuchel el mesaod a tekoi er a bek el sils lobengkel. Me a Wayne a miltebengii el kmo ngii el Pauline a mla mo chad er a budech, e dirrek el miltebengii el kmo a ngelekir el sechal a kmal mla mo kedung. (Osi. 31:18, 27, 28) Me sera lutebengii el kmo a klumech er a Biblia a mla ngosuir a telungalek er ngii, e ngmlo semeriar er a klumech er a Tekingel a Dios.​—1 Ko. 7:12-14, 16.

9. Ngera uchul me ngkired el melemolem el olengeseu er a rechedad?

 ⁹ Molemolem el melasem el olengeseu er a rechedam. A Jehovah a kiltmeklii a kerebai el kired. Ng “millemolem” el mengelechel er a rechedal me lekengei er a ungil chais me bo lenguu a klengar. (Jer. 44:4) Me a apostol Paulus a dilu er a Timothy me lolemolem el olengeseu er a rebebil. E ngera uchul? E le loruul el uaisei, e ngosebelii ngii me tirke el orrenges er ngii. (1 Ti. 4:16) Kid a betik a rengud er a rechedad, me ngsoad a bo lodengei a klemerang el ngar er a Tekingel a Dios. A cherengel a taem e a tekingel me a omerellel a Pauline a mla er ngii a ungil lerellii el mora telungalek er ngii. Chelechang e ngdmeu a rengul el mesiou er a Jehovah el obengkel a bechil. Tir el terung a pioneer, me a Wayne a mesiou el ta er a remechuodel er a ongdibel.

10. Ngera uchul me ngkired el mo oba kllourreng?

¹⁰ Bo moba kllourreng. Sel bo doltirakl a llechul a Dios er a klengar er kid, e a rechedad a locha mo meringel er tir el kongei er a beches el klaumerang me a rolel a klengar er kid. Sel kot el tekoi el blechoel mtebengii a kid el dikea deteloi er tir el mengedaol a chedaol sils me a tekoi er a balatiks. Me a rebebil er a rechedad a locha mo kesib a rengrir er kid er a uchelel. (Mt. 10:35, 36) Engdi ngdiak el kired el omdasu el kmo ngdiak el sebechir el melodech a uldesuir. E le lsekum e kede mo stob el olengeseu er tir el mo ungil medengei a klaumerang er kid, e ngdi ua bla doterekeklii el kmo te diak lerredemelel a mo nguu a diak a ulebengelel el klengar. E a Jehovah a dirkak lebeskid tia el ngerachel el mo oukerrekeriil, ngbai ngiluu ngii el ngerachel el msa Jesus. (Jn. 5:22) Me a lsekum kede oba kllourreng, e a cherengel a taem e ngmo sebechir a rechedad el kongei el orrenges er a klumech el domerk er ngii.​—Momes er a baks el “ Mousbech er a Website er Kid el Olisechakl.”

11-13. Ngera kede suubii er a omerellel a Alice el bedul a demal me a delal?

¹¹ Bo lungil a omerellem engdi lak bechititerir a rechedam me lengedechii a uldesuem. (Osi. 15:2) Ka molatk er a tekoi el dilubech el mora Alice. Ngmilsuub el kirel a Jehovah er sel taem er a bo lekiei el cheroid er a demal me a delal, el tir a dimlak loumerang er a Dios e kmal mle sorir a tekoi er a balatiks. Ngmlo medengei el kmo ngkmal kirel di mereched el ouchais er tir el kirel aike el ungil tekoi el losuub. Ngmelekoi el kmo: “A lsekum ke mengiil el mo meketeket e ouchais er a rechad er a blim el kirel a klaumerang er kau me a tekoi el moruul, e ngmo kesib a rengrir er kau.” Me ngmilluches a babier el mora demal me a delal, el oker er tir el kirel a uldesuir er a tekoi er a Biblia el lomdasu el kmo te mo semeriar er ngii, el uai a bltikerreng. (1 Ko. 13:1-13) Ngmirreng a sulir el mle ungil omekeroul er ngii e omekerreu er ngii, e dirrek el uldurokl a bresent el mo er tir. Me sera bo loldingel er tir, e ngmlo er a tkurrebab el sebechel el olengeseu er a delal el meruul a ureor er a blai. A kot el uchul, e a demal me a delal a dimlak el sorir er sera lesbedeterir er tia el beches el klaumerang er ngii.

¹² Sel taem el Alice a mla er a blil a demal me a delal, e ngdi milenguiu er a Biblia er a bek el sils. Ngmelekoi el kmo: “Tia ngilsuir a delak el mo mesa el kmo a Biblia a kmal klou a ultutelel er a osengek.” E a demal a Alice a mle soal mesuub er a Biblia el osiik a cheleuid el tekoi er a chelsel me bo lodengelii sel uchul me a ngelekel a ngildechii a klengar er ngii. Me a Alice a kmo: “Ak milsa Biblia er ngii, e lilechesii a babilengek el mo er ngii e nguu el sukur er a chelsel.” Me ngera dilubech? Ngdimlak a ta el cheleuid el tekoi el lebiltik er ngii a demal a Alice er a Tekingel a Dios. Aike el tekoi el lulenguiu a bai kmal millisiich er a rengul.

