A CHAD el omes a blekerdelel a eanged a kerekikl el omes er a radar image el kirel a eolt el merael el mei. Ngomes er ngii el merael bedul a basio el kmal betok a rechad el kiei er ngii. Ngii el kmal suebek a rengul er a klengar er a rechad a uchul me ngmora tkurrebab el sebechel el omeklatk er tir er a uchei er a bo lak a taem.

Me ngdi osisiu, chelecha el taem e a Jehovah a omeklatk er a rechad el kirel a “chetau” el ngii a lmuut el kdekudel er a ngii di el tekoi el medung er a chisel a eolt. Ngmekera loruul er tiang? E ngera uchul me ngsebechel el mo ulterekokl a rengud el kmo ngomesterir a rechad a techall el mo sebechir el kutmeklterir el kirel tiang? A bo donger aika el ker, e a kot e bo dosaod a bebil uleklatk el Jehovah milsterir a rechad er a irechar.

Ngar er a taem er a Biblia, e a Jehovah a ulemeklatk el kirel a kakerous el “chetau” me a lechub e ngkerrekeriil el mo er tirke el dimlak lolengesenges er ngii. (Osi. 10:25; Jer. 30:23) Me ngar aikaikid el taem, e ngmilsubed er tirka el dimlak lolengesenges er aike el tekoi el kirir el meruul me bo lolengesenges er ngii. (2 Ki. 17:12-15; Neh. 9:29, 30) Ngmle blechoel el ousbech er a reblak a rengrir el mesiungel er tia el beluulechad el ngosuterir a rechad el mo melodech a blekerdelir me bo el sebechir el mo medengei el kmo ngorechudel a taem er chelechang.​—Amo. 3:7.

A Noah a ta er tirke el chad el Dios a uluusbech er ngii el mo ouchais a kerrekerilel. Ngmle betok el rak el loba blekeu el omeklatk er a remekngit e bekeu el chad er a taem er ngii el kirel a merekung el Ieleb. (Gen. 6:9-13, 17) Ngdirrek el uluuchais er tir aike el kirir el meruul me bo el sebechir el mo suobel, me a uriul e ngmlokedong el “ngikel omerk ra llemalt.”​—2 Pe. 2:5, BT.

Me alta Noah a uleba blakerreng el omeklatk er a rechad, engdi te uleltngakl er tia el klemechel a Dios. Te ulechotii el kmo ngdimlak a klaumerang er tir. Sei a uchul, me te mlad er a lemei a Ieleb el “mechekelterir el rokui.” (Mt. 24:39; Heb. 11:7) Me ngar er a ulebengelel a klengar er tir, e ngdiak el sebechir el loltelechakl el kmo a Dios a dimlak lomeklatk er tir.

A kuk bebil er a taem, e a Jehovah a ulemeklatk er a rechad er a uchei er a lomuchel a “chetau” el kirel a kerrekerilel. Me nguaisei, engdi ngulterekeklii el kmo tirke el mo chuarm a mla er ngii a techellir el kutmeklterir. El ua tiang, ngulemeklatk el kirel aike el Teruich el Ringel el mlo er a rechad er a Ekipten er a irechar. A ta er a olechotel a kmo, ngulderechii a Moses me a Aron el mo omeklatk er a Farao me a rechedal el kirel sel ongeuid el ringel, el ngii a chull el kori el mo uchul a klou el tellemall. E tiang a mlo er ngii er a ongingil el sils, me a Dios, ngmilsterir a techellir el mo osiik a blai me lak lemetemall? A Biblia a melekoi el kmo: “A re bebil er a re ofiser er a Farao a mlo medakt a ikel le dilu RUBAK, me tulelsiseb er a re sibrir ma chermir me lak le mekesakl. E ngdi a re bebil a dimlak lorrenges a ikel le dilu RUBAK, me te di milechititerir a re sibrir ma chermir me ng ngar rikl.” (Exo. 9:18-21) Me ngbleketakl el kmo a Jehovah a ulemeklatk er tir me tirke el di mle mereched el kutmeklterir a dimlak el sal mo chuarm el ua rebebil.

