1. Ngera el ungil tekoi a bla leruul a rebetok el ngeasek?

 TE BETOK el telael er a rengeasek a metecholb er a bek el rak. Kau, ke mla metecholb? A leuaisei e a rudam me a rudos er kau a kmal dmeu a rengrir el kirem me a Jehovah me ngkmal dmeu a rengul! (Osi. 27:11) Ka molebedebek a tekoi el bla mruul. Ngkmal blak a rengum el mesuub er a Biblia el locha mla mo betok el rak. Omesubem a mla oterekeklii a rengum el kmo a Biblia Tekingel a Dios. Ngaruchei er ngii, ke mla mo medengelii e betik a rengum er ngike el milskid a Biblia. Bltkil a rengum el mora Jehovah a kmal mesisiich me ke ngileltii el mo metecholb el mesiungel. Ngmera el ungil!

2. Ngera kede mo mesaod er tia el suobel?

 ² Uchei er a obo metecholb e ke locha mlo chobangel a betok el tekoi el millasem er a klaumerang er kau. Me nguaisei engdi omorael el mo klou e ke mo chobangel a beches el omelsemai. A Satan a mo melasem el mengitechut er a bltkil a rengum el mora Jehovah e meruul er kau el mo diak mosiou er ngii. (Efe. 4:14) Ngkmal diak el kirem el mecherei tiang me ngduubech. Ngera sebechel ngosukau el mo melemolem loba blakerreng e otutii a telbilem? Ngkirem el melemolem el mukeroul e ‘ngosechekl’ el mo klou el chad er a tekoi er a klereng. (Heb. 6:1) Engdi ngmekera omoruul er tiang?

3. A rokui el Kristiano, ngngera kirir el meruul er ngii er a uriul er a lemetecholb?

³ Kid el rokui a kired el loltirakl er a ulekrael el apostol Paulus a milsterir a Rekristiano er a Efesus er a uriul er a demetecholb.  Ngmillisiich er tir el “mo mukeroul el mo ultebechel” el Kristiano. (Efe. 4:13) Tia belkul a kmo ngmle kirir el ‘melemolem el olengeriakl.’ Ngsebeched el mtebengii a belkul a tekingel a Paulus er a lomekesiu er a ulekurulel a Kristiano el mo ua ulekurulel a ngalek. A tolechoi a uchul a klou el deurreng el mora delal me a demal. Me nguaisei engdi ngdiak el sebechel di tolechoi el diak a ulebengelel. Cherengel a taem e ngkirel chemoit “a ikel tekoilngalek.” (1 Ko. 13:11) Ngdi osisiu el kirir a Rekristiano. Uriul er a techolb e ngkired el melemolem el olengeriakl. Me dosaod a bebil ngeso er a uldasu el ngosukid el kirel tiang.

4. Ngera sebechel ngosukau el mo olengeriakl er a tekoi er a klereng? Mosaod. (Filipi 1:9)

⁴ Lemukeroul a bltkil a rengum el mora Jehovah. Ngkmal betik a rengum er a Jehovah. Me nguaisei engdi ngdirk sebechel lmuut el mo dmolech a bltkil a rengum el mo er ngii. Ngmekera omoruul er tiang? A apostol Paulus a ochotii a ta er a rolel el ngar er a Filipi 1:9. (Monguiu.) Paulus a milluluuch el kmo a bltkil a rengrir a rechad er a Filipi “le mengal mo klou.” Me ngsebechel mukeroul a bltkil a rengud. Sebeched el meruul el uaisei loeak sel ‘bo dungil medengei a klemerang e demeduch el melilt a ungil ma mekngit.’ Sel lluut el mukeroul a klemedengei er kid el kirel a Jehovah me ngii a lmuut el mukeroul a bltkil a rengud me a omereng el saul er kid el kirel a blekerdelel me a rolel a loruul a tekoi. Ngmukeroul a urunguled el mo meruul a soal, e diak bo doruul a ngii di el ngera el mo kingtir a rengul. Kede oureor el meringel el mo medengei aike el soal a doruul, e oltirakl.

