1. Ngera belkul a bo dulserechakl? (2 Timothy 4:5, BT)

 SEL bo dechelebangel a ringel, ngsebechel measem a blakerreng er kid el mora Jehovah me a cheldebechelel. Ngmekera sebeched el mo mesisiich er aika el omelsemai? Ngkired el melemolem lulserechakl e klekar, e “mesisiich el oumerang.” (Monguiu er a 2 Timothy 4:5, BT. b) Kede ulserechakl sel lolemolem el chelellakl a rengud, ungil omdasu, e omes a tekoi el ua Jehovah. Sel doruul uaisei e a tekoi el domelechesiu a diak bo lomekrael er a uldesued.

2. Ngera kede mo mesaod er tia el suobel?

² Ngar sel uleak uchei el suobel e kede milsaod a edei el omelsemai el ngar er a ikrel a ongdibel el mei. Ngar tia el suobel e kede mo mesaod a edei el tekoi el duubech er a chelsel ongdibel el sebechel mo melasem er a blakerreng er kid el mora Jehovah. Aikang a sel (1) de feel el kmo ngdimlak el melemalt omerellel a Kristiano el mei er kid, (2) dengai omesmechokl, me sel (3) meringel er kid oltirakl omelodech loruul a cheldebechel. Ngmekera sebeched el melemolem lulserechakl e oba blakerreng el mora Jehovah me a cheldebechelel sel bo dechebangel omelsemai?

3. Nglocha mo uangerang a uldesued sel bo de feel el kmo ngdimlak el melemalt omerellel a Kristiano el mei er kid?

³ Ngmla ta el bom feel el kmo ngdimlak el melemalt omerellel a Kristiano el mo er kau, e locha chad lolab a ngerachel el ua ta er a remechuodel? Nguaisei, a odam a locha dimlak el durengul el tomellii a rengum. (Rom 3:23; Jak. 3:2) Engdi ngdirk meringel a omeruul el mlo er kau. Nglocha mlo diak el sebechem el mechiuaiu  le ke di melatk er ngii. Ke locha mlo melatk el kmo, ‘A lsekum odam a sebechel uaisei a blekerdelel, e tia ngmera el cheldebechelel a Dios?’ A Satan a kmal soal obo momdasu el uaisei. (2 Ko. 2:11) Chouaika el negative el uldasu a sebechel rullid el mo cheroid er a Jehovah me a cheldebechelel. Me sel bo de feel el kmo a odam me a lechub e ngodos a dimlak el melemalt omerellel el mei er kid, e ngmekera sebeched el melemolem el ulserechakl e mo diak domdasu a tekoi el Satan a soal a domdasu?

4. Ngmilekera Josef e melemolem el ulserechakl er a bo lak el melemalt omeruul el mo er ngii, e ngera sebeched el suubii er a Josef? (Genesis 50:19-21)

⁴ Lak mongemekl a kngtil a rengum. Omerellir a rubekul a Josef el mo er ngii er a lengeasek a kmal dimlak el melemalt. Te uluuketui er ngii me a rebebil er tir a mle sorir lomekoad er ngii. (Gen. 37:4, 18-22) Cherengel a taem e tulterur el mo sibai. Sei a uchul me a Josef a mlo chobangel a kmal meringel el blekeradel, el ngii a millemolem el bekord el 13 el rak. Ngmle sebechel a Josef el mo oumededenger er a bltkil a rengul a Jehovah el mo er ngii. E sebechel mo omdasu el kmo a Jehovah a mla choitii er tia el taem el kmal lousbech er ngii. Me nguaisei engdi a Josef a dimlak longemekl a kngtil a rengul. E ngbai millemolem el ulserechakl e chelellakl a rengul. Sera lebo er ngii a techellel el melaitechei er a rubekul e ngdimlak loruul uaisei e ngbai ulechotii a bltikerreng el mo er tir e uluusubes er tir. (Gen. 45:4, 5) Josef a mirruul el uaisei e le ngmle sebechel ungil omdasu. Ngdimlak lolatk a mondai er ngii, e ngbai millatk er a moktek er a Jehovah. (Monguiu er a Genesis 50:19-21.) Me ngera klubeled er tiang? A lsekum e ngmo diak el melemalt omeruul lekor kau, e lak mongemekl a kngtil a rengum el bedul a Jehovah me a lechub e bo momdasu el kmo ngmla choitau. E bai molebedebek a rolel e ngolengeseu er kau loutekangel. Me a lmuut kung, sel bo lak el melemalt omerellir a rechad el lekor kau e mdekedekii er a bltikerreng.​—1 Pe. 4:8.

