CHISEL A KLENGAR ER A RECHAD
“Ngmle Soak el Mo Oureor el Kirel a Jehovah”
AKI uleldars chimomam el melmesumech er a kekerei el group el ki blo moldingel er tir el kiliei er bita er a Granbori, el beluu el mlara mesechesechel a oreomel er a Suriname. Aki ngilasech er a bos el delasech er a kerrekar e merrael lokiu a Tapanahoni River. Engdi ngdi mle telkib e a brobera er a bos a subechii er a bad. A medal a bos a urresors me a ralm a milekekii a bos el rokir. Ngmera el mlo melekedukem a uluk. Alta ngmla mo betok el rak el kngar er a bos el merael mesiou el circuit overseer, me nguaisei engdi ngak a metitur el mengikai!
A uchei er a kuuchais a tekoi el dilubech er uriul, e me kuuchais er a rolel ak mlo omuchel el mesiou el ngar er a mui el taem el omesiou.
Ak mlechell er a 1942 er a klebokel el iungs er a Curaçao el ngar er a Caribbean. A demak a chad er a Suriname engdi ureor a uchul e ngmillukl el mora Curaçao. Sesei el rak er uchei er ak mechell e a demak a mlo ta er tirke el mle kot el Sioning er a Jehovah el miltecholb er a Curaçao. a Ngbek el sandei lulsuub a Biblia lobengkemam el teim el ochad, alta ngdimlak el blechoel somam el mesuub. Sera lebo el 14 a rekik e aki millukl el mora Suriname el mo omekerreu er a delal a demak.
NGKMAL KLOU A LERIRELLII A UNGIL KLAUSECHELEI
Ak milengoit a taem lobengterir a rengeasek er a ongdibel er a Suriname el mle blak a rengrir el mesiou er a Jehovah. Tirka mle telkib el meklou er ngak e milsiou el regular pioneer. Ak milsa klou el deurreng er tir sel losaod a experience er tir er a odingel. Uriul er a miting aki dirrek el mle chadecheduch el mesaod er a Biblia, el oumesingd el taem aki mle dengchokl e chadecheduch lomes a btuch er a eanged. Tirka el sechelik a ngilsukak el mo medengelii a soak el meruul er ngii er a klengar er ngak. Ngmle soak el mo oureor el kirel a Jehovah. Me sera lebo el 16 a rekik e ak miltecholb. Uriul er a bo le 18 a rekik e a kulemuchel el mesiou el regular pioneer.
SUUB A MEKLOU ULTUTELEL EL TEKOI
Sera ak pioneer er a Paramaribo
Ngbetok ak siluub er a bok pioneer el ngii a kmal mla ngosukak er a omesiungek er a mui el taem el omesiou. El ua tiang, a ta er a klou a ultutelel el tekoi el ksilubii a klungel a ultutelel a de train er a rebebil. Sera kumuchel el pioneer e a ta el missionari lodam el Willem van Seijl a ulechotii a klemeriarreng er ngii er ngak. b Ngulsisecheklak a betok el kirel a doruul a ngerachel er a ongdibel. Ngar tiakid el taem e ngkmal dimlak kutebengii el kmo ak kmal uluusbech er tia el training. Ongingil rak e ak miltutk el mo special pioneer e mlo olengeseu aike el mekekerei el group er a rudam me a rudos el kiei er a chelsel a oreomel er a Suriname e mle cheroid er a ongdibel. Ak kmal uleba omereng el saul el kirel aike el training el kngilai er a rudam! Seikid el taem el mei e ak melasem loukerebai er tir e mengoit a taem el train er a rebebil.
