1. A Jehovah, ngmla oterekeklii a ngera el ngerachel el mora ruungalek?

A JEHOVAH a ulemeob er a rekot el obekel el ngar ngii a urungulir el sorir el oungalek. Sei a uchul me a Biblia a melekoi el kmo: “A re ngalek a sengk el mlar a RUBAK.” (Psa. 127:3) Tiang ngera belkul? Ka molatk er tiang. A kmeed el sechelim a olengit er kau el mo omekerreu a betok el ududel. Ngmo uangera uldesuem? Nglocha kmal mo dmeu a rengum e le ngoumerang er kau. Engdi ke locha mo bekikl el kmo kele bo lak el sebechem el kutmokl ngii el ududel. A Jehovah el kot el kmeed el Sechelid, a mesterir a ruungalek a ngerechelir el mo omekerreu er a rengelekir, el tir a lmuut el meklou a ultutelir er a udoud. Ngmesterir a ngerechelir el mo omekerreu e dirrek el rulleterir a rengelekir el mo dmeu a rengrir.

2. Ngera el ker a bo dosaod?

² Ngtecha kirel olterekokl el kmo, a rubekel ngkirir el mo oungalek me a lechub e ngdiak? E ngera sebechir a ruungalek el meruul el ngosuterir a rengelekir el mo ungil a klengar er tir? Ka momtab a bebil el omellach el debetik er a Tekingel a Dios el sebechel ngosuterir a rubekel el Kristiano el mo ungil melilt a tekoi.

3. (a) Ngtecha kirel olterekokl el kmo a rubekel te mo oungalek me a lechub e ngdiak? (b) Ngera el omellach er a Biblia a kirir el melatk er ngii a resechelirir me a rechederir a rubekel?

³ Ngar er a bebil siukang, e a rechad a omdasu el kmo a redirk mlo bechiil el obekel a kirir el di mereched el mo oungalek. Me a telungalek er tir me a rekuk bebil a locha mo orrimel er tir el mo oltirakl er tia el siukang. A Jethro, el odam el ngar er a Asia, a dmu el kmo, “Ngar er a ongdibel, e a rebebil el oungalek a orrimel er a rubekel el diak loungalek me bo loungalek.” A Jeffrey, el kuk ta er a odam er a Asia, a mtebengii el kmo, “A rebebil a melekoi  er a rubekel el diak loungalek el kmo, ngmo diak a chad el omekerreu er tir sel bo lemechuodel.” Nguaisei, engdi a rubekel a kirir el di tir el melilt el kmo, te mo oungalek me a lechub e ngdiak. Tiang a omelilt er tir e dirrek el ngerechelir. (Gal. 6:5) Me a resechelirir me a rechederir a sorir a bo ledeu a rengrir a rubekel el dirk mlo bechiil. Engdi tir el rokui a kirir diak lobes el kmo, ngerechelir a rubekel el di tir el melilt el kmo te mo oungalek me a lechub e ngdiak.​—1 Th. 4:11.

4-5. Ngera el eru el tekoi a kirir a rubekel el mesaod, e oingerang a ungil taem el kirir el mesaod aika el tekoi? Mosaod.

⁴ A rubekel el melilt el mo oungalek a kirir el mesaod aika el eru el meklou a ultutelel el tekoi el kmo: A kot, ngoingerang e ngsorir el mo oungalek? A ongerung, ngmo tela ildisir a rengelekir? Ngoingera ungil taem el bo losaod aika el tekoi? E ngera uchul me aika el eru el tekoi a kmal meklou a ultutelel?