5. Ngmilekera Miqueas e melemolem el ulserechakl er sera bo le feel el kmo ngdimlak el melemalt omeruul el mo er ngii?

⁵ Molatk er a kerebil a Miqueas el ta er a remechuodel er a South America. c Ngmelatk er a taem el blo le feel el kmo ngkmal mle mekngit omerellir a rudam el omekrael el mo er ngii. Ngkmo: “Ngdirkak a ta el bo kumelechesiu er a stress el uaisei. Ngkmal di mle suebek a renguk. Ngdimlak el sebechek el mechiuaiu a leklebesei, e lilangel e le ak mle feel el kmo ngdiak el sebechek el mekerang.” Me nguaisei a Miqueas a millemolem el ulserechakl e mle meringel loureor lomtebechel er a rengul. Ngmle blechoel el meluluuch lolengit er a Jehovah me lebsa chedaol reng me a klisiich loutekangel. Ngdirrek el ulemes a suobel er aika el babilenged el sebechel ngosukii. Me ngera klubeled er tiang? A lsekum e kede mo feel el kmo ngdimlak el melemalt omerellel a odam me a lechub e ngodos el mei er kid, e lolemolem el chelellakl a rengud e dolasem lomtebechel a negative el uldesued. Nglocha diak modengelii a uchul me a chad a mlo melekoi me a lechub e ngmeruul el uaisei. Me moluluuch el mora Jehovah, e molengit er ngii me lengesukau el mo omes a tekoi loba osengel ngii el chad. Sel moruul el uaisei e ngsebechel rullau el mo omdasu el kmo ngdimlak el durengul el meruul el uaisei lekor kau, e mo ousubes er ngii. (Osi. 19:11) Lak mobes el kmo a Jehovah medengelii a blekeradel el omngar ngii, e ngii a mo meskau a klisiich el mousbech er ngii el mo outekangel.​—2 Kr. 16:9; Oli. 5:8.

6. Ngera uchul me ngklou a ultutelel domes omesmechokl lolechotel a bltkil a rengul a Jehovah el mei er kid? (Hebru 12:5, 6, 11)

⁶ Ngsebechel kmal mo mekngit a rengud sel  dengai omesmechokl. Engdi a lsekum kede di mo melatk er a ringelel e ngsebeched el mo mengkekerei er a omesmechokl el dengiluu, e mo omdasu el kmo ngkmal mle meringel me a lechub e ngdiak el fair. Tia sebechel mo uchul me ngdiak dutebengii tia el kmal klou a ultutelel el tekoi el kmo, a omesmechokl olechotel a bltkil a rengul a Jehovah el mei er kid. (Monguiu er a Hebru 12:5, 6, 11.) A lsekum me kede mechei aike el ngar er a rengud me ngomtebechel er kid e kede msa Satan a techall el mo ousbech el melemall er kid. Ngsoal a bo dotngeklii a omesmechokl e a ngaruchei er ngii, bo dongeroid er kid er a Jehovah me a ongdibel. A lsekum e ke mla ngmai omesmechokl e ngmekera sebechem el melemolem lulserechakl?

7. (a) Ngua desa er a siasing, ngmilekera Jehovah e mlo ousbech er a Petrus er a uriul er a lekengei omesmechokl? (b) Ngera ke suubii er a Petrus?

