SUOBEL EL BO DOSUUB 46
Rolel e a Jehovah Olengeseu er Kid Loutekangel Loba Deurreng
“A Jehovah oba kllourreng el mengiil el mo meruul a ungil kiriu, ngmo mekiis e ochotii er kemiu a klechubechub.”—ISA. 30:18, NW.
CHELITAKL 3 Ke Klisicham e Omeltkam e Blekengam
NGAR TIA EL SUOBEL a
1-2. (a) Ngera el ker a bo dosaod? (b) Ngera ochotii el kmo a Jehovah a kmal soal lolengeseu er kid?
JEHOVAH sebechel ngosukid el outekangel a mondai er a klengar er kid e mo dmeu a rengud el meruul er a omesiunged el mo er ngii. Ngoeak a ngera el rolel e ngolengeseu er kid? E mekera demui el ngmai a klungioled er aike el ngeso lomeskid? Kede mo onger aika el ker er tia el suobel. Engdi uchei er a donger, e dosaod er tia el ker: A Jehovah ngmera el soal lolengeseu er kid?
2 A tekoi lousbech er ngii a apostol Paulus el ngar er a babilengel el mora rechad er a Hebru ngosukid longer tia el ker. A Paulus a dilu el kmo: “A Rubak a ngelseuik, me ngdiak a kdekdelek; a chad ngera ngsebechel rullii er ngak?” (Heb. 13:6, BT) A ta el reference er a Biblia melekoi el kmo tia el tekoi el “ngelseuik” a melutk el kirel a chad el ngii di lemereched el mo ngosuir a chad el lolengit a ngeso. Ka mlechesii er a uldesuem a Jehovah el remurt el mo olengeseu er a chad el chuarm. Ke kmal mo kongei el kmo tia ochotii el kmo a Jehovah kmal soal, e kltmokl el mo Ngelsuid. Ngkmal sebeched loutekangel a ngii di el ringel loba deurreng e le Jehovah olengeseu er kid.
3. Ngera edei el rolel e a Jehovah olengeseu er kid loutekangel a ringel loba deurreng?
3 Ngera lmuut el bebil er a rolel e a Jehovah olengeseu er kid loutekangel a ringel loba deurreng? Me domes er a babier er a Isaia el mo onger er tiang. E ngerang? Le betok er aike el ulaoch el Isaia mlukreng el mo meluches a melutk el kirir a rechedal a Dios er chelecha el taem. Ka molatk er a 30 el bliongel. Ngar tia el bliongel e a Isaia ousbech a klebokel el okesiu lolecholt er a rolel e a Jehovah olengeseu er a rechedal. Ngdilu el kmo a Jehovah olengeseu er kid loeak sel (1) lekerekikl lorrenges e longer a nglunguched, (2) lomeskid a ulekrael, e (3) lomekngeltengat er kid er chelechang me a ngar medad. Me dorriter aika el edei el rolel e a Jehovah olengeseu er kid.
JEHOVAH ORRENGES ER KID
4. (a) A Jehovah ngmilekera losaod er a Rechijudea er a taem er a Isaia, e a cherengel a taem e ngngera ngmilecherei me ngduubech? (b) Ngera el omelatk a mla er ngii el kirir a reblak a rengrir el Chijudea? (Isaia 30:18, 19, NW)
4 A Jehovah mesaod er a Rechijudea el ngar er a kot el kekerei el bades er a 30 el bliongel er a Isaia el kmo, “tomtok” e “mengisois er a tar a klengit er bebul a kuk tang.” Ngdirrek el dilu el kmo: “Te di blechoel el omtok . . . e di blechoel el okor el orrenges osisecheklel a Dios.” (Isa. 30:1, 9) Tir el dimlak lekengei lorrenges a uchul me a Isaia ulemlaoch el kmo te mo osiueklii a tellemall. (Isa. 30:5, 17; Jer. 25:8-11) E tiakid a dilubech. Te milengai el mo blebaol er a Babilon. Me nguaisei engdi ngmla er ngii a Rechijudea er a delongelir el luleba blakerreng me a Isaia milsterir a klumech er omelatk. Ngdilu er tir el kmo a ta er a klebesei e a Jehovah mo ngoititerir el lmuut el mora Israel. (Monguiu er a Isaia 30:18, 19, NW. b) E tiakid a lerirellii. A Jehovah ngilebeteterir er a blebaol. Me nguaisei engdi tia dimlak di lemereched el tekoi. A tekoi el “Jehovah oba kllourreng el mengiil el mo meruul a ungil kiriu” ulechotii el kmo ngmo chuib a taem e ngii a mo osobelterir. Ngchilib a 70 el rak e ngmlo sebechir a rebebil er tir el lmuut el mora Jerusalem. (Isa. 10:21; Jer. 29:10) Te lilangel er a klengiterreng er a leblebaol engdi chelecha el bla lluut el mora belurir e te lmangel er a deurreng.
