1. A rebetok er chelechang, ngngera uldesuir el kirel a okedongel a llomeserreng? (Osisechakl 1:20, 21)

 NGAR er a betok el beluu, e kede blechoel lomes er a rudam me a rudos er kid el ngar aike el basio el betok a rechad el merael er ngii, el dechor e merous a babier el mora rechad el me engelakl. Ngmla ta el moruul er tia el rolel a omesiou? A leuaisei e tia locha mekltkau er a tekoi el losaod er ngii a babier er a Osisechakl. Ngmesaod el kirel a llomeserreng el kmo, ngomekedong el klou a ngerel el mora rechad me lorrenges a ulekrael er ngii. (Monguiu er a Osisechakl 1:20, 21.) A Biblia me aika el babilenged a debetik a mera el llomeserreng er ngii, el llomeserreng er a Jehovah. A rechad a kmal lousbech aikang me bo lsebechir el nguu a diak a ulebengelel el klengar. Me ngkmal dmeu a rengud sel lekengei a chad el melai aika el babilenged. A rebebil a diak el semeriar el mo medengei aike el lolekoi a Biblia. A rekuk bebil ocherchur er kid. Te omdasu el kmo a Biblia kmal chuodel el babier e mla mo diak a usbechel. E ngar ngii tirke el omdasu el kmo a rechad el oltirakl er a Biblia meruul el tir el kmal melemalt e di judge er a rechad. Me nguaisei engdi a Jehovah olecholt er a bltikerreng e melemolem lomesterir a rechad a llomeserreng. Ngoeak a ngera el rolel?

2. Ngsebeched el metik er a mera el llomeserreng er ker, engdi a oumesingd el chad ngera te melilt el meruul er ngii?

² A ta er a rolel e a Jehovah omesterir a rechad a llomeserreng, a oeak a Tekingel el Biblia. Tia el babier a sebechir a rokui el chad el menguiu er ngii. E aika el babilenged el mengai er a Biblia? Ngoeak a klengeltengat er a Jehovah e aika el babilenged a motobed el ngar er a betok er a 1,000 el bedengel omelekoi. Me tirke el orrenges, el tir tirke el menguiu e oltaut aike el losuub, a ngmai a klungiolir. Me nguaisei, engdi oumesingd el chad a diak el sorir lorrenges er a ngerel a mera el llomeserreng. Sel bo lekirir el meruul omelilt e te bai kongei el di tir me a lechub e te orrenges  er a rechad. Te locha dirrek el metengel osengir er kid le kede melilt loltirakl aike el lolekoi a Biblia. Tia el suobel a mo mesaod er a uchul me a rechad a uaisei. Engdi a kot e me dosaod er a rolel e ngsebeched el nguu a llomeserreng er a Jehovah.

3. Ngera kired el meruul me denguu a mera el llomeserreng?

³ A llomeserreng a sebechel melutk el kirel sel duch er kid el sebeched lousbech aike el dodengei el meruul a ungil omelilt. Me nguaisei a mera el llomeserreng a lmuut el ngaruchei er tiang. A Biblia kmo: “A omeluu er a RUBAK a uchelel a llomeserreng, ma klemedengei er Ngikel Chedaol a sekutaberreng.” (Osi. 9:10) Me sel lebo el kired el meruul a meklou a ultutelel el omelilt e ngkirel a omelilt er kid el mengai a uchetemel er a uldesuel a Jehovah, el ngii a “klemedengei er Ngikel Chedaol.” Ngsebeched el meruul el uaisei sel dosuub er a Biblia me aike el babilenged el mengai er a Biblia. Seikid e kede mo ochotii a mera el llomeserreng.​—Osi. 2:5-7.

4. Ngera uchul me ngdi ta el Jehovah sebechel meskid a mera el llomeserreng?

⁴ Ngdi ta el Jehovah sebechel meskid a mera el llomeserreng. (Rom 16:27) Ngera uchul me ngsebeched el melekoi el kmo a llomeserreng a ngar er a Jehovah el mei? A kot, e ngika Ulemeob me ngika medengei a rokui el tekoi el kirel a blebelel. (Psa. 104:24) Ongerung, aike el rokui loruul a Jehovah ochotii a llemesel a rengul. (Rom 11:33) Ongedei, a mellomes el ulekrael er a Jehovah di mo uchul a klungiolir tirke el oltaut. (Osi. 2:10-12) Me a lsoad el nguu a mera el llomeserreng, e ngkired el kongei aika el edei el klemerang er a Biblia e mechei me ngomekrael omelilt er kid me a omerelled.