⁵ Ngblechoel el ungil a lsekum a rubekel a mesaod el kmo te mo oungalek me a lechub e ngdiak er a uchei er a bo lebechiil. E ngera uchul? A ta er a ungil luchul a kmo, bo losisiu a uldesuir el kirel tia el tekoi. Ngdirrek el mo sebechir el mesa el kmo te kltmokl el kirel a chouaisei el ngerachel me a lechub e ngdiak. A rebebil el obekel a mengiil el kesengil e ngtang me a lechub e ngeru el rak er a uriul er a chebechiielir e mochu oungalek, e le ngii el tekoi a mo ousbech er a klou el temir me a klisichir. Te dirrek el melatk el kmo a longiil el telkib e ngmo er ngii a temir el mo smau el dmak el kiei el terung e olekes a deleuill er tir.​—Efe. 5:33.

6. A rebebil el obekel, te mla melilt el mekerang e le kid el kiei er a blsechel a ringel?

⁶ A rekuk bebil el obekel a mla melilt el mo oltirakl er tirke el tedei el ngelekel a Noah el sechal me a rebecherir. Tirkang a dimlak di lemereched el mo oungalek. (Gen. 6:18; 9:18, 19; 10:1; 2 Pe. 2:5) A Jesus a ulemekesiu er a taem er kid el mora “taem ra Noah,” me kid a dirrek el kiei er a “uriul sils ra belulechad [el] morngii er ngii a blsechel a ringel.” (Mt. 24:37, BT; 2 Ti. 3:1, BT) Sei a uchul me a rebebil el obekel a ngiltii el diak bo loungalek er chelechang me bo el sebechel klou a temir el meruul er a omesiungir el mora Jehovah.

7. Ngmekera omellach el ngar er a Lukas 14:28, 29 me a Osisechakl 21:5 e ngosuterir a rubekel?

⁷ Me sel lolilt el kmo te mo oungalek me a lechub e ngmo tela ildisir a rengelekir, e a remellomes a rengrir el obekel a kerekikl el oltaut er a omellach el medung er a Lukas 14:28, 29 (Monguiu.) A ta el tekoi a kmo a chad el melatk el omekedechor er a tebekebok a kirel el kutmokl a udoud el mo cheral. Me a rechad el mla  oungalek a medengei el kmo ngklou el chitel a udoud a bo doungalek. Te dirrek el medengei el kmo kede ousbech a taem me a klisichel a bedenged el mo omekeroul er a rengalek. Sei a uchul me ngklou a ultutelel el kirir a rubekel el melatk aika el ker el kmo: ‘Kemam, ngkiram el terung el oureor me bo el sebecham el mechar aike el lousbech a telungalek er kemam? Kemam, ngosisiu a uldesuam el kirel aike el lousbech a telungalek er kemam? A lsekum e ngmo kiram el terung el oureor, e ngtechang a mo omes er a rengelekam? Ngtechang a somam a lomekrael a uldesuir me a omerellir?’ A rubekel sel losaod aika el ker, e ngsebechir el melatk a tekoi el ngar er a Osisechakl 21:5.​—Monguiu.

8. Ngera el omelsemai a sebechir a Rekristiano el obekel el mo chelebangel, e ngera sebechel a ungil bechiil sechal el meruul er ngii?

⁸ A ngalek a ousbech e kirel nguu a klou el temel me a klisichel a demal me a delal. Me a lsekum a rubekel a mo er ngii a rebetok el ngelekir el kmeed el osisiu a rekrir, e nglocha mo meringel er tir el msang a derta el ngelekir sel ulekerreu el lousbech er ngii. A rebebil el obekel el mla er ngii a rebetok el mekekerei el ngelekir a melekoi el kmo ngkmal mlo oberaod er tir. A chedil a locha di mo blechoel el mesaul a bedengel. Me ngmo diak a klisichel el blechoel el mesuub e meluluuch e oldingel. Ngdirrek el mo meringel er ngii el orrenges er a temel a miting er a ongdibel e melai a klungiolel er ngii. Me a ungil bechiil sechal a mo meruul aike el sebechel el ngosuir a bechil el omekerreu er a rengelekir sel lengar er a miting me a lengar er a blai. El ua tiang, ngsebechel ngosuir a bechil el meruul a ureor er a blai. Ngdirrek el kerekikl el lomes el kmo a rokui el ngar er a telungalek er ngii a ngmai a klungiolir er a prokuram er a Omengull el Telungalek. E mo blechoel el obengkel a telungalek er ngii el oldingel a obliil.

