A klou el ureor er a berkel a klumech a uchul me ngmlo klou a usbechel a babier. A rudam er a Brooklyn Bethel a mle print a magazine engdi te uluusbech er a ngodech el kombalii el print a book. Ngmlo betok el buil el tia el kombalii a dimlak el sebechel print a ildisel a book lousbech el kirel a berkel a klumech. Me a odam el Rutherford uleker er a Robert Martin el uluungerachel er a ureor er a factory el print el kmo, a lomdasu e ngsebechir el di tir el print a book.

A odam el Martin a melatk er tiakid el taem e dmu el kmo, “Ngmera el ungil uldasu e le ngmle belkul a kmo kede mo open er a factory el sebechel print a book.” A rudam a mle rent er a basio el ngar er a 18 Concord Street er a Brooklyn e milechar a klekedall.

Engdi ngdiak el rokui el chad a mle dmeu a rengrir el kirel tiang. Ngike el merreder er sel kombalii el mle print a book er kid a mle omes er tia el beches el factory. Ngdilu el kmo: “Ko molab aike el kot lungil klekedall el kirel a print a book e diak a ta er kemiu el meduch lousbech. Chelsel a elolem el buil e aika di mo diak el klalo.”

A odam el Martin a kmo: “Ngsebeched el loumerang a tekingel me nguaisei engdi ngika ulebes er a Jehovah, el ngii a blechoel el obengkemam.” E mera el mle klemerang a tekingel a odam el Martin. Ngdi mle telkib e te mlo print a 2,000 el book er a chelsel a ta el sils.

A rechedal a Jehovah dimlak di le print a book, te dirrek el mlo ousbech er a razio el omerk er a ungil chais. Ieta sils er a Sandei el February 26, 1922 e a odam el Rutherford ultebedii sel kot el cheldecheduch loeak a razio el dai er ngii a “Millions Now Living Will Never Die.” Ngultebedii  tiang er a radio station er a Los Angeles, California el KOG.

Ngbekord el 25,000 el chad a ulerrenges er tia el prokuram. A rebebil er tir a milluches el mereng a saul. A ta er ngii el tengami a mlara Willard Ashford el kiei er a Santa Ana, California. Ngika chilat er a odam el Rutherford el kirel a cheldechedechal. Ngdilu el kmo: “Te ngar ngii a retedei el chad el kiei er a blik el smecher e diak el sebechir el tobed er a blai, me ngdiak el sebecham el mo orrenges er a cheldecheduch omultebedii er a basio el kmeed er kemam.”

Betok el cheldecheduch loeak a razio mlotobed er aike el uleak uriul el sandei. A The Watch Tower a kmo ngar er a ulebengelel a 1922 e “te bekord el 300,000 el chad a rirengesii a klumech loeak a razio.”

A tengami el lengilai me a tekingir a rechad a uchul me a Remesuub er a Biblia rirellii a radio station er a Staten Island, el kmeed er a Brooklyn Bethel. Ngar er aike el uleak uriul el rak e a Remesuub er a Biblia uluusbech er tia el station el okedongall el WBBR el omerk el mora rebetok el chad el ngar er a kakerous el basio.

A The Watch Tower er a June 15, 1922, ultebedii a subed el kmo ngmo er ngii a convention er a Cedar Point, Ohio er a September 5 el mora 13, 1922. A Remesuub er a Biblia kmal mle dmeu a rengrir er a lekerd er a Cedar Point.

Ngar er a kot el cheldechedechal a odam Rutherford e ngdilu el kmo: “Ngkmal ulterekokl a renguk el kmo a Rubak a mo . . . omekngeltengat er tia el convention, e oterekeklii el kmo ngmo mocholt sel kot el klou el sioning er tia el beluulechad.” A re ultobed a cheldecheduch er tia el convention a millisiich er a rechad el mo meruul er a ureor er a berkel a klumech.

A September 8 e ngmle bekord el 8,000 el chad a mlei er a auditorium, el kmal semeriar el mo orrenges er a cheldecheduch el bo loltobed er ngii a odam el Rutherford. Ngmle sorir el mo medengelii a belkul a “ADV” el mle llechukl er a invitation. A rechad er a lebo el dengchokl e te locha milsa sel klou el iluil el mamed el mlara bebul a stage. A Arthur Claus el mlara Tulsa, Oklahoma el mei, a miltik er a ungil kingellel el mle sebechel lungil rongesii a prokuram. E tia  mle meringel el tekoi le seikid el taem e ngdimlak a mic me a speakers.

