1. Ngera uchul me a Jesus ullengit er a Jehovah me longkar er a rultirakl er ngii?

 SEL kesus er a uchei er a lemad a Jesus e ngullengit er a ileakl el tekoi er a Demal. Ngullengit er a Jehovah me bo longkar er a rultirakl er ngii. (Jn. 17:15, 20) Chochoi a Jehovah a kerekikl el omekerreu er a rechedal. Me nguaisei engdi Jesus a mle medengei el kmo te mo chobangel a mesisiich el odechelakl er a Satan. Ngmiltebengii el kmo te mo ousbech er a ngelsuil a Jehovah el mo mesisiich er aika el odechelakl.

2. A doltirakl er a Psalm 33:18-20, e ngera uchul me ngdiak el kirel mo ouedikel a rengud sel bo dechebangel a ringel?

² A beluulechad er a Satan a mekdubech a betok el orimel el kirir a remera el Kristiano. Kede chelebangel a ringel el sebechel choitechetur a rengud e melasem er a blakerreng er kid el mora Jehovah. Engdi ngua bo desang er tia el suobel, ngdiak lekirel mo ouedikel a rengud. A Jehovah mengkar er kid, ngmes aike el rokui el dechelebangel e kmal kltmokl el mo olengeseu er kid. Ka me dosaod eru locholt er a Biblia el ngii ochotii el kmo, a Jehovah a “mengkar er tirkel meluu er ngii.”​—Monguiu er a Psalm 33:18-20.

3. Oingerang e kede locha mo omelechesiu el kmo ngkmal di kid el tang?

³ Alta kede chedal a klou el telungalek er a klereng me nguaisei engdi a lebebil e kede locha mo omelechesiu el kmo ngkmal di kid el tang. El ua tiang, a ngeasek a locha mo melechesuar el kmo ngkmal di ngii el tang sel bo losaod er a klaumerang er ngii er mederir a rengalek er a skuul me a lechub a lsekum e te melukl el mora beches el ongdibel. A rebebil er kid el kora di mekngit a rengud me a lechub kede oldechelakl a mengitechut el uldasu, a locha omdasu el kmo ngkmal kirel di kid loutekangel. Kede locha omai er a rengud a mengedecheduch er a rebebil el kirel le kede bekikl el kmo ngdiak bo el tab aike el domelechesiu.  Kede locha mo melatk el kmo ngdiak a chad lomekerreu er kid. Sel bo domdasu el kmo ngkmal di kid el tang e ngsebechel rullid el mo suebek a rengud me a lechub e kede mo omdasu el kmo ngdiak a klisiched er a ngerang. A Jehovah a kmal diak el soal a bo domdasu el uaisei. Ngera uchul me ngsebeched el melekoi el uaisei?

4. Ngera uchul me a Elias a dilu el kmo: “Ng di ngak el ta ku medechel”?

⁴ Molatk er a kerebil a Elias. A Jesebel a rirellii er a rengul a mo omekoad er ngii me ngchiliis el betok er a 40 el klebesei. (1 Ki. 19:1-9) Sera lesiseb er a ii e ngdilu er a Jehovah el kmo: “Ng di ngak el ta [el profet] ku medechel.” (1 Ki. 19:10) Te mla er ngii a lmuut el bebil profet er a beluu. A Obadia ulsebelterir a re 100 el profet er a chimal a Jesebel. (1 Ki. 18:7, 13) Me ngngera uchul me a Elias a mlo omdasu el kmo ngdi ngii el tang? Ngulemdasu el kmo tirke el profet lulsobelterir a Obadia mla mad? Ngmlo omdasu el kmo ngdi ngii el tang e le ngdimlak a rechad el mo obengkel mesiou er a Jehovah er uriul er a omeasem er a Baal er a Rois Karmel? Me a lechub e ngmlo omdasu el kmo ngkmal di ngii el tang e le ngdimlak a chad el melechesuar er a berredel a blekeradel el lemla er ngii, me a lechub e ngdimlak a chad lomekerreu? A bades a diak lebleketakl omesodel kirel a uchul me a Elias ulemelechesiu el uaisei. Me nguaisei engdi kede medengei el kmo a Jehovah mle ungil medengelii a lomelechesiu er ngii e mle medengelii sel kmal luluusbech er ngii.

