1. Ngera kede medengei el kmo ngmo duubech, e ngera sebechel mo ulterekokl a rengud er ngii?

 KEDE medengei el kmo te mo er ngii omtok er kid sel domerk er a klumech. Te lmuut el mo betok er a ngar medad. (Dan. 11:44; 2 Ti. 3:12; Och. 16:21) Engdi ngsebechel mo ulterekokl a rengud el kmo a Jehovah mo ngosukid. E ngerang? E le Jehovah blechoel lolengeseu er a remesiungel el mo kutmokl a ngerechelir el mo lmuut er a chelsel a kmal meringel el blekeradel. El ua tiang, molatk a bebil el blekeradel er a klengar er a profet Esekiel er a lomerk el mora Rechijudea el mle blebaol er a Babilon.

2. A Jehovah ngmilekera losaod er a rechad er a territory er a Esekiel, e ngera kede mo mesaod er tia el suobel? (Esekiel 2:3-6)

² Te mle uangera rechad er a territory er a Esekiel? A Jehovah mesaod el kirir el kmo te “omtok” e “medecherecher a rengrir.” Tirka mle ua toched el melemall e kengaol el ua scorpion. Sei a uchul me a Jehovah mle betok el taem el ledu er a Esekiel el kmo: ‘Lak omedakt.’ (Monguiu er a Esekiel 2:3-6.) A Esekiel a mle sebechel rullii a ngerechelel lomerk e le (1) Jehovah uleldurech er ngii, (2) ngiluu a klisiich loeak a chedaol reng er a Dios, (3) e ngiluu a klisiich loeak a Tekingel a Dios. Ngmilekera ika el edei el tekoi e ngosuir a Esekiel? E mekera ngosukid er chelecha el taem?

3. Ngera locha kmal silsichii a rengul a Esekiel, e milekera Jehovah e olterekokl er a rengul el kmo ngmo ngosuir?

³ A Jehovah dilu er a Esekiel el kmo: “Ngak oldurech er kau.” (Ese. 2:3, 4) Aika el tekoi a locha kmal silsichii a rengul a Esekiel. E ngerang? A Esekiel a locha millatk el kmo aika osisiu el tekoi el ledilu el mora Moses me a Isaia er a letetketerir el mo profet er ngii. (Exo. 3:10; Isa. 6:8) E mle medengei el kmo a Jehovah ngilsuterir el mo mesisiich a melsemai er tir el meruul er a ngerechelir. Me sera ledu er ngii el eru el taem el kmo:  “Ngak oldurech er kau,” e ngmla er ngii a ungil luchul me ngmle sebechel loumerang el kmo a Jehovah mo ngosuir. Me a lmuut kung, ngar er a babier er a Esekiel e ngbetok el taem el debetik aika el tekoi: “A RUBAK a milengedecheduch er ngak.” (Ese. 3:16) Kede dirrek el metik er tia el tekoi el kmo, “A tekingel a RUBAK a mler ngak.” (Ese. 6:1) Me a Esekiel a mle ulterekokl a rengul el kmo a Jehovah uleldurech er ngii. A Esekiel a dirrek el mle ngelekel a prist, me a demal a locha ullisechakl er ngii el kmo a Jehovah mle oterekokl a rengrir a rokui el profet er ngii er a irechar el kmo ngmo ngosuterir. A Jehovah dilu er a Isak, Jakob, me a Jeremia el kmo: “Ak ubengkem.”​—Gen. 26:24; 28:15; Jer. 1:8.

4. Ngera el tekoi a locha kmal millisiich er a Esekiel?

⁴ Me a ruumesingd el chad er a Israel te mo mekerang el kirel a klemechel a Esekiel? A Jehovah dilu el kmo: “Ngdi diak a chad er a Israel el mo soal el orrenges; ng dirrek el diak bo lorrenges er ngak.” (Ese. 3:7) Me a rechad loltngakl er a Esekiel a uleltngakl er a Jehovah. Tia ulelterekokl er a rengul a Esekiel el kmo a rechad el diak bo lorrenges a diak lebelkul a kmo, ngdimlak leketmeklii a ngerechelel el profet. Ngdirrek el Jehovah ulelterekokl a rengul el kmo sel letaut a tekoi el lulemerk, e a rechad a “di mo medengei el kmo a profet a mlar a delongelir.” (Ese. 2:5; 33:33) Aika ulterekokl el silsichii a rengul a Esekiel el mo kutmeklii a ngerechelel lomerk.