Te mle announce el kmo a remeoud el mei a diak a sebechir el me soiseb er a auditorium er a temel a cheldechedechal a odam el Rutherford me lak a chad el mo mengesang. Ngmle 9:30 er a tutau e a odam el Rutherford ulemuchel el melekoi a tekingel a Jesus el ngar er a Mateus 4:17: “Rengedel a eanged a kmedang!” Sera losaod er a rolel e a rechad a mo rongesii a klumech el kirel tia el Renged, e ngdilu el kmo: “A Jesus a dilu el kmo a temel a demiel e ngmo er ngii a klou el sim er a rechad, me ngii a mo mengudel er tirke el oba blakerreng.”

A odam el Klaus a melekoi el kmo: “Aki kmal mle kerekikl lorrenges a tekingel.” Me nguaisei engdi ngdi mle kiul el mo mekngit a tsios er ngii e mle kirel mo tuobed er a auditorium, alta ngkmal dimlak el soal mekiis le ngmedengei el kmo a letobed e ngdiak el sebechel lmuut el me tmuu.

Chelsel a sesei el bung e ngliluut el mo ungil a tsios er ngii. Ngmelekoi el kmo ngmla er ngii a klou el brotech er a lorael el bedul a auditorium. Ngkmal mlo smiich a rengul! Me ngmocha tibir el kmo ngmo rongesii tia el cheldecheduch el rokir el mo lmuut me a lsekum e ngmocha kirel melemiakl el mora chetebtel tia el blai el mo orrenges er ngii. Tiakid el taem e ngmle 23 a rekil. Ngmiltik er a rolel e melemiakl el mo er bab. A chedoel a blai a mle belkais me sera lorael el mong e ngkmal mle sebechel “ungil rongesii” a cheldecheduch.

Me nguaisei engdi ngdimlak di lengii el tang. Te mla er ngii a rebebil el ngar er a chetebtel tia el blai. A ta er tir el Frank Johnson a rirurt el mo er ngii e oker: “Ngngar ngii a kedorm el pocket knife er kau?”

Me a Arthur a kmo: “Chochoi.”

Me a Frank a dmu er ngii el kmo: “Kau a nger er a nglungucham. Ke mesa tia el klou el iluil el  klalo? Tiang a banner el llechotel el mora ika el deel. Mkerekikl lorrenges er a Judge. a Sel ledu el kmo, ‘ngkiriu el advertise, advertise,’ e ke tmuk aika el lechetel.”

Me a Arthur uleba olsengel e mengiil er a signal er tir. E ngii a mocha ulebengelel a cheldechedechal a odam el Rutherford. Ngika locha kmal mle excited me nglocha kmal mle klou a ngerel el kmo: “Bo mera el sioning er a Rubak e bo moba blakerreng. Molemolem el di mereko lemokngemed a Babilon. Momerk er a klumech er ker me ker. A beluulechad a kirel el mo medengei el kmo a Jehovah a Dios e a Jesus Kristus a King er a reking e Rubak er a re rubak. Tiakid sel kot el klou a ultutelel el taem er a reksi, a King a mengedereder! Kemiu a ngerecheliu el ouchais er a rechad er tiang. Me a leuaisei em advertise, advertise, advertise, er a King me a Rengedel!”

A Arthur a melekoi el kmo tiakid e ngii me tirke el bebil a tiluk a lechetel tia el banner me ngkmal di mlo ungil ruebet. Me a banner a mle llechukl er ngii a “Advertise er a King me a Renged” loltirakl er tia el llechukl el “ADV.”

A convention el mla er ngii er a Cedar Point a ngilsuterir a rudam el mo ulturk osengir er tia el kmal klou a ultutelel el ureor er a berkel a klumech er a Renged, e tirke el kilengei a kmal mle dmeu a rengrir el meruul er tia el ureor. A ta er a colporteur (el chelecha e te okedongall el pioneer) er a beluu er a Oklahoma er a Merikel a milluches el kmo, “A basio el ki momerk er ngii a betok er a rechad er ngii oureor el mengiis a coal e kmal mechebuul.” Ngika melekoi el kmo oumesingd er a rechad sel lerengesii a klumech er a Golden Age el magazine, “e te di mo merael a iuechel a mederir.” Ngkmo: “Ngmera el dmeu a rengmam le ngsebecham el mesterir a ongelaod.”

Tirka el Mesuub er a Biblia a mle medengelii a klungel a ultutelel a tekingel a Jesus el debetik er a Lukas 10:2: “Ng ngar ngii a klou el sim, e ngdi te di mekesai a ruureor el kirel.” Me a ulebengelel a rak e te mengal mirruul a rengrir el mo advertise el kirel a klumech er a Renged er ker me ker.