9-10. Ngera kirir a ruungalek el meruul me bo el sebechir el ngosuterir a rengelekir?

⁹ Ngera bebil er a tekoi el sebechir a ruungalek el meruul el ngosuterir a rengelekir el mo betik a rengrir er a Jehovah? Ngmekera lomekerreu er a rengelekir er aike el kdekudel el tekoi er tia el mekngit el beluulechad? Ka molatk a bebil el tekoi el sebechir el meruul.

¹⁰ Moluluuch el olengit er a ngelsuil a Jehovah. Molatk er a kerebai el lebilecherei a Manoa me a bechil, el tir a uluungalek er a Samson. A Manoa er a bo lodengei el kmo ngii me a bechil a mo er ngii a ngelekir el sechal, e ngullengit er a Jehovah me lomekrael er tir er a rolel a lomekeroul er a ngelekir.

11. Te mekera ruungalek a loukerebai er a Manoa, el ua losaod a Mengeteklel 13:8?

¹¹ A Nihad me a Alma, el chad er a Bosnia and Herzegovina, a milsuub er a kerebil a Manoa. Te  mesaod el kmo: “Aki di ua Manoa, el ullengit er a Jehovah me lomekrael er kemam el mo ungil oungalek. E a Jehovah ulenger er a nglungucham el okiu a kakerous el rolel, el ua Bades me a babier el mlengai er a Biblia, me a miting er a ongdibel, me a meklou el ongdibel.”​—Monguiu er a Mengeteklel 13:8.

12. Ngera el kerebai a lebilecherei a Josef me a Maria el kirir a rengelekir?

¹² Molisechakl lokiu a omerellem. Aike el molekoi a meklou a ultutelel engdi a omerellem a lmuut el klou a lerellii er a rengelekem. Ngulterekokl a rengud el kmo a Josef me a Maria a milecherei a kmal ungil kerebai el kirir a rengelekir, el uldimukl er a Jesus. A Josef a mle blak a rengul loureor el mesiou er a telungalek er ngii. Ngdirrek el millisiich er tir el mo olecholt a omereng el saul el kirel a tekoi er a klereng. (Dut. 4:9, 10) Me alta Llach a dimlak ledu el kmo ngkirel a Josef el nguu a telungalek er ngii el mora Jerusalem er a “bek el rak” el mo mengedaol er a Baskua, engdi ngmirruul er ngii. (Lk. 2:41, 42) A rebebil el chedam er a taem er ngii a locha ulemes er tia el omerael el kmal meringel, e ousbech er a klou el taem, e dirrek el klou el omengitel a udoud. Engdi a Josef a uleba omereng el saul el kirel a tekoi er a klereng e ulsisecheklterir a rengelekel el mo meruul uaisei. A Maria a dirrek el kmal mle medengei a Bades. Ngokiu a tekingel me a omerellel, e ngulsisecheklterir a rengelekel el mo betik a rengrir er a Tekingel a Dios.

13. Te milekera rubekel e otireklii a kerebil a Josef me a Maria?

¹³ A Nihad me a Alma, el dulsaod er tir er a uchei, a mle sorir el oltirakl er a kerebai el lebilecherei a Josef me a Maria. Me te milekera e ngosuir a ngelekir el sechal el mo betik a rengul e mo mesiou er a Dios? Te melekoi el kmo, “Ngokiu a rolel a klengar er kemam, e aki millasem el ochotii el mora ngelekam el sechal el kmo ngkmal ungil a dekiei el oltirakl a omellach er a Jehovah.” A Nihad a kmo, “Bom ngike el chad el soam a ngelekem a bo el uai ngii.”