5-6. Ngmekera sebechel lmuut el mukeroul a bltkil a rengud el mora Jehovah? Mosaod.

⁵ Ngsebechel mukeroul a bltkil a rengud el mora Jehovah loeak sel bo dungil medengelii a Ngelekel, el ngii a cherrungel lokesiul a Chedam. (Heb. 1:3) Sel kot lungil rolel e kede mo medengelii a Jesus a dosuub aike el eua el Ebangkelio. A lsekum ngdiak monguiu er a Biblia er a bek el sils, e nglocha sebechem lomuchel loeak omonguiu aika el Ebangkelio. Sel monguiu aika el cheldecheduch el kirel a Jesus e mkerekikl el melatk a blekerdelel. A rechad a mle beot er tir el mengedecheduch er ngii. A rengalek a mlei er ngii e ngomechull er tir. (Mk. 10:13-16) Ngmle beot er a redisaiplo er ngii obengkel, e beot er tir louchais a uldesuir er a medal. (Mt. 16:22) A Jesus uluukerebai er a Demal. Ngkmal beot er kid a mora Jehovah. Ngsebeched el meluluuch el mengedecheduch er ngii. Sel doluluuch e kede ouchais er ngii aike el ngar er a rengud. Ngulterekokl a rengud el kmo ngdiak bo loukerrekeriil er kid. Ngbetik a rengul er kid e omekerreu er kid.​—1 Pe. 5:7.

⁶ A Jesus a kmal mle chubechubechad. A apostol Mateus a melluches el kmo: “Ser a lesa seked er a re chad, e ng kmal mlo mekngit a rengul er tir, ele ng mle suebek a rengrir e metacherbesrir, el ua sib el diak a mengkerengel.” (Mt. 9:36) E a Jehovah uangerang? A Jesus a dilu el kmo: “Demmiu el ngar a eanged a diak el soal a tar tirkal mekekerel ngalek a bo leriid.” (Mt. 18:14) Tia kmal rutechii a rengud! Sel lemukeroul a klemedengei er kid el kirel a Jesus me ngii a mukeroul a bltkil a rengud el mora Jehovah.

7. Ngmekera ngosukau sel mongoit a taem el lobengterir a Rekristiano el mesisiich er a tekoi er a klereng?

⁷ Ngdirrek el sebechem el suubii el mo olecholt er a bltikerreng e olengeriakl loeak sel bo modengelterir tirke el mesisiich er a tekoi er a klereng el odam me a odos er a ongdibel. Mutebengii el kmo ngkmal dmeu a rengrir. Ngkmal diak louuchel a rengrir el millilt el mo mesiou er a Jehovah. Molengit er tir me  louchais a bebil er a experience er tir er a omesiungir el mora Jehovah. Sel lebo el kirem el meruul a meklou a ultutelel omelilt e molengit a ulekrael er tir. Lak mobes el kmo a “le betok a oltobed a ungil uldasu e a re chad a selebechakl.”​—Osi. 11:14.