5. A Isaia 30:19 (NW) ngera ngolterekokl er a rengud er ngii?
5 Ngsebeched el ngmai omelisiich er aika el tekoi: “Sel lerenges a lengelem lolengit a ngeso, e ngmo onger er kau e le ngchubechubechad.” (Isa. 30:19, NW) Isaia olterekokl er a rengud el kmo a Jehovah kerekikl lorrenges er kid sel doluluuch el mo er ngii e kmal di mereched el mo onger a nglunguched. Ngmelemolem el melekoi el kmo: “Sel rechedel rongesii e ngmo onger er kau.” Aika omeklatk er kid el kmo a Demad a kmal soal, e kltmokl el mo olengeseu er kid sel dolengit a ngeso er ngii. Sel bo dodengelii tiang e ngmo ngosukid loutekangel loba deurreng.
6. Ngmekera tekingel a Isaia e ochotii el kmo a Jehovah orrenges a nglunguchir a derta el mesiungel?
6 Ngera ngdirrek lolterekokl a rengud er ngii tia el bades? A Jehovah kerekikl lorrenges a nglunguchir a rederta er kid. Ngera uchul me kede melekoi el uaisei? A kot el tedebechel a 30 el bliongel a ousbech er a tekoi el “kemiu” le Jehovah el mengedecheduch er a rechedal el rokui. Me nguaisei engdi a 19 el kekerei el bades ousbech er a tekoi el “kau” el belkul a kmo ngmengedecheduch er a derta el chad. Isaia kmo: “[Kau a diak] mluut el mo lmangel. Sel lerenges a lengelem lolengit a ngeso, e ngmo onger er kau e le ngchubechubechad. Sel rechedel rongesii e ngmo onger er kau.” A Jehovah el betik a rengul Chedam a diak bo lolekoi er a ngelekel el mla mo mechitechut a rengul el kmo, “Ngkirem el mo mesisiich a rengum el ua ta er kau.” E ngbai omes er a derta er kid e kerekikl lorrenges a derta el nglunguched.—Psa. 116:1; Isa. 57:15.
Ngera mle belkul a tekingel a Isaia er a ledu el kmo: “Ng diak . . . becherei [a Jehovah] me lolengull”? (Momes er a parakurab 7)
7. Ngmekera tekingel a Isaia me a Jesus e melisiich er a klungel a ultutelel a bo leblak a rengud el meluluuch?
7 Sel doluluuch el mora Dios er kid el kirel a tekoi el mengesang er kid, e a kot e nglocha mo onger er kid loeak sel lebeskid a klisiich el mo outekangel er ngii. E a lsekum e ngdiak el mereched el mo cheroid a ringel el ua dulemdasu er ngii, e nglocha kired el mo betok el taem el di dolengit er a Jehovah me le sisichid loutekangel er ngii. E a Jehovah mengemedaol er kid el mo meruul uaisei. Kede mtebengii tiang er aika el tekingel a Isaia: “Ng diak . . . becherei [a Jehovah] me lolengull.” (Isa. 62:7) Tia ngngera belkul? Ngkired el mo blak a rengud el meluluuch el mora Jehovah me ngua lak debsa techellel lolengull. Tekingel a Isaia mekltkid er a okesiu er a Jesus el kirel a nglunguuch el ngar er a Lukas 11:8-10, 13 (NW). Ngar tiang e a Jesus a melisiich er kid el mo ‘diak demekimd’ e “melemolem lolengit” er a chedaol reng. Ngdirrek el sebeched lolengit er a Jehovah me lomekrael er kid me lsebeched lungil meruul omelilt.
