1-2. (a) A doltirakl er a Efesus 6:16, BT e ngera uchul me kede ousbech er a “chomekreakl el kloumerang”? (b) Ngera el ker a bo donger?

ME KAU, ngar ngii a “chomekreakl el kloumerang” er kau? (Monguiu er a Efesus 6:16, BT.) * Ngulterekokl el ngar ngii. A klaumerang er kau a omekerreu er kau er a deleboes, me a delengerenger, me aike el rokui el tekoi el diak loltirakl a llechul a Dios, el di ua klou el omekreakl el lomekerreu er a bedenged.

² Me nguaisei, engdi kid a kiei er a taem er a “uriul sils,” me a klaumerang er kid a melemolem el measem. (2 Ti. 3:1, BT) Me ngmekera e mo sebechem el merriter er a omekreakl er a klaumerang er kau me lolemolem el mesisiich? E mekera e sebechem el melemolem el melisiich er ngii? Kede mo mesaod a nger er aika el ker.

3. A resoldau, te mekerang a omekreakl er tir, e ngera uchul?

³ Ngar a taem er a Biblia, e a resoldau a blechoel el ngar ngii a omekreakl er tir el bliull er a budel a charm. Me te mengilt a omekreakl er tir lolab a cheluch el meruul er a budel a charm me ngdiak lemetemall e dirrek el meruul er a deel me ngdiak bo el chemert. Me a lsekum a soldau a metemall a omekreakl er ngii, e ngkirel rullii el mo ungil me bo lsebechel el di kltmokl el kirel a mekemad. Me ngokiu a ngera el rolel e tia el omeruul a sebechem lomekesiu er ngii el mora klaumerang er kau?

4. Ngera uchul me ngkirem el merriter er a omekreakl er a klaumerang er kau? E oeak a ngera el rolel e ke meruul er tiang?

 ⁴ Me kau a di ua soldau er a irechar el kirem el blechoel merriter e omekerreu er a omekreakl er a klaumerang er kau me di leblechoel el kltmokl el kirel a mekemad. Me kid a Kristiano me kede oumekemad el omtok er a recherroued luldimukl er a remekngit el anghel. (Efe. 6:10-12) Ngdiak a ngii di el chad el sebechel el omekerreu er a omekreakl er a klaumerang er kau el kirem. Me ngmekerang e mo ulterekokl a rengum el kmo a klaumerang er kau a mo mesisiich er sel taem el bo mchebangel a omelsemai? A kot, e ngkirem el meluluuch el olengit a ngeso er a Dios. E kirem lousbech er a Tekingel a Dios el ngosukau el mo omes er kau loba osengel a Dios sel lomes er kau. (Heb. 4:12) A Biblia a mesaod el kmo: “Moumeral ulsirs er a RUBAK el oba rengum el rokir. Lak mulsirs er a di llemesel a rengum.” (Osi. 3:5, 6) E sola e molatk er a tekoi el dirk dilubech er a klengar er kau me aike el tekoi el murruul el kirel. El ua tiang, ngmla ta el bom chelebangel er a meringel mondai el kirel a udoud? Ke mlo melatk er sel telbilel a Jehovah el ngar a Hebru 13:5 el kmo: “Ng kmal diak bo kchitau ma ka bo kubes er kau”? Tia el telbiil, ngulterekeklii a rengum el kmo a Jehovah a mo ngosukau? A leuaisei, e ngolechotel a kmo ke kerekikl el omekerreu er a omekreakl er a klaumerang er kau.

5. Ngera el tekoi a sebechem el mo metik sel morriter er a klaumerang er kau?

⁵ Nglocha mo mechas a rengum sel morriter er a klaumerang er kau e bo betik a chelitechetum. Ke locha mo mtebengii el kmo ngar ngii a chelitechetum el dirk melemolem e kau a diak molechesuar. El ua tiang, ke locha mo mtebengii el kmo a diak a belkul el sebekreng me a blulak me a dirrek el chelitechetul a rengum a mla choitechetur a klaumerang er kau. A lsekum tiang a duubech leko er kau, e ngmekerang e mo sebechem lomekerreu er a klaumerang er kau me lak lluut el metemall?

