1. A Jehovah ngsebechel el mo ngerang me bo lemotaut a moktek er ngii?

A JEHOVAH a sebechel el mo ngii di el ngerang el mo oltaut a moktek er ngii. El ua tiang, a Jehovah a sebechel el mo Sensei, e Chad el Mengelaod, e Chad el Omerk er a Klumech. Aikang a di bebil er a tekoi el sebechel kutmokl. (Isa. 48:17; 2 Ko. 7:6; Gal. 3:8) Engdi, ngblechoel el ousbech er a rechad el mo oltaut a moktek er ngii. (Mt. 24:14; 28:19, 20; 2 Ko. 1:3, 4) A Jehovah a dirrek el sebechel meskid a llomeserreng me a klisiich el dousbech er ngii el mo oltaut a soal. Aikang a rokui el omesodel a ngklel a Jehovah, el lolekoi a rebebil el chellimosk el chad.

2. (a) Ngera uchul me a lebebil er a taem e kede omdasu el kmo a Jehovah a diak lousbech er kid? (b) Ngera kede mo mesaod er tia el suobel?

² Kid el rokui a soad a Jehovah a lousbech er kid el mo oltaut a moktek er ngii, engdi a rebebil a locha omdasu el kmo a Jehovah a diak lousbech er tir. E ngera uchul? Te omdasu el kmo ngdiak el sebechir el kutmokl aike el sorir el ngar er a omesiungir e le ngrekrir, me a blekerdelel a klengar er tir, me a lechub e te metitur. E a rekuk bebil a locha omdasu el kmo ngungil a omesiungir me ngdiak a ultutelel el longlou er ngii. Ngar tia el suobel, e kede mo mesaod er a rolel e a Jehovah a sebechel mesterir a derta el chad aike el lousbech el mo oltaut a moktek er Ngii. Kede dirrek el mo mesaod a cheldecheduch er a Biblia el Jehovah a milsterir a remesiungel, el sechal me a redil, a urungulir me a klisichir el mo meruul a tekoi. E a ulebongel er ngii, kede mo mesaod a rolel e ngsebeched el kongei er a Jehovah me ngousbech er kid.

3. A doltirakl er a Filipi 2:13, e ngmekera Jehovah lengesukid el mo soad el meruul a tekoi?

³ Monguiu er a Filipi 2:13. * A Jehovah a sebechel meskid a urunguled el mo meruul a tekoi. Ngmekera loruul er tiang? Kede locha remenges el kmo ngar ngii a ngar er a ongdibel el ousbech a ngeso me a lechub e ngar ngii a tekoi el kirel ketmekill. Me a lechub e a remechuodel a chiuii a babier el mla er a obis er a Resioning er a Jehovah el ouchais el kirel a ta er a ongdibel el ousbech a ngeso. Me kede mo melatk el kmo: ‘Ngera sebechek el rullii el olengeseu?’ Me a lechub e ngmloterekokl er kid a ngerachel el domdasu el kmo ngmeringel er kid e diak dodengei el kmo ngsebeched el mo ungil kutmeklii me a lechub e ngdiak. Me a lechub e kede milenguiu a bebil Bades, e mo melatk el kmo, ‘Ngmekera kuusbech aika el bla kchuiu el mo ngosuterir a rebebil?’ A Jehovah a diak lorrimel er kid el mo meruul a ngii di el tekoi. Engdi sel lesa el kmo kede kongei el melatk aike el sebeched el meruul, e ngmo meskid a urunguled el mo kutmokl.

