1. Ngmle uangera blekerdelel a klengar er a apostol Johanes er a bekord el rak er a 95?

NGMLE bekord el rak er a 95, e a apostol Johanes a chillebangel er a kmal meringel el blekeradel. Ngchudelang, e mla mengai el mora iungs er a Patmos, e dirrek el ngii a locha mle ulebongel el apostol el dirk kiei. (Och. 1:9) Ngmle medengei el kmo a rumtok a mengeuid a ongdibel e dirrek el meruul a klekakeakl er a delongelir a Rekristiano. Me ngokiu tiang, e ngsebeched el omdasu el kmo ngkmal di kmedung e ngmo diak a remera el Kristiano.​—Jud. 4; Och. 2:15, 20; 3:1, 17.

2. A doltirakl er a Ocholt 7:9-14, e ngera el kmal ungil ues a lilsa Johanes? (Momes er a siasing er a medal tia el babier.)

² Me ngar er a chelsel tia el kmal meringel el blekeradel, e a Dios a milsa Johanes a kmal ungil ues el kirel a ngar medad el taem. Ngar tia el ues, e a ta el anghel a millekoi er a reteua el anghel me lorreked aike el uchul a eolt er a kloul ringel el dimerekmo llecha ulebongel el olangch er a cheldellir a remesiou. (Och. 7:1-3) Tia el cheldellir a remesiou a tirke el 144,000 el mo mengedereder el obengkel a Jesus el ngar er a eanged. (Lk. 12:32; Och. 7:4) E sola e a Johanes a kuk mlo mesaod er a ta er a cheldellir a rechad, el tir a diak lemochur a ildisir me ngmelekoi el kmo: “Uriul er itiang e a kulemes e milsa kloul seked; ng dimlak a chad el sebechel el mechur a ildisir el rokui! Te chad er a bek el beluu, ma kebliil, ma bek el bedengir a re chad ma omelekoi, e dilechor er medal a kingall ma medal a Ngelekel a Sib.” (Monguiu er a Ocholt 7:9-14.) A Johanes a locha kmal mle ungil a rengul el mo medengei el kmo a ngar medad el taem, e te mo er ngii a rubdois el chad el mo mengull er a Dios el ngar er a melemalt el rolel!

3. (a) Ngera uchul me a ues el lilsa Johanes a smisichii a klaumerang er kid? (b) Ngera kede mo mesaod er tia el suobel?

³ Ngsebechel mo ulterekokl a rengud el kmo tia el ues a kmal silsichii  a klaumerang er a Johanes. Ngdirrek el smisichii a klaumerang er kid er chelechang e le ngmesaod el kirel a uriul sils, el ngii a taem el dekiei er ngii. Chelecha el taem er kid, e a rebetok el miliol el chad a mla mechudel el mo mengull er a Jehovah e oba omelatk el mo suobel er a kloul ringel e mo kiei el diak a ulebengelel el ngar tia el chutem. Ngar tia el suobel, e kede mo mesaod er a rolel e a Jehovah ulechotii tia el kloul seked el mora rechedal er a kuk betok er a okai el rak er a mla me mong. Kede dirrek el mo mesaod a eru el tekoi el kirel tia el seked el ngii a: (1) kmal klou me a (2) a rechedal a chad er a kakerous el beluu er a beluulechad. Aika el tekoi a smisichii a klaumerang er tirke el rokui el melatk el mo chedal tia el mukngeltengat el cheldellir a rechad.

4. Ngera el klemerang er a Biblia a diak lodengelii a Klsuul Klekristiano, e ngera me a Remesuub er a Biblia a kuk ngodech a omesodir er ngii?

⁴ A Klsuul Klekristiano a diak lolisechakl a klemerang er a Biblia el kmo, a ta er a klebesei e a rebekongesenges el chad a mo kiei er tia el chutem el mo cherechar. (2 Ko. 4:3, 4) Chelecha el taem, e a oumesingd el klechelid er a Klsuul Klekristiano a olisechakl el kmo, a rokui el ungil chad a mora eanged sel lemad. Engdi tiang a kuk ngodech er a osisecheklel a kekerei el cheldellir a Remesuub er a Biblia el tir a uleltobed er a Watch Tower er aike el ulebongel el rak er a 1800. Te mle medengei el kmo a Dios a lmuut el mo rullii tia el chutem el mo Baradis me a rebetok el miliol el bekongesenges el chad a mo kiei er ngii el chutem, el diak lebo er a eanged. Engdi te uluusbech a taem el mo ungil mtebengii tia el tekoi el kmo, te rua techa tirka el bekongesenges el chad.​—Mt. 6:10.

