Ngdiak. A Diabelong a dimlak ledu er a Eva el kmo a bo lekelii sel rodech el ledilu Dios el kmo ngdiak el kirel mo menga er ngii, e ngua lemad engdi ngar ngii a kmung ngerang er a bedengel el melemolem el ngar e kiei er a kmung ker. A Satan a milengedecheduch lokiu a bersoech e dilu er a Eva el kmo obo mkelii sel rodech, e ‘ng diak bo mad.’ Ngmillekoi er ngii el kmo ngdi melemolem el ngar, e mo dmeu a rengul er a ungil klengar el ngar tia el chutem, el ileakl er a Dios.​—Gen. 2:17; 3:3-5.

Me a lsekum tia el klsuul el osisechakl el kmo kid a di melemolem el ngar er a uriul er a kodall a dimlak lomuchel er a sers er a Eden, e ngulemuchel er ker? Ngdiak omesoded el kirel tiang. Engdi kede medengei el kmo a rokui el klsuul el omengull a ngilemed er a Ieleb er a taem er a Noah. Ngdiak a cheleuid el osisechakl er a klechelid el mlo medechel, e le ngdi mle Noah me a telungalek er ngii a silobel er a Ieleb, e tir a mla er a mera el omengull.

Me a osisechakl el kmo ngar ngii a kmung ngerang er a bedengel a chad el melemolem el ngar er a uriul er a kodall a mlo er ngii er a uriul er a Ieleb. Me sel taem el Dios a milengeuid aike el omelekoi er a Babel me lemeterakl a rechad el “mekelekelii a beluulchad el rokir,” e te ulterekokl el ngiluu tia el osisechakl el mo er aike el beluu el leblo er ngii. (Gen. 11:8, 9) Me alta ngdiak dodengei el kmo tia el klsuul el osisechakl ngulemuchel er oingerang, engdi ngulterekokl a rengud el kmo a Satan el Diabelong el ngii a “demal a bek el blulak” a uchul tia el tekoi, e kmal dmeu a rengul el mesa el kmo ngmla oberk er a beluulechad el rokir.​—Jn. 8:44.