6. Ngera bebil er a ungil sebekreng?

⁶ A bebil sebekreng a ungil. El ua tiang, ngungil el tekoi sel dekerekikl el oldeu er a rengul a Jehovah me a Jesus. (1 Ko. 7:32) A lsekum kede ruebet er a oberaod el klengit, e ngouedikel a rengud el soad el lmuut el sumechii a deleuill er kid me a Dios. (Psa. 38:18) Ngdirrek louedikel a rengud el soad loldeu er a rengul a bechid e dirrek lomekerreu er a rechedal a telungalek er kid me a rekldemed er a klaumerang.​—1 Ko. 7:33; 2 Ko. 11:28.

7. A doltirakl er a Osisechakl 29:25, e ngera uchul me ngdiak el kired el mo medakt er a rechad?

⁷ Engdi a diak a belkul sebekreng a sebechel tomellii a klaumerang er kid. El ua tiang, kede locha mo blechoel suebek a rengud el kirel a keled me a biled. (Mt. 6:31, 32) Me kede locha mo mechesang losiik aika el klalo. E dirrek el mo soad a betok el udoud. Me a lsekum kede mo uaisei, e a klaumerang er kid el mora Jehovah a mo mechitechut me a deleuill er kid lobengkel me ngdirrek el mo mechitechut. (Mk. 4:19; 1 Ti. 6:10) Me a lechub e kede kuk mo mechitechut er a ta er a bedengel a sebekreng, el kmal mo suebek a rengud el kirel a uldesuir a rechad el bedulkid. Seikid e kede locha mo medakt er a rechad el melenguul me a lechub e te oldechelakl er kid, el kuk ngaruchei er a dekted el mora Jehovah. Me a lsoad lomekerreu er kid er tia el tekoi, e ngkmal kired el meluluuch lolengit er a Jehovah me lesisichii a klaumerang er kid e lebeskid a blekenged el mo dechor el mtekengelii tia el omelsemai.​—Monguiu er a Osisechakl 29:25; Lk. 17:5.

8. Ngkirel mo uangera uldesued el kirel a blulak el tekoi?

⁸ A Satan el “demal a bek el blulak,” a ousbech er tirke el longedereder er tir el mo omerk a blulak el kirel a Jehovah me a dirrek el rudam me a rudos er kid. (Jn. 8:44) El ua tiang, a rumtok a mera el osisechakl a oltobed a blulak me a diak lemelemalt el tekoi el kirel a cheldebechelel a  Jehovah lokiu a websites me a TV me a dirrek el chais er a beluu. E aika el blulak a bebil er a “kmard el belechel” a Satan. (Efe. 6:16) Kede mo mekerang a lsekum a chad a omuchel el mesaod a chouaika el blulak el mei er kid? Ngdiak dekengei lorrenges er ngii! E ngera uchul? E le kid a oumerang er a Jehovah e dirrek el oumerang er a rudam er kid. E a mera er ngii, ngkired el mengeroid er kid er a rumtok a mera el osisechakl. Ngdiak dekengei er a ngii di el chad me a lechub e ngii di el ngerang me lerellid el mo outoketok er tir alta e ngsoad el mo medengei aika el tekoi.

9. Ngerang a telemellel a chelitechetul a rengud?

⁹ A chelitechetul a rengud a sebechel choitechetur a klaumerang er kid. Kid a diak lsebeched el mengemikr a mondai er a klengar er kid. E a mera er ngii, ngklebelung el tekoi a lsekum kede meruul uaisei. Ngbai kmal kired el kerekikl me lak debechei a mondai er kid me di longesang er a uldesued. E le a lsekum kede mo uaisei, e ngsebeched el oridii sel mengasireng lomelatk el Jehovah a mla tibir el mei er kid. (Och. 21:3, 4) A chelitechetul a rengud a sebechel rullid el mo mechitechut me ngmo diak dosiou er a Jehovah. (Osi. 24:10) Tia el tekoi a diak el kirel duubech el mei er kid.