8. Ngera sebechem el meruul er ngii a lsekum e ke mo oumededenger aike el lolekoi a Biblia?

⁸ Bo mesisiich er aike el moumededenger. Ngua losaod a  parakurab 2, a Satan a mo melasem el merrob er kau me ngdiak molengeriakl. A ta er a rolel a loruul er tiang, a meruul er kau el mo oumededenger a bebil er a osisechakl er a Biblia. El ua tiang, ngkmal di kmedung e ke mo mesuub el kirel a evolution. Nglocha kmal dimlak molatk el kirel tiang er omkekerei engdi chelechang el mklungang e ke mocha chobengelii er a skuul. Aike el lolekoi a resensei el kirel a evolution a kora kmal make sense. Me nguaisei engdi tirka locha dirkak a ta lorriter el kmo ngngar ngii olechotel a Ulemeob. Lak mobes er a omellach el ngar er a Osisechakl 18:17: “A chad el omuchel el mengedecheduch er a kerrekeriil a ua le klemerang a cheldechedechal, e ngdi di mor sel bo longetiit er ngii ngkel chad el omtok er ngii.” Lak di mereched el mo oumerang aike el lolisechakl er a skuul, morriter a klemerang el ngar er a Tekingel a Dios el Biblia. Moruul a research lousbech aike el babilenged. Mongedecheduch er a rudam me a rudos el tir a uchei e te uluumerang er a evolution. Moker er tir el kmo ngera olterekokl a rengrir el kmo ngngar ngii a Ulemeob el kmal betik a rengul er kid. Aika el cheldecheduch a sebechel ngosukau el mo melebedebek aike el olechotel a kmo ngngar ngii Ulemeob.

9. Ngera ke suubii er a experience er a Melissa?

⁹ A odos el Melissa a kmal ngilai a klungiolel er a loruul a research el kirel a omebelel a rokui el tekoi. * Ngdmu el kmo: “Sel dengar er a skuul e a resensei a kmal meduch el mesaod er a evolution el rulleterir a rechad el mo omdasu el kmo ngklemerang. A kot e ngdimlak el soak el meruul a research e le ak mle bekikl el kmo ngmo loterekeklii el kmo a evolution a klemerang. Engdi ak mlo melatk el kmo a Jehovah a soal a lengar ngii a uchetemel a tekoi el doumerang. Me ak mirruul a research. Ak chiliuii a book el Is There a Creator Who Cares About You? me a brochure el Was Life Created? me a The Origin of Life​—Five Questions Worth  Asking. Aika kmal ngilsukak. Ak kmal oureng ulekum me ak mle mereched el mo meruul a research.”

10-11. Ngera sebechel ngosukau me ke melemolem el klikiid? (1 Thesalonika 4:3, 4, NW)

¹⁰ Moltngakl a mekngit el omeruul. Sel obo mngeasek, e ngsebechel kmal mo mesisiich a feelings er kau el soam el mo ousechelei, me a rebebil a locha mo orrimel er kau el mo meruul er ngii. A Satan a kmal soal obo moruul er tiang. Ngera sebechel ngosukau me ngdiak bo moruul er ngii? (Monguiu er a 1 Thesalonika 4:3, 4, NW. *) Moluluuch louchais er a Jehovah a feelings er kau. Mouchais er ngii aike el mera el ngar er a rengum e molengit er ngii me lesisichau. (Mt. 6:13) Lak mobes el kmo a Jehovah diak loukerrekeriil er kau e ngbai soal lolengeseu er kau. (Psa. 103:13, 14) Ngdirrek el sebechem el melai a ngeso er a Tekingel. A Melissa el dulsaod er ngii er a uchei, a mle meringel er ngii omtebechel a diak el klikiid el uldesuel. Ngkmo: “Omengiuek er a Biblia er a bek sils a ngilsukak me ngdiak give up. Ngulemeklatk er ngak el kmo ak chedal a Jehovah e soak a lolemolem el ngar er a chelsel a klengar er ngak.”​—Psa. 119:9.

¹¹ Lak di lekau el melasem el mesmechokl a mondai er kau. Mongedecheduch er a rechad er a blim. Ngdiak lebeot er kau el mesaod aikang, engdi ngkmal klou a ultutelel omoruul el uaisei. A Melissa kmo: “Ak milluluuch lolengit er a blekeu e mlo mengedecheduch er a demak el kirel a mondai er ngak. Uriul er tiang e ak mlo omelechesiu er ngak el kebekakl. Ak mle medengei el kmo a Jehovah a kmal proud er ngak.”