Ongeru el tekoi el ksilubii a klungel a ultutelel a domekbeot er a klengar er kid e bo el chelderoder a rolel a doruul a tekoi. Uchelel a bek el buil, e ngak me a partner er ngak el dirrek el special pioneer a melib aike el ki bo mousbech er aike el merael mei el sandei. E a ta er kemam a rolii a kemanget el omerael el mora chelsel a beluu e mechar aika el ki mousbech. Ngmle kiram el mo ungil lousbech a ududam me aike el ngar ngii er kemam er a chelsel a ta el buil. E le sekum ngmo diak aike el ki mousbech e ngdiak a chad el sebechel ngosukemam. A kuumerang el kmo ngak el di mle kekerei el chad e suubii el mo omekbeot er a klengar er ngak e mo chelderoder a rolel a kuruul a tekoi a ngilsukak me ngmle sebechel lulturk osengek er a urerel a Jehovah er a klengar er ngak el rokir.
A ongedei el tekoi el ksilubii a klungiolel a dolisechakl er a rechad el ngar er a omelekingir. Ngak a mlukeroul el melekoi a tekoi er a Dutch, Merikel, Papiamento, me a Sranantongo (dirrek lokedongall el Sranan), el ngii sel omelekoi el oumesingd el chad er a Suriname a medengelii. Me nguaisei engdi rechad el kiliei er a chelsel a oreomel a mle beot er tir el kongei er a ungil chais sel ki momerk el ngar omelekingir. Ngmle meringel er ngak a melekoi a bebil er aika el omelekoi, el ua tekoi er a Saramaccan, el ngii ousbech a high me a low tone. Me nguaisei alta ngkmal mle meringel engdi ngkmal dmeu a renguk el siluub aika el omelekoi. Chelsel aika el betok el rak e ngmle sebechek losisecheklterir a relmuut el betok el mo medengelii a klemerang le ngsebechek el melekoi omelekingir.
Nguaisei, ngngar ngii aike el taem el kdilu tekoi el blok merur er ngii. El ua tiang, a ta el taem e ngmle soak loker er a chad el kusuub lobengkel el millekoi a tekoi er a Saramaccan el kmo, ngmla mo uangera ringelel a delel. Ngdi tekoi el kuleker er ngii a kmo, kau ke dioll. Chochoi e ngdimlak el soal tia el ker. Me alta lebebil ak mlo dmu cheleuid, engdi ak millasem el mora tkurrebab el sebechek el mengedecheduch er a rechad el kulemerk el mo er tir el ngar er a omelekingir.
KONGEI A LMUUT EL BEBIL ER A NGERACHEL
Sera 1970 e ak miltutk el mo circuit overseer. Tiakid el rak e a kullecholt er a “Visiting the World Headquarters of Jehovah’s Witnesses” el slide show el prokuram el mora betok er aike el group el kiei er a chelsel oreomel. Ngak me a rebebil er a rudam uluusbech er a kemanget el bos el loeak omoachel el mo oldingel er tir. Tia el bos a dirrek el uleltak er a generator, tangk er a cheluch, olbidel, me aike el klekedall lorrael er tia el prokuram. Sel ki bo er sel kiram el mo er ngii e aki otobed aika el klekedall el mora chelsel a beluu el mo er sel ki bo morrael er a prokuram er ngii. Engdi sel kmal kullatk er ngii el kirel aika el omerollam a rechad el kiliei aika el basio a kmal
mle sorir aika el prokuram. Ngkmal mle dmeu a renguk lolisechakl er a rebebil el kirel a Jehovah me a meues el cheldebechelel. Aike el klengeltengat el kngilai a lmuut el mle ngaruchei er a ngii di el ringel el blok chebangel el meruul er a urerel a Jehovah.MELIBUK ER A EDEI EL KERREEL
Ethel me ngak er aki bo bechiil er a September 1971
Alta kmilsa klungiolel a kulemolem el mesobil engdi ngkmal mle soak el mo bechiil. Me a kulemuchel el meluluuch lolengit er a chad el mo dmeu a rengul meruul er tia el meringel ngerachel lobengkek el mesiou aike el ongdibel el ngar er a chelsel oreomel. Bekord el ta el rak er uriul e ak mlo kasisiik ngak me a Ethel lodos el special pioneer, el kilengei el meringel loureor el kirel a Jehovah el mo lmuut me a lak lebeot a blekeradel. A Ethel a di mle kekerei e kmal soal a apostol Paulus e mle soal mo uai ngii el mirruul aike el rokui el sebechel er a ureor er a berkel a klumech. Aki mlo bechiil er a 1971 e ulemuchel el mesiou loldingel ongdibel.