⁷ Mkengei omesmechokl e mruul omelodech el kirem el meruul. A Jesus a mla er ngii aike el taem losmechokl er a Petrus er mederir tirke el bebil er a apostol. (Mk. 8:33; Lk. 22:31-34) A Petrus a locha kmal mlo merur! Me nguaisei engdi ngmillemolem loba blakerreng el mora Jesus. A Petrus a kilengei aika el omesmechokl e ngilai a klubelel er a cheleuid el riruul. Me a Jehovah ulemekngeltengat er a blakerreng er ngii e ulemekngerachel er ngii er a meklou a ultutelel el ngerachel er a ongdibel. (Jn. 21:15-17; Rel. 10:24-33; 1 Pe. 1:1) Ngera sebeched el suub er a kerebil a Petrus? Ngmo uchul a klungioled sel lak lulturk osenged er a rrenged e bai kongei a omesmechokl e meruul omelodech el kired el meruul. Sel doruul uaisei, e kede lmuut el mo usbechall er a Jehovah me a ongdibel.

8-9. Ngmle uangera uldesuel a Bernardo er a uchelel er a lengai omesmechokl, e ngera ngilsuir el sumecheklii a uldesuel?

⁸ Molatk a tekoi el dilubech el mora Bernardo el odam el ngar er a Mozambique. Ngika urridii a ngerechelel el ta er a remechuodel. Me ngmle uangera uldesuel er a kot? Ngdmu el kmo, “Ak milengemekl a kngtil a renguk le ngdimlak el soak omesmechokl el kngiluu.” Ngika mle bekikl el kmo ngmo uangerang a uldesuir a rechad er ongdibel el kirel. Ngkmo, “Ngmlo chuib a sesei el buil e ngak a mlo sebechek lomes er tia el omesmechokl el ngar er a melemalt el rolel e liluut el mo oumerang er a Jehovah me a cheldebechelel.” Ngera ngilsuir el mo ngodechii osengel?

⁹ Bernardo a silmecheklii a uldesuel. Ngmelekoi  el kmo: “Sera kusiou el ta er a remechuodel e ak mle blechoel lousbech er a Hebru 12:7 lolengeseu er a rechad el mo oba melemalt el uldasu el kirel omesmechokl er a Jehovah. Me ngdi mlo ngak loker, ‘Ngtecha kirel loltaut er tia el bades?’ Ngrokui el mesiungel a Jehovah el luldimukl er ngak.” Me a Bernardo mirruul aike el kirel meruul el lmuut el mekurulii a klaumerang er ngii er a Jehovah me a cheldebechelel. Ngmilengoit er a lmuut el klou el taem el menguiu er a Biblia e dmolech el melebedebek a longuiu. Me alta ngdirk mle bekikl a uldesuir a rechad er a ongdibel engdi nguluureor lobengterir er odingel e mle teloi er a miting er a ongdibel. Cherengel a taem e ngliluut el metutk el mo ta er a remechuodel. Me a lsekum e kau a ua Bernardo el ngilai omesmechokl e molasem lomes lengelakl er a rrengem e mkengei omesmechokl e moruul aike el omelodech el kirem el meruul. d (Osi. 8:33; 22:4) Omoruul el uaisei e ngsebechel mo ulterekokl a rengum el kmo a Jehovah mo omekngeltengat er a blakerreng er kau el mo er ngii me a cheldebechelel.

10. Ngera el omelodech a locha mlo melasem er a rebebil sechal er a Israel?

¹⁰ Omelodech el loruul a cheldebechel a sebechel mo melasem er a blakerreng er kid. A lak dekerekikl e ngsebeched el mechei me ngchoridid er a Jehovah. El ua tiang, molatk er a omelodech el mlora rechad er a Israel er a lebora cheungel a Llach er a Moses. Uchei er a Llach e a rebdelul a telungalek a mle ngerechelir el meruul aike el tekoi el blo loruul a reprist. Te ulemekedechor olengetongel e millenget el mora Jehovah el kirel a telungalek er tir. (Gen. 8:20, 21; 12:7; 26:25; 35:1, 6, 7; Job 1:5) Engdi sera lebo er ngii a Llach e ngmlo mekull a loruul aikang. A Jehovah tiltketerir a rechedal a telungalek er a Aron el mo prist el melenget aika el tenget. Mla er tiakid el taem el mong e a ngii di el bdelul a telungalek el diak el chedal a telungalek er a Aron a lsekum e ngmo meruul a urerir a reprist e ngmo okodall. e (Lev. 17:3-6, 8, 9) Tiakid lomelodech nglocha mle ta er a uchul me a Kora, Dathan, Abiram, me tirke el 250 el mengeteklir a rechad er a Israel a mlo omtok er a Moses me a Aron? (Ule. 16:1-3) Alta ngdiak dodengelii a uchul me te mlo uaisei engdi kede medengei el kmo a Kora me a rubengkel a mlo diak loba blakerreng el mora Jehovah. A lsekum omelodech el loruul a cheldebechel a mo melasem er a klaumerang er kau, e ngera sebechem el meruul er ngii?

