1. A Jehovah, ngmechikid me kede mekerang?

A JEHOVAH a mechikid me ngdi kid el melilt el kmo ngmo uangera klengar er kid. Ngolisechakl er kid el mo meruul a ungil omelilt, e sel doruul el uaisei, e ngosukid el mo ungil a klengar er kid. (Psa. 119:173) Me sel doltaut a tekoi er a llomeserreng el desuub er a Biblia, e ngmo sebeched el lmuut el mo ungil melilt a tekoi.​—Heb. 5:14.

2. Ngera el meringel el tekoi a sebeched el mo chelebangel er ngii er a uriul er a dolilt a tekoi?

² Engdi ngmo lmuut me sel bla derellii a ungil el omelilt, e nglocha mo meringel er kid el lomelemii a tekoi el bla domuchel er ngii. Ka molatk a bebil er aika el blekeradel: A ngeasek el odam a melilt el mo menguiu er a Biblia el rokir. Me ngkmal ungil loltaut er tia el tekoi el sesei el sandei e mo diak loruul er ngii. A odos a melilt el mo mesiou el regular pioneer engdi ngdi omosech er a temel el mo omuchel er tia el omesiou. A chelechad er a remechuodel a dmak el tibir el kmo te lmuut el mo blak a rengrir el oldingel er a rudam me a rudos er a ongdibel el mo melisiich er tir, engdi ngmla mo chuib a betok el buil, e dirkak lomuchel er tia el tekoi. Aikang a kakerous el blekeradel, engdi ngar ngii a tekoi el losisiu er ngii. Te rokui el millib a tekoi engdi ngdimlak lotaut. A Rekristiano er a irechar el ngar er a Korinth a chilebangel er a osisiu el omelsemai. Me ka momtab el kmo ngera klubeled er a tekoi el lurruul.

3. Ngera te tilbir el mo meruul er ngii a Rekristiano er a Korinth, engdi ngera dilubech?

³ Ngar er a bekord el 55 C.E., e a Rekristiano er a Korinth a rirellii a kmal klou a ultutelel el omelilt. Te mlo medengei el kmo a rudam er tir el ngar er a Jerusalem me a Judea a chuarm a ringel me a chelebuul, me a bebil el ongdibel a mengudel a udoud el mo olengeseu  er tir. Me nguleak a blekokuii me a blekururau el reng er tir e te tilbir el mo olengeseu er a rudam er tir, me te uleker er a apostol Paulus er a rolel e ngsebechir el olengeseu. Me ngmilsterir a ulekrael e dirrek el tiltkii a Titus el mo olengeseu el melai a udoud. (1 Ko. 16:1; 2 Ko. 8:6) A uriul er a sesei el buil, e a Paulus a mlo medengei el kmo a Rekristiano er a Korinth a dimlak lotutii a telbilir. Sei a uchul me a tengetengir a locha mlo diak el bechir sel temel el bo lemengai el mora Jerusalem el obengkel aike el kuk bebil er a tenget el mla er aike el bebil er a ongdibel.​—2 Ko. 9:4, 5.

4. A Paulus, ngmillisiich er a Rekristiano er a Korinth el mo mekerang el ua losaod a 2 Korinth 8:7, 10, 11?

⁴ A Rekristiano er a Korinth a rirellii a ungil omelilt me a Paulus a chilat er tir el kirel a mesisiich el klaumerang er tir me a urungulir el mle sorir el olengeseu. Engdi ngdirrek el mle kirel melisiich er tir me lerekir a tekoi el bla lomuchel er ngii. (Monguiu er a 2 Korinth 8:7, 10, 11.) Me a tekoi el dilubech el mo er tir a osisecheklid el kmo ngmo lmuut er a reblak a rengrir el Kristiano me nglocha mo meringel er tir el lotaut a ungil omelilt er tir.