5. Ngmilekera Jehovah e olterekokl er a rengul a Elias el kmo, ngdiak di lengii el tang?

⁵ Ngmle betok a rolel a Jehovah ullengeseu er a Elias. Ngmillisiich er ngii me louchais aike el ngar er a rengul. Ngmle eru el taem loker er ngii el kmo: “Ke mekera er tiang?” (1 Ki. 19:9, 13) A Jehovah ulerrenges er ngii e ngouchais aike el rokui el mlara rengul. A Jehovah ulechotii el mo er ngii el kmo ngobengkel e ngii a kmal mesisiich. Ngdirrek lulterekokl er a rengul el kmo te dirk ngar ngii a rechad er a Israel el mengull er ngii. (1 Ki. 19:11, 12, 18) Nglocha kmal mlo ungil a rengul a Elias louchais er a Jehovah aike el ngar er a rengul e mesa rolel a Jehovah ulenger er ngii. A Jehovah dirrek el milsang a meklou a ultutelel el ngerachel.  Ngdilu er ngii me lebo el chiltii a Hasael el mo king er a Siria, lechiltii a Jehu el mo king er a Israel, e letetkii a Elisa el mo profet. (1 Ki. 19:15, 16) A Jehovah er a lebsa ika el ngerachel e ngngilsuir el mo ulturk osengel er aike el ungil mla er ngii. Ngdirrek el milsa chelmengel er a Elisa. Ngmekera sebechem el ngmai a ulengesuil a Jehovah sel bo momelechesiu el kmo ngkmal di kau el tang?

6. Ngera sebechem el meluluuch el kirel sel bo momelechesiu el kmo ngkmal di kau el tang? (Psalm 62:8)

⁶ A Jehovah mengemedaol er kau el mo meluluuch el mo er ngii. Ngmes a tekoi el omchelebangel, ngolterekokl er a rengum el kmo ngmo orrenges a nglunguchem er a ngii di el taem. (1 Th. 5:17) Ngkmal soal lorrenges er a remesiungel. (Osi. 15:8) Ngera sebechem el meluluuch el kirel sel bo momelechesiu el kmo ngkmal di kau el tang? Mouchais aike el rokui el ngar er a rengum el mo er ngii, el ua lurruul er ngii a Elias. (Monguiu er a Psalm 62:8.) Mouchais er ngii aike el suebek a rengum er ngii me a uldesuem el kirel. Molengit er ngii me lengesukau el mo medengei aike el ungil omoruul sel bo momelechesiu er kau el di kau el tang me a lechub e ngmekngit a rengum. El ua tiang, a lsekum ke mo medakt sel loker a rengalek er a skuul el kirel a klaumerang er kau, e molengit er a Jehovah me lebeskau a blekeu el mo ouchais er tir. Ngdirrek el sebechem el lolengit er a llomeserreng er ngii el mo ouchais er a klaumerang er kau el ngar er a ungil rolel. (Lk. 21:14, 15) A lsekum ke oldechelakl a mengitechut el uldasu, e molengit er a Jehovah me lengesukau el mo mengedecheduch er a chad el kirel. Sebechem lolengit er a Jehovah me lengesuir ngike el bo mongedecheduch er ngii me bo lungil lorrenges e lomtab aike el mosaod. Mouchais er a Jehovah aike el rokui el ngar er a rengum, momes a rolel e ngonger a nglunguchem, e mkengei a ulengesurir a rebebil. Tia mo ngosukau me ngdiak momelechesiu el kmo ngdi kau el tang.

