SUOBEL EL BO DOSUUB 47
Lak Becherei a Ngii Di el Ngerang Me Lecheridau er a Jehovah
“Ngak a oumeral ulsirs er kau e RUBAK.”—PSA. 31:14.
CHELITAKL 122 Bo Dedechor e Lak Dolmesim!
NGAR TIA EL SUOBEL a
1. Kede mekera medengei el kmo a Jehovah soal a bo dekeed er ngii?
A JEHOVAH mengemedaol er kid el mo olekeed er kid er ngii. (Jak. 4:8) Ngkmal soal mo Dios er kid, Demad, e Sechelid. Ngonger a nglunguched e olengeseu er kid sel dechelebangel a meringel el blekeradel. E ousbech er a cheldebechelel lolisechakl e omekerreu er kid. Engdi ngera kired el meruul me bo dekeed er a Jehovah?
2. Ngmekera sebeched el mo kmeed er a Jehovah?
2 Kede mo kmeed er a Jehovah loeak sel doluluuch el mo er ngii e donguiu e dolebedebek a Tekingel. Sel doruul aikang e ngkmal mo betik a rengud er ngii e oba omereng el saul el kirel. Ngrullid el mo msa blekongesenges me a odanges el lekmal rredemelel. (Och. 4:11) Sel lluut el mo klou a klemedengei er kid er a Jehovah me ngii a mukeroul a klaumerang er kid er ngii me a cheldebechel el bla leketmeklii el mo olengeseu er kid.
3. Ngmekera Diabelong e melasem el mengeroid er kid er a Jehovah, engdi ngera mo ngosukid me ngdiak dechitii a Dios er kid me a cheldebechelel? (Psalm 31:13, 14)
3 Me nguaisei engdi Diabelong a soal choridid er a Jehovah, tokubets sel bo dechelebangel a meringel el blekeradel. Ngmekera loruul er tiang? Ngmekekokil el meruul er kid el mo diak doumerang er a Jehovah me a cheldebechelel. Me nguaisei engdi ngsebeched el diak dobedikl er ngii. Sel lemesisiich a klaumerang er kid e doumerang lulsirs er a Jehovah e ngkmal diak bo dechitii, ngii me a cheldebechelel.—Monguiu er a Psalm 31:13, 14.
4. Ngera kede mo mesaod er tia el suobel?
4 Ngar tia el suobel e kede mo mesaod a edei el tekoi el ngar er a ikrel ongdibel el mei el sebechel choitechetur a klaumerang er kid er a Jehovah me a cheldebechelel. Ngmekera aika el omelsemai e sebechel choridid er a Jehovah? E ngera sebeched el meruul me lak dobedikl er a Satan?
SEL BO DECHEBANGEL A MONDAI
5. Ngmekera mondai el bo dechebangel e sebechel esemii a klaumerang er kid er a Jehovah me a cheldebechelel?
5 A lebebil e kede mo chobangel a mondai el uai a telungalek er kid omtok er kid me a lechub e kede oridii a urered. Ngmekera chouaika el blekeradel e sebechel esemii a klaumerang er kid er a cheldebechelel a Jehovah e choridid er ngii? Sel dechelebangel er a mondai el kemanget el taem e ngsebeched el mo feel el kmo, ngdiak el sebeched el mekerang e mo depressed. A Satan a kmal soal lousbech choua ikakid el taem el meruul er kid el mo oumededenger er a bltkil a rengul a Jehovah el mei er kid. Ngsoal a bo domdasu el kmo ng Jehovah me a cheldebechelel a uchul aika el mondai. A kmeed el osisiu el tekoi a dilubech el mora rebebil er a rechad er a Israel. A kot e te uluumerang el kmo a Jehovah tiltkii a Moses me a Aron el mo olsobel er tir er a klsibai. (Exo. 4:29-31) Engdi Farao er a leruul a klengar er tir el lmuut el mo meringel e te mlo oltelechakl er a Moses me a Aron el kirel e dilu er tir el kmo: “Kemiu [a] mla rullii a Farao ma rubengkel metelil a beluu el mo ouketui er kemam. Kom mla locha saider er a chimorir el kirir el omekoad er kemam.” (Exo. 5:19-21) Te uleltelechakl er tirka el blak a rengrir el mesiungel a Dios. Ngmera el klengiterreng! A lsekum e kau a mla mo kemanget el taem el di moutekangel er a mondai, e ngmekera sebechel melemolem el mesisiich a klaumerang er kau er a Jehovah me a cheldebechelel?
