Ke Dirk Melatk?
Ngsebechem longer aika el ker lousbech a Ongkerongel er a rak er a 2019?
Ngera belkul a telbilel a Dios el kmo: “Ngdi diak a klekedall er a mekemad el merruul el mo sebechel tomellau”? (Isa. 54:17)
Ngsebeched loumerang el kmo a Dios a mo omekerreu er kid er a mekngit el klisiich el ua “re mekngit a tekingir el chad [el] oldechelakl.” (Isa. 25:4, 5) A recherroued a kmal diak lsebechir el mo cherrungel el tomellid.—w19.01 er a 6-7 el llel.
Ngokiu a ngera el rolel e a blekerdelel a Dios el mora rechad er a Kanaan me a rulemtok el chad er a Israel a ochotii a melemalt el kerrekerilel?
A Dios a uluukerrekeriil er tirke el chad el mirruul a mekikiongel el rolel a deleboes me a lechub e te ulemekcharm er a redil me a rengalek. Engdi ngulemekngeltengat er tirke el ullengesenges er Ngii e dirrek el mle melemalt a omerellir el mora rebebil.—w19.02 er a 22-23 el llel.
Kede mo mekerang a lsekum kede ngar a basio e a chad el diak loumerang a meluluuch?
Ngsebeched el di lmuk engdi kede olecholt er a omengull, engdi ngdiak dedu el kmo “amen” me a lechub e dekaiuereked chim. Ngdirrek el sebeched el meluluuch el di ngar a rengud.—w19.03 er a 31 el llel.
Ngua ngera berredel a mekngit el omeruul el mora rengalek?
A mekngit lomeruul el meketmokl el mora ngalek a klengit el omtok er ngii el ngalek, me a ongdibel, me a dereder er a beluu, me a dirrek el Dios. Sel taem el llach a mo mengerechir er a ultutakl el kirel a mekngit lomeruul el mileketmokl el mora ngalek, e a remechuodel er a ongdibel a kirir el otireklii a llach.—w19.05 er a 9-10 el llel.
Ngmekera dolodech a uldesued me a rengud?
A meklou a ultutelel el tekoi el kired el meruul a: Moluluuch el mengedecheduch er a Jehovah. E bo mungil melebedebek e di lekau el merriter er a uldesuem. E molilt er a rungil sechelim.—w19.06 er a 11 el llel.
Ngera sebeched el remuul er chelechang me bo dekltmokl el kirel a odechelakl?
Ngkired el melisiich er a deleuill er kid lobengkel a Jehovah. E oumerang el kmo ngbetik a rengul er kid e dirrek el kmal diak bo lechitid. Donguiu er a Biblia er a bek el sils, e bo deblechoel el meluluuch. E bo lulterekokl a rengud el kmo a klengeltengat er a Renged a mera el mo er ngii. E desichedekl er a uldesued aike el kot el soad el bades me a chelitakl er a odanges.—w19.07 er a 2-4 el llel.
Ngera sebeched el remuul el ngosuterir a rechedad me bo lsobel?
Ngklou a ultutelel el kired el mo melatk a uldesuir, e bo lsebechel a blekerdeled el mo ungil ocholt, e dirrek el bo leklou a rengud e le medemedemek a cheldechedechad.—w19.08 er a 15-17 el llel.
Kede mekera nguu a ulengull, el ngar a telbilel a Jesus el medung er a Mateus 11:28?
Ngar ngii a rebetik a rengrir el Kristiano el oungerachel er a ureor, me a rekot lungil sechelid, e dirrek el ngar ngii a kot lungil el urered.—w19.09 er a 23 el llel.
Ngoeak a ngera el rolel e a Dios a meskid a urunguled me a klisiched el meruul a tekoi? (Fil. 2:13)
Cherengel a taem el donguiu e dolebedebek a Tekingel a Dios, e a Dios a mo smisichid, e dirrek el meskid a urunguled el mo soad el meruul a soal el tekoi. A chedaol reng er ngii a ngosukid el mo ungil meruul a tekoi.—w19.10 er a 21 el llel.
Ngera el melemalt el tekoi a kired el meruul er a uchei er a doruul er a klou el omelilt er a klengar er kid?
Aike el eim el bakes a: Bo mungil research. Moluluuch el olengit a llomeserreng. Morriter er sel uchul me ke melilt a tekoi. Moterekokl a turrekong er kau. Bo letabesul a osengem.—w19.11 er a 27-29 el llel.
Sel uldasu el kirel a diak lengemed el klengar, ngulemuchel lokiu aike el tekingel a Satan el mora Eva?
Ngdiak leuaisei. A Satan a dilu er a Eva el kmo ngkmal diak bo lemad, ngdimlak ledu el kmo ngua bo lemad. Me a ngii di el klsuul el klaumerang a ngilemed er a taem er a Ieleb. Me sel uldasu el kirel a diak lengemed el klengar a locha ulemuchel er uchei er a Dios er a letereklterir tirke el chad el milleketek er a tebekebok er a Babel.—w19.12 er a 15 el llel.