7. Ngera ke suubii er a kerebil a Mauricio?

⁷ A Jehovah mla meskid a urered el ngar ngii a belkul. Ngkmal sebechel mo ulterekokl a rengum el kmo, ngmes aike el rokui el moruul el kirel ongdibel me a berkel a klumech e kmal oba omereng el saul. (Psa. 110:3) Ngmekera omechesang el meruul er tia el ureor e ngosukau me ngdiak bo momelechesiu el kmo ngdi kau el tang? Molatk er a odam el Mauricio. * Kedeb el taem er uriul er a lemetecholb e a ta er a kmeed el sechelil a uleberius el mo cheroid er a klemerang. Ngmelekoi el kmo: “Sera kisang el choitii a Jehovah e ak mlo oumededenger el kmo ngak a sebechek el lomelemii a telbilek el mora Jehovah e melemolem el chedal a telungalek er ngii. Ak mlo omelechesiu er ngak el kmal di ngak el tang e mlo omdasu el kmo, ngdiak a chad el medengelii a tekoi el kumelechesiu  er ngii.” Ngera ngilsuir a Mauricio? Ngdmu el kmo: “Ak milenglou er a omesiungek. Tia ngilsukak el mo diak di kulatk er a di ngak me aika el mekngit el uldesuek. Ngmle dmeu a renguk loureor lobengterir a rebebil er odingel e mlo diak kumelechesiu el kmo ngkmal di ngak el tang.” Nguaisei, ngmo lmuut me a lak el sebeched loldingel obliil, me nguaisei engdi ngmelisiich er kid sel dedak el lomerk er a klumech lousbech er a dengua me a letter writing. Ngera dirrek el ngilsuir a Mauricio? Ngkmo: “Ak dirrek el mle mechesang el meruul a tekoi er a ongdibel. Ak mlo blak a renguk el mengetmokl e oltobed a part er ngak er a miting. Aika el part er ngak a rirellak el mo omelechesiu el kmo ngngar ngii a ultutelek er a Jehovah me a rebebil.”

8. Ngera ngsebechel rullii el mei er kid a meringel el blekeradel?

⁸ Kede medengei el kmo kede mo chobangel a ringel er chelecha el uriul sils. (2 Ti. 3:1, BT) Me nguaisei engdi kede locha mo chobengelii a ringel el dimlak dolatk er ngii, er a taem el dirrek el dimlak dolatk el kmo ngmo uaisei. Kede locha mo chelebangel er a ringelel a udoud, meringel el secher, me a lechub e ngkodellel a betik er a rengud. Ngar aikakid el taem e kede locha kmal mo omelechesiu er a klou el berraod, tokubets a lsekum e ngmekdekudem me a lechub ngduubech el rokui er osisiu el taem. Lak mobes el kmo a Jehovah a mengkar er kid, e oeak a ngelsuil e ngsebeched loutekangel loba ulterekokl el reng.

9. Mosaod a bebil er a ringel el blo lechebangel a Job?

⁹ Molatk er a rolel e a Jehovah ngilsuir a Job. Ngika mlo chobangel a kmal meringel el blekeradel er a chelsel a di kedeb el taem. Chelsel a ta el sils e a Job a silubii el kmo ngmla oriid a rokui el chermel, me a remesiungel me a rengelekel a mla mad. (Job 1:13-19) Kedeb el taem er uriul er tiang, el ledirk chelebangel er a klou el klengiterreng e ngmlo smecher er a meringel el rakt. (Job 2:7) Ngmera el mle meringel a blekeradel el bla er ngii me ngdilu el kmo: “Ng mla tmurk a renguk el chad; ng dikea le soak el melemolem el chad.”​—Job 7:16.

10. Ngmilekera Jehovah e msa Job aike el lousbech el mo outekangel a ringel? (Momes er a siasing er a medal tia el babier.)