12. Ngmekera sebechem el meruul a ungil omelilt?

¹² Bechei omellach er a Biblia me lomekrael er kau. Sel morael el mo klou, e a rechad er a blim a mo meskau a ilmeklem el melilt. Me nguaisei engdi ngkmal dirk betok a diak modengei. Ngmekera e sebechem el mo ungil melilt me lak mtemellii a deleuill er kau me a Jehovah? (Osi. 22:3) A odos el Kari a ouchais er a ngilsuir el mo sebechel lungil melilt. Ngmiltebengii el kmo a Rekristiano el mla mukeroul a diak lousbech a rules el kirel a rokui el tekoi. Ngdmu el kmo: “Ngmle kirek el mo medengei a omellach er a Biblia e diak di kultirakl a rules.” Sel monguiu er a Biblia e di lekau el oker: ‘Tia ngngera ngouchais er ngak el kirel a uldesuel a Jehovah? Ngngar ngii omellach er ngii el sebechel omekrael er ngak? A lengar ngii, e ngmekera mo uchul a klungiolek a kultaut er ngii?’ (Psa. 19:7; Isa. 48:17, 18) Sel monguiu er a Biblia e molebedebek omellach er ngii, e ngmo beot er kau el meruul omelilt el odeuir a rengul a Jehovah. Sel molengeriakl, e ke mo mtebengii el kmo ngdiak mousbech a rules el kirel a bek el tekoi e le ke medengelii a uldesuel a Jehovah.

13. Ngera ngsebechel rullii el kirem a rungil el friends? (Osisechakl 13:20)

¹³ Molilt er tirke el betik a rengrir er a Jehovah el mo friends er kau. Ngua dulsaod er ngii, a resechelim a ngar ngii a bo lerellii er a okurulem el Kristiano. (Monguiu er a Osisechakl 13:20.) A odos el Sara a urridii a deurreng er ngii. Engdi ngngar ngii a dilubech el ngilsuir el lmuut el mo dmeu a rengul. Ngkmo: “Ak miltik er a rungil friends. Ngngar ngii a kekerei el odos el kim dilak el mesuub er a Ongkerongel er a bek el sandei. A kuk ta er a friend er ngak a ngilsukak el mo omuchel el comment er a miting. A ngelsurir a re friends er ngak a uchul me ak mlo blak a renguk el meruul er a omesubek el di ngak el tang, e meluluuch. Ngmlo er ngii a mesisiich el deleuill er  ngak me a Jehovah, me ak liluut el mo omelechesiu er a deurreng.”

14. Ngmilekera Julien e metik er a rungil friends?

¹⁴ Ngmekera sebechem el metik er a rungil friends? A Julien el chelecha e ngmesiou el ta er a remechuodel a kmo: “Sera kngeasek e ak miltik er a rungil friends er a temel odingel. Tirka kmal mle blak a rengrir e ngilsukak el mo mesa el kmo ngsebechek el mo soak odingel. Tia rirellak el mo rullii a mui el taem el omesiou el mo turrekong er ngak. Ak mlo mtebengii el kmo a uchul me ngdiak lebetok a rungil sechelik e le ngak el di osiik er a rua meklungek. Uriul e ngmlo er ngii a rungil sechelik er a Bethel. A ungil kerebai er tir a ngilsukak el mo ungil melilt a rolel ongelaod, e tia rirellak el lmuut el mo kmeed er a Jehovah.”

15. A Paulus ngmilsa Timothy a ngera el uleklatk el kirel a klausechelei? (2 Timothy 2:20-22)

¹⁵ Engdi ke mo mekerang a lsekum e ke mtebengii el kmo ngngar ngii a rengar ongdibel el mekngit el klausechelei? A Paulus a mle medengei el kmo ngngar ngii a rebebil er a ongdibel el dimlak lomdasu e loruul a tekoi el ua Rekristiano, me ngdilu er a Timothy el mo mengeroid er ngii er tir. (Monguiu er a 2 Timothy 2:20-22.) A deleuill er kid me a Jehovah a kmal mekreos. Ngkmal diak el kired el mecherei a ngii di el chad me lechitechetur a deleuill er kid me a Demad el ngar er a eanged el de kmal mle meringel loureor el kirel.​—Psa. 26:4.