A Farao me a rechedal a dirrek el mluklatk er a uchei er a lemei sel ongeteruich el ringel. Me nguaisei, engdi te ultngeklii tia el uleklatk. (Exo. 4:22, 23) Sei a uchul, me a rekot el ngelekir el sechal a mlad. Ngkol uangera el klengiterreng! (Exo. 11:4-10; 12:29) Ngmle sebechir el olengesenges er tia el uleklatk er a uchei er a bo lak a taem? Ochoi! A Moses a di mle mereched el ouchais er a rechad er a Israel el kirel a mereku el ongeteruich el ringel e dirrek el ulemekrael er tir er a rolel a lolsobel a telungalek er tir. (Exo. 12:21-28) Me te tela el chad a ullengesenges er a uleklatk er a Moses? A doltirakl a bebil omerriter, e te mle edei el miliol el chad, el uldimukl  er a rechad er a Israel me a “rubdois el chad el diak le chad er a Israel” me a rechad er a Ekipten, a silobel er a kerrekerilel a Dios e tilobed er a Ekipten.​—Exo. 12:38.

Me ngdi uaike el olechotel, a Jehovah a blechoel el oterekeklii el kmo a rechad a ngar ngii a techellir el olengesenges a uleklatk er ngii. (Dut. 32:4) Ngera uchul me a Dios a mirruul uaisei? A apostol Petrus a milsaod er ngii el kmo a Jehovah a “diak el soal a ngii di le chad a leriid, e bai soal a rokui el chad a lobult el mo imikr a kngterir.” (2 Pe. 3:9) Me a Jehovah a kmal omekerreu er a rechad. Ngsoal a lobult er a kngterir e bo lolodech a blekerdelir er a uchei er a lemei a kerrekerilel.​—Isa. 48:17, 18; Rom 2:4.

Chelecha el taem, e a rokui el chad a dirrek el kirir el mo olengesenges er a klou a ultutelel el uleklatk el medung er a beluulechad el rokir. Sera lengar tia el chutem a Jesus e ngulemeklatk el kmo tia el blekeradel er a beluulechad a mo nguemed er a taem er a “kloul ringel.” (Mt. 24:21, BT) Me sera losaod el kirel tia el merael mei el kerrekeriil, e ngmilskid a ulaoch el bleketakl el smaod aike el bo lomes e lomelechesiu a rultirakl er ngii sel bo lekeed tia el taem. Me a Jesus a milsaod aika el meklou el tekoi el domes el duubechang er chelecha el taem.​—Mt. 24:3-12; Lk. 21:10-13.

Me ngokiu sel ulaoch, e a Jehovah er chelecha el taem a mengelechel er a rokui el chad el mo chederedall er tia el ungil el omengederederel. Ngkmal soal a rebekongesenges el chad a loldeu a rengrir er a ungil klengar er chelechang me a dirrek el ike el klengeltengat el mo er ngii er a merekung el beches el beluulechad. (2 Pe. 3:13) A Jehovah a soal ngosuterir a rechad el mo oumerang a telbilel. Me ngmeruul er tiang lokiu sel lomesterir a klumech el mo olsobel a klengar er tir. Tia el klumech a “Ebangkelio el kirel ngii el Renged” el Jesus a ulemlaoch el kmo ngmo “mosisechakl er a beluulchad el rokir el kirel el mo ocholt el mor a rokui el chad.” (Mt. 24:14) Me a Dios a mla omekrael er a remera el mesiungel el mo ouchais er tia el ‘osisechakl’ me a lechub e te merkii tia el klumech, er a chelsel a bekord el 240 el beluu. A Jehovah a soal a rebetok el chad a bo lolengesenges er tia el uleklatk me bo el sobel er a merael mei el “chetau” el kirel a melemalt el kerrekerilel.​—Sef. 1:14, 15; 2:2, 3.

Me a klou a ultutelel el ker a diak el ultuil er a kmo, a Jehovah a omesterir a rechad a techellir el mo olengesenges a uleklatk er ngii me a lechub e ngdiak. Kede mla mesang el kmo ngblechoel el meruul uaisei. A klou a ultutelel el ker a bai kmo: A rechad, te mo olengesenges a uleklatk er a Dios er a uchei er a bo lak a taem? Me kid el oderchelel a Dios, bo dolemolem el olengeseu er a rebetok el chad me bo el sebechir el mo suobel er tia el merael mei el ulebongel er tia el blekeradel er a beluulechad.