A Ethel a mlukeroul el diak el betok a ngera er ngii me ngmle beot er ngii a mo smau er a klengar el oldingel er tirke el kie chelsel oreomel. El ua tiang, sel ki bo moldingel ongdibel er a chelsel oreomel e ngdimlak ki molab a betok el klalo. Ki milsilek a bilam e melechong er a omoachel. Aki dirrek el milenga ngii di el ngerang lomeskemam el ua iguana, piranha, me a ngii di el ngerang lulemedikl er a oreomel me a lechub e te kirreel er a omoachel. Sel lak a belatong e aki ousbech a llel a tuu. Sel lak oliich e aki ousbech chimomam. Ngak me a Ethel el dilak el meruul aika el tekoi e oureor el kirel a Jehovah a mla ngosukemam el dibkur a edei el kerreel. (Oli. 4:12) Ngkmal diak ki mouuchel a rengmam el kirel!
Ngar er a omerollam el lmuut el mo remei er a odngelam er a ta er aike el ongdibel er a chelsel oreomel e aki mlo chobengelii sel blekeradel el kulsaod er ngii er a uchelel. A bos a mlo er cheungel
a ralm el telkib engdi ngdi mle mereched el lmuut el me er bab. Ngkmal ungil a renguk le ki uluu life jacket e dimlak kim rebet er a bos. Engdi a bos a mle mui er a ralm. Me a ki chiloit a kall el mlara chelsel a olekang er omoachel e uluusbech el melecheseb a ralm loltobed.Ngdimlak a kall le ki chiloit me aki milengereel. Engdi ngdimlak a mekereel. Me aki milluluuch lolengit er a Jehovah me lebeskemam a kelam el kirel seikid el sils. Aki kmal di mlo merek el meluluuch e a odam choitii a kerelel e korelii a ngikel el mle sebecham el teim el menga er ngii er seikid el kesus e ungil a rengmam.
BECHIIL EL SECHAL, CHEDAM, E CIRCUIT OVERSEER
Eim el rak el ki mosiou el oldingel ongdibel e aki mlo metik el kmo aki mo oungalek. Ngkmal mle dmeu a renguk engdi ngdimlak kudengei el kmo ngmo uangerang a klengar er kemam. Ngak me a Ethel a mle somam el melemolem el ngar er a mui el taem el omesiou. Me a ngelekam er a Ethniël a mlechell er a 1976. E a eru el rak me a tedobech er uriul e ngmlo er ngii a ngelekam er a Giovanni.
Omes er a chad el metecholb er a Tapanahoni River el kmeed er a Godo Holo el beluu er ongos er a Suriname—1983
Te kmal uluusbech er a rudam er tiakid el taem er a Suriname me a branch office a kiltmeklii a rolel e ngsebechek el melemolem el mesiou el circuit overseer e omekeroul er a rengelekam. Sera ledirk mekekerei a rengelekam e ak mlukngerachel el mo oldingel a di mekesai el ongdibel. Me ngsebechek el oldingel a bebil ongdibel el sesei el sandei er a buil e aike el mlo medechel el sandei ak mle pioneer er a ongdibel el ble le assign er kemam el mo er ngii. Ethel me a rengelekam ulebengkek loldingel aike el ongdibel el mle kmeed er a blimam. Engdi ngdi mle ngak el tang a mora ike el ongdibel me a assembly el ngar chelsel oreomel.