14. Ngera uchul me a ruungalek a kirir el mo medengei el kmo te rua techang a obengterir a rengelekir?

¹⁴ Mngesuterir a rengelekem el mo melilt er a rungil sechelirir. A rechedam me a rechedil a kirir el mo medengei el kmo, a rengelekir te obengterir a rua techang e ngera te meruul. Tiang a belkul a kmo a ruungalek a kirir el mo medengei el kmo, a rengelekir te mengedecheduch er a rua techang el ngar er a social media me a dirrek el dengua er tir. Tirka el chad a ngar ngii a bo lerellii er a uldesuir me a omerellir a rengelekir.​—1 Ko. 15:33.

15. Ngera sebechir a ruungalek el suubii er a kerebil a Jessie?

¹⁵ Ngera sebechir a ruungalek el meruul a lsekum e ngdiak a kmal klemedengei er tir el kirel a computer me a lechub e ng mobile device? A Jessie, el chedam el ngar er Huriping a melekoi el kmo: “Ngdimlak a kmal klemedengei er kemam el kirel a technology. Engdi tiang a dimlak lerellemam me lak ki mongelechel er a rengelekam el kirel a kngtil a electronic device.” A Jessie a dimlak lorrob er a rengelekel me lak lousbech aika el klalo e le ngii el dimlak a klemedengei er ngii el kirel. Ngmesaod el kmo: “Ak millekoi er a rengelekek el kmo ngungil a lousbech a electronic device el mesuub a beches el omelekoi, e mesuub a subeled er a miting, e dirrek el menguiu er a Biblia er a bek el sils.” Me kemiu el oungalek, kom mla chemuiu e mesaod a tabesul el ulekrael el kirel a texting me a de post a siasing er a Internet el ngar er a “Teenagers” section er a jw.org^® el obengterir a rengelekiu? Kom mla omes e mesaod aike el video el Who’s in Control​—You or Your Devices? me a Be Social-Network Smart el obengterir? * Aikang a sebechel ngosukau el osisecheklterir a rengelekem el mo ungil ousbech a electronic device.​—Osi. 13:20.

16. Ngera te mla remuul a rebetok el oungalek, el mlo uchul a ngera el tekoi?

 ¹⁶ A rebetok el oungalek a meruul aike el sebechir el kutmokl a techall me bo el sebechir a rengelekir el obengterir tirke el blak a rengrir el mesiou er a Dios. El ua tiang, a N’Déni me a Bomine, el obekel el ngar er a Côte d’Ivoire, a blechoel el mengemedaol er ngike el odam el oldingel a ongdibel el mo kiei er a blirir. A N’Déni a melekoi el kmo: “Tiang a mlo uchul a klungiolel a ngelekam el sechal. Ngmlo omuchel el pioneer e chelechang e ngmesiou el omtechei er ngike el odam el oldingel a ongdibel.” Me kau, ngsebechem el kutmokl a chouaisei el techall el kirir a rengelekem?

17-18. A ruungalek, ngkirir el omuchel el osisecheklterir a rengelekir er oingerang?

¹⁷ Momuchel el osisecheklterir a rengalek sel dirk lemekekerei. Ngkmal ungil a lsekum a ruungalek a omuchel el osisecheklterir a rengelekir sel dirk lemekekerei. (Osi. 22:6) Ka molatk er a Timothy, el ulemais el obengkel a apostol Paulus. A delal a Timothy el Eunice me a delal mechas el Lois a ulsisecheklii er a ‘lekekerei’ el dirk tolechoi.​—2 Ti. 1:5; 3:15.

¹⁸ A lmuut el ta er a obekel er a Côte d’Ivoire, el Jean-Claude me a Peace, a mle sebechir el mekeruleterir a retelolem el ngelekir el mo betik a rengrir e mo mesiou er a Jehovah. Ngera ngilsuterir el mo sebechir el kutmeklii tia el tekoi? Te uleltirakl er a kerebil a Eunice me a Lois. Te melekoi el kmo, “Te di mle mekekerei a rengelekam, el telkib el taem er a uriul er a lemechell, e aki ulemuchel el olisechakl er tir er a Tekingel a Dios.”

