KAU, ke omes er kau el ua chad el blechoel loba omereng el saul? Kede rokui el kired el melatk er tia el ker. A Biblia a ulemlaoch el kirel tia el taem er kid el kmo, a rebetok el chad a mo “diak loreng a saul.” (2 Ti. 3:2) Ke locha dirrek el medengelterir a rechad el omdasu el kmo ngkmal kirir a rebebil el meruul a tekoi el mo er tir el ua lebelsir. Te dirrek el omdasu el kmo ngdiak a ultutelel el loreng a saul el kirel a tekoi el lengilai. Nglocha diak lsoam lobengterir a rechad el uaisei a omerellir.

Engdi a remesiungel a Jehovah a muchelechel el kmo: “Moreng a saul.” Me ngkired el blechoel el ‘mereng a saul era rokuil tekoi.’ (Kol. 3:15, BT; 1 Th. 5:18, BT) Ngmo uchul a klungioled sel deblechoel mereng a saul. Ngbetok a uchul me tiang a klemerang el tekoi.

A ta el klou a ultutelel el uchul me ngkired el blechoel mereng a saul, a rullid el mo ungil a uldesued el di kired. A chad el blechoel mereng a saul a ungil a uldesuel el kirel, e ngike el luluureng a sulel a dirrek el mo ungil a rengul. Ngera uchul me a omereng el saul a rullid kid me a rebebil el mo ungil a rengud? Ka molatk er tiang, a lsekum a chad a kongei el chemoit a temel meruul a tekoi el kirem, e ngbelkul a kmo kau a rredemelel a tekoi el longetmokl er ngii el mei er kau. Te omekerreu er kau. Me sel bo modengei el kmo te omekerreu er kau, e tiang a rullau el mo ungil a rengum el kirem. Kede melatk er a tekoi el dilubech el mora Ruth. A Boas a mle bekururau el mora Ruth. Me ngulterekokl a omerellel el rirellii a Ruth el kmal mo ungil a rengul e dirrek el mlo melechesuar el kmo ngar ngii a chad el omekerreu er ngii.​—Rut 2:10-13.

Ngileakl el klou a ultutelel el doba omereng el saul el bedul a Dios. Kede ulterekokl el blechoel el melatk el kirel aike el betok el ungil sengk el tekoi er a klereng me a dirrek el klechad el bla lebeskid a Jehovah e dirk melemolem lomeskid. (Dut. 8:17, 18; Rel. 14:17) Me ngungil a deblechoel melatk el kirel aike el ungil tekoi el lomeskid a Dios, engdi nglmuut el klou a klungiolel a lsekum kede mengoit a temed el melebedebek ngii el betok el klengeltengat el bla lebeskid, kid me tirke el betik er a rengud. Me sel dolebedebek el kirel a blekerurau er ngika el Ulemeob, e nglmuut el smisichii a omereng el saul er kid el bedulngii, e dirrek el lmuut el dochelii a klemedengei er kid er a klungel a bltkil a rengul me a dirrek lomereng el saul er ngii el bedulkid.​—1 Jn. 4:9.

Ngkired el blechoel melebedebek aike el tekoi el lomeskid a Jehovah, e dirrek el kired el mereng a sulel el kirel tia el ungil blekerdelel. (Psa. 100:4, 5) Ngar ngii a omelekoi el kmo, “a olechotel a omereng el saul a klou a lerellii el kirel a deurreng er a rechad.”

A ta er a uchul me ngungil a doreng a saul, a olekes a deleuill er kid me a rebebil. Kede rokui el soad a loreng a suled a rebebil. Me ngungil tekoi sel deblechoel mereng a sulir a rebebil, e tiang a lmuut lokes a deleuill er kid me tir. (Rom 16:3, 4) Me a lmuut el tang, a rechad el blechoel mereng a saul a beot er tir lolengeseu er a rebebil. Ngmo dmeu a rengrir a lsekum a rebebil a meruul a ungil el mo er tir, me ngrulleterir el dirrek el mo sorir meruul a ungil. Nguaisei, sel dolengeseu er a rebebil e ngmo uchul a deurreng er kid, el ua ledilu Jesus el kmo: “Ng bai klou el deurreng a dorous er a dolai.”​—Rel. 20:35.