10. Ngera ke suubii er a babilengel a ta el odos?

¹⁰ Ka molatk er a rolel e a ta el odos er a Merikel a melemolem el melisiich er a klaumerang er ngii er a taem el omekerreu er a bechil el kmal smecher. Ngar a babilengel el mora klou el obis er kid, e ngmilluches el kmo: “A blekeradel el kim chelebangel er ngii a kmal meringel e dirrek el mengitechut a rengmam a lebebil er a taem, engdi a omeltkam a mesisiich. Ak kmal oba omereng el saul el kirel a rokui el tekoi el Jehovah a omeskemam el melisiich a klaumerang er kemam e dirrek el melisiich a rengmam. Aki mera el ousbech er tia el ulekrael me a omelisiich. Ngolengeseu er kemam el melemolem el mesiou er a Jehovah e dirrek el mo sebecham loutekangel a tekoi el Satan a ousbech el mengitechut er kemam.” Me ngar a tekingel ngika el odos e kede mo medengei el kmo ngsebeched el mo mesisiich er a chelitechetul a rengud! Lokiu a ngera el rolel? Momes a mondai el mchelebangel el ua lomelsemai er a Satan. E moumerang el kmo a Jehovah a mo mengelaod er kau. E moba omereng el saul el kirel a kall er a klereng el lomeskau.

11. A lsoad el merriter er a klaumerang er kid, e ngera el ker a kired el melatk?

¹¹ Ngsebechem el mtebengii el kmo a omekreakl  er a klaumerang er kau a kirel lmuut el mo mesisiich? Ngar aika el mereko el buil, e ngmle sebechem el oibngau er a diak a belkul el sebekreng? Ngdimlak mkengei lorrenges a blulak el tekoi el lomerk a rumtok a mera el osisechakl e moutoketok er tir? E mlo sebechem el mo mesisiich er a chelitechetul a rengum? A leuaisei, e ngbelkul a kmo a klaumerang er kau a mesisiich. Engdi ngkmal kired el kerekikl e le ngar ngii a lmuut el bebil er a dongu er a Satan el lousbech el oumekemad er kid. Me bo dosaod er a ta er ngii.

12. Ngera sebechel mo duubech a lsekum kede mo nguibes a kerruul?

¹² A ngibes er a kerruul a sebechel rullid el mo mechesang me ngmo mechitechut a klaumerang er kid. A apostol Paulus a dilu el kmo: “A soldau el oureor, a diak longesengsang er ngii er a tekingir a re di chad el diak le soldau, ele ng soal di kldmokl el mor a ikel lomdasu a merreder er ngii.” (2 Ti. 2:4) Me tirke el soldau er a Rom a dimlak lsebechir el meruul a ngii di el ureor. Ngera sebechel mo duubech a lsekum a soldau a mengemikr er tia el llach?

13. Ngera uchul me a soldau a diak el kirel mengesechusem er ngii er a tekoi er a siobai?

¹³ Ka di molatk er tiang. A delebechel el soldau a mengoit a temir er a ta el tutau el mesuub loumekemad lousbech a saider er tir, engdi a ta er tir a dibus. Ngika el soldau a ngar a beluu el mechesang lolterau a kall er a makit. E sel kebesengei e a resoldau a mengoit a temir el mengetmokl a bilir er a mekemad e merorem a saider er tir. Engdi ngike el ngar ngii a siobai er ngii a mengoit a temel el meruul a kall el bo lolterau er a bo lekukuk. E sel tutau, e a cheraro a di dilum loumekemad. Ngtecha el soldau a kltmokl el kirel a mekemad, e mo rullii a merredelel el mo dmeu a rengul? E soam a techa el soldau a bo ledechor er bita er kau? Ngike el soldau el mle ungil kltmokl me a lechub e ngike el mle mechesang er a ta er a tekoi?

14. Kid el soldau er a Kristus, ngkired el mengreos er a ngera el tekoi?

¹⁴ Me kid a ua rungil soldau el diak lsoad el mo mechesang er a bebil er a tekoi me bo lak denguu a kengei er a Remerreder er kid el Jehovah me a Kristus. Kede omes er tia el techelled el kuk mekreos er a ngii di el tekoi er tia el beluulechad er a Satan. Kede kerekikl me ngar ngii a temed me a klisiched el mesiou er a Jehovah e dirrek el  kerekikl me a omekreakl er a klaumerang er kid me a biled er a mekemad a melemolem el ungil kltmokl.