5. A doltirakl er a Isaia 44:8, e ngera meskid a blekenged el omerk?

⁵ Ngdirrek el kmal smisichii a rengud sel dodengei el kmo a Jehovah oldurech er kid el omerk. Ngoldanges er kid sel lomekedong er kid el “sioning” er ngii. (Isa. 43:10) Ngmera el ileakl el techall! Me a Jehovah dilu er a Esekiel el kmo: ‘Lak omedakt.’ Ngdirrek el melekoi er  kid el kmo: “Lak medakt!” Ngera uchul me ngdiak el kired el medakt er a rumtok er kid? E le kede di ua Esekiel el mlodurech er a Jehovah me a Jehovah obengked.​—Monguiu er a Isaia 44:8.

6. (a) Ngmekera Jehovah olterekokl a rengud el kmo ngmo olengeseu er kid? (b) Ngera meskid a ongelaod me a klisiich?

⁶ A Jehovah olterekokl er a rengud el kmo ngmo olengeseu er kid. El ua tiang, a uchei er a ledu Jehovah el kmo: “Kemiu a sioning er ngak,” e ngdilu el kmo: “Sel bo molebechakl er a dmolech el ralm, e ak mo obengkem; a ikel chelebulem a diak bo lelebau. Sel bo msiseb er a ngau, e ng diak bo medul; a ikel meringel el ongarm el mei a diak bo le temellau.” (Isa. 43:2) Sel domerk er a klumech e kede locha mo chobangel a omelsemai el meleleb el ua dmolech el ralm me a lechub e ng omeasem el ua ngau el melul. Me nguaisei engdi ngoeak a ngelsuil a Jehovah e ngsebeched el melemolem lomerk. (Isa. 41:13) A ruumesingd el chad er chelechang a di ua rechad er a taem er a Esekiel el oltngakl er a klumech el domerk er ngii. Engdi tia diak lebelkul a kmo, ngdiak dungil meruul er a ngerecheled. Ngmechelaod e mesisiich a rengud le kede medengei el kmo ngodeuir a rengul a Jehovah sel dolemolem lomerk. A apostol Paulus a dilu el kmo: “[A derta el chad a] ngmai chomeksaul el redemelel a ikel urerir.” (1 Ko. 3:8, BT; 4:1, 2) A ta el odos el meketeketa el pioneer a kmo: “Ngkmal dmeu a renguk sel kudengei el kmo a Jehovah omekngeltengat er a blakerreng er kid.”

7. A bek el taem el Esekiel a mo melatk er sel ues lilsang, e nglocha ngera ngrirellii el mo er ngii? (Momes er a siasing er a medal tia el babier.)

⁷ A Esekiel a milsa el kmo a chedaol reng er a Jehovah kmal mesisiich. Ngmilsa er a ues a chedaol reng loureor lolengeseu er a rechanghel el lorrael er a kuruma er a Jehovah. (Ese. 1:20, 21) Me ngika ngmilekerang? Ngdmu el kmo: “Isei er a kisa tiang, e ak mloubuu el mo chebecheb er a chutem.” A Esekiel a kmal mlo mechas a rengul me ngdi mlo terrob er a chutem. (Ese. 2:1) Uriul e sel ta el bo lolatk er tia el ues e nglocha kmal lolterekokl er a rengul el kmo, ngoeak a ngelsuil a chedaol reng er a Jehovah, e ngkmal sebechel kutmeklii a ngerechelel lomerk.

8-9. (a) Ngera dilubech er a ledu Jehovah el mora Esekiel el kmo “bo mdechor”? (b) Ngera ngdirrek el mirruul a Jehovah el lmuut el melisiich er a Esekiel el kirel tia el kmal meringel el territory er ngii?

⁸ A Jehovah dilu er a Esekiel el kmo: “Ngelekel a chad, bo mdechor. Ng soak el mengedecheduch er kau.” Tiang me a dirrek el chedaol reng er a Dios a milsang a klisiich lousbech er ngii el mekiis el mo dechor. A Esekiel a dilu el kmo: “A Reng er a Dios a siliseb er ngak e ulekisak el mo dechor.” (Ese. 2:1, 2) Uriul me a dirrek el ngar er a omesiungel el rokir e a Esekiel ulemelechesiu er a “kloul el klisichel a RUBAK,” el chedaol reng lomekrael er ngii. (Ese. 3:22; 8:1; 33:22; 37:1; 40:1) Chedaol reng er a Dios a silsichii el mo meruul er a ngerechelel lomerk el mora rechad er a territory er ngii el mle “medecherecher a rengrir e omtok omerreder.” (Ese. 3:7) Jehovah dilu er ngii el kmo: “Ak mla rullii a medam el mo medecherecher el ua mederir e rullii a medal a bdelum el mo medecherecher el ua medal a bderrir. Ak mo rullau el kuk mo mesisiich er a ngii di le bad, choi, ke mo medecherecher el ua diamond; kele bo medakt er tirkel omtok.” (Ese. 3:8, 9, NW) Me a Jehovah ua ledilu er a Esekiel el kmo: ‘Lak bechei a delecherecherel a rengrir me lechoitechetur a rengum. Ak mo smisichau.’