¹³ Ngkired el mo ungil a omerelled engdi ngdiak debechititerir a rechedad me lengedechii a uldesued, el mo lmuut er a taem el bo dechelebangel a ringel. (1 Ko. 4:12b) El ua tiang, a Alice a mle kirel el outekangel a ultekengel a delal. Ngmelekoi el kmo: “Sera bo kmetecholb, e a delak a dilu el kmo ‘ke mekngit el ngalek.’” Me ngmilekera Alice? Ngmelekoi el kmo: “Ngdimlak meterob el mesaod er tia el beches el klaumerang er ngak, ngbai  uleak a omengull er ngak el mo er ngii e ak silodii el kmo ak mla ngiltii el mo ta er a Sioning er a Jehovah e kmal diak bo kngedechii tia el omelilt er ngak. Ak millasem el oterekeklii a rengul a delak el kmo ngkmal dirk betik a renguk er ngii. Me aki lilangel, e ak mlo remuul a kmal ungil el kelel. Seikid el taem el mei, e a delak a mlo sebechel el mesa el kmo a Biblia a mla rullak el mo ungil a blekerdelek.”

14. Ngera uchul me ngdiak el kired el mechititerir a rechedad me lolodech a uldesued el kirel a omesiunged el mora Jehovah?

¹⁴ Nglocha mo kemanget el taem e ngmochu sebechir a rechedad el mo ungil medengelii a klungel a ultutelel a osenged el kirel a omesiunged el mora Jehovah. El ua tiang, a Alice er sera lechitii a tekoi el mle soal a demal me a delal a bo loruul er ngii, e lengiltii el mo pioneer, e a delal a liluut el lmangel. Engdi a Alice a di millemolem el mesisiich a rengul. Ngmelekoi el kmo: “A lsekum ke mecherei a telungalek er kau me te ngodechii a uldesuem el kirel a ta el tekoi, e ngmo sebechir el dirrek el melasem el ngodechii a uldesuem er a kuk bebil er a tekoi. Engdi a lsekum ngungil a omerellem e melemolem el mesisiich a rengum, e a rebebil er tir a locha mo orrenges er kau.” Tiakid el tekoi a dilubech el mora Alice. Me chelecha el taem, e a demal me a delal a mesiou el pioneer, e a demal a mesiou el ta er a remechuodel.

15. A doltirakl er a Mateus 5:14-16 me a 1 Petrus 2:12, e ngmekera “ungil tekoi el loruul” a rebebil e sebechel ngosuterir a rechedad?

¹⁵ A Jehovah a omekrael er a rechad el mo er ngii el okiu a “ungil tekoi el loruul” a rechad er a ongdibel er a Rekristiano. (Monguiu er a Mateus 5:14-16; 1 Petrus 2:12.) Me a lsekum a bechim a diak el ta er a Resioning er a Jehovah, e ngmla mo medengelterir a rechad er a ongdibel?  A Pauline el dulsaod er ngii er a uchei, a milengemedaol er a rudam me a rudos el mora blil me bo el sebechel a bechil er a Wayne el mo medengelterir. A Wayne a dirk melatk er a rolel e a ta el odam a ngilsuir el mo medengei el kmo te kmal uangerang a Resioning er a Jehovah. Ngmelekoi el kmo: “Ngiluu a ulengellel er a ureor me bo el sebechel el me obengkek el omes a iakiu. Me ak mlo medengei el kmo, ‘Ngika di chad el uai ngak!’”

16. Ngera uchul me ngkired el mengemedaol er a rechedad el mei er a miting?

¹⁶ A ta er a kot el ungil rolel a dengesuterir a rechedad a okiu sel dongemedaol er tir el mei er a miting er a ongdibel el obengked. (1 Ko. 14:24, 25) Sel kot el miting el leblo er ngii a Wayne a Chedaol Belsoil, e le ngmlo er ngii er a uriul er a temel a urerel me a prokuram a di mle kedeb. Ngmelekoi el kmo: “Ngdimlak kudengei el kmo a cheldecheduch ngmilsaod el kirel a ngerang, engdi sel kmal chilsir a renguk a blekerdelir a rechad. Te mle outkeu er ngak e urrekedii a chimak. Ngmle sebechek el mtebengii el kmo te melemalt el chad.” Ngmla er ngii a ta el obekel el kmal mle ungil a blekerdelir el bedul a Pauline, el olengeseu er ngii el omes er a ngelekel sel temel a miting me sel loldingel. Me a Wayne er a bo lolatk el soal el mo medengei a lmuut el betok el kirel tia el beches el klaumerang er a Pauline, e ngullengit er ngike el bechiil el sechal me bo losuub a Biblia lobengkel.

17. Ngdiak el kirel el di kid loltelechakl er kid er a ngerang? Ngera uchul me ngdiak el kired el mo omdasu el kmo a rechedad a diak a ta el bo lolodech a uldesuir?

¹⁷ Kede oureng el kmo a rokui el chedad a me obengked el mesiou er a Jehovah. Alta kede mora aike el rokui el sebeched el ngosuterir el mo mesiou er a Dios, engdi te locha diak be lsiseb er a klemerang. Me a bo leuaisei, e ngdiak el kirel el di kid loltelechakl er kid el kirel a omelilt er tir. E le ngdiak el sebeched el orrimel er a ngii di el chad el mo kongei er a klaumerang er kid. Me nguaisei, engdi a lsekum a rechedad a mesa el kmo ngdmeu a rengud e le kid el mesiou er a Jehovah, e tia sebechel kmal klou a lerellii er tir. Me moluluuch el kirir. E bo mungil el mengedecheduch er tir. Lak meterob el olengeseu er tir! (Rel. 20:20) Bo lulterekokl a rengum el kmo a Jehovah a mo omekngeltengat a tekoi el moruul. Me a lsekum a rechedam a melilt el mo orrenges er kau, e te mo suobel!