5. Ngera te uluumerang a Remesuub er a Biblia el kirir tirke el 144,000?

⁵ A Remesuub er a Biblia a dirrek el miltebengii er a Bades el kmo a rebebil a mo ‘mengubet ra belulechad’ el mo mengedereder el obengkel a Jesus el ngar er a eanged. (Och. 14:3, BT) Tia el seked a tirke el 144,000 el blak a rengrir el Kristiano el milsiou er a Dios er a lengar tia el chutem. E kuk mekerang el kirel a kloul seked?

6. Ngera mle uldesuir a Remesuub er a Biblia el kirel a kloul seked?

⁶ Ngar tia el ues el lilsa Johanes, e ngmilsa tia el seked el “dilechor er medal a kingall ma medal a Ngelekel a Sib.” (Och. 7:9) Aika el tekoi a rirelleterir a Remesuub er a Biblia el mo oumerang el kmo a kloul seked, a di ua tirke el 144,000 el mo kiei er a eanged. Me a lsekum tirke el 144,000 me a kloul seked a mo kiei er a eanged, e ngera klekakerous er a delongelir? A Remesuub er a Biblia a uluumerang el kmo a kloul seked a tirke el Kristiano el tir a dimlak el mui el olengesenges er a Dios er a lengar tia el chutem. Alta e te uleltirakl a llechul a Biblia el kirel a tekoi er a kldung, engdi a rebebil er tir a locha dirk mle chedal a Klsuul Klekristiano. Me a Remesuub er a Biblia a uluumerang el kmo chouaitirka el chad a mle blak a rengrir, engdi ngdimlak bo lenguu sel telkael el blakerreng me bo el sebechir el mengedereder el obengkel a Jesus. A bltikerreng er tir el mora Dios a dimlak lesal mesisiich a uchul, me ngii el kloul seked a mle sebechel el mora eanged el mo dechor medal a kingall engdi ngdiak bo ledengchokl aika el kingall.

7. A Remesuub er a Biblia, te uluumerang el kmo te rua techa mo kiei er tia el chutem er a chelsel a Ta el Telael el Rak? E kuk uangera klaumerang er tir el kirir tirke el blak a rengrir el chad er a irechar?

⁷ Me te rua techang a mo kiei er tia el chutem? A Remesuub er a Biblia a uluumerang el kmo a uriul er a bo lemechudel er a eanged tirke el 144,000 me a kloul seked, e a rekuk betok el miliol a mo sebechir el kiei er tia el chutem el mo oldeu a rengrir er a klengeltengat el mo er ngii lokiu a Ta el Telael el Rak el Omengederederel a Kristus. A Remesuub er a Biblia a dimlak lomdasu el kmo tirka el betok el miliol el chad a mo mesiou er a Jehovah er a uchei er a lomuchel  a Omengederederel a Kristus. Te bai ulemdasu el kmo tirka el chad a mo mesuub el kirel a Jehovah er a chelsel tia el Ta el Telael Rak el Omengedereder. E seikid, e tirke el uleltirakl a llechul a Jehovah a mo mukngeltengat er a diak a ulebengelel el klengar el ngar tia el chutem, e tirke el ulemtok a mo nguemed. A Remesuub er a Biblia a dirrek el ulemdasu el kmo a rebebil el mo mesiou el ua “reprins” er tia el chutem er seikid el taem, el uldimukl er tirke el mo mekiis el tir a blak a rengrir el chad el mlad er a uchei er a Kristus a mo nguu a omeksulir el mora eanged er a ulebengelel a Ta el Telael el Rak.​—Psa. 45:16.