11. Ngera kede suub er a re Levait el chedal a telungalek er a Kohath?

¹¹ Em support omelodech loruul a cheldebechel. A rechedal a telungalek er a Kohath a uleba kmal ileakl el techall er a lomais er a ked a rechad er a Israel. Bek el taem el lolukl a rechad er a Israel e a rebebil er tir a milengol er a blil a telbiil loeak mederir a rokui el chad. (Ule. 3:29, 31; 10:33; Jos. 3:2-4) Ngmera el mle ileakl el techall! Me nguaisei engdi a blekeradel a mlengodech er a lebora Beluu er a Nglat. Ngmlo diak lolukl er a blil a telbiil. Me sera taem er a Salomon e a rebebil er a chedal a telungalek er a Kohath a mlo chad er a chelitakl, mengkar er a siseball er a templo, me a oungerachel er a omsangel. (1 Kr. 6:31-33; 26:1, 24) Ngdiak omesodel er a Biblia el kmo a rechedal a telungalek er a Kohath a milengeremrum me a lechub e losiik a leko ngngar bab el  deruchall le tir el mla er ngii a ileakl el ngerechelir er a uchei. Me ngera kede suubii? Moba rengum el rokir el support omelodech loruul a cheldebechel el mo lmuut er a omelodech el ngar ngii a lerellii er a assignment er kau. Betik a deurreng er a ngii di el ngerachel el molab. Lak mobes el kmo a ngerachel el molab a diak lerellau el mo mekreos er osengel a Jehovah. E ngbai mengreos er a blekongesenges er kau el ngaruchei er a ngii di el assignment.​—1 Sa. 15:22.

12. Ngmlo uangerang a uldesuel a Zaina er a lemengodech a assignment er ngii?

¹² Molatk er a Zaina, el odos er a Middle East el mlengodech a assignment er ngii e mlo diak loba techall er omesiou el kmal mle mekreos er a rengul. Uriul er a betok er a 23 el rak el losiou el ngar er a Bethel e ngmlengodech a assignment er ngii el mora berkel a klumech. Ngkmo: “Ngkmal dimlak expect er tiang. Ak mlo feel el diak a ultutelek e mlo betok el taem el di kullatk el kmo, ‘Ngera ktilemellii?’” Ngklengiterreng e le rebebil er a rudam me a rudos a rirellii el lmuut el mengal mo mekngit a rengul er a ledu er ngii el kmo: “A lsekum e ke mle ungil, e a cheldebechel a milechikau me ke melemolem el mesiou el ngar er a Bethel.” Ngmle telkib el taem el di lemekngit a rengul e lmangel er a bek el kesus. Engdi ngkmo: “Ngdimlak becherei tiang me lerellak el mo oumededenger er a cheldebechel me a bltkil a rengul a Jehovah el mei er ngak.” Ngmilekera Zaina e melemolem el ulserechakl?