JEHOVAH OMEKRAEL ER KID
8. Ngmilekera tmaut a bades er a Isaia 30:20, 21 (NW) er a irechar?
8 Monguiu er a Isaia 30:20, 21 (NW). c A resoldau er a Babilon a mle iliuekl er a Jerusalem el ta el rak me a tedobech. A rechad a mlo chuarm er a klou el ringel. A ringel a di mlo ua blauang me a ralm lungil medengelii. Engdi a doltirakl er a 20 me a 21 el kekerei el bades e a Jehovah tilbir el mo er tir el kmo a lobult e lengodech omerellir, e ngmo osobelterir. A Isaia melekoi el kirel a Jehovah el kmo ng “Ngarbab el Sensei,” e tilbir el mo er tir el kmo a Jehovah mo osisecheklterir er a omengull el lekengei er ngii. Aika el tekoi a tilaut er a lemengubet er a blebaol. A Jehovah a mlo Ngarbab el Sensei el kirir e ngar cheungel a ulekrolel e a rechedal a liluut el toketekii a bliochel el omengull. Ngmera el dmeu a rengud le Jehovah Ngarbab el Sensei er kid er chelecha el taem.
9. Ngera ta er a rolel e kede melai a ulekrael er a Jehovah?
9 Ngar er aika el bades e a Isaia melekoi el kmo kid a ua rengalek er a skuul el Jehovah olisechakl er kid el ngar er a eru el rolel. A kot e a Isaia melekoi el kmo: “Ko mo mesa ngika el Ngarbab el Sensei er kemiu.” Ngar tia el okesiu e a Sensei a dechor er mederir a rengalek er a skuul. Ngmera el ileakl el techall el Dios olisechakl er kid er chelecha el taem. Ngmekera Jehovah e olisechakl er kid? Ngoeak a cheldebechelel. Kede kmal oba omereng el saul el kirel a bleketakl el ulekrael el dolai er a cheldebechelel a Jehovah! A ulekrael dolai er a miting me a convention me a dirrek loeak aika el babilenged, broadcast, me a lmuut el bebil a olengeseu er kid er a chelsel aika el meringel el taem el mo outekangel loba deurreng.
10. Ngoeak a ngera el rolel e kede orrenges er a “ngor el di ngar [ulled]”?
10 Isaia ouchais er a ongeru el rolel e a Jehovah olisechakl er kid. Ngdmu el kmo: “Kom mo rongesii a ngor el di ngar ulliu.” A Isaia mesaod el kirel a Jehovah el kmo ngsensei el ulturk osengel er a rengalek er a skuul e merael er ullir lolecholt er tir er a rael e omesterir a ulekrael. Chelecha el taem e kede orrenges er a ngerel a Jehovah el ngar ulled. Ngoeak a ngera rolel? A mlukreng el tekingel a le liluches er a irechar e locha er a Biblia. Me sel donguiu er a Biblia e ngua dorrenges er a ngerel a Jehovah el ngar ulled el mei.—Isa. 51:4.
11. A bo doutekangel loba deurreng e ngera kired el meruul? E ngerang?
11 Ngmekera demui el ngmai a klungioled er a ulekrael er a Jehovah el mei loeak a cheldebechelel me a Tekingel? Molatk el kmo a Isaia dilu eru el tekoi. A kot, “tiakid a rael.” Ongerung, “mokiu ngii.” (Isa. 30:21) Ngdiak el sebeched el di mo medengelii “a rael.” Ngdirrek el kired el “mokiu ngii.” Ngoeak a Tekingel a Jehovah me a omesaod el lebeskid a cheldebechelel e kede suub aike el longerechir er kid a Jehovah. Kede mesuub el mo oltaut. A bo doutekangel loba deurreng el ngar er a omesiunged el mora Jehovah e ngkired el meruul aika el eru el tekoi. E seikid e ngsebechel mo ulterekokl a rengud er a klengeltengat er a Jehovah.
JEHOVAH OMEKNGELTENGAT ER KID
12. A doltirakl er a Isaia 30:23-26, e ngmekera Jehovah omekngeltengat er a rechedal?
12 Monguiu er a Isaia 30:23-26. Ngmilekera tia el ulaoch e tmaut el kirir a Rechijudea el liluut el mora Israel er a uriul er a leblebaol er a Babilon? Te ngilai a betok el klengeltengat er a klechad me a klereng. Jehovah milsterir a betok el kall. Engdi sel lmuut el klou a ultutelel a Jehovah milsterir aike el rokui lousbech me bo lekeed er ngii e lluut el mo mengull er ngii el ngar er a melemalt el rolel. Aike el klengeltengat el lengilai a rechedal a Dios er tiakid el taem a dimlak lemokesiu. Ngua losaod er ngii a 26 el kekerei el bades, Jehovah milsterir a lmuut el klou el llomes, el belkul a kmo ngngilsuterir el mo medengei a belkul a Tekingel. (Isa. 60:2) Klengeltengat er a Jehovah ngilsuterir el mo melemolem el mesiou er ngii loba deurreng e mesisiich a rengrir le “rengrir a mui er a deurreng.”—Isa. 65:14, NW.