8. Ngera edei el cheldellir a rechad el ua lemla er a moktek er a Dios?

⁸ Me a Remesuub er a Biblia a ulemdasu el kmo ngmla er ngii a edei el cheldellir a rechad el: (1) tirke el 144,000, el mo mengedereder el obengkel a Jesus el ngar er a eanged; (2) a kloul seked er a rediak el sal blak a rengrir el Kristiano, el tir a mo dechor medal a kingellel a Jesus er a omerreder el ngar er a eanged; me a (3) rebetok el miliol el mo mosisechakl er a rolel a Jehovah er a chelsel a Ta el Telael el Rak el Omengederederel a Kristus. * Nguaisei, engdi uriul e a Jehovah a ngilsuterir el mo ungil medengelii a omesodel tia el tekoi.​—Osi. 4:18.

9. (a) Ngokiu a ngera el rolel e a kloul seked er tia el chutem a mo dechor er “medal a kingall ma medal a Ngelekel a Sib”? (b) Ngera uchul me a klemedengei er kid el kirel a Ocholt 7:9 a kmal bleketakl?

⁹ Sera rak er a 1935, e a Resioning er a Jehovah a mlo ungil medengei el kmo te ngera chedal a kloul seked el ngar er a ues er a Johanes. Te miltebengii el kmo ngdiak el belkul a kmo a kloul seked a kirir el mora eanged el mo dechor “medal a kingall ma medal a Ngelekel a Sib.” Tiang a di okesiu. Me alta e te mo kiei er tia el chutem, engdi a kloul seked a sebechel dechor “medal a kingall” lokiu sel lekengei er a omengederederel a Jehovah e bo lechederedall er ngii. (Isa. 66:1) E dirrek el sebechir el dechor “medal a Ngelekel a Sib” lokiu sel lolecholt a klaumerang er tir er a olubet el tengetengel a Jesus. Me ngdi osisiu, ngar er a Mateus 25:31, 32, e “a re chad er a bek el beluu” el uldimukl er a remechebirukel, a mo “kldibel er medal” a kebkall el kingellel a Jesus er a omerreder. Me ngbleketakl el kmo, aika el rokui el renged a ngar tia el chutem, el diak el ngar er a eanged. Tia el mla mengodech el klemedengei a kmal mla obeketakl. Ngmesaod er a uchul me a Biblia a diak ledu el kmo a kloul seked a mengai el mora eanged. A di ta el cheldellir a rechad el losaod er ngii el kmo te mo nguu a diak a ulebengelel el klengar el ngar er a eanged, a tirke el 144,000 el mo “mengedereder ra belulechad” lobengkel a Jesus.​—Och. 5:10, BT.

10. Ngera uchul me ngkirel a kloul seked el mo mosisechakl er a rolel a Jehovah er a uchei er a Ta el Telael Rak el Omengedereder?

¹⁰ Me ngulemuchel er a 1935, e a Resioning er a Jehovah a mlo medengei el kmo a kloul seked el ngar a ues el lilsa Johanes a cheldellir a reblak a rengrir el Kristiano el oba omelatk el mo kiei er tia el chutem el mo cherechar. A kloul seked a kirir el mesuub el kirel a rolel a Jehovah er a uchei er a lomuchel a Ta el Telael Rak el Omengedereder me bo el sebechir el mo suobel er a kloul ringel. Te dirrek el kirir el mo mesisiich a klaumerang er tir me bo el ‘sebechir el chemiis era ikal mochu er ngii’ er a uchei er a Ta el Telael Rak el Omengederederel a Kristus.​—Lk. 21:34-36, BT.

11. Ngera uchul me a rebebil el Mesuub er a Biblia a ulemdasu el kmo a rebebil a mo mengai el mora eanged er a uriul er a Ta el Telael Rak el Omengedereder?

¹¹ E kuk mekerang sel uldasu el kmo a rebebil el kmal blak a rengrir el ngar tia el chutem a mo mekiis el mora eanged er a uriul er a Ta el Telael Rak el Omengedereder? Tia el uldasu a mildung er a irechar el ngar er a February 15, 1913, el The  Watch Tower. Me a chad a locha mo melatk el kmo, ‘Ngera uchul me a reblak a rengrir el chad er a irechar a nguu a dikesir el mo kiei er tia el chutem, engdi a Rekristiano el dimlak el sal blak a rengrir a mo kiei er a eanged?’ Tia el uldasu e mle cheleuid e le: (1) a kloul seked a mo kiei er a eanged, e a (2) a kloul seked a meteketek lokiu tirke el diak el sal blak a rengrir el Kristiano.

