1. Ngera uchul me a Jehovah a rredemelel a cherrungel el blakerreng er kid?

A JEHOVAH a rredemelel a nguu a cherrungel el blakerreng er kid e le ngii a Ulemeob er kid e Milskid a Klengar. (Och. 4:11) Engdi kede mo chelebangel er a omelsemai, e le alta e ngbetik a rengud er a Jehovah e mengull er ngii, engdi ngsebechel a bebil er a tekoi el kmal mo meklou a ultutelel er a klengar er kid el mo uchul me ngdiak debsa Jehovah a cherrungel el blakerreng er kid. Me ngkired el mo medengei el kmo ngmekera chouaitia el tekoi e mo uaisei. Engdi kot e kede mo mesaod er a belkul a bo lecherrungel a blakerreng er kid el mora Jehovah.

2. A doltirakl er a Exodus 34:14, e ngera bo doruul a lsekum ngsoad el msa Jehovah a cherrungel el blakerreng er kid?

² A Biblia a mesaod el kmo, a doba blakerreng el mora Dios a melekoi el kirel a bo lemesisiich a bltkil a rengud er ngii. Sel debsa Jehovah a cherrungel el blakerreng er kid, e ngdi mo ngii el tang a dongull er ngii. Ngdiak debecherei a ngii di el chad me a lechub e ngii di el ngerang me bo lomtechei er a Jehovah er a klengar er kid.​—Monguiu er a Exodus 34:14.

3. Ngera uchetemel a blakerreng er kid el mora Jehovah?

³ A blakerreng er kid el mora Jehovah a ngar ngii a uchetemel. E ngera uchul? E le ngmengai er a klemerang el bla desuub el kirel. Kede mla mesuub el mo soad a ungil blekerdelel. E dirrek el mla mo medengei e kongei aike el soal me a chetil. Kede dirrek el medengei e melisiich er a moktek er ngii el kired. Kede omes er ngii el chetengakl el tekoi e le ngii el kongei er kid el mo sechelil. (Psa. 25:14) Me a rokui el tekoi el bla desuub el kirel Ngika el Ulemeob er kid a olekeed er kid er ngii.​—Jak. 4:8.

4. (a) Ngera ngousbech er ngii a Diabelong el mengitechut er a blakerreng er kid el mora Jehovah? (b) Ngera kede mo mesaod er tia el suobel?

⁴ A Diabelong a mengedereder er tia el beluulechad, me ngousbech er ngii el melisiich a ngibeserreng er a rechad el rullid me  ngmo meringel er kid el oltngakl. (Efe. 2:1-3; 1 Jn. 5:19) Ngsoal a bo lebetik a rengud er a kuk bebil er a tekoi el rullid me lak debsa Jehovah a cherrungel el blakerreng er kid. Ka me bo dosaod a eru el rolel a loruul er tiang. A kot, e ngmelasem el meruul er kid el mo nguibes a udoud, e a ongerung, e ngmelasem el meruul er kid el mo melilt a mekngit el rolel a ongelaod.

5. Ngera uchul me ngkired el kerekikl me lak bo dengibes a udoud?

⁵ Kid el rokui a soad a lengar ngii a ungil a ildisel el keled, me a bail el doubail, me a basio el dekiei er ngii. Me nguaisei, engdi ngkired el mo kerekikl me lak bo dengibes er a udoud. A rebetok el chad er chelechang a “nguibes a udoud” me aike el tekoi el sebechel a udoud el mechar. (2 Ti. 3:2, BT) A Jesus a mle medengei el kmo a rultirakl er ngii a sebechir el mechetikaik er tia el tekoi. Me ngmillekoi el kmo: “Ng diak a chad el sebechel el mo sibrir a re terul mastang; ng mo chetil a tang e mo soal ngikel kuk tang; ng mo blak a rengul er a tang e mo mengemikr er ngikel tang. Ng diak el sebechiu el di tang e mesiou er a Dios ma udoud.” (Mt. 6:24) Me a chad el mesiou er a Jehovah e a osisiu el taem e ngmengoit er a klou el temel me a klisichel el mengereker a betok el udoud, a sebeched el melekoi el kmo, ngmelasem el mesiou er a reteru el mastang. Ngdiak el sebechel msa Jehovah a cherrungel el blakerreng er ngii.