4. Ngmekera Jehovah lomeskid a klisiich el mo meruul a tekoi?

⁴ A Jehovah a dirrek el sebechel meskid a klisiich el mo meruul a tekoi. (Isa. 40:29) El mekerang? Ngsebechel meskid a chedaol reng er ngii el rullid el lmuut el mo meduch el kutmeklii a tekoi. (Exo. 35:30-35) A Jehovah a sebechel lousbech er a cheldebechelel el osisecheklid er a rolel a doruul a bebil er a ureor. Me a lsekum e ngmo diak modengei el kmo ngmekera cho moruul er a ureor, e molengit a ngeso. Ngdirrek el sebechem el olengit er a bekururau el Demad el ngar er a eanged el kirel “sel diak le metuk el klisiich.” (2 Ko. 4:7, BT; Lk. 11:13) A Biblia a ngar ngii a betok el olechotel a rolel e a Jehovah a olengeseu er a resechal me a redil el mo er ngii a urungulir me a klisichir el meruul a tekoi. Me sel dosaod a bebil er aika el olechotel, e dolatk er a rolel e a Jehovah a sebechel el ousbech er kid el mo meruul a osisiu el tekoi el lurruul tirke el chad.

5. Ngera kede suubii er a temel me a rolel e a Jehovah uluusbech er a Moses el olsobel er a rechedal?

⁵ A Jehovah a rirellii a Moses el mo olsobel er a rechad er a Israel. Engdi ngoingera el taem e a Jehovah a mlo ousbech er a Moses? Tia ngsel taem el Moses a ulemdasu el kmo ngkltmokl er a uriul er a ‘lemosisechakl er a bek el llomeserreng er a re chad er a Ekipten’? (Rel. 7:22-25) Ngdiak, e le Jehovah a di uluusbech er a Moses er a uriul er a lengesuir el mo ngariou e medemedemek a rengul el chad. (Rel. 7:30, 34-36) A Jehovah a milsa blekengel a Moses el mo sebechel dechor medal ngike el kot el mesisiich el merreder er a Ekipten. (Exo. 9:13-19) Ngera kede suubii er a temel me a rolel a Jehovah er a lousbech er a Moses? A Jehovah a ousbech er tirke el oukerebai a blekerdelel e dirrek el ultuil er ngii el kirel a ngeso.​—Fil. 4:13.

6. Ngera kede suubii er sel rolel e a Jehovah uluusbech er a Barsilai el ngosuir a King David?

⁶ A betok el dart el rak er a uriul, e a Jehovah a uluusbech er a Barsilai el mo ngosuir a King David. A David me a rechedal a mle “songerenger e meched a rengrir” er a lechiis er a ngelekel a David er a Absalom. A Barsilai el chudelang er sel taem a kilengei el tongetengii a klengar er ngii me a rebebil el mo ngosuir a David me a rechedal. A Barsilai a dimlak lomdasu el kmo ngii el chudelang a uchul me a Jehovah a dikea lousbech er ngii. Ngbai uluusbech aike el ngar ngii er ngii el mo ngosuterir a rechedal a Dios el ousbech a ngeso. (2 Sa. 17:27-29) Ngera klubeled er tiang? A demeklou me a demekekerei, engdi a Jehovah a sebechel lousbech er kid el mo ngosuterir a rekldemed er a klaumerang, el ngar er a beluad me a lechub a ta er a beluu, el kirel aike el  lousbech. (Osi. 3:27, 28; 19:17) Me alta e ngdiak el sebechel di kid el mo ngosuterir, engdi nglocha sebeched el melenget el kirel a ureor er a beluulechad el rokir er sel taem el bebil er a beluu a ousbech a ngeso.​—2 Ko. 8:14, 15; 9:11.

7. Ngmilekera Jehovah e ousbech er a Simeon, e ngera uchul me tia melisiich er kid?

⁷ A Jehovah a tilbir el mora Simeon, el blak a rengul el chudelang el ngar er a Jerusalem, el kmo ngdiak lemad el dimerekmo lesa Mesias. Tia el telbiil a kmal silsichii a rengul a Simeon, e le ngmilengiil el kemanget el taem el kirel a Mesias. Me a Jehovah a ulemekngeltengat er ngii el kirel a klaumerang me a ducherreng er ngii. A ta er a klebesei, e a Simeon a “milechetikaik er a Chedaol Reng” e mlora templo. E seikid e ngmilsa tolechoi el Jesus, me a Jehovah a uluusbech er a Simeon el mo omlaoch el kirel a ngalek el mo Kristus. (Lk. 2:25-35) Me alta Simeon a locha mlad er a uchei er a lomuchel a omesiungel a Jesus, engdi ngmle dmeu a rengul e le Jehovah uluusbech er ngii el ngar tia el ileakl el rolel. E ngii el Simeon a mo oldeu a rengul er a betok el ungil el tekoi er a ngar medal taem. Ngar er a beches el beluulechad, e ngika el blak a rengul chad a mo mesa rolel e a omengederederel a Jesus a mo uchul a klengeltengat el mora rokui el telungalek el ngar tia el chutem. (Gen. 22:18) Kid me ngdirrek el dmeu a rengud el kirel a ngii di el techall er a omesiou el lomeskid a Jehovah.