12-13. A rengellitel me a kloul seked, ngera te medengei el kirel a omeksulir?

¹² Nguaisei engdi ngua ike el bla deues, ngulemuchel er a 1935, e a Resioning er a Jehovah a mlo ungil medengei el kmo, a kloul seked el ngar er a ues el lilsa Johanes a tirke el mo suobel er a Armakedon. Te mo ‘suobel er sel meringel el odechelakl’ el ngar tia el chutem, e mo oldiu el “klou a ngerir el kmo, ‘Osobel a mlar a Dios er kid el mei, el ngii a dengchokl er a kingall, e dirrek el mlar a Ngelekel a Sib el mei!’” (Och. 7:10, 14) A Bades a dirrek el olisechakl el kmo, tirke el mekiis el mo nguu a klengar er a eanged a mo er tir a “lmuut el ungil” el omelatk er tirke el blak a rengrir el chad er a irechar. (Heb. 11:40) Me seikid e a rudam er kid a mlo omuchel el blak a rengrir el mengemedaol er a rechad el mo mesiou er a Jehovah el oba omelatk el mo kiei er tia el chutem el diak a ulebengelel.

¹³ Tirke el chedal a kloul seked a kmal dmeu a rengrir el kirel tia el omeltkir. Te ungil medengei el kmo a Jehovah ngii ngike el olterekokl el kmo a reblak a rengrir el mesiungel te mo mesiou er ngii el ngar er a eanged me a lechub ngar tia el chutem. Me a rengellitel me a kloul seked a ungil medengei el kmo ngdi sebechir el nguu a omeksulir e le ngkrasia er a Jehovah a uchul, el mocholt lokiu a olubet el tengetengel a Jesus Kristus.​—Rom 3:24.

14. A uriul er a 1935, e ngera uchul me a rebetok a mle rrau a rengrir el kmo ngmilekera tia el ulaoch el kirel a kloul seked e mo tmaut?

¹⁴ A uriul er a lobeketakl a klemedengei er a rechedal a Jehovah er a rak er a 1935, e a rebetok a dirk mle rrau a rengrir el kmo ngmekera e meleketek a ildisir tirke el oba omelatk el mo kiei er tia el chutem. El ua tiang, a Ronald Parkin a mle 12 a rekil er sel taem er a lobeketakl el kmo te rua techa chedal a kloul seked. Ngdilu el kmo: “Seikid el taem, e te di mla er ngii a bekord el 56,000 el publisher er a beluulechad el rokir, el klou el ildois er tir a locha mle ngellitel. Me ngdimlak el sal betok a rechedal tia el kloul seked.”

15. Ngmekera e melemolem el mechudel a rechedal a kloul seked?

¹⁵ Me nguaisei, engdi ngar aike el uleak uriul el rak el mei, e a remissionari a mlodurokl el mora betok el beluu, me a ildisir a Resioning er a Jehovah a millemolem el meleketek. E sera 1968, e ngulemuchel a beches el prokuram er a omesubel a Biblia lousbech er a babier el A  Klemerang el Choitikikid el Mora Klengar. A beot el omesodel a klemerang er a Biblia a ulechau a uldesuir a rebetok el chad el mora Jehovah. Me ngdi mle chelsel a eua el rak, e a rekuk betok er a tedobech el miliol el beches el disaiplo a mlo metecholb. Ngdirrek, a Ikelesia er a Katolik er a loridii a klisichel er aike el beluu er a Latin America, me a lmuut el bebil er a beluu, me a dirrek er sera bo lak lorrob er a urered aike el beluu er a Eastern Europe me a bebil el beluu er a Africa, e te liluut el mo betok el miliol a mlo metecholb. (Isa. 60:22) E ngar aika el dirk mlo merek el rak, e a cheldebechelel a Jehovah a mla otobed a betok el klekedall el ngosuterir a rechad el mesuub el kirel aike el lolisechakl a Biblia. Me ngulterekokl el kmo a kloul seked, el chelechang e ngkuk betok er a eai el miliol a ildisir, a mla mechudel.