19. Ngera belkul a ‘dolisechakl’ er a Tekingel a Dios el mora rengeleked?

¹⁹ Me ngera belkul a ‘dolisechakl’ er a Tekingel a Jehovah el mora rengeleked? A tekoi el ‘dolisechakl’ a belkul a kmo ‘kede olisechakl e omelekl el betok el taem.’ A bo el sebechir a ruungalek el meruul er tiang, e ngkirir el mo blechoel el obengterir a remekekerei el ngelekir. Me a lebebil er a taem e ngsebechir el mo mechitechut a rengrir e le ngkirir el blechoel el omelekl a ulekrael el mora rengelekir. Nguaisei engdi a ruungalek a sebechir el omes er tiang el ua letechall el sebechir el ngosuterir a rengelekir el mo medengelii a Tekingel a Dios e oltirakl er ngii.

20. Mosaod el kmo ngmekera sebeched el oltaut er a Psalm 127:4 el kirel a okurulir a rengalek.

²⁰ Bo mungil medengelterir a rengelekem. A Psalm 127 a omekesiu er a rengalek el mora kelel a balech. (Monguiu er a Psalm 127:4.) Me  ngdi ua kelel a balech el rruul er a kakerous el klekedall e di kakerous a meklungel, a derta el ngalek a kakerous. Me a ruungalek a kirir el mo medengei el kmo ngua ngera rolel a lolisechakl er a derta er tir. A ta el obekel er a Israel er chelecha el taem el mle ungil mekuruleterir a reteru el ngelekir el mo mesiou er a Jehovah a ouchais a tekoi el ngilsuterir el kmo, “Aki milsuub a Biblia el obengkel a derta er tir er a kakerous el taem.” Nguaisei, a bdelul a bek el telungalek a ngerechelel el melilt er a chouaisei el rolel a omesuub.

21. Ngera el ngeso a sebechir a ruungalek el nguu er a Jehovah?

²¹ A lebebil er a taem, e a ruungalek a mo omdasu el kmo ngkmal meringel er tir el osisecheklterir a rengelekir, engdi a rengalek a sengk el mla er a Jehovah. Me ngblechoel el kltmokl el olengeseu er a ruungalek. Ngkongei el orrenges a nglunguchir. E onger aika el nglunguchir lokiu a Biblia, me a babilenged, me a dirrek el kerebai me a ulekrael er tirke el mla oungalek el ngar er a ongdibel.

22. Ngera bebil er a kot el ungil tekoi el sebechir a ruungalek el mesterir a rengelekir?

²² A rebebil er a rechad a melekoi el kmo a okurulel a ngalek a ousbech er a 20 el rak, engdi mera er ngii a ruungalek a diak a ta el bo lemeterob loungalek. A bebil er aike el kot el ungil tekoi el sebechir el mesterir a rengelekir a bltikerreng me a taem me a osisechakl el mlengai er a Biblia. A derta el ngalek a kakerous a osengir el kirel a osisechakl. Nguaisei engdi a rebetok er tir a lulemekeroul er tir a redemerir me a rederrir el tir a betik a rengrir er a Jehovah, me te uai a uldesuel a Joanna Mae, el odos el ngar er a Asia el dmu el kmo: “Sel kulatk er a osisechakl el kngilai er a demak me a delak, e ak kmal mo oba klou el omereng el saul e le te milellach er ngak e ulsisecheklak el mo betik a renguk er a Jehovah. Ngdimlak di lebeskak a klengar, te milskak a klengar el ngar ngii a belkul.” (Osi. 23:24, 25) A rebetok el miliol el rudam me a rudos a uaisei a uldesuir.