5. Ngera mla duubech le rechad el diak el sorir el kongei el kmo, ngdi ta el Jehovah sebechel meskid a mera el llomeserreng?

⁵ A rebetok el dongedecheduch er tir sel doldingel a melekoi el kmo ngkmal mengasireng a design er a charm me a dellomel, engdi te diak loumerang el kmo ngngar ngii a Ulemeob e bai oumerang er a evolution. A rekuk bebil a kmo te oumerang er a Dios engdi te omes aike el lolisechakl a Biblia el kmo ngkuk di mle blekeradel er a ngar er a mong, e kiei loltirakl aike el sorir. Engdi ngera rsel omerellir? A rechad loltirakl a di llemesir er a bai loltirakl a llemesel a Dios, ngmla rullii a beluulechad el lmuut el mo ungil? Te mla metik er a mera el deurreng me a ulterekokl el omelatk el kirel a ngar medad? Aike el domes er a beluulechad oterekeklii tia el klemerang el kmo: “A llemesel a chad, ma sekutaberreng er ngii, ma ungil el uldesuel a diak bo le ngesuir a lsekum a RUBAK a mo omtok er ngii.” (Osi. 21:30) Tia meskid a ungil luchul me ngkired el mora Jehovah el kirel a mera el llomeserreng! Me nguaisei, engdi a ruumesingd el chad a diak lebora Jehovah. Le ngerang?

6. A doltirakl er a Osisechakl 1:22-25 (NW) e te rua techang a mengad a dingerir er a ‘okedongel’ a mera el llomeserreng?

⁶ A rebetok a mengad a dingerir sel ‘lomekedong’ a mera el llomeserreng. A doltirakl aike el lolekoi a Biblia, e ngngar ngii a edei el bliongel er a rechad loltngakl er a llomeserreng: tirke el “diak a klemedengei er [tir],” tirke el “melenguul,” me tirke el “mekebelung.” (Monguiu er a Osisechakl 1:22-25, NW. b) Me domes aike el luchul me te oltngakl er a llomeserreng  er a Dios me a rolel e ngsebeched el mengeroid er kid er aikang me lak debo deuai tir.

7. Ngera uchul me a rebebil a melilt el melemolem el di “diak a klemedengei er [tir]”?

⁷ Tirke el “diak a klemedengei er [tir],” a tirke el beot er tir a mecheblad e mekesuseu. (Osi. 14:15, NW, ftn.) Kede blechoel el metik er a chouaitirka el chad sel doldingel. Molatk er tirke el betok el miliol el chad el longeuid er tir a remengeteklel a klechelid me a lechub a rechad er a balatiks. A rebebil a kmal mo mechas a rengrir sel bo lodengei el kmo tirka omulak er tir. Me nguaisei engdi tirke el losaod er tir a Osisechakl 1:22 (NW) a melilt el melemolem el diak a ngerang el lodengei le ngsorir el uaisei. (Jer. 5:31) Ngsorir el di meruul aike el sorir, e diak el sorir mo medengei aike el lolekoi a Biblia me a lechub e bo loltirakl aike el lolekoi. A rebetok er tir a di ua uldesuel a ta el chad er a Quebec, Canada el dilu er a Sioning el mlo oldingel er ngii el kmo, “A lsekum a prist er kemam a mengeuid er kemam, e ngkngtil el diak el kngtmam!” Ngkmal diak el soad el mo uai tirka el sorir el melemolem el di diak a ngerang lodengei!​—Osi. 1:32; 27:12.

8. Ngera mo ngosukid el nguu a llomeserreng?

⁸ Ngngar ngii a ungil luchul me a Biblia melisiich er kid me lolemolem el diak a klemedengei er kid el kirel a bebil tekoi, engdi kede mo “meklou el chad . . . lultebechel [omelebedebeked].” (1 Ko. 14:20) Kede nguu a mera el klemedengei loeak sel doltaut omellach er a Biblia er a klengar er kid. Sel doruul el uaisei e kede mesa el kmo aika el omellach a ngosukid el mochib er a mondai e mo ungil melilt. Ngungil dolatk a omelilt el bla deruul. A lsekum e kede mla mesuub a Biblia e ngar er a miting el kemanget el taem e ngsebeched el di kid loker el kmo, ngngera uchul me ngdirkak tibir a renguk el mora Jehovah e kmetecholb. E a lsekum e kede mla metecholb, e kid kede olengeriakl er a rolel a domerk e dolisechakl er a ungil chais? A omelilt er kid ngochotii el kmo a omellach er a Biblia omekrael er kid? Kid, kede olecholt a blekerdelir a Rekristiano el ngar er a omerelled el mora rechad? A lsekum kede mesa el kmo kede ousbech el mo meruul omelodech er a klengar er kid, e ngkired el dmolech el melatk a uleklatk er a Jehovah el ngii “a mesterir a llomeserreng er tirke el diak er tir.”​—Psa. 19:7.