6. Ngera kede suubii er a Habakuk el kirel a rolel a doutekangel a mondai er kid? (Habakuk 3:17-19)
6 Moluluuch louchais er a Jehovah aike el rokui el ngar er a rengum, e bo multuil er ngii el kirel a ngeso. A profet Habakuk a mle betok a tekoi el blo lechebangel. A ta el taem e ngmlo oumededenger er a ulekerreuil a Jehovah. Me ngmilluluuch louchais er a Jehovah aike el ngar er a rengul. Ngdilu el kmo: “RUBAK, ng mo ua ngera klteketel el kulengit a ngesou e ke mochu rongesak, . . . A omelemall ma mekngit el bekeu el omeruul a di iliuekl er ngak.” (Hab. 1:2, 3) Jehovah ulenger er ngika el blak a rengul el mesiungel. (Hab. 2:2, 3) A uriul er a le dmolech el melebedebek a rolel e a Jehovah ulelsobel er a rechedal, e a Habakuk a liluut el mo dmeu a rengul. Ngmlo ulterekokl a rengul el kmo a Jehovah omekerreu er ngii e mo ngosukii loutekangel a ngii di el omelsemai. (Monguiu er a Habakuk 3:17-19.) Me ngera klubeled er tiang? Sel mchebangel a meringel el blekeradel e moluluuch louchais er a Jehovah aike el ngar er a rengum. E bo er ngii el kirel a ngeso. Sel moruul uaisei e ngsebechel mo ulterekokl a rengum el kmo a Jehovah a mo meskau a klisiich el mousbech er ngii loutekangel. E sel momelechesiu er a ulengesuil e a klaumerang er kau er ngii a lmuut el mo mesisiich.
7. Ngera te millasem el meruul a rechedal a Shirley, e ngera ngilsuir me ngdimlak loridii a klaumerang er ngii er a Jehovah?
7 Molemolem el meruul aike el tekoi el rullau me ke melemolem el kmeed er a Jehovah. Molatk er a rolel e tia ngilsuir a Shirley el odos er a Papua New Guinea el loutekangel a mondai er ngii. b A telungalek er ngii a kmal mle chebuul me a lebebil e ngmo meringel er tir a metik a kelir. Ngngar ngii a chedal el millasem el mengitechut er a klaumerang er ngii er a Jehovah. Ngdilu er ngii el kmo: “Ke melekoi el kmo a chedaol reng er a Dios a olengeseu er kau, me ngngar ker aika el ngeso? A telungalek er kau a dirk chebuul. E kau a waste a taem lomerk.” A Shirley melekoi el kmo: “Ak mlo melatk: ‘A Dios ngomekerreu a tekoi el duubech el mei er kemam me a lechub e ngdiak?’ Me ak di mle mereched el meluluuch el mora Jehovah louchais er ngii aike el rokui el mlara uldesuek. Ak millemolem el meruul er a omengiuek er a Biblia me aike el babilenged, e millemolem lomerk er a klumech e ngar er a miting.” A Shirley a mlo sebechel mtebengii el kmo a Jehovah omekerreu er ngii me a telungalek er ngii. Te dimlak bo lolsengerenger e mla er ngii a deurreng er a telungalek er tir. Ngkmo: “Ak mlo melechesuar el kmo, a Jehovah onger a nglunguchek.” (1 Ti. 6:6-8) Omolemolem el meruul er a schedule er kau el mesuub er a Tekingel a Dios, oldingel, e ngar er a miting, e kau me ngdirrek el diak bo bechei a ringel me a klaumededenger me lecheridau er a Jehovah.