8. Ngmekera Jehovah a lousbech er kid el di ua luluusbech er a Barnabas?

⁸ Sera taem er a rekot el Kristiano, e a bekururau el chad el ngklel a Josef a kilengei er a Jehovah me lousbech er ngii. (Rel. 4:36, 37) A rechapostol a ulemekedong er ngii el Barnabas, el belkul a kmo “Ngikel Melisiich a Rengrir a re Chad” e le nglocha kmal mle meduch el mengelaod er a rechad. El ua tiang, a uriul er a bo el Kristiano a Saulus, e a rebetok el rudam a mle medakt el mengedecheduch er ngii e le ngii el uleldechelakl er tirke el uluumerang er a Jesus. Nguaisei, engdi a Barnabas a milengelaod e ngilsuir a Saulus, me a Saulus a kmal uleba omereng el saul el kirel tiang. (Rel. 9:21, 26-28) E a uriul, e a remechuodel er a Jerusalem a mle sorir el melisiich er a rudam el kiliei er a Antiok er a Siria. Me te ulderchii techang el mong? Barnabas! Ngkmal mle ungil a omelilt er tir. Kede menguiu el kmo a Barnabas a “millisiich a rengrir el rokui me bo le meral blak a rengrir el rokui el oltirakl er a Rubak.” (Rel. 11:22-24) Me ngdi osisiu er chelecha el taem, a Jehovah a sebechel el ngosukid el mengelaod er a rudam me a rudos er kid. El ua tiang, ngsebechel lousbech er kid el mo mengelaod er tirke el mla mad a rebetik er a rengrir. Me a lechub e ngsebechel melisiich er kid el mo oldingel me a lechub e kede oudengua el mora chad el smecher me a lechub e ngmechitechut a rengul el melisiich er ngii. Kau ke mo kongei er a Jehovah el ousbech er kau el di ua Barnabas?​—1 Th. 5:14.

9. Ngera kede suubii er sel rolel e a Jehovah ngilsuir a odam el ngklel a Vasily el mo ungil mengkerengel a sib?

⁹ A Jehovah a ngilsuir a odam el ngklel a Vasily el mo ungil mengkerengel a sib. A Vasily er a lemetutk el mo ta er a remechuodel er a dirk el 26 a rekil, e ngulemdasu el kmo ngdiak a kmal duch er ngii el ngosuterir a rudam me a rudos, el ileakl tirke el chelebangel a meringel mondai. Engdi ngilai a ungil osisechakl er a remechuodel el mla mesiou el kemanget el taem me sel Skuul el Kirir a Rudam el Oldingel a Ongdibel me a Remechuodel me a Remesiou er a Ongdibel. Me a Vasily a kmal mle blak a rengul el mo ungil er tia el ngerechelel. El ua tiang, ngrirellii a list er ngii er a mekekerei el turrekong. Me sel lotutii a tang, e ngmengal mo mesisiich er a dektel. Me chelechang e ngmelekoi el kmo: “Sel uchul me ak mle medakt er a ngar er a mong, a mla mo uchul a deuil a renguk er chelechang. A Jehovah sel lengesukak el mo ngiltii a ungil bades el kuusbech er ngii el mengelaod er a odam me a lechub a odos, e ngkmal mo ungil a renguk.” Me kemiu el odam, a lsekum e kom ua Vasily el kongei er a Jehovah me lousbech er kemiu, e ngsebechel rullemiu  el mo oungerachel a meklou el ngerachel er a ongdibel.