13. Ngmilekera Zaina e mo mesisiich er aika el negative el uldesuel?

¹³ A Zaina mle sebechel mo mesisiich er a negative el uldesuel. Ngmilekerang? Ngmelekoi el kmo ngmilenguiu a suobel el mesaod er a tekoi el lechelebangel er ngii. A suobel el dai er ngii a “You Can Cope With Discouragement!” el ngar er a February 1, 2001, el The Watchtower a kmal ngilsuir. Tia el suobel a mesaod el kirel a Markus el milluches er a ta er aike el babier er a Biblia el kmo, nglocha dirrek el mlo feel el uaisei er a lemengodech a assignment er ngii. A Zaina kmo: “A kerebil a Markus a mle kerul a chelitechetul a renguk.” Ngdirrek el millemolem el kmeed er a resechelil e dimlak loleakl er ngii me a lechub e bo lomdasu el kmo ngkmal chebuul. Ngmlo mtebengii el kmo a chedaol reng er a Jehovah omekrael er a cheldebechelel me tirke el omekrael a kmal betik a rengrir er ngii. Ngdirrek el miltebengii el kmo a cheldebechelel a Dios a mo meruul aike el kirel ruoll me lemeketmokl  a urerel a Jehovah el ngar sel kot lungil rolel.

14. Vlado mle meringel er ngii a omelodech lurruul a cheldebechel, engdi ngera ngilsuir?

¹⁴ A Vlado el 73 a rekil el ta er a remechuodel er a Slovenia a kmo ngkmal mlo meringel er ngii er a loldak er a ongdibel er ngii lobengkel a kuk ta er a ongdibel, e lechesmerii a Blil a Ongdibel luluusbech er ngii. Ngkmo: “Ak mlo melatk el kmo ngera uchul me te mengesimer er a kmal klebokel el Blil a Ongdibel. Ngmiltemall a renguk e le te kmal dirk mle renovate er ngii. E ngak a daiksang, me ak mirruul a betok er aike el klekedall el mla er tia el blil a ongdibel. Ngdirrek el tia el omelodech a uluusbech a betok el adjustment el dimlak lebeot el kiram a remechudelang el chedal ongdibel.” Ngera ngilsuir a Vlado el support er tia el ulekrael? Ngmelekoi el kmo: “Sel bo doltirakl omelodech el loruul a cheldebechelel a Jehovah e ngdi blechoel el mo uchul a klengeltengat. Aika mengetmokl er kid el kirel a lmuut el meklou el omelodech er a ngar medad.” Kau, ngmeringel er kau omelodech el mo oldak er a ongdibel er kau er a kuk ta er a ongdibel me a lechub ngeldechel a assignment er kau? Lemechelaod a rengum el kmo a Jehovah medengelii a omomelechesiu er ngii. Sel em support omelodech e molemolem loba blakerreng el mora Jehovah me a cheldebechel lousbech er ngii, e ngsebechel mo ulterekokl a rengum el kmo ngmo omekngeltengat er kau.​—Psa. 18:25.

15. Ngmekera dolemolem el ulserechakl sel bo dechebangel omelsemai er a chelsel ongdibel?

¹⁵ Sel dorael el lmuut el mo kmeed er a ulebongel er tia el mekngit el blekeradel e kede mo chobangel omelsemai er a chelsel ongdibel. Aika el omelsemai a sebechel esemii a blakerreng er kid el mora Jehovah. Me ngkired el mo ulserechakl. A lsekum e ke mo feel el kmo ngdimlak el melemalt omerellel a Kristiano el mo er kau, e lak morreked a kngtil a rengul. A lsekum e ke ngmai a omesmechokl e momes lengelakl er a rrengem e mkengei omesmechokl e moruul a omelodech el kirem el meruul. E sel loruul omelodech a cheldebechelel a Jehovah el ngar ngii a lerellii er kau, e moba rengum el rokir el kongei e molengesenges a ulekrael.

16. Ngmekera e sebechem el melemolem loumera el ulsirs er a Jehovah me a cheldebechelel?

¹⁶ Ngsebechem el melemolem loumera el ulsirs er a Jehovah me a cheldebechelel sel lemeasem a blakerreng er kau. Engdi omoruul el uaisei e ngkirem el melemolem el ulserechakl, el belkul a kmo, ngmelemolem el chelellakl a rengum, ungil omdasu, e omes a tekoi loba osengel a Jehovah. Mosuub el kirir a rechad er a Biblia el mle sebechir el mo mesisiich osisiu el blekeradel e molebedebek er a kerebai er tir. Moluluuch el mora Jehovah. E lak moleakl er kau er a ongdibel. Me a ngii di el ngerang el duubech e a Satan a diak el sebechel choridau er a Jehovah me a cheldebechelel.​—Jak. 4:7.