13. Ngmekera ulaoch el kirel a bliochel el omengull el lmuut el mo meteketek e mla tmaut er chelecha el taem?
13 A ulaoch el kirel a bliochel el omengull el lmuut el mo meteketek ngdirrek el melutk el kired er chelecha el taem? Nguaisei! Ngoeak a ngera el rolel? Ngulemuchel er a 1919 C.E. e te betok el miliol el chad a mla mo diak el blebaol er a Kloul Babilon, el ngii a cheldellel a rokui el klsuul el klechelid. Te mla mukrael el mora basio el lmuut lungil er a Beluu er a Nglat er a Israel. Te mla mukrael el mora baradis er a klereng. (Isa. 51:3; 66:8) Ngera tia el baradis er a klereng?
14. Ngngera baradis er a klereng, e techa kiei er ngii? (Momes er a Omesodel a Tekoi.)
14 Ngulemuchel er a 1919 C.E. el mei e a rengellitel a dmeu a rengrir el kiei er a baradis er a klereng. d Cherengel a taem e a “rekuk bebil el sib” el tir tirke el loba omelatk el di kiei er tia el chutem, a dirrek el mla mo kiei er tia el beluu er a klereng e oldeu a rengrir er a betok el klengeltengat er a Jehovah.—Jn. 10:16, NW; Isa. 25:6; 65:13.
15. Ngngar ker a baradis er a klereng?
15 Ngngar ker tia el baradis er a klereng? A rechedal a Jehovah debetik er tir el meliuekl er a beluulechad el rokir. Me a baradis er a klereng a ngar er a beluulechad el rokir. Me ngdiak loltirakl er a beluu el dekiei er ngii. Ngsebeched el mo er tia el baradis er a klereng sel leblak a rengud el support er a mera el omengull.
Ngmekera derta er kid e sebechel melisiich er a klebekelel a baradis er a klereng? (Momes er a parakurab 16-17)
16. Ngmekera e sebeched el melemolem lomes er a klebekelel a baradis er a klereng?
16 A bo dolemolem el ngar tia el baradis er a klereng e ngkired el melemolem loba dmolech el omereng el saul el kirel a ongdibel er kid a Rekristiano. Ngmekera doruul er tiang? Loeak sel domes a klungiolir a rengar er a ongdibel, el diak el kngterir. (Jn. 17:20, 21) Ngera uchul me tia kmal klou a ultutelel? Molatk er tiang. Ke locha mo mes a betok el klebokel e kakerous el kerrekar er a park me a lechub e ngsers. Ngdi osisiu a baradis er a klereng el ngar er aika el ongdibel er chelecha el taem a betok a onglebokel er ngii, el tir tirka el betok el bedengir a rechad el domekesiu er tir er a kerrekar. (Isa. 44:4; 61:3) Ngkired el melemolem lulturk osenged er a klebekelel “oreomel” el diak el ike el kngtil a derta el “kerrekar” el kmeed er kid. Ngdiak el kired el mechei a chelitechetud me a lechub e ngchelitecheterir a rechad er a ongdibel me lerellid el mo diak desa klebekelel a kltang er a ongdibel er a Rekristiano er a beluulechad el rokir.
17. Ngera sebechel a derta er kid el meruul el melisiich er a kltarreng er a ongdibel?
17 Ngmekera derta er kid e sebechel melisiich er tia el kltarreng el dobang? Ngoeak sel bo dechad er omeruul el budech. (Mt. 5:9; Rom 12:18) Bek el taem el bo doruul er a budech lobengterir a rechedal ongdibel e kede melechel er a klebekelel a baradis er a klereng. E deblechoel el melatk el kmo a Jehovah milengurs er a derta el chad el ngar tia el baradis er a klereng el mei er a bliochel el omengull. (Jn. 6:44) Ka di molatk er a deuil a rengul a Jehovah sel lomes er kid el meringel loureor el melisiich er a budech me a kltarreng lobengterir tirka el mesiungel el kmal mekreos er a rengul!—Isa. 26:3; Hag. 2:7.