6. Ngera sebeched el suubii er a tekingel a Jesus el mora ongdibel er a Laodisea?

⁶ Ngar uchei er a rak er a 100 C.E., e a rechedal a ongdibel er a mats er a Laodisea a mle mekedidai a rengrir e kmo: “Ngak a meteet e ungilbesuk; ng diak a kngesonges er ngii.” Engdi ngar osengel a Jehovah me a Jesus, e te mle “chebuul, e meau, e meiko.” Me a Jesus a dimlak lollach er tir e le tir el mle merau, ngbai mirruul uaisei e le tir el kmal mlo nguibes a udoud el mlo uchul a telemellel a deleuill er tir me a Jehovah. (Och. 3: 14-17) Me a lsekum kede mtebengii el kmo kede mocha nguibes a udoud, e ngkired el mereched el sumecheklii a uldesued. (1 Ti. 6:7, 8) E le lak, e ngsebeched el omuchel el mo betik a rengud er a kuk bebil er a tekoi me a Jehovah a mo diak lekengei er a omengull er kid. E le Ngii a “diak le kengei me le ngar ngii a ngodech el chelid er bita er ngii.” (Dut. 4:24) Me ngmekera udoud e mo klou a ultutelel er a klengar er kid?

7-9. Ngera sebechem el suubii er a tekoi el dilubech el mora ta er a remechuodel el ngklel a David?

⁷ Ka molatk er a David, el blak a rengul el mesiou el ta er a remechuodel el kiei er a Merikel. Ngmesaod er ngii el kmo ngkmal mle ungil chad er a ureor. Me a kombalii el luluureor er ngii a ulengesecheklii er a urerel e ngii a dirrek el ngiluu a chetengakl er a beluu el kirel tia el urerel. Me ngmelekoi el kmo: “Seikid el taem, e ak ulemdasu el kmo aika el ungil tekoi a mle olechotel a klengeltengat er a Jehovah.” Engdi tiang, ngmera el tekoi?

⁸ A cherengel a taem, e a David a mlo mtebengii el kmo tia el urerel a millemall er a deleuill er ngii me a Jehovah. Ngmelekoi el kmo: “Sel kngar er a miting er a ongdibel me sel kuldingel a obliil, e ak blechoel el omdasu a mondai er a ureor. Ak milsuk er a klou el udoud, engdi ngkmal di mle blechoel el di meringel a uldesuek, e dirrek el mlo er ngii a mondai er a chebechiielek.”

⁹ Me a David a miltebengii el kmo ngmle kirel el merriter el kmo ngera meklou a ultutelel el tekoi er a klengar er ngii. Ngmelekoi el kmo: “Ak tilbir er a renguk el mo sumecheklii tia el blekeradel.” Me ngmlo soal ngodechii a schedule er a urerel, e silbedii a merrederel er aike el soal el mo meruul. Me ngera dilubech? Ngmlo diak a urerel. Me ngmilekerang? Ngdmu el kmo: “Sel ongingil sils, e ak mlo apply el mo mesiou el auxiliary pioneer er a bek el buil.” A David me a bechil a mlo mengetmokl a blai me bo el sebechir el di tir el mesiou er tir. A cherengel a taem, e ngmlo regular pioneer e a uriul e a bechil a dirrek  el mlo obengkel el pioneer. Te millilt el mo meruul er a ureor el betok el chad a omes el kmo ngariou el ureor, engdi a ureor el loruul er ngii a diak el klou a ultutelel er a osengir. Me alta e ngkmal kekerei a udoud el losuk er ngii, engdi bek el buil e ngar ngii a ungil ildisel a udoud el mechar aike el lousbech. Ngsorir el nguu a Jehovah el mo kot er a klengar er tir, e sebechir el melechesuar el kmo a Jehovah a omekerreu er tirke el nguu a Renged el mo kot er a klengar er tir.​—Mt. 6:31-33.

10. Ngmekera domekerreu er a rengud?

¹⁰ Me a lebetok me a lechub e lekesai a ududed, me kid a di kired el kerekikl er a rengud. Ngokiu a ngera el rolel? Ngokiu sel lak bo lengibes a rengud er a udoud. E dirrek, lak denguu a urered el mo ruchei er a omesiunged el mora Jehovah. Ke mekera e medengei el kmo ngmla mo uaisei a uldesuem? A bebil el ker el sebechem el di kau loker a kmo: ‘Ngak, ak blechoel el melatk el kirel a urerek sel kngar er a miting me a lechub e kuldingel? Ak blechoel el di suebek a renguk el kmo ngmo er ngii a ududek el mo mesiou er ngak er a ngar medak el taem? A udoud me a tekoi er a kerruul, ngmla mo uchul a mondai er a chebechiielek? Ngak, ak kongei el mo meruul er a ureor el lomes a rechad el kmo ngariou el ureor, me bo el sebechek el mengoit er a klou el taem el mesiou er a Jehovah?’ (1 Ti. 6:9-12) Me sel dolatk aika el ker, e lak dobes el kmo a Jehovah a betik a rengul er kid e mla tibir el mo er tirke el blak a rengrir er Ngii el kmo: “Ng kmal diak bo kchitau ma ka bo kubes er kau.” Sei a uchul me a apostol Paulus a milluches el kmo: “Mongeroid a klengar er kemiu er a ngibes er a udoud.”​—Heb. 13:5, 6.