SEL LEDUUBECH A DIAK EL MELEMALT EL OMERUUL EL MORA RUDAM LOMEKRAEL
8. Ngera sebechel duubech el mora rudam er a cheldebechelel a Jehovah el lomekrael?
8 Ngoeak a media me a social network, e a recherroued a mla merk a betok el blulak el kirir a rudam er a cheldebechelel a Jehovah el omekrael. (Psa. 31:13) A rebebil er a odam a kelebus e motelechakl el kmo te meruul a delengerenger. A rekot el Kristiano me te mlo chobangel osisiu el blekeradel er sel taem er a lekulebsengii a apostol Paulus e lotelecheklii er a tekoi el dimlak lerellii. Me te milekerang tirka el Kristiano?
9. Te milekerang a rebebil Kristiano er a lemekelebus a apostol Paulus?
9 A rebebil er a rekot el Rekristiano a chilitii a Paulus er a lemekelebus er a Rom. (2 Ti. 1:8, 15) E ngerang? Te mle merur er a Paulus e le buai ulemes er ngii el dengerenger el chad? (2 Ti. 2:8, 9) Me a lechub e te mle medakt le te mo el dirrek el mo modechelakl? Alta ngdiak dodengelii a uchul me nguaisei engdi ka di molatk er a uldesuel a Paulus. Ngika uluutekangel a betok el tekoi e kilengei el meruul el kirir alta ngmle sebechel loridii a klengar er ngii. (Rel. 20:18-21; 2 Ko. 1:8) Me lak debo deuai tirka el chilitii a Paulus er a taem el kmal luluusbech a ngeso! Ngera kired el melatk sel bo loldechelakl er a rudam el omekrael?
10. Ngera kired el diak dobes er ngii sel loldechelakl er a rudam el omekrael, e ngera uchul?
10 Lak mobes er a uchul me kede modechelakl me ngike luchul aika el odechelakl. A Ongeru el Timothy 3:12 a kmo: “Tirkel rokui el kmal sorir el mo ungil chedal a chelid, el oltirakl er a Kristus Jesus a mo metik odechelakl.” Me ngdiak el kirel mechas a rengud er a Satan el ulturk odelecheklel er a rudam el omekrael. A moktek er ngii a melemall er a blakerreng er tirka el odam e omekdakt er kid.—1 Pe. 5:8.
Alta Paulus a mle kelebus, a Onesiforus ulechotii a blekeu e mlo olengeseu er ngii. Chelecha el taem e a rudam me a rudos er kid olecholt a support er tir el mora rebebil er kid el mekelebus (Momes er a parakurab 11-12)
11. Ngera kede suubii er a Onesiforus? (2 Timothy 1:16-18)
11 Molemolem el support er a rudam e mochotii a blakerreng er kau el mo er tir. (Monguiu er a 2 Timothy 1:16-18.) A Onesiforus el ta er a rekot el Kristiano, a mle ngodech omerellel er a lemekelebus a Paulus. “Ng dimlak le merur er [a Paulus] el kelebus.” E ngbai a Onesiforus a ulsiik er a Paulus, e sera lebetik er ngii, e ngulsiik a rolel a mo olengeseu er ngii. E aika el tekoi a mle sebechel mo uchul e ngoridii a klengar er ngii. Me ngera klubeled er tiang? Ngdiak el kired el mecherei a dakt er a rechad me lebekdektid me a lechub e lerellid el mo diak de support er a rudam er kid el modechelakl. E bai dosebechakl er tir e doruul aike el rokui el sebeched el mo olengeseu er tir. (Osi. 17:17) Te kmal lousbech er a bltkil a rengud me a support er kid.
12. Ngera kede suub er a rudam me a rudos er kid el ngar er a Russia?
12 Molatk er a rolel e a rudam me a rudos er kid er a Russia a support er a rebebil er kid el bla longelebus er tir. Sel lebora kerrekeriil e a rebetok er a rudam me a rudos a mora kort el support er tir. Me ngera klubeled er tiang? Sel lolekoi a mekngit el kirir a rudam lomekrael me a lechub e longelebus e loldechelakl er tir e lak bo demedakt. Doluluuch el kirir, domekerreu er a telungalek er tir, e dosiik a rolel e ngsebeched el lolengeseu er tir.—Rel. 12:5; 2 Ko. 1:10, 11.