18. Ngera kired el blechoel el melebedebek, e ngera uchul?
18 Ngmekera demui el ngmai a klungioled er aika el betok el klengeltengat el Jehovah omesterir a remesiungel? Kede dmolech el melebedebek aike el dosuub er a Tekingel a Dios me aika el babilenged. Chouaitia el rolel omesuub me a omelebedebek a mo ngosukid el mekeroul a blekerdelir a Rekristiano el ngii a mo odbechid el mo olecholt er a “bltikerreng ra klodam” e “mungil kaubltikerreng” er a chelsel ongdibel. (Rom 12:10, BT) Sel dolebedebek a klengeltengat el dolab er chelechang e ngsmisichii a deleuill er kid me a Jehovah. E sel dolebedebek a klengeltengat el Jehovah mo omeskid er a ngar medad e ngmo mera el tekoi er a rengud a omelatk el dobang el mesiou er ngii el mo cherechar. Aika el rokui a mo dochelir a deurreng er kid el mesiou er a Jehovah er chelechang.
MRELLII A RENGUM EL MO OUTEKANGEL
19. (a) A doltirakl er a Isaia 30:18 (NW) e ngera sebechel mo ulterekokl a rengud er ngii? (b) Ngera mo ngosukid loutekangel loba deurreng?
19 Jehovah ‘mo mekiis’ el kired sel bo lokngemedii tia el mekngit el blekeradel. (Isa. 30:18, NW) Ngulterekokl a rengud el kmo a Jehovah el “Dios er a llemalt” a diak bo lebecherei a beluulechad er a Satan me lolemolem lengelakl er sel taem el usbechall. (Isa. 25:9) Kede oba kllourreng el mengiil er a sils er a Jehovah er osobel. A osisiu el taem e kede mengreos er a ileakl el techall er a nglunguuch, mesuub e oltaut a Tekingel a Dios, e melebedebek a klengeltengat el bla dengai. Sel doruul el uaisei e a Jehovah mo ngosukid el mo outekangel loba deurreng el ngar omengull er kid el mo er ngii.
CHELITAKL 142 Melemolem Lurrekodel er a Omelatk el Dobang
a Tia el suobel a mo mesaod a edei el rolel e a Jehovah olengeseu er a remesiungel el mo outekangel a mondai er a klengar loba deurreng. Kede mo mesaod aikang loeak sel domes er a 30 el bliongel er a Isaia. Tia el bliongel a mo omeklatk er kid er a klungel a ultutelel a doluluuch el mora Jehovah, dosuub er a Tekingel, e dolebedebek a klengeltengat lomeskid er chelechang me aike el bo lomeskid er a ngar medad.
b Isaia 30:18, 19, NW: Engdi a Jehovah oba kllourreng el mengiil el mo meruul a ungil kiriu, Ngmo mekiis e ochotii er kemiu a klechubechub. E le Jehovah a Dios er a llemalt. Ngdmeu a rengrir tirke el rokui el kerekikl el mengiil er ngii. A rechad sel bo lekiei er a Sion er a Jerusalem e ngdiak mluut el mo lmangel. Sel lerenges a lengelem lolengit a ngeso, e ngmo onger er kau e le ngchubechubechad. Sel rechedel rongesii e ngmo onger er kau.
c Isaia 30:20, NW: Alta Jehovah a uaisei el mo meskemiu a chelebengeliu er a ringel, engdi ngika el Ngarbab el Sensei er kemiu a dikea lomart er ngii me ko mo mesa ngika el Ngarbab el Sensei er kemiu.
d OMESODEL A TEKOI: A “baradis er a klereng” a mesaod el kirel a blekeradel el dengar ngii e kede melechesuar er a osebechakl e mengull er a Jehovah el ngar er a kltarreng. Tia betok a kall er a klereng er ngii el diak el chelsechusem er a klsuul el osisechakl, e betok a ureor el doruul lomerk er a ungil chais el kirel a Rengedel a Dios el ngii a meskid a deurreng. Ngngar ngii a kmes el deleuill er kid me a Jehovah, e kiei el ngar er a budech lobengterir a rudam me a rudos er kid, el tir olengeseu er kid loutekangel a mondai er a klengar loba deurreng. Kede mo kiei er tia el baradis er a klereng sel bo dongull er a Jehovah er a melemalt el rolel e debora tkurrebab el sebeched el mo oukerebai er ngii.