10. Ngera ngmirruul er ngii a Abigail? E ngera sebechem el suubii er a kerebil?

¹⁰ A David me a rechedal a luleltoir er tir a King Saul me te uluusbech a ngeso. Me a rechedal a David a ullengit er a ta el merau el chad el ngklel a Nabal el kirel a sesei el kall. Te ulemdasu el kmo ngsebechir el olengit a kall er ngii e le te ulemekerreu a chermel a Nabal er a ked. Engdi a Nabal el kmal di millatk er a di ngii, e dimlak el soal lomesterir a ngii di el ngerang. Me a David a kmal mlo kesib a rengul me ngmle soal mekodir a Nabal me a rokui el sechal er a delengcheklel. (1 Sa. 25:3-13, 22) Engdi a klebokel el bechil a Nabal er a Abigail a mle mellomes a rengul. Me ngulechotii a klou el blekeu, e mlo outubuach er a medal a David e ullengit er ngii me lak bo el chelsechusem er a rsechir a rechad el lokiu a omelaitechei. Ngbai ullengit er a David me bo lultuil er a Jehovah el kirel a ngeso. A ungil tekingel me a omerellel a Abigail a kmal ulechau er a rengul a David. Me ngmiltebengii el kmo a Jehovah a ulderchii. (1 Sa. 25:23-28, 32-34) A Abigail a milekeroul a blekeradel el rirellii el mo sebechel a Jehovah lousbech er ngii. Me ngdi osisiu, a Rekristiano el odos el ungil mengedecheduch e oba sekutaberreng a sebechel a Jehovah lousbech er tir el mo melisiich a telungalek er tir me a rebebil el ngar er a ongdibel.​—Osi. 24:3; Tit. 2:3-5.

11. Ngera te mirruul er ngii a rengelekel a Shalum el redil? E te rua techa oukerebai er tir er chelechang?

¹¹ A betok el dart el rak er a uriul, e a rengelekel a Shalum el redil a bebil er tirke el luluusbech er tir a Jehovah el mo omekbeches er a cheotelel a Jerusalem. (Neh. 2:20; 3:12) Me alta demerir a mle ta er a mengeteklir a rechad, engdi tir a kilengei el mo meruul er tia el kmal meringel e kdekudel el ureor. (Neh. 4:15-18) Te kmal mle ngodech er tirke el meklou a ultutelir el chad er a Tekoa el “dimlak le sorir el merutech a ureor!” (Neh. 3:5) Me ka di molatk er a deuil a rengrir a rengelekel a Shalum er a bo lemerek tia el ureor er a chelsel a di 52 el klebesei! (Neh. 6:15) Chelecha el taem, e te ngar ngii a rudos el kongei e dirrek el dmeu a rengrir el meruul er a kuk ta er a bedengel a omesiou, el ngii a okedecherul me a oketmeklel aike el blai el kirel a omesiou el mora Jehovah. Kede ousbech er tirka el ngar ngii a duch er tir e semeriar er a ureor e dirrek el blak a rengrir el redil me bo el sebechel mo ungil meketmokl aika el ureor.

12. Ngoeak a ngera el rolel e ngsebechel a Jehovah lousbech er kid el di ua sera lousbech er a Tabitha?

¹² A Jehovah a millisiich er a Tabitha el mo “blechoel el meruul a ungil e olengeseu er a re mechebuul,” el ileakl a remelakl el dil. (Rel. 9:36) Ngii el kmal mle bekururau e bekokuii a uchul me a rebetok a kmal mlo mekngit a rengrir er a lemad. Engdi ngkmal mlo dmeu a rengrir er a lokisii er a kodall a apostol Petrus. (Rel. 9:39-41) Me ngera kede suubii er a Tabitha? A demekekerei me a demeklou, me a desechal me a deredil, me kid a di sebeched el remuul a tekoi el mo ngosuterir a rudam me a rudos er kid.​—Heb. 13:16.