¹⁰ A Jehovah milengkar er a Job. Ngkmal mle betik a rengul er ngii me ngmilsang aike el lousbech el mo mesisiich aika el ringel. Ngmilengedecheduch er ngii, e ulemeklatk er ngii er a diak lemekimd el llomeserreng me a ulekerreuil el mora blebelel. A Jehovah milsaod a betok el charm. (Job 38:1, 2; 39:9, 13, 19, 27; 40:15; 41:1, 2) Ngdirrek luluusbech er a Elihu el mo melisiich e mengelaod er a Job. A Elihu ulelterekokl er a rengul el kmo a Jehovah a omekngeltengat a blakerreng er a remesiungel. Me nguaisei a Jehovah dirrek el luluusbech er a Elihu el mo mesmechokl er a Job. Ngngilsuir a Job el mo diak di lolatk er a di ngii loeak a lomeklatk er ngii el kmo, kid a kmal kekerei sel domekesiu er kid er a Jehovah, el Ulemeob a rokui el tekoi. (Job 37:14) Jehovah dirrek el milsa ngerechelel a Job. Ngdilu er ngii me loluluuch el kirir tirke el tedei el mlo oldingel er ngii e mlora klengit. (Job 42:8-10) Ngmekera Jehovah e olengeseu er kid er chelecha el taem sel bo dechebangel a meringel el blekeradel?

11. Ngera el ongelaod a lebeskid a Biblia el kirel sel bo dechebangel a ringel?

¹¹ A Jehovah a diak lemelemalt el mengedecheduch er kid el ua lurruul er ngii el mora Job. Me nguaisei engdi ngmengedecheduch er kid loeak a Tekingel Biblia. (Rom 15:4) Ngmengelaod er kid loeak omelatk el lebla lebeskid el kirel a ngar medad. Molatk a bebil tekoi er a Biblia el sebechel mengelaod er kid sel  bo dechebangel a ringel. Ngar er a Biblia e a Jehovah olterekokl er a rengud el kmo ngdiak a ngii di el ngerang, luldimukl er a meringel el blekeradel el “sebechel el choridid er a bltikerreng er [ngii].” (Rom 8:38, 39) Ngdirrek lolterekokl a rengud el kmo “ng kmeed er tirkel rokui el omekedong er ngii” loeak a nglunguuch. (Psa. 145:18) A Jehovah melekoi el kmo sel bo doumera lulsirs er ngii e ngsebeched loutekangel a ngii di el ringel, e dirrek el sebeched el moba deurreng alta kede chelebangel a ringel. (1 Ko. 10:13; Jak. 1:2, 12) Tekingel a Dios a dirrek el omeklatk er kid el kmo a ringel el dechebangel a di tedeb sel domekesiu er aike el diak a ulebengelel klengeltengat el lebo lebeskid a Dios. (2 Ko. 4:16-18) A Jehovah meskid a ulterekokl el omelatk el kmo ngmo okngemedeterir tirke el rokui el luchul a ringel, el Satan el Diabelong me tirke el rokui el uai ngii. (Psa. 37:10) Ke mla memorize a bebil el bades er a Biblia el mo mengelaod er kau sel bo mchebangel a ringel er a ngar medad?

12. Ngera ngmengerechir er kid a Jehovah el mo meruul er ngii me bo demui el ngmai a klungioled er a Tekingel?

¹² A Jehovah mengerechir er kid el mo kutmeklii a temed er a bek el sils el mesuub er a Biblia e mo dmolech el melebedebek aike el donguiu. Sel bo doltaut aike el dosuub e a klaumerang er kid a mukeroul me kid a lmuut el mo kmeed er a Demad el ngar er a eanged. Tia smisichid el mo outekangel a ringel. A Jehovah dirrek el mesterir tirke el ultuil er a Tekingel a chedaol reng. E tia el chedaol reng a meskid a “klou el klisiich” el mo outekangel a ngii di el ringel.​—2 Ko. 4:7-10.

13. Ngmekera kall er a klereng el lomeskid a “blak a rengul e mellomes a rengul el mesiou” e ngosukid loutekangel a ringel?