5. Ngera el ker a bo donger?

⁵ Me kid a di ua Rekristiano er a Korinth el locha mo meringel er kid el oltaut a tekoi el bla dolilt el mo meruul. E ngera uchul? E le ngdiak demecherrungel me kede locha di mo omekmeoud er a tekoi el kired el meruul er ngii. Me a lechub e ngsebechel duubech a bkaischemrungel el tekoi el rullii el mo meringel er kid el otutii a tekoi el dullilt el mo meruul er ngii. (Oli. 9:11; Rom 7:18) Me ngmekera bo dorriter er a omelilt er kid e desa el kmo ngkired el ngodechii me a lechub e ngdiak? E mekera doterekeklii el kmo kede mo lomelemii a tekoi el dulemuchel er ngii e rokir ngii el tekoi?

6. Ngoingera el taem e ngmo kired el melodech a omelilt er kid?

⁶ Ngar ngii a bebil el omelilt el kmal diak el sebeched el melodech. El ua omelilt er kid el mo mesiou er a Jehovah, me a dirrek el blakerreng er kid el mora bechid. (Mt. 16:24; 19:6) Nguaisei, engdi ngdirrek el ngar ngii a bebil omelilt el sebeched el melodech. E ngera uchul? E le ngsebechel mengodech a blekerdelel a klengar er kid. Me ngera sebechel ngosukid el mo meruul a kot el ungil omelilt?

7. Ngera kired el meluluuch el kirel, e ngera uchul?

⁷ Moluluuch el olengit er a llomeserreng. A Jehovah a ulemekrael er a Jakobus el mo meluches el kmo: “A le ngar ngii er kemiu olengesonges er a llomeserreng, e lolengit er a Dios, me le bsang ele Dios a ungil a tekingel.” (Jak. 1:5) Kid el rokui a ‘olengesonges a llomeserreng’ er kid. Me molengit er a Jehovah me lengesukau sel molilt er a tekoi me sel bo el kirem el ngodechii a tekoi el bla mngiltii. Seikid e a Jehovah a mo ngosukau el meruul a ungil omelilt.

8. Ngera el research a kired el meruul er ngii er a uchei er a doruul a omelilt er kid?

⁸ Bo mungil research. Morriter er a Tekingel a Dios, e monguiu a babier el lotobed a cheldebechelel a Jehovah, e mongedecheduch er a rechad el moumerang er tir. (Osi. 20:18) A chouaisei el research a klou a ultutelel a moruul er ngii er a uchei er a omolilt el melodech er a urerem, me a lechub e ke melukl, me a lechub e kosiik el kmo ngera el rolel a skuul a mo ngosukau er a omesiungem.

9. Ngmekerang e mo klungioled a bo de honest er a uldesued?

⁹ Morriter er sel uchul me ke melilt a tekoi. Sel uchul me kede melilt a tekoi a klou a ultutelel er a osengel a Jehovah. (Osi. 16:2) Ngsoal a bo de honest er a rokui el tekoi. Me sel doruul a omelilt er kid, e ngdirrek el soad el mo honest er a uldesued me a dirrek el delongeled kid me a rebebil. A lsekum e ngdiak de honest, e nglocha mo meringel er kid el otutii a omelilt el derirellii. El ua tiang, a ngeasek el odam a sebechel melilt el mo regular pioneer. Engdi a telkib el taem er a uriul, e ngmo meringel er ngii el meruul a temel e dirrek el mo diak el deu a rengul er a omesiungel. Me nglocha  ulemdasu el kmo ngmo pioneer e le ngsoal odeuir a rengul a Jehovah. Engdi a mera er ngii, nglocha mle soal el mo pioneer el di oldeu er a rengul a demal me a delal me a lechub e ngkuk ta er a chad.