11. A tekoi er a ongelaod, ngera ngrullii el mora chad?

¹¹ A Jehovah a soal a doldeu a rengud er a klengar, e a tekoi er a ongelaod a sebechel ngosukid el kirel tiang. A Tekingel a Dios a melekoi el kmo, “ng bai ungil er a chad a longa e lolim e loldeu er a rengul er a urerel.” (Oli. 2:24) Engdi a oumesingd el tekoi er a ongelaod er tia el beluulechad a ngar ngii a letemellii er kid. Ngsebechel el rulleterir a rebetok el chad el mo kongei me a lechub e ngmo sorir aike el tekoi el Tekingel a Dios a olekebai.

12. A doltirakl er a 1 Korinth 10:21, 22, e ngera uchul me ngkired el mo kerekikl el melilt a tekoi er a ongelaod el soad?

¹² Ngsoad el msa Jehovah a cherrungel el blakerreng er kid, me ngdiak el sebeched el omengur er a “tebelel a Rubak” e kuk mo omengur er a “tebelel a mekngit el chelid.” (Monguiu er a 1 Korinth 10:21, 22.) A domengur el obengkel a chad e ngblechoel el olechotel a  kmo kede kausechelei. Me a lsekum kede melilt a ongelaod el melisiich a blekeu el omeruul, me a oltuubladek, me a deleboes el omeruul, me a ngii di el ngibes er a tech, e ngdi ua domengur el obengterir a recherrouel a Dios e donga ike el kall el bla leketmokl. E seikid, e ngdiak di bo luchul a telemelled, e ngdirrek el tomellii a klausechelei er kid me a Jehovah.

13-14. A doltirakl er a Jakobus 1:14, 15, e ngera uchul me ngkired el mo kerekikl el kirel a ongelaod el dolilt? Mosaod.

¹³ Ka molatk a bebil el rolel e a tekoi er a ongelaod a di uai a kall el dongang. Sel bo domengur, e ngsebeched el melilt el kmo ngera el kall a bo donga er ngii. Engdi sel ta el bla deberkeklii a kall, e ngdiak el sebeched el melilt el kmo ngera ngrullii er a bedenged tia el kall. Me a ungil kall a rullid el mo mesisiich a bedenged, engdi a mekngit el kall a osecherii a bedenged. Me alta e ngdiak demereched el mesa telemellel, engdi cherengel a taem e ngme obeketakl.

¹⁴ Me ngdi osisiu, sel dengiltii a ongelaod el soad, e kede melilt er a tekoi el bo dolsiseb er ngii er a uldesued. A uriul er isei, e a ongelaod el dullilt er ngii a ngar ngii a lerellii er a uldesued me a rengud. Me a ungil ongelaod a sebechel melisiich er kid, engdi a mekngit el ongelaod a mo uchul a telemelled. (Monguiu er a Jakobus 1:14, 15.) Me alta e ngdiak demereched el mes a telemellel a mekngit el ongelaod, engdi cherengel a taem e ngme obeketakl. Sei a uchul me a Biblia a omeklatk er kid el kmo: “Lak kom mecheuid; a Dios a diak le mecheblad, ele ikel lolalem a chad, ia ikei a bo loridm. Ngikel di meruul a soal a klechad er ngii a mo remiid.” (Gal. 6:7, 8) Me ngkmal klou a ultutelel a doltngakl a rokui el ongelaod el melisiich a tekoi el louketui a Jehovah!​—Psa. 97:10.

