A cheldecheduch el ngar er a Duteronomi 22:25-27 a diak losaod el kirel a telemellel ngika el chad, e le ngii el chad a mle mekngit. Tia el llach a bai melekoi el kirel ngika el redil el kmo ngdiak a telemellel. Ka momtab aike el bades er a uchei er tia el cheldecheduch.

Aike el bades er a uchei a mesaod er a tekoi el dilubech er a chelsel a “beluu” el chad a mlo obengkel a redil el kirel mo bechil a ta er a chad. Tia el omerellel ngika el chad a mlo uchul e ngrirebet er a laokreng, e le ngar osengir a rechad e ngika el redil a ua bla bo lebechiil. E kuk mekera el kirel ngii el redil? Ng “dimlak loldiu el osiik osebecheklel.” E le blo leuaisei, e te ngar ngii a rechad el rirengesii me te mo mesebechakl er ngii. Engdi ngii el dimlak loldiu me ngbelkul a kmo, ngkilengei er tia el omeruul, me tir el terung a dul mukerrekeriil el kmo te mekngit.​—Dut. 22:23, 24.

A Llach a kuk mlo mesaod er a ta er a blekeradel el kmo: “A lsekum a chad a osiueklii a kekerel redil el kirel mo bechil a tar a chad er a ikrel a beluu e mdechemii e oterebekii, e ngdi ngikel sechal a okodall. Ngikel kekerel redil a diak mokerang er ngii, ele ng dimlak a le temellii el kirel a kodall. Tia di ua chad el mlar ngii er a rengul e odecheleklii a ngar bita er ngii el mekodir. Ng mildechemii ngkel kekerei el redil er a ikrel a beluu e oterebekii, ma luleldiu el olengit a ngesou e ng dimlak a mo sobecheklii.”​—Dut. 22:25-27.

Ngar tia el blekeradel, e a remengeteklel a beluu a uluumerang er ngika el redil. Lokiu a ngera el rolel? Te melatk el kmo ng ‘uleldiu el olengit a ngesou e ng dimlak a mo sobecheklii.’ Me ngdimlak lerebet er a laokreng. Engdi ngike el chad a mlukerrekeriil el kmo ngulterebek e mlora laokreng e le ng ‘mildechemii e oterebekii’ ngika el redil el mle kirel mo bechil a ta er a chad.

Me a leuaisei, alta e tia el llach a milsaod el kirel ngika el redil el kmo ngdiak a telemellel, ngdirrek el mesaod el kmo ngike el chad a mlukerrekeriil el kmo ngulterebek e mlora laokreng. Me ngsebechel mo ulterekokl a rengud el kmo a remengeteklel a beluu a mle “ungil tirterii” tia el tekoi e tilbir a kerrekeriil el oltirakl er a bleketakl el llechul a Dios el lulemelekl er ngii el betok el taem.​—Dut. 13:14; 17:4; Exo. 20:14.