⁹ Me a reng er a Dios a ngiluu a Esekiel el merael el omerk er a territory er ngii. A Esekiel  a dilu el kmo: “Klisichel a RUBAK a milchelchebak.” Ngmle bekord el ta el sandei el Esekiel a milsuub el mo ungil medengelii a klumech el bo lomerk er ngii me bo lsebechel merkii loba ulterekokl el reng. (Ese. 3:14, 15) E seikid a Jehovah dilu er ngii me lebora dellas me a “Reng er a Dios a siliseb er [ngii].” (Ese. 3:23, 24) Chelechang e a Esekiel a mla mo kltmokl el momuchel lomerk er a klumech.

10. Ngera kede ousbech er ngii me bo lsebeched el melemolem el meruul er a urered er a berkel a klumech, e ngerang?

¹⁰ Ngera kede ousbech er ngii me bo lsebeched el melemolem el meruul er a urered er a berkel a klumech? Molatk a tekoi el dilubech el mora Esekiel. Uchei er a lomuchel lomerk er a klumech e a chedaol reng a milsa klisiich luluusbech er ngii. Me ngua Esekiel, ngdi oeak a ngelsuil a chedaol reng er a Dios e ngsebeched el kutmeklii a ureor er a berkel a klumech. E ngerang? E le Satan a meringel loldechelakl er kid le ngsoal merrob er a urered. (Och. 12:17) Ngar er a osengir a redi chad e ngkmal diak el sebeched er a Satan e le ngkmal mesisiich. Me nguaisei engdi kede mesisiich er ngii loeak a urered er a berkel a klumech! (Och. 12:9-11) Ngmekera uaisei? Sel domerk e kede ochotii el kmo ngkmal diak demedakt er a ulekdakt er a Satan. Bek el taem el domerk e a Satan a mo make. Me a urered el diak lemeterob alta kede mo chelebangel a ultok, ngngera ngomeklatk er ngii er kid? Chedaol reng er a Dios a uchul me kede mesisiich me kid oba kengei er a Jehovah.​—Mt. 5:10-12; 1 Pe. 4:14.

11. Ngera ngmo meruul er ngii a chedaol reng el kired, e mekera dolemolem el melai er ngii?

¹¹ Okesiu er a Jehovah el meruul er a medal me a medal a bdelul a Esekiel el mo medecherecher, ngngera ngdirrek lolterekokl er a rengud er ngii? A chedaol reng er a Dios a sebechel meskid a klisiich el dousbech er ngii el mo mesisiich er a ngii di el tekoi el melsemai  er a urered er a berkel a klumech. (2 Ko. 4:7-9) Me ngera sebeched el meruul me dolemolem el melai er a chedaol reng er a Dios? Ngkired el blak a rengud el meluluuch lolengit er ngii, lulterekokl a rengud el kmo Jehovah orrenges a nglunguched. A Jesus ullisechakl er a redisaiplo er ngii el kmo: “Molemolem lolengit, . . . molemolem losiik, . . . molemolem el melngod.” E a Jehovah mo ‘mesterir Chedaol Reng tirkel olengit er ngii!’​—Lk. 11:9, 13, NW; Rel. 1:14; 2:4.

12. Ngua losaod a Esekiel 2:9–3:3, sel iluil el babier ngmla er el mei e ngera mle llechukl er ngii?

¹² A Esekiel a dimlak di lebo lemesisiich loeak a chedaol reng ngdirrek el mlo mesisiich loeak a Tekingel a Dios. Ngmilsa er a ues a chim lurrekodel er a iluil el babier. (Monguiu er a Esekiel 2:9–3:3.) Tia el babier ngmla er ker el mei? E ngera mle llechukl er ngii? Ngmilekera smisichii a Esekiel? Tia el iluil el babier a mlara kingellel a Dios er a omerreder. A Jehovah ulterekokl luluusbech er a ta er tirke el teua el anghel er a ues el lilsang a Esekiel el mo omsang tia el babier. (Ese. 1:8; 10:7, 20) Tia el babier a mle llechukl er ngii a tekingel a Dios, el kemanget el klumech er a kerrekeriil el mora reblebaol lulemtok. (Ese. 2:7) Tia el klumech a mle llechukl er a medal me a ikrel tia el babier.

13. Ngera ngdilu Jehovah me bo loruul er ngii a Esekiel el kirel tia el iluil el babier, e ngera uchul me ngmle merekos? 

¹³ Jehovah dilu er ngika el profet er ngii me lekelii tia el babier e ‘lokekii a delel er ngii.’ Me a Esekiel a killii tia el babier el rokir. Ngera belkul tia el tedebechel a ues? A Esekiel a mle kirel mo ungil medengelii a belkul a klumech el bo lomerk er ngii. Ngmle kirel moumerang er tia el klumech me bo lodbechii el mo omerk. E ngar ngii a dilubech er a lekelii. Ngmlo mtebengii el kmo tia el babier a “merekos el ua honey.” (Ese. 3:3) E ngerang? Ngar osengel a Esekiel e ngkmal mle ileakl el techall a lobang el mo omtechei er a Jehovah me ngua ble lemerekos, me a lechub e ngungil a rengul kirel. (Psa. 19:8-11) Ngkmal uleba omereng el saul el Jehovah kilengei er ngii el mo mesiou el profet er ngii.