15. Ngera lomengelechel a ledillii a Paulus, e ngera uchul?

¹⁵ Ngkmal kired el melemolem el kerekikl! E ngera uchul? A apostol Paulus a milengelechel el kmo “tirikel sorir el mo merau” a mo “mecheuid ra kloumerang.” (1 Ti. 6:9, 10, BT) A tekoi el “mecheuid ra kloumerang” a belkul a kmo kede mo mechesang el osiik a klalo el diak dousbech. Me ngmo uchul e kede mekurulii a ngelbesel a rengud el mora “betok el klebelung el tomellid el ngibes.” Me lak debechei a chouaika el ngibes me be lesiseb er a rengud, e bai bo domes el kmo ngklekedall el sebechel tomellii a klaumerang er kid.

16. A cheldecheduch el medung er a Markus 10:17-22, ngrullid el mo melatk a ngera el ker?

¹⁶ Alta e ngar ngii a ududed el sebeched el omechar a betok el klalo. Me ngar ngii a telemellel a lsekum kede omechar a klalo el soad engdi mera er ngii ngdiak dousbech? Ngdiak leuaisei. Engdi ka di molatk aika el ker: Mo lmuut me a lsekum ngsebeched el mecherar a klalo, engdi a ker a kmo, ngmo er ngii a temed me a klisiched el ousbech er ngii e dirrek el mengetmokl er ngii el klalo? Me a lechub e ngkmal mo betik a rengud er ngii el klokled? Me a bltkil a rengud el mora klokled ngrullid el mo ua uldesuel ngike el kekerei el chad el ultngeklii a okedongel a Jesus el mo menglou er a omesiungel el mora Dios? (Monguiu er a Markus 10:17-22.) Ngmo uchul a  klou el klungioled sel domekbeot er a klengar er kid e bo dongoit a mekreos el temed me a klisiched el meruul a soal a Dios!

17. Ngera el tekoi a diak el kired lobes er ngii?

¹⁷ Ngkmal diak el kired lobes el kmo kid a ngar a mekemad e dirrek el kired el di kltmokl el oumekemad er a bek el sils. (Och. 12:17) A rudam me a rudos er kid a diak el sebechir el oba omekreakl er a klaumerang er kau el kirem. Kede rokui el kired el melemolem el melisiich er a klaumerang er kid.

18. Ngera uchul me a resoldau er a irechar a mle kirir kerekikl lorreked a omekreakl er tir?

¹⁸ A irechar e a soldau a modanges e le ngii el mle bekeu loumekemad. Engdi ngmo merur a lsekum ngme remei el diak a omekreakl er ngii. A chad er a reksi er a Rom el Tacitus a milluches el kmo: “Ngkmal klou el otuub a lsekum a soldau a me remei el diak a omekreakl er ngii.” Tiaikid a ta er a uchul me a soldau a kirel kerekikl lurrekodel er a omekreakl er ngii er a mekemad.

19. Ngoeak a ngera el rolel e kede melemolem el lurrekodel er a omekreakl er a klaumerang er kid?

¹⁹ Kede melemolem lurrekodel er a omekreakl er a klaumerang er kid lokiu sel deblechoel el ngar aike el miting er a Rekristiano e dirrek el douchais el kirel a ngklel a Jehovah me a Rengedel el mora rechad. (Heb. 10:23-25) Me a lmuut el tang, kede menguiu er a Tekingel a Dios e meluluuch el mo er ngii er a bek el sils me lengesukid loltaut ngii el tekoi er a klengar er kid. (2 Ti. 3:16, 17) Seikid e aike el klekedall el lousbech a Satan loumekemad er kid a mo diak el sebechel lokngemedid. (Isa. 54:17) A “chomekreakl el kloumerang” er kid a mo omekerreu er kid. Me kede mo dechor el mesisiich, e oureor lobengterir a rudam me a rudos er kid. Kede mo mesisiich er a mekemad el dengar ngii er a bek el sils. E sel kot el ngaruchei er ngii el rokui, ngmo er ngii a techelled el mo dechor er bita er a Jesus er sel taem el ngii a mo mesisiich er a mekemad lomtok er a Satan me a rechedal.​—Och. 17:14; 20:10.