13. Ngoeak a ngera el rolel e a Jehovah a uluusbech er a sekemerur el odos el ngklel a Ruth? E ngera ngdilung?

¹³ A ta el sekemerur el odos el ngklel a Ruth a kmal mle soal mo missionari. Sera lekekerei, e ngorreched el mora blai el mo merous a tract. Ngmelekoi el kmo: “Ngkmal mle soak tia el ureor.” Engdi kmal mle meringel er ngak el mengedecheduch er a rechad e kuuchais er tir el kirel a Rengedel a Dios. Me alta ngkmal mle sekemerur, engdi ngmlo regular pioneer er a bo el 18 a rekil. E sera 1946, e ngmlora Watchtower Bible School of Gilead e a uriul e ngmlo mesiou er a Hawaii me a Siabal. A Jehovah a uluusbech er ngii el mo meruul a meklou el ureor er a berkel a klumech el ngar aike el beluu. Me a uriul er a bekord el 80 el rak el loruul er a omesiungel, e ngmillekoi el kmo: “A Jehovah a blechoel melisiich er ngak. Ngmla ngosukak el mo diak  sekemerur. Ak kmal oumerang el kmo a Jehovah a sebechel ousbech er a ngii di el chad el oumerang er Ngii.”

14. A doltirakl er a Kolose 1:29, e ngera kired el meruul a lsoad a Jehovah a bo lousbech er kid?

¹⁴ Ngar aika el mereko el betok el rak, e a Jehovah a mla ousbech er a rechedal el ngar er a betok el kakerous el rolel. Me ngmo ousbech er kau el mo meruul a ngerang? Tiang a di mo ultuil er kau el kmo ke kongei el mo blak a rengum loureor me a lechub e ngdiak. (Monguiu er a Efesus 3:16, 17.) Me a lsekum ke kongei er a Jehovah me ngousbech er kau, e ngsebechel rullau el mo blak a rengum el omerk er a klumech, e mo ungil sensei, e mo ungil mengelaod, e mo meduch el chad er a ureor, e mo ungil sechelei, me a lechub e ke mo ngii di el ngerang el mo oltaut a moktek er ngii.

15. A doltirakl er a 1 Timothy 4:12, 15, e ngera kirir a remekekerei el odam el olengit er a Jehovah me lengesuterir el mo meruul er ngii?

¹⁵ E kuk mekerang el kiriu a remekekerei el odam el di merael mo meklou el chad? Ngkmal klou a usbechir a remesisiich a bedengir el rudam el mo mesiou el ta er a remesiou er a ongdibel. Ngar er a betok el ongdibel, e a ildisir a rudam el mesiou el remechuodel a kuk betok er a remesiou er a ongdibel. Ngsebechir a rebebil er kemiu el mekekerei el odam el mekurulii a urunguliu el mo olab a ngerachel er a ongdibel? A lebebil er a taem, e te ngar ngii a rudam el melekoi el kmo, “Kuk ngak, e ngkmal di ungil er a renguk el mesiou el ta er a publisher er a ongdibel.” A lsekum e nguaisei a uldesuem, e molengit er a Jehovah me lengesukau el mo oureng el mo ta er a remesiou er a ongdibel e bo er a tkurrebab el sebechem el mesiou er ngii. (Oli. 12:1) Aki kmal ousbech er kau!​—Monguiu er a 1 Timothy 4:12, 15.

16. Ngera kired el olengit er a Jehovah, e ngera uchul?

¹⁶ A Jehovah a sebechel rullau el mo ngii di el ngerang me bo lemotaut a moktek er ngii. Me molengit er ngii me lebo er ngii a urungulem el mo meruul er a urerel, e sola molengit er ngii me lebeskau a klisiich el mousbech er ngii. Me alta ke kekerei me a lechub e ke mla mo klou el chad, bo mousbech a temem, me a klisichem, me aike el ngar ngii er kau el mengebkall er a Jehovah er chelechang. (Oli. 9:10) Lak bechei a dakt me a lechub e nguldasu el kmo ke metitur me lerellau me lak mkengei a ileakl el techall el mo menglou er a omesiungem el mora Jehovah. Ngkmal ileakl el techall a dobang el meruul aike el rokui el sebeched el mo mengebkall er ngika el betik er a rengud el Demad!