14. Ngera ngilsuir a Esekiel el mo kltmokl el meruul er a ngerechelel?

¹⁴ Uriul e a Jehovah dilu er a Esekiel el kmo: “Bo mungil el orrenges e molatk a bek el tekoi el kulekoi er kau.” (Ese. 3:10) E dilu er a Esekiel el kmo bo lodengei aike el mle llechukl er tia el babier e bo lolebedebek. Sera loruul el uaisei a Esekiel e ngsilsichii a klaumerang er ngii. Ngdirrek el mlo medengelii a klumech el mle kirel mo ouchais er ngii er a rechad. (Ese. 3:11) A Tekingel a Dios a mlora rengul me ngii a mlo medengei aike el kirel melekoi. Me ngmlo kltmokl el mo meruul er a ngerechelel.​—Momekesiu er a Psalm 19:14.

15. Ngera kired el mo ‘ungil el orrenges’ me bo lsebeched loutekangel?

¹⁵ Kid me ngkired el mo mesisiich loeak a Tekingel a Dios me bo lsebeched loutekangel el ngar er a urered er a berkel a klumech. Ngkired el mo ‘ungil el orrenges’ aike el rokui el lolekoi er kid a Jehovah. Chelecha el taem a Jehovah mengedecheduch er kid loeak a Tekingel el Biblia. Ngmekera doterekeklii el kmo a Tekingel a Dios a ngar ngii a lerellii er a uldesued, rengud, me a uchul e kede meruul a tekoi?

16. Ngkired el mekera Tekingel a Dios, e mekera e sebechel mora rengud?

¹⁶ Ngdi ua sel donga e digest a kall e ngmo uchul a olisichel a bedenged, me kid me kede  mo mesisiich er a klereng sel dosuub er a Tekingel a Dios e dolebedebek er ngii. Kede melatk er sel desuubii er a iluil el babier. Jehovah a soal a ‘dokekii a deled’ er a Tekingel, el belkul a kmo kede mo ungil medengelii a Tekingel. Kede meruul uaisei loeak sel doluluuch, donguiu, e dolebedebek. A kot e kede meluluuch el mengetmokl er a rengud el mo melai a uldesuel a Dios. E mo merek e menguiu er a Biblia. A uriul e kede melebedebek. Kede dmolech el melatk aike el bla dechuiu. Ngera mo rsel? Sel bo leklou a temed el melebedebek, e a Tekingel a Dios a mora rengud.

17. Ngera uchul me ngkired el melebedebek aika el donguiu er a Biblia?

¹⁷ Ngera uchul me ngkmal klou a ultutelel el donguiu e dolebedebek er a Biblia? Ngsmisichii a rengud el mo omerk er a klumech er a Renged er chelechang e mo omerk er a klumech er a kerrekeriil er a ngar medad. Ngdirrek sel dolebedebek a blekerdelel a Jehovah e nglmuut el mo kmes a deleuill er kid me ngii. Seikid e kede chormii a tekoi el merekos e ungil, el ngii a budech me a deurreng.​—Psa. 119:103.

18. Ngera te mo mesa rechad er a territory er kid, e ngerang?

¹⁸ Kid a diak deua Esekiel el mlukreng el mo ouchais er a rechad. Me nguaisei engdi kede mla remuul a rengud el mo melemolem lomerk er a mlukreng el klemechel a Jehovah el ngar er a Tekingel el dimerekmo ureor lemeruul el mo oltirakl er sel ungil er a osengel. Me sel lemei a taem er a kerrekeriil e a rechad er a territory er kid a diak el sebechir el mo melekoi el kmo ngdimlak lenguu a omengelechel me a lechub a Dios a milengemikr er tir. (Ese. 3:19; 18:23) Te bai mo mesa el kmo a klumech el dulemerk er ngii a mlara Dios.

19. Ngera mo smisichid el mo churrengelii a urered lomerk?

¹⁹ Ngera mo smisichid el lomerk? Aike el edei el osisiu el tekoi el silsichii a Esekiel. Kede melemolem lomerk le kede medengei el kmo Jehovah oldurech er kid, e melai er a klisiich loeak chedaol reng me a Tekingel a Dios. Ngoeak a ngelsuil a Jehovah e kede melemolem lomerk e outekangel “mor a ulebongel.”​—Mt. 24:13.