¹³ Ngoeak a ngelsuil a Jehovah e a “blak a rengul e mellomes a rengul el mesiou” a mla otobed a betok el suobel, video, me a ongngak el sebechel ngosukid el toketekii a mesisiich el klaumerang e melemolem el kmeed er a Jehovah. (Mt. 24:45) Ngkired el mo ungil lousbech aika el bla lebeskid a Jehovah. A odos er a Merikel a melekoi omereng el saul er ngii el kirel aika el betok el kall er a klereng. Ngdmu el kmo: “Chelsel aika el 40 el rak el kusiou er a Jehovah e ngmla measem a klaumerang er ngak el ngar er a betok el rolel.” Ngmlo chobangel a meringel el blekeradel. A chad el ulemekall a mlai el cheltelaol a milekodir a demal rubak, rechad er a blil a mlo smecher er omekodall el rakt e mad, me ngii a mlo eru el taem le kasinoma. Ngera ngilsuir loutekangel? Ngmelekoi el kmo: “A Jehovah ngkakid er a lomekerreu er ngak. A  kall er a klereng el bla lebeskid loeak a blak a rengul e mellomes a rengul el mesiou a mla ngosukak loutekangel. Tia e a uchul me ngsebechek el melekoi el ua Job el kmo: ‘Ngmo lmuut er a kodellek me ngak a di melemolem er a blakerreng er ngak!’”​—Job 27:5, NW.

14. Ngmekera Jehovah ousbech er a rudam me a rudos er kid lolengeseu er kid sel bo dechebangel a ringel? (1 Thesalonika 4:9)

¹⁴ A Jehovah mla osisecheklterir a rechedal el mo kaubltikerreng e chachelaod er a chelsel a meringel el taem. (2 Ko. 1:3, 4, BT; monguiu er a 1 Thesalonika 4:9.) Te oukerebai er a Elihu el kmal sorir el ngosukid el mo melemolem loba blakerreng sel bo dechebangel a ringel. (Rel. 14:22) El ua tiang, molatk er a rolel e a ongdibel er a Diane a millisiich er ngii e olengeseu er ngii el melemolem el mesisiich er a klereng er uriul er a lebo er ngii a meringel el secherel a bechil. Ngkmo: “Ngmera el mle meringel. Engdi aki mlo melechesuar er a mesisiich el chimal me a bltkil a rengul a Jehovah er a chelsel aike el buil el lesal kmal mle meringel. A ongdibel a mirruul a betok lolengeseu er kemam. Te uleldingel er kemam, uluudengua, e ulemechull er kemam. Aika ngilsukemam el melemolem. Ngak a diak kumekall me a rudam me a rudos ulterekeklii el kmo ngngar ngii a mlik el mora miting e mo oldingel sel sebechek.” Kede mera el ngeltengat el chedal a telungalek er a klereng el kmal lolecholt er a bltikerreng!

15. Ngera uchul me ngulterekokl a rengud el kmo ngsebeched loutekangel a ringel?

¹⁵ Kid el rokui a mo chobangel a ringel. Me nguaisei, engdi ngngua ika el bla desuub, ngkmal diak di lekid el tang sel bo dechebangel a ringel. A Jehovah a di ua betik a rengul el chedam el kmal kerekikl er kid. Ngkmeed er kid, e kltmokl el mo orrenges a nglunguched e kmal soal lolengeseu er kid. (Isa. 43:2) Ngulterekokl a rengud el kmo ngsebeched loutekangel a ringel e le ngii el mla meskid aike el rokui el dousbech el mo outekangel. Ngmla meskid a nglunguuch, Biblia, betok el kall er a klereng, me a klodam er kid el lolengeseu er kid.

16. Ngmekera sebeched el melemolem el ngar cheungel a ulekerreuil a Jehovah?

¹⁶ Kede mera el loba omereng el saul le ngngar ngii a Demad el ngar er a eanged el mengkar er kid! “Ng ungil a rengud el ngii a uchul.” (Psa. 33:21) Ngsebeched lochotii omereng el saul er kid el kirel a ulekerreuil loeak sel bo dungil lousbech aike el rokui el ngeso el bla lebeskid. Ngdirrek el kired el meruul er a ngerecheled el mo melemolem el ngar cheungel a ulekerreuil. Tia belkul a kmo, kede mora tkurrebab el klisiched el mo olengesenges er a Jehovah e meruul a melemalt er a osengel, e ngii a mo mengkar er kid el mo cherechar!​—1 Pe. 3:12.