9. Te mekera re “melenguul” e ochotii el kmo te oltngakl a llomeserreng?

⁹ Sel ongeru el bliongel er a rechad el oltngakl er a llomeserreng er a Dios a tirke el “melenguul.” A lebebil e sel doldingel e kede metik er chouaitirka el chad. Ngkmal sorir el melenguul er kid. (Psa. 123:4) A Biblia melekoi el kmo a taem er a uriul el sils e te mo betok a rechad el melenguul er kid. (2 Pe. 3:3, 4) Ngdi uai tirke el mle kirir el mo becherir a rengelekel a Lot, a rebebil er chelecha el taem a kmal diak lorrenges a uleklatk er a Dios. (Gen. 19:14) A rebetok ocherchur er tirke el kiei el oltirakl omellach er a Biblia. Tirka el melenguul a “di oltirakl e meruul a ike el di sorir el diak lomekerreu er a Dios.” (Jud. 7, 17, 18) A rolel a Biblia losaod er tirka el melenguul a kmal mesaod er tirke el omtok a mera el osisechakl me tirke el mla otngeklii a Jehovah!

10. Ngua losaod a Psalm 1:1, ngmekera doterekeklii el kmo ngdiak debo deuai tirke el melenguul er kid?

¹⁰ Ngmekera doterekeklii el kmo ngdiak bo deuai tirke el melenguul er kid? A ta er ngii a lak dobengterir a rechad el di sorir el mengeremrum. (Monguiu er a Psalm 1:1.) Tia belkul a kmo ngdiak dorrenges me a lechub e donguiu a ngii di el ngerang el mlara rumtok osisechakl. Kede mtebengii el kmo a lak dekerekikl e ngkmal sebechel mo beot er kid a mo mengeremrum e oumededenger er a Jehovah me a ulekrael el dengai loeak a cheldebechelel. Me ngkired el di kid loker: ‘Ngak ak blechoel el  mo mengeremrum sel dengai a beches el ulekrael me a lechub e ngklemedengei? Ngak ak blechoel osiik a kngterir tirke el omekrael?’ Sel demereched el mo mesmechokl aika el blekerdeled, e kede rullii a Jehovah el mo dmeu a rengul.​—Osi. 3:34, 35.

11. A re “mekebelung” ngua ngera osengir el kirel a llechul a Jehovah?

¹¹ Sel ongedei el bliongel er a rechad el oltngakl er a llomeserreng er a Dios a tirke el “mekebelung.” Tirka mekebelung e le te diak lekengei el mo kiei loltirakl a llechul a Jehovah. Te di meruul aike el ungil er osengir. (Osi. 12:15) Te otngeklii a Jehovah el ngike el luchul a llomeserreng. (Psa. 53:1) Sel doldingel e dongedecheduch er tir e te blechoel el melekoi a mekngit el kired le kede oltirakl aike el lolekoi a Biblia. Me nguaisei engdi ngdiak a ngera lungil el sebechir el meskid. A Biblia kmo: “A kebelung el chad a diak lomtab er a llomeserreng; ng diak a tekingel sel le soadel a meklou a ultutelel tekoi.” (Osi. 24:7) A remekebelung a diak el sebechir el meskid a ungil ulekrael. A Jehovah mengelechel er kid el kmo, “Mcheridau er a kebelung”!​—Osi. 14:7.

12. Ngera mo ngosukid me ngdiak debo deuai tirke el mekebelung?

¹² Kid a diak deuai tirke el ouketui a ulekrael er a Jehovah. Kede bai mesuub el mo betik a rengud er a rolel a Dios, luldimukl aike el rokui el llechul. Ngsebeched el melisiich er tia el bltikerreng loeak sel domekesiu aike el duubech sel dolengesenges er aike el duubech sel lak dolengesenges. Momtab aike el mondai el rechad a di tir lomekdubech le te oltngakl a mellomes el ulekrael er a Jehovah. E molatk er a rolel e a klengar er kau a kmal ungil lekau lolengesenges er a Dios.​—Psa. 32:8, 10.

13. A Jehovah, ngorrimel er kid el mo oltirakl a mellomