1-2. (a) Ngerang a rak er a ilmokl? (Momes er a baks el “ Ngerang a Mle Rak er a Ilmokl?”) (b) Ngera ngmilsaod a Jesus el ngar a Lukas 4:16-18?

NGAR a bebil beluu, e te mengetmokl a ileakl el mur el kirel sel mong me ng 50 el rak el longedereder a king me a lechub a kuin. Tia el mong me ng 50 er a rak a lodengelii a rechad el kmo ngrak er a ilmokl. Aika el mur a locha melemolem el ta el sils, me a lechub e ngta el sandei me a lechub e ngmo kemanget, engdi ngmo er ngii a ulebengelel, e a uriul er ngii e a rechad a di mereched lobes er ngii.

² Me kid a mo mesang a otutel a lmuut el ungil el rak er a ilmokl el ngii a lmuut el ungil er a omengedolel aike el mong me ng 50 el rak er a Israel er a irechar. Tia el rak er a ilmokl a milsterir a rechad er a Israel a ilmeklir. Engdi ngera uchul me ngkired el mesuub el kirel tia el tekoi er chelechang? E le rak er a ilmokl er a rechad er a Israel a omeklatk er kid er a betok lungil tekoi el bla leketmokl a Jehovah el kired. Ngmo meskid a diak a ulebengelel el ilmekled, el ngii a bla domuchel el melai a klungioled er ngii er chelechang. A Jesus a milsaod el kirel tiaikid el mengasireng el ilmokl.​—Monguiu er a Lukas 4:16-18.

3. A doltirakl er a Levitikus 25:8-12, e te milekerang a rechad er a Israel e ngmai a klungiolir er a rak er a ilmokl?

³ Me ngsebeched el mo ungil medengelii a belkul a tekingel a Jesus er sera losaod el kirel a ilmokl lokiu sera lekot el mesaod er a rak er a ilmokl el Dios a kiltmeklii el kirir a rechedal er a irechar. A Jehovah a dilu er a rechad er a Israel el kmo: “Kom eklii sel mong me ng okeim er a rak, e mchisii a ilmokl el mor a rokui el chad er a beluu el rokir; ng mo belsechel a deurreng el kiriu, sel bo le moluut a klokliu el ekor kemiu, ma re moluut el mor a telungalek er tir.” (Monguiu er a Levitikus 25:8-12.) Ngar sel mlo merek el suobel, e kede milsaod el kirel a klungiolir a rechad er a Israel er sel Ulengull el Sils. Me ngkuk ngera el klungiaol a lengilai a rechad er a Israel er a rak er a ilmokl? Ka di molatk oleko a ta el chad er a Israel a mo er ngii a klou el belsel, el rullii me ngmo morimel el mo oterur  a chetemel me bo lsebechel mengkad er a belsel. Ngar seikid el rak er a ilmokl, e sel chetemel a lmuut el moluut el mo er ngii. Seikid e ng ‘moluut a kloklel’ el mo er ngii, me ngsebechir a rengelekel el mo oudiukes er ngii er a uriul. Me a lechub e ngkuk kmal mo klou a belsel a chad me ngmo kirel kongei el mo sibai me a lechub e ngta er a ngelekel a mo sibai me bo lsebechel mengkad a belsel. Ngar seikid el rak er a ilmokl, e ngike el sibai a kirel ‘moluut el mor a telungalek er ngii.’ Tiaikid a rolel e a chad el mlo sibai a mo er ngii a omeltkel el mo mimokl er a uriul! Tia el omeruul a ochotii el kmo a Jehovah a mera el omekerreu er a rechedal!

4-5. Ngera uchul me ngklou a ultutelel el dosuub el kirel a rak er a ilmokl el kirir a rechad er a Israel?

⁴ Ngera ta er a lmuut el klungiolel a rak er a ilmokl? A Jehovah a silodii el kmo: “A RUBAK el Dios er kemiu a mo omekngeltengat er kemiu er sel beluu el bo lomeskemiu me ng diak le bor ngii a re mechebuul er a delongeliu.” (Dut. 15:4) Tiang a kmal ngodech er a tekoi el dubechang er chelecha el taem! E le kede blechoel el omes er a remerau el chad el mengal mocha merau, e a remechebuul a mengal mocha chebuul!

⁵ Me kid el Kristiano a diak dengar cheungel a Llach er a Moses. Me tiang a belkul a kmo ngdiak doltirakl er a llach el kirel a rak er a ilmokl el mirruul er a resibai el mo mimokl er a klsibai e mengubet er a belsir e dirrek el moluut a chetemir a rechad. (Rom 7:4; 10:4; Efe. 2:15) Me nguaisei, engdi ngklou a ultutelel el dosuub el kirel a rak er a ilmokl. E ngera uchul? E le ngmo sebeched el oba deurreng el kirel a ilmekled, el ngii a mekltkid er a tekoi el lekiltmokl a Jehovah el kirir a rechad er a Israel.

6. A klechad, ngkirel mo mimokl er a ngera el tekoi?

⁶ Kid el rokui a kired el mo mimokl e le kede mludiukes er a klengit me kede sibil a klengit. Tiaikid a uchul me kede mo chuodel e mo smecher e dirrek el mad. A rebetok a mesang a klemerang er tia el tekoi sel lomes a mederir er a dirk me a lechub e te mora toktang losiik a rolel a ukeruul. Ngdirrek el mo mechitechut a rengud sel derebet er a klengit. A apostol Paulus a dilu el kmo: “Mak kelebus er a llach er a klengit el oureor el ngar a bedengek.” Ngdirrek el dilu el kmo: “Kele kkol chebuul el chad! Ng techa mo osebelak er tial bedengek el obekak el mor a kodall?”​—Rom 7:23, 24.

7. Ngera el rolel a ilmokl a lulemlaoch el kirel a Isaia?

 ⁷ Me nguaisei, engdi ngdmeu a rengud e le Dios a mla kutmeklii a rolel e ngsebeched el mengubet er a belsel a klengit. A Jesus a ngike el uchul tiaikid el ilmokl. Ngar a kuk betok er a 700 el rak er a uchei er a lemei er tia el chutem a Jesus, e a profet el Isaia a ulemlaoch el kirel a lmuut el ngarbab el rolel a ilmokl el kuk ngarbab er sel ilmokl el mlora rechad er a Israel er a rak er a ilmokl. Ngmilluches el kmo: “A Reng er a Rubak el Dios a ngar ngak. Ng mla ngiltak e oderchak el oba ungil chais el mor a re mechebuul, el mo omkar a chelemuurreng, e mo mesubed er a ngbetir a re mlengai el mo blebaol.” (Isa. 61:1) Me tia el ulaoch, ngmo tmaut el kirir a rua techang?

8. A ulochel a Isaia el kirel a ilmokl, ngmillutk el kirel techang?

⁸ Tia el klou a ultutelel el ulaoch el kirel a ilmokl a ulemuchel a otutel er a uriul er a lomuchel er a omesiungel er tia el chutem a Jesus. Sera lebo er a blil a ongdibel er a belual er a Nasareth, e ngii el Jesus a milenguiu aika el tekingel a Isaia el mora rechad el mle kldibel er isei. Me a Jesus a millekoi aika el tekoi el melutk er ngii el kmo: “A Reng er a Rubak a ngar ngak, ele ng mla ngiltak el mo ouchais er a ungil chais el mor a re mechebuul. Ng ulderchak el mo ouchais el kmo a re rrengodel a mengubet, ma re meiko a mo omes, ma lomcheracheb er tir a mo mimokl, e mesubed el kmo ng mla mo belsechel a Rubak el mo olsobel er a re chedal.” (Lk. 4:16-19) Ngoeak a ngera el rolel e a Jesus a ultutii tia el ulaoch?

9. A rebetok el chad er a taem er a Jesus, ngmle sorir el mo mimokl er a ngera el tekoi?

⁹ Sel taem er a Jesus, e a rechad a ulemuchel el mo mimokl el oltirakl er sel ulochel a Isaia el Jesus a dirrek el milenguiu er ngii. Me ngsebeched loumerang er tia el tekoi e le Jesus a dilu el kmo: “A ikal tekoi er a Chedaol Llechukl el bla mrenges a toutang er chelechal sils.” (Lk. 4:21) Me a rebetok el rirenges a tekoi el lulenguiu a Jesus a locha ulemdasu el kmo te mo mimokl er a omengederederel a kabelment er a Rom. Te locha mlo ua uldesuir tirke el teru el chad el dilu el kmo: “Kemam a millatk el kmo ngii ngikel mo osebelii a Israel!” (Lk. 24:13, 21) Engdi kid a medengei el kmo a Jesus a dimlak loldurech er a rultirakl er ngii el mo omtok a meringel el omengederederel a kabelment er a Rom. Ngbai dilu el kmo, “bsa merreder er a Rom a kloklel.” (Mt. 22:21) Me ngmilekera Jesus e mesterir a ilmeklir a rechad er sel taem?

10. A Jesus, ngmillubet er a rechad er a ngera el rolel a klsibai?

¹⁰ A Ngelekel a Dios a mlei el me olengeseu er a  rechad el mo mimokl el okiu a eru el rolel. Me a kot, e a Jesus a ngilsuterir a rechad el mo mimokl er a betok el diak a ultutelel e omekberaod el osisecheklir a remengeteklel a klechelid. A rebetok el chad er a Judea er sel taem a mlorimel el mo oltirakl a siukang er a rechad me a dirrek el klsuul klaumerang. (Mt. 5:31-37; 15:1-11) Tirke el chad el millekoi el kmo te olengeseu er a rebebil el mo mesiou er a Dios, a dimlak losiou er a Dios el ngar a melemalt el rolel, me te di mle ua rechad el meiko. Me tir el ultngeklii a Mesias me a klemerang el lullisechakl er ngii a uchul me ngdimlak lsebechir el mo medengelii a Dios, me te millemolem el ua lemeiko, me a kngterir a dimlak lsebechel musubes. (Jn. 9:1, 14-16, 35-41) Engdi a Jesus a ullisechakl er a klemerang e kiltmeklii a ungil kerebai el ochotii el kmo a rengariou a rengrir el chad a sebechir el mo mimokl er a klsuul losisechakl.​—Mk. 1:22; 2:23–3:5.

11. Ngera ongeru el rolel e a Jesus a kiltmeklii a ilmokl?

¹¹ A ongerung, e a Jesus a mle uchul e a klechad a mo sebechir el mo mimokl er a klsibai er a klengit. Ngii el tilengetengii a klengar er ngii el mo olubet a uchul me a Dios a sebechel ousubes a kngterir tirke el olecholt er a klaumerang er tir e dirrek el kongei er a tenget el olubet el Jehovah a kiltmeklii. (Heb. 10:12-18) A Jesus a dilu el kmo: “Ma lsekum a Ngalek a rullemiu el mo mimokl, e kom meral mo mimokl.” (Jn. 8:36) Tia el ilmokl a lmuut lungil er sel ilmokl el mlora rechad er a Israel er a rak er a ilmokl! El ua tiang, a chad el mo mimokl er sel rak er a ilmokl a sebechel lmuut el mo sibai, e a osisiu el taem e ngmo mad. Engdi a ilmokl el lekiltmeklii a Jesus a melemolem el mo cherechar!

12. Te rua techa tirke el mle kot el nguu a klungiolir er a ilmokl el luluuchais er ngii a Jesus?

¹² Ngar sel sils er a Pentekost 33 C.E., e a Jehovah a uluusbech er a chedaol reng er ngii el melilt er a rechapostol me a relmuut el bebil el blak a rengrir el sechal me a redil. Ngmirrodel er tir el mo ngelekel me bo lsebechir el mo mekiis er a kodall el mora eanged el mo obengkel a Jesus el mengedereder er a uriul. (Rom 8:2, 15-17) Tirkang a mle kot el chad el nguu a klungiolir er a ilmokl el Jesus a uluuchais el kirel er a blil a ongdibel er a beluu er a Nasareth. Tirka el sechal me a redil a mlo mimokl er a klsuul losisechakl me a siukang el lullisiich a remengeteklel a klechelid er a Judea el ngii a dimlak loltirakl a Tekingel a Dios. A Dios a dirrek el mesterir a techellir el mo mimokl er a belsel a klengit el mo uchul a kodall. Me tia el tekoi el lekiltmeklii a Jehovah a liluut el olutii a ilmokl el ngii a ulemuchel er sel taem er a lemengilt a rultirakl er a Kristus e mo merekui a temel er sel ulebongel er a Ta el Telael el Rak el Omengederederel a Jesus. Me ngera el klungiaol a mo er ngii er a delongelel chelechang el mo lmuut er seikid el taem?

13-14. Te rua techang a dirrek el sebechir el nguu a ilmokl el luluuchais er ngii a Jesus?

¹³ Chelecha el taem, e a rebetok el miliol el ngariou a rengrir el chad a chedal sel delebechel el okedongall el ‘rekuk bebil el sib.’ (Jn. 10:16, NW) Ngdimlak lomekedong er tir a Dios el mo mengedereder lobengkel a Jesus el ngar a eanged. A Biblia a bai mesaod el kmo ngar ngii a techellir el mo kiei er tia el chutem el mo cherechar. Me kau, ke oba tia el omelatk?

¹⁴ Chelecha el taem e ngdirrek el sebechem el oldeu a rengum er a bebil er a ungil tekoi el rengellitel oldeu a rengrir er ngii. Ngokiu a klaumerang er kau er a mloitel el rsechel a Jesus, e ngsebechem lolengit er a Jehovah me lousubes a kngtim. Seikid e ngmo sebechem el nguu a kengei er a Dios el mo uchul a budech er a uldesuem. (Efe. 1:7; Och. 7:14, 15) E ka di molatk aike el klengeltengat el molai e le kau el mla mo mimokl er a klsuul losisechakl. A Jesus a dilu el kmo: “Ko mo medengei a klemerang, ma klemerang a meskemiu a ilmokl.” (Jn. 8:32, BT) Ngmera el dmeu a rengud el mla nguu tia el rolel a ilmokl!

15. Ngera el ilmokl me a klengeltengat a dirk dongiil?

¹⁵ Me kede dirk mengiil er a lmuut el klou el ilmokl el dirk merael mei. Ngdi kmedung, e a Jesus a mo okngemed a rokui el klsuul klechelid me a chebirukel el kabelment er a rechad. E a Dios a mo omekerreu er a “kloul seked” er a rechad el tir a mesiou er ngii, e ngii a dirrek el mo kongei er tir me te mo kiei loldeu a rengrir er a betok el klengeltengat er a baradis er tia el chutem. (Och. 7: 9, 14) A rebetok el chad a mo mekiis er a kodall, e dirrek el mo er ngii a techellir el mo mimokl er a rokui el telemellel a klengit el Adam a mle uchul.​—Rel. 24:15.

16. Ngera el mengasireng el ilmokl a bo lenguu a klechad er a ngar medad?

¹⁶ Ngar sel Ta el Telael el Rak el Omengederederel, e a Jesus me tirke el mo mengedereder lobengkel a mo ngosuir a klechad el mo cherrungel a klisichel a bedengir me a deleuill er tir lobengkel a Dios. Tiaikid el taem a di mo ua sel rak er a ilmokl er a rechad er a Israel. Tiang a belkul a kmo a rokui el chad el blak a rengrir el mesiou er a Jehovah a mo cherrungel e mengubet er a blsel a klengit.

17. Ngerang dmu Isaia 65:21-23 el kirir a rechedal a Dios? (Momes er a siasing er a medal tia el babier.)

¹⁷ A ulaoch el ngar a Isaia 65:21-23 (Monguiu.) a mesaod el kirel a blekerdelel a klengar el mo er ngii er a ngar medad el taem. Tia el klengar a mo mui er a betok lungil tekoi el diak di lebechachau. A Biblia a mesaod el kmo a rechedal a Dios er sel taem a mo meruul a ungil e meklou a ultutelel lureor. E ngar a ulebengelel a Ta el Telael el Rak el Omengederederel a Kristus, e ngsebechel mo ulterekokl a rengud el kmo “a beluulchad el rokir a mo mengubet er a klisichel a kodall, e mo soiseb er a mededaes el klebkellir a re ngelekel a Dios.”​—Rom 8:21.

18. Ngera uchul me kede oumerang el kmo ngmo dmeu a rengud er a klengar er a ngar medad el taem?

¹⁸ Me a tekoi el lekiltmokl a Jehovah el kirir a rechad er a Israel me bo letabesul a uldesuir el kirel a ureor me a ulengull a di mo osisiu el tekoi el bo loruul el kirir a rechedal er tia el merael mei el Ta el Telael el Rak el Omengederederel a Kristus. Ngulterekokl el mo er ngii a temel a omengull el mora Dios. A omengull el mora Dios a klou a ultutelel el tekoi el kirel a deurreng er chelechang, me ngmo er ngii er a chelsel a beches el beluulechad. Nguaisei, ngar ngii a ungil luchul e kede mo oldeu a rengud er a ungil lureor me a omengull el mora Dios er a chelsel a Ta el Telael el Rak el Omengederederel a Kristus e le rokui el chad a mo ungil a rengrir loureor e dirrek el mo mesiou er a Dios.