15. Ngera el sengk a bla lebeskid a Jehovah el mo oldeu a rengud er ngii?

¹⁵ A rebetok el chedal a Jehovah a kmal sorir lomes er a JW Broadcasting^®, el ngii a station er a T.V. er kid el ngar er a Internet. A odos el ngklel a Marilyn a kmo: “A JW Broadcasting a mla ngosukak el lmuut el mo ungil a uldesuek, e dirrek el sebechek el omes a rokui el tekoi er a chelsel e le ngungil el kirek. Me sel bok sabisi me a lechub e bo lemechitechut a renguk, e a kusiik er a cheldecheduch el melisiich me a lechub e ngprokuram er a Morning Worship el mo omes er ngii. E tia rullak el mo kmeed er a Jehovah me a cheldebechelel. Me a JW Broadcasting a kmal mla ngodechii a klengar er ngak.” Me kau, ke melai a klungiolem er a sengk el mla er a Jehovah? Obengkel aike el beches el prokuram er a bek el buil, e a JW Broadcasting a ngar ngii a betok el prokuram er a audio me a video me a dirrek el chelitakl el melisiich el sebeched el omes e orrenges er a ngii di el taem.

16-17. Ngera uchul me ngkired el mo kerekikl er a klungel a taem el dongoit er ngii er a tekoi er a ongelaod, e mekera doruul er ngii?

¹⁶ Ngkired el kerekikl el melilt el kmo ngera el ongelaod a soad, e dirrek el kired el kerekikl el kmo ngua ngera klungel el taem a dongoit el kirel. E le lak, e ngsebeched el mo mengoit a klou el taem el kirel a tekoi er a ongelaod er a bai dongoit el mesiou er a Jehovah. A rebetok a meringel er tir el meluk er a klungel a taem el longoit er ngii el kirel a tekoi er a ongelaod. A ta el 18 a rekil el odos el ngklel a Abigail a kmo: “A osengek er a T.V. a ngosukak el mo olengull er a uriul er a ta el sils el kmechesang el meruul a betok el tekoi. Engdi a lak kerekikl, e ngsebechek el mengoit er a kmal klou el taem el omes a T.V.” A ta er a ngeasek el odam el ngklel a Samuel a kmo: “A lebebil er a taem e a kumes a betok el mekekedeb el video el ngar er a Internet. Me a kumuchel el omes er a chimong, e di diak kulechesuar e ngmla engelakl a edei el mora eua el sikang.”

¹⁷ Me ngmekera cho moluk er a klungel a taem el mongoit er ngii el kirel a tekoi er a ongelaod? A kot, ngsebechem el omes el kmo ngua ngera  klungel el taem a cho mongoit er ngii el kirel a tekoi er a ongelaod. Nglocha sebechem el rullii a rekord er kau el kirel a ta el sandei. Ke luchesii er a kalender a ildisel a sikang el mongoit er ngii el omes a T.V., e omes a tekoi el ngar er a Internet, e ousekool a game el ngar er a dengua er kau. A lsekum e ke mtebengii el kmo ngkmal klou el taem a cho mongoit er ngii el kirel a tekoi er a ongelaod, e molasem el rullii a schedule er kau. Mrellii a telbilem el mo mengoit a klou el taem el kirel aike el meklou a ultutelel el tekoi, e kuk moruul a temem el kirel a tekoi er a ongelaod. E molengit er a Jehovah me lengesukau el mo oltaut aika el telbilem. Seikid e ngmo er ngii a temem me a klisichem el mesuub a Biblia el di kau el tang, me a omengull el telungalek, me a miting er a ongdibel, me a omesiungem el mora Jehovah. Nglocha dirrek el mo ungil a rengum er a taem el mongoit er ngii el kirel a tekoi er a ongelaod e le ke ngiluu a Jehovah el mo kot.

18-19. Ngmekera dochotii el kmo ngcherrungel a blakerreng er kid el mora Jehovah?

¹⁸ A uriul er a loluches el kirel a ulebengelel a beluulechad er a Satan me a dirk merael mei el beches el beluulechad, e a apostol Petrus a dilu el kmo: “Kemiu el betik er a renguk, chelechal mongiil er sel Sils, e lesal mo blak a rengmiu el mengikiid er kemiu e lak a telemelliu er medal a Dios e le chelellakl a rengmiu.” (2 Pe. 3:14) Me sel dolengesenges er tia el omellach e bo dekiei el oltirakl er a llechul a Jehovah er a klengar er kid, e kede ochotii el kmo ngcherrungel a blakerreng er kid el mo er Ngii.

¹⁹ A Satan me a beluulechad er ngii a melemolem el mengesuseu er kid el mo melodech aike el meklou a ultutelel el tekoi er a klengar er kid. (Lk. 4:13) Me nguaisei engdi ngdiak debecherei a ngii di el chad me a lechub e ngii di el ngerang me bo lomtechei er a Jehovah er a chelsel a rengud. Ngulterekokl a rengud el soad el msang a Jehovah a cherrungel el blakerreng er kid, e ngii a kmal rredemelel a nguu!