A Robert Emmons, el codirector er a University of California a mesuub el kirel a blekeradel el omereng el saul, e dilu el kmo: “Ngkired el mo medengei el kmo kid a ousbech er a rebebil, e seikid e kede mo oba omereng el saul. A lebebil e kede merous e a lebebil e kede kuk melai.” Tiang a belkul a kmo ngmo dmeu a rengud er a klengar er kid sel dolengeseu er a rebebil e dirrek el lolengeseu er kid a rebebil. El ua tiang, te locha mo meskid a keled me a lechub e te ngosukid el kirel a  ukeruul. (1 Ko. 12:21) A chad loba omereng el saul a mereng a sulir a rebebil el kirel a tekoi el leriruul el bedulngii. Me a ker a kmo kau, ke blechoel mereng a sulir a rebebil el kirel a tekoi el loruul el eko er kau?

A ta er a uchul me ngungil moba omereng el saul a mo ngosukau el mo blechoel lomes a ungil er a tekoi er a bai momes a kngtil a tekoi. Ngsebeched lomekesiu er tiang el mora biich, e le ngosukau el di mo omes a klungiolel a tekoi. Me a cherengel a taem el moreng a saul, e ngmengal mo biusech a medam er a ungil tekoi, el ngii a rullau el mengal mo oba omereng el saul. Me a lsekum ke mo blechoel melatk a tekoi el moba omereng el saul el kirel, e ngrullau el mo soam el meruul a tekoi el apostol Paulus a mengelechel er kid el mo meruul er ngii el kmo: “Moldeu a rengmiu el di blechoel el ngar a Rubak.”​—Fil. 4:4.

Sel deblechoel loba omereng el saul, e ngrullid el mo diak di domdasu a mekngit. Ngdiak lsebechel a chad loba omereng el saul e osisiu el taem e ngmechechei, e mekngit a rengul, me a lechub e ngkesib a rengul. A rechad el blechoel loba omereng el saul a dirrek el diak lengibes a kerruul. Ngdmeu a rengrir er aike el ngar ngii er tir, e diak di lemechesang losiik a kerruul.​—Fil. 4:12.

Me kau el Kristiano a medengei el kmo a Satan a soal rullau el mo mekngit a rengum e mo mechitechut a rengum lokiu a ringel el bo mchelebangel er a chelsel tia el taem er a uriul sils. Ngkmal soal rullau el mo mekngit a uldesuem e di mo mengeremrum el kirel a bek el tekoi. E a chouaitia el blekeradel a rulleterir a rechad el mo meringel er tir el rongesau er sel taem el momerk er a ungil chais el mo er tir. E a mera er ngii, a omereng el saul me a rodech er a reng er a Dios a dmak el tekoi, el uldimukl er a deurreng el kirel a ungil tekoi el Dios a omeskau, e dirrek el uldimukl er a klaumerang el kirel aike el telbiil el bla leketmokl el kirel a ngar medad el taem.​—Gal. 5:22, 23.

Me kau el ta er a chedal a Jehovah a uchul me ke locha kongei aika el tekoi el mla medung er tia el suobel el kirel a omereng el saul. Me nguaisei, engdi nglocha meringel er kau lolecholt er a omereng el saul a lebebil er a taem. A leuaisei, e lak bo lemechitechut a rengum. Ngkmal sebechem el mekurulii a omereng el saul er kau e melemolem lurrekodel er ngii. Lokiu a ngera el rolel? Mongoit a taem er a bek el sils el melatk a bebil tekoi er a klengar er kau el sebechem el mereng a saul el kirel. A cherengel a taem el moruul uaisei, e ngmengal mo beot er kau el olecholt a omereng el saul er kau. E tiang a rullau el mo dmeu a rengum el kuk ngaruchei er tirke el blechoel di melatk a meringel blekeradel er a klengar er tir. Molebedebek el kirel aike el ungil tekoi el uchul a deuil a rengum el lolisiich er kau er ngii a Dios me a rebebil. Ngdirrek el sebechem el rullii a journal er kau, e lmuches er ngii a eru me a lechub a edei el tekoi el rirellau el mo oba omereng el saul er seikid el sils.

A rebebil el merriter a tekoi a kmo “sel deblechoel mereng a sulir a rechad, e ngsebechel ngodechii a rolel a loureor a brain er kid el rullid el mo dmeu a rengud er a klengar er kid.” Ngdmeu a rengul a chad el blechoel oba omereng el saul. Me bo lungil a rengum, e molatk aike el rokui lungil tekoi el bla mngai, e moldeu er a rengum er a ungil tekoi el mla duubech er a klengar er kau, e bo blechoel loba omereng el saul! Me lak mongemikr a ungil tekoi el mla meketmokl e bai “moreng a sulel a RUBAK ele ngii a ungil.” Nguaisei, “moreng a saul era rokuil tekoi.”​—1 Kr. 16:34; 1 Th. 5:18, BT.