SEL LOLTUUB ER KID
13. Ngmekera otubir a rechad e sebechel esemii a klaumerang er kid er a Jehovah me a cheldebechelel?
13 Rechedad el diak el ngar er a klemerang, rechad el dedak loureor, me a lechub te rengalek er a skuul a locha mo oltuub er kid el kirel a berkel a klumech, me kid el kiei loltirakl a llechul a Jehovah. (1 Pe. 4:4) Te locha mo melekoi el kmo: “Ngkmal soak a blekerdelem el chad engdi ngkmal meringel a klechelid er kau me ngii oltirakl a tekoi er a ngar er a mong.” A rebebil a locha mo melekoi a mekngit el kired le ngblekerdeled el bedul a reseluld a ngklir a uchul. Te locha mo melekoi el kmo: “Ngmekera e sebechem el melekoi el kmo ngungil a blekerdelem el chad?” Chouaika el tekoi a sebechel rullid el mo oumededenger el kmo a llechul a Jehovah melemalt. Kede locha mo melatk: ‘A Jehovah ngkmal klou a longerechir er ngii er ngak? A cheldebechelel ngkmal strict?’ A lsekum ke chelebangel er a chouaitia el blekeradel e ngera sebechel ngosukau el mo melemolem el kmeed er a Jehovah me a cheldebechelel?
Job a dimlak lekengei el mo oumerang a blulekngir tirka leko te mle sechelil. E ngbai rirellii a rengul el mo melemolem loba blakerreng el mora Jehovah (Momes er a parakurab 14)
14. Ngkired el mekerang sel loltuub er kid a rechad le kede kiei loltirakl a llechul a Jehovah? (Psalm 119:50-52)
14 Mrellii a rengum el mo melemolem loltirakl a llechul a Jehovah. A Job a millemolem loltirakl a llechul a Jehovah alta te uleltuub er ngii el kirel. A ta er tirke lekong ngsechelil a millasem el meruul er ngii el mo omdasu el kmo ngdiak a belkul er a Dios a loltirakl a llechul me a lak. (Job 4:17, 18; 22:3) Engdi Job a dimlak lekengei lorrenges a blulekngir. Ngmle medengei el kmo a llechul a Jehovah el kirel a ungil me a mekngit a melemalt, me ngrirellii a rengul el mo oltirakl. Ngkmal dimlak lebechititerir a rechad me lerellii el mo diak loba blakerreng. (Job 27:5, 6, NW) Me ngera klubeled er tiang? Lak bechei otuub me lerellau el mo oumededenger a llechul a Jehovah. Molatk a tekoi el mla duubech er a klengar er kau. Nglocha mla mo betok el taem el mesa el kmo sel moltirakl a llechul a Jehovah engdi mo uchul a klungiolem. Me mrellii a rengum el mo oltirakl er tia el cheldebechel el melisiich e oltirakl a llechul a Jehovah. Seikid e alta te mo melekoi a betok el tekoi loltuub er kid, me ngii a diak bo lecheridau er a Jehovah.—Monguiu er a Psalm 119:50-52.
15. Ngera uchul me a Brizit a mlotuub?
15 Molatk er a experience er a Brizit el odos er a India. A telungalek er ngii uleltuub er ngii el kirel a klaumerang er ngii. Kedeb el taem er uriul er a lemetecholb er a 1997 e a bechil el ngii a diak el Sioning a urridii a urerel. Me ngmillilt el melukl ngii me a Brizit me a rengelekir el mo kiei lobengterir a rechad er a blil el tir a kiliei er a kuk ta er a beluu er a belurir. Me nguaisei engdi tia mlo uchul a lmuut el betok lomelsemai el mora Brizit. Ngmle kirel loureor el mui el taem el mesiou er a telungalek er ngii le bechil dimlak loureor. Me a lmuut kung sel kot el kmeed el blil a ongdibel a mle 220 el mael a cherridel. E klengiterreng le telungalek er a bechil ulemtok er a klaumerang er ngii. Ngkmal mlo meringel a ultok me ngmle kirir el lmuut el melukl. E a bechil a di mle kiul el mad. Uriul e a ta er tirka el ngelekir el redil a mlad er a kasinoma. Ngika mle 12 a rekil. E a rechedal a lmuut lomekringel er ngii, el melekoi el kmo ngngii a uchul me aika el tekoi a dilubech. Te dilu el kmo a lemlak lebo le Sioning er a Jehovah e ngdimlak el duubech aika el tekoi. Me nguaisei engdi ngdi millemolem el loumerang el ulsirs er a Jehovah e melemolem el kmeed er a cheldebechelel.