16. A rechedal a kloul seked, te mla er ker el mei?

¹⁶ Me a Johanes er a loluches el kirel a ues el lilsang, e ngdilu el kmo, tia el kloul seked a mo mechudel lokiu a rechad er a “bek el beluu, ma kebliil, ma bek el bedengir a re chad ma omelekoi.” A profet el Sekaria a ulemlaoch el kirel a osisiu el tekoi er a uchei. Ngmilluches el kmo: “Seikid e a re truich el chad er a ngodech el beluu a mor a tal chad er a Judea e dmu el kmo, ‘Aki obengkem el mor sel bor ngii, ele kim mla remenges el kmo a Dios a obengkem.’”​—Sek. 8:23.

17. Ngera mla meketmokl el olengeseu er a rechad er a rokui el renged me a omelekoi?

 ¹⁷ A Resioning er a Jehovah a medengei el kmo ngkirel loberk a ungil chais lokiu a betok el omelekoi me bo el sebechir el mechudel a rebetok el chad. Kede mla oliuid a babier el dousbech el mesuub er a Biblia el kuk betok er a 130 el rak, engdi chelechang e ngmeketmeklang a kot el klou el ureor lokiu a oidel a babier el ngar er a betok el dart el omelekoi. Me ngbleketakl el kmo, a Jehovah a meruul er a mengasireng el tekoi er chelechang, el mengudel er a kloul seked er a rokui el renged. Me tia el seked a dmak el mengull er a Jehovah el ngar er a kltarreng, alta e te mla er a kakerous el beluu, e le Biblia me a babier el mlengai er a Biblia a mla mo er ngii er a kmal betok el omelekoi. A Resioning er a Jehovah a dirrek el lodengelterir a rechad el kirel a blakerreng er tir el omerk er a klumech me a bltikerreng er a delongelir. Tiang a mera el melisiich a klaumerang er kid!​—Mt. 24:14; Jn. 13:35.

18. (a) A doltirakl er a Isaia 46:10, 11, e ngera uchul me ngdiak lemechas a rengud el kmo a Jehovah a mla otutii a ulaoch el kirel a kloul seked? (b) Ngera uchul me tirke el oba omelatk el mo kiei er tia el chutem a diak lomdasu el kmo ngar ngii a olengesonges er tir?

¹⁸ Ngkmal dmeu a rengud er tia el ulaoch el kirel a kloul seked! Ngdiak lemechas a rengud el kmo a Jehovah a mla otutii tia el ulaoch lokiu a mengasireng el rolel! (Monguiu er a Isaia 46:10, 11.) Tirke el chedal a kloul seked a kmal oba omereng el saul el kirel tia el omelatk el Jehovah mla mesterir. Ngdiak lomdasu el kmo ngar ngii a olengesonges er tir, e le tir el dimlak lemengilt lokiu a chedaol reng er a Dios el mo mesiou lobengkel a Jesus el ngar er a eanged. Ngar er a Biblia, e kede menguiu el kirir a reblak a rengrir el sechal me a redil el lulemekrael er tir a chedaol reng, engdi ngdiak el ta er tirke el 144,000. A Johanes el Chad er a Techolb a ta er tir. (Mt. 11:11) Me a dirrek el David. (Rel. 2:34) Tir me a lmuut el betok a mo mekiis el mo nguu a klengar el ngar tia el baradis el chutem. Tir el rokui, el uldimukl er a kloul seked a mo er ngii a techellir lochotii a blakerreng er tir el mora Jehovah me a omengederederel.

19. Ngmekera otutel a ues el lilsa Johanes el kirel a kloul seked e ochotii el kmo ngkmal orechudel a taem el dekiei er ngii?

¹⁹ Tiaikid a ketengel el taem el Dios a mla mengudel er a rebetok el miliol el chad er a rokui el renged el mo dmak el mesiou er ngii. Me a doba omelatk el mora eanged me a lechub e kede mo kiei er tia el chutem, e ngkired el ngosuterir a rebetok el chad me bo el sebechir el mo chedal a kloul seked er a re “kuk bebil el sib.” (Jn. 10:16, NW) Ngdi kmedung, e a Jehovah a mo kongei me lomuchel a kloul ringel, el ngii a mo tomall a kabelment me a klechelid, el ngii a uchul a klou el chelebuul el kirel a klechad. Me a rokui el chedal a kloul seked a ngar ngii a kmal ileakl el techellir el mo sebechir el mesiou er a Jehovah el ngar tia el chutem el diak a ulebengelel!​—Och. 7:14.