Sera ak circuit overseer e ak mle blechoel loldingel aike el ongdibel el ngar cheroid lousbech a bos
Ak childeroder a tekoi el kuruul me lsebechek el kutmokl a rokui el ngerechelek. Ak ulterekeklii el kmo a omesubam el telungalek aki moruul er ngii er a every week. E sel kuldingel aike el ongdibel el ngar er a chelsel oreomel e a Ethel a meruul er a omengull el telungalek lobengkel a rengelekam. Engdi aki millasem el dmak el meruul a tekoi el telungalek. Aki dirrek el dilak el meruul a rolel omilil el ua ousekool a games me a lechub aki oldingel a ungil basio el kmeed er a blimam. Ak mle blechoel el mekar el mo osoi el prepare a ngerechelek er a ongdibel. A Ethel a ua ngike el bechiil redil er a Osisechakl 31:15 el mekiis er a uchei er a lengasech a sils e olterekokl el kmo ngsebecham el menguiu er a text e omengur el telungalek er a uchei er a lebora skuul a rengelekam. Ak mera el oba omereng el saul el kirel a bechik el olengeseu er ngak el meruul a rokui el ngerachel el Jehovah omeskak.
Aki mle meringel loureor el olengeseu er a rengelekam el mo betik a rengrir er a Jehovah me a odingel. Ngmle somam a lengiltii el mo teloi er a mui el taem el omesiou. Engdi ngdimlak el somam a loruul er tiang le ngsomam el kirir e ngbai tir a melilt le ngsorir. Aki mle blechoel el mengedecheduch er tir el kirel a rolel a mui el taem el omesiou a mo uchul a klou el deuil a rengrir. Engdi ki dilu er tir el kmo ngmo er ngii a ringel el bo lechebangel engdi ki millisiich er a rolel e a Jehovah mla olengeseu e omekngeltengat er kemam el telungalek. Aki dirrek el ulterekeklii el kmo a rengelekam a mle iliuekl er a Resioning el nguu a Jehovah el mo kot er a klengar er tir.
A Jehovah milskemam aike el rokui el ki mousbech lomekeroul er a telungalek er kemam. Nguaisei ak mirruul er a ngerechelek el mesiou er a telungalek er ngak. A klengar er ngak er a chelsel a oreomel el mesobil special pioneer a ulsisecheklak el melib el kirel aike el ki mousbech. Me nguaisei alta ki kmal mle meringel loureor el kirel engdi ngngar ngii aike el taem el dimlak aki mousbech. E ngar aikakid el taem e a Jehovah ngilsukemam. El ua tiang, ngar er aike el ulebongel el rak er a 1980 me a uchelel aike el rak er a 1990 e ngmlo er ngii a uldikel er a Suriname. Ngar tiakid el taem e ngkmal mle meringel a debetik aike el dousbech er a klengar. Me nguaisei, engdi a Jehovah milskemam aike el rokui el ki mousbech.—Mt. 6:32.
MELATK EL KIREL A KLENGAR ER NGAK
Ngar er a klitechetud el mora klisiched: Ngak me a bechik er a Ethel
Kot el klou el ngelekam el sechal er a Ethniël me a bechil er a Natalie
Ngelekam er a Giovanni me a bechil er a Christal
Klengar er kemam er rokir e a Jehovah ulemekerreu er kemam e ngosukemam el mo dmeu a rengmam e ungil a rengmam er aike el ngar ngii er kemam. A rengelekam a uchul a deuil a rengmam e mera el ileakl el techall el mle sebecham el lomekeroul er tir el mo mesiou er a Jehovah. E mera el dmeu a rengmam le te dirrek el ngileltii el mo mesiou el mui el taem. Ethniël me a Giovanni tilobed er aike el skuul loruul a cheldebecheled e chelecha e te mesiou er a branch er a Suriname el terung lobengterir a rebecherir.
Ngak me a Ethel a mla mo mechudelang engdi aki kmal dirk mechesang el meruul er a urerel a Jehovah el special pioneer. Aki kmal mechesang me ngdirkak betik er a taem el mo mesuub el mo meduch el mengikai! Engdi ngkmal diak kuuchel er a renguk el kirel a ngii di el ngerang. Sel kulatk er a klengar er ngak, e ak mera el feel el kmo a omelilt er ngak el di mle kekerei e ngiltii el mo meruul er a mui el taem el omesiou a ta er aike el kot lungil omelilt el bla krellii.
b A chisel a klengar er a Willem van Seijl el “Reality Has Exceeded My Expectations,” a lultebedii er a October 8, 1999, el Awake!