16. Ngera el turrekong a ungil omolilt?

¹⁶ Moruul a turrekong el ngar ngii a klungiolel. Molilt a turrekong el ngii a smisichau e merorem er kau. (Efe. 3:16) El ua tiang, ke locha melilt el mo lmuut el lolengeriakl er a omengiuem me a omesubem er a Biblia. (Psa. 1:2, 3) Me a lechub e nglmuut el mo betok a idisel a taem el moluluuch e mo meluluuch el mera el ngar er a rengum. Me a lechub e ngkirem el lmuut el mo kerekikl er a rolel ongelaod el omolilt me a dirrek el rolel omousbech a temem. (Efe. 5:15, 16) Ngkmal mo dmeu a rengul a Jehovah sel lomes er kau el oureor el meringel el mo olengeriakl.

17. Ngmekera ngosukau sel molengeseu er a rechad?

¹⁷ Ke dirrek el mukeroul sel molengeseu er a rechad. A Jesus a dilu el kmo: “Ng bai klou el  deurreng a dorous er a dolai.” (Rel. 20:35) Ngmo dmeu a rengum sel mousbech a temem me a klisichel a klengeasek er kau el olengeseu er a rebebil. El ua tiang, mrellii a turrekong er kau el mo olengeseu er a remechudelang me a rengar ngii a secherel a bedengir er a ongdibel. Nglocha sebechem el shopping el kirir me a lechub e ke olengeseu er tir lousbech a electronics. A lsekum e ke odam, e mrellii a turrekong er kau el mo ministerial servant, me bo lsebechem el mui lolengeseu er a rudam me a rudos er kau. (Fil. 2:4) Ke dirrek lochotii a bltikerreng el mo er tirke el diak lengar ongdibel loeak sel momerk er a ungil chais el kirel a Renged el mo er tir. (Mt. 9:36, 37) A lsebechel e mrellii a turrekong er kau el mo teloi er a ta er a bedengel a mui el taem el omesiou.

18. Ngmekera sebechel ngosukau el mukeroul sel obora mui el taem el omesiou?

¹⁸ A mui el taem el omesiou a meskau a betok el techellem el mo olengeriakl er a tekoi er a klereng. A obom pioneer e ngsebechel mekengii a rael el mora Skuul el Kirir a Rumerk er a Rengedel a Dios. Ngsebechem el mo mesiou er a Bethel me a lechub e ngureor lomekedechor. A ngeasek el odos el Kaitlyn a kmo: “Temek er odingel lobengterir a rudam me a rudos el mesisiich er a klereng a kmal ngilsukak el mukeroul er a tekoi er a klereng er a uriul er a kmetecholb. A ungil kerebai er tir a millisiich er ngak el mo menglou er a klemedengei er ngak er a Biblia e mo olengeriakl er a rolel a kulisechakl.”

19. Ngera el klengeltengat obo mngai sel molemolem el olengeriakl?

¹⁹ Ke mo ngmai a betok el klengeltengat sel molemolem el olengeriakl er a tekoi er a klereng. Ngkmal diak bom waste er a klengeasek er kau el oltoir a diak a belkul turrekong. (1 Jn. 2:17) Ngdiak bom chermii a ringelel a mekngit el omelilt. Ke bai mo metik er a mera el deurreng me a ungil klengar. (Osi. 16:3) A ungil kerebai er kau a mo melisiich er a rudam me a rudos er kau, el remeklou me a remekekerei. (1 Ti. 4:12) E a ngaruchei er ngii, e ke mo nguu a budech me a deurreng el mo er ngii sel modengei el kmo, ke odeuir a rengul a Jehovah e ngar ngii a mesisiich el deleuill er kau me ngii.​—Osi. 23:15, 16.