10. Ngera kede ousbech a lsoad el melodech a tekoi er a klengar er kid?

¹⁰ Ka molatk er a chad el mesuub er a Biblia el soal mo stob el melamech a dekool. Me ngmo diak lolamech el tang me a lechub e ngeru el sandei alta ngkmal meringel er ngii. Engdi nglmuut el mo melamech. Nguaisei, engdi ngmo mesisiich er tia el tekoi! A bltkil a rengul el mora Jehovah me a urungulel el soal odeuir a rengul a ngosuir el mo mesisiich er tia el mekngit el omeruul.​—Kol. 1:10; 3:23.

11. Ngera uchul me ngkirel ngar ngii a ulterekokl el turrekong er kid?

¹¹ Moterekokl a turrekong er kau. Sel lulterekokl a turrekong er kau, e ngmo beot er kau el oltaut. El ua tiang, ke locha mla ngiltii el mo blechoel el menguiu er a Biblia. Engdi a lsekum ngdiak a ulterekokl el schedule er kau el menguiu er a Biblia, e nglocha mo diak el sebechem el otutii tia el tekoi. * Me a lechub a remechuodel er a ongdibel a sebechir el melilt el mo blechoel el oldingel er a delebechel, engdi uriul er a telkib el taem, e ngdiak lemelemii tia el tekoi el lullilt el mo meruul er ngii. Me a bo el sebechir el kutmeklii tia el tekoi, e ngungil a lolatk aika el ker el kmo: “Kemam, aki mla lemuches a ngklir a rudam me a rudos el mo ngmai a klungiolir er a odngelam? Aki mla oterekeklii a taem el sebecham el mo oldingel er tir?”

12. Nglocha mo kired el mekerang, e ngera uchul?

¹² Bo letabesul a osengem. Ngdiak a ta er kid el ngar ngii a temel, me a kloklel, me a lechub e ngklisichel el mo remuul a rokui el tekoi el soal. Me bo letabesul a osengem. A lsekum e ngmo kirel, e nglocha kirem el ngodechii a omelilt el ngii a diak el sebechem el otutii. (Oli. 3:6) Engdi ngkuk mekerang a lsekum ke mla merriter er a omelilt er kau, e ngodechii, e mesa el kmo ngsebechem el otutii? Momtab a eim el tekoi el sebechel ngosukau el rokir a tekoi el bla momuchel er ngii.

13. Ke mekerang e nguu a klisiich el mousbech er ngii el oltaut er a omelilt er kau?

¹³ Moluluuch el olengit a klisiich el mo oltaut a tekoi. A Dios a sebechel meskau a klisiich el mo ‘sebechem’ el otutii a omelilt er kau. (Fil. 2:13) Me molengit er a Jehovah el kirel a chedaol reng er ngii el mo meskau a klisiich el mousbech er ngii. Molemolem el meluluuch el mo lmuut er a taem el momdasu el kmo a nglunguchem a dirkak lemonger. Ngdi ua lullekoi a Jesus el kmo: ‘Molengit me mnguu [a chedaol reng].’​—Lk. 11:9, 13.

14. Ngmekera omellach el ngar er a Lukas 14:28 e ngosukau el otutii a omelilt er kau?

¹⁴ Moterekeklii a tekoi el soam el meruul er ngii. (Monguiu er a Lukas 14:28.) A lsoam el rokir a tekoi el bla momuchel er ngii, e ngkirem el oterekeklii. E kirem el oltirakl a tekoi el bla moterekokl. Me ngdi osisiu, sel moruul er a omelilt er kau, e ngkirem el lemuches a rokui el tekoi el soam el mo oltaut. E bingii a klou el ureor el mo betok el mekekerei el ureor. A Paulus a millisiich er a Rekristiano er a Korinth el mo imakl a sesei el udoud el mo tengetengir “sel uchelel a bek el sandei” er a bai longiil er ngii el mei e bochu lolai a udoud. (1 Ko. 16:2) Me sel obii a meklou el ureor el mo betok el mekekerei el ureor e ngsebechel ngosukau me ngdiak bo el mesaul a rengum.