16. Ngmilekera Brizit e mlukngeltengat le ngii el millemolem el kmeed er a Jehovah me a cheldebechelel?
16 A Brizit el kiliei el kmal cheroid er a ongdibel a uchul me a ta er a circuit overseer a millisiich er ngii el mo omerk er a klumech er tia lekiei er ngii e oltobed a miting er a blil. A uchelel e ngmlo omelechesiu er a klou el berraod. Engdi nguleltirakl er a ulekrael. Ngulemerk er a klumech, mirruul a miting er a blil, e milengetmokl a taem el meruul er a omengull el telungalek lobengterir a rengelekel. Me ngera dilubech? A Brizit a mlo sebechel lomuchel a betok el study e betok er a remilsuub lobengkel a miltecholb. Sera 2005 e ngulemuchel el regular pioneer. Ngmlukngeltengat el kirel a blakerreng er ngii el mora Jehovah me a cheldebechelel. A rengelekel a blak a rengrir el mesiou er a Jehovah e chelecha ngteblo ongdibel er tia el basio lekiei er ngii! A Brizit a ulterekokl a rengul el kmo a Jehovah silsichii el mo outekangel a ringel el blo lechebangel e outekangel otuub el mlara telungalek er ngii.
MOLEMOLEM LOBA BLAKERRENG EL MORA JEHOVAH ME A CHELDEBECHELEL
17. Ngera soad el rullii a rengud el mo meruul er ngii?
17 A Satan a soal a bo doumerang el kmo, a Jehovah mo choitid sel dechelebangel a ringel e a de support er a cheldebechel e ngmo rullii a klengar el lmuut el mo meringel el kired. Ngsoal a bo demedakt sel loldechelakl er a rudam lomekrael me a lechub e loltuub e longelebus er tir. E oeak a otubir a rechad e ngsoal mengitechut er a klaumerang er kid er a llechul a Jehovah me a cheldebechelel. Me nguaisei engdi kid a ungil medengei a ulekbat er a Satan me ngdiak demecheblad er ngii. (2 Ko. 2:11) Mrellii a rengum el mo oltngakl a blulekngel a Satan e mo melemolem loba blakerreng el mora Jehovah me a cheldebechelel. Lak mobes el kmo a Jehovah a kmal diak bo lechitau. (Psa. 28:7) Me lak becherei a ngii di el ngerang me lecheridau er a Jehovah!—Rom 8:35-39.
18. Ngera kede mo mesaod er a ongingil suobel?
18 Ngar tia el suobel e kede mla smaod a omelsemai el ngar er a ikrel ongdibel el mei el sebeched el mo chobangel. Me nguaisei engdi a tekoi er a chelsel a ongdibel a dirrek el sebechel esemii a klaumerang er kid er a Jehovah me a cheldebechelel. Ngmekera sebeched el mo mesisiich er ngii? Kede mo mesaod er tiang er a ongingil suobel.
CHELITAKL 118 “Mrellemam el Mo Mesisiich el Oumerang”
a Ngkired el melemolem loumera el ulsirs er a Jehovah me a cheldebechelel a lsoad loutekangel loba blakerreng er chelecha el uriul sils. A Diabelong ousbech omelsemai el melasem el melemall er a klaumerang er kid er tir. Tia el suobel a mo mesaod a edei el omelsemai lousbech a Diabelong me a rolel e ngsebeched el mo mesisiich er ngii.
b A bebil el ngakl a mlengodech.