15. A uriul er a bla mluches aike el soam el mo meruul, e ngera sebechem el rullii?

¹⁵ A lsekum e ke lemuches aike el soam el mo meruul, e ngmo beot er kau el oltaut. (1 Ko. 14:40) El ua tiang, a chelechad er a remechuodel a mukrael el mo ngiltii a ta er tir el mo lmuches a rokui el tekoi el sorir el mo kutmokl, e ngiltii a chad el mo oungerachel er tia el tekoi, e oterekeklii a taem el kirel mo merek tia el tekoi. Me a remechuodel el oltirakl er tia el ulekrael a klou a techellir el mo oltaut a tekoi el bla lolilt el mo  meruul. (1 Ko. 9:26) Ngsebechem el oltirakl er tia el osisiu el ulekrael sel moruul a chelsengum er a bek el sils. El ua tiang, ngsebechem el lemuches aike el kirem el meruul er a bek el sils, el omuchel er sel kot el tekoi el bo moruul er ngii. A cho moruul el uaisei, e ngmo beot er kau el rokir a tekoi el bla momuchel er ngii e dirrek el mo kutmokl a lmuut el betok.

16. Ngera kede ousbech er ngii el mo oltaut er a omelilt er kid, e mekera Rom 12:11 a lolisiich er tiang?

¹⁶ Mluut el mo blak a rengum. Ke ousbech er a blakerreng el mo sebechem el otutii a tekoi el mle soam el meruul er ngii e rokir ngii el tekoi. (Monguiu er a Rom 12:11.) A Paulus a dilu er a Timothy me bo el ‘blak a rengul’ e bo el “kerekikl” me bo el sebechel el mo ungil sensei. Ngsebeched el oltirakl er tia el ulekrael er a Paulus el kirel a ngii di el tekoi el soad el meruul el mora Jehovah.​—1 Ti. 4:13, 16.

17. Ngmekera Efesus 5:15, 16 e ngosukid el otutii a tekoi el soad el meruul er ngii?

¹⁷ Bo mungil lousbech a temem. (Monguiu er a Efesus 5:15, 16.) Mngiltii a taem el bo motutii a omelilt er kau e lak mngedechii. Lak mongiil er sel kot el ungil taem el bo moltaut a tekoi el bla mngilt, e le nglocha diak el sebechel mei seikid el taem. (Oli. 11:4) Bo mkerekikl me lak bechei a diak el sal meklou a ultutelel el tekoi me lechesengkau me bo lak a temem me a lechub e ngklisichem el kirel aike el lmuut el meklou a ultutelel el tekoi. (Fil. 1:10) A lsebechel, e mocheuekl a taem el diak a mo mengesang er kau. Mouchais er a rebebil el kmo ke ousbech a taem el mo omdasu a tekoi. E mokodir a dengua er kau e bo momes a email me a social media er kau er a uriul. *

18-19. Ngera sebechel ngosukau el di melemolem el oltaut er a tekoi el bla mngiltii el mo meruul er ngii alta e ngmo meringel?

¹⁸ Molatk er a ulebengelel a tekoi el mullilt el mo meruul er ngii. A orokiolel a tekoi el mullilt er ngii a di ua sel basio el kau a soam el mo er ngii. A lsekum e ngsoam el mo er sel basio, e ngkirem el di melemolem el merael alta e ngmla mechesimer a rael me ngkirem el ngodechii a omerollem. Me ngdi osisiu, sel doltaut a osenged er a orokiolel a tekoi el dullilt er ngii, e ngdiak lebeot el mo mechitechut a rengud sel bo dechelebangel a mondai.​—Gal. 6:9.

¹⁹ Ngsebechel mo meringel er kid el meruul a ungil omelilt e dirrek el oltaut ngii el omelilt. Engdi ngokiu a ngelsuil a Jehovah, e ngsebechem el nguu a llomeserreng me a klisiich el mousbech er ngii el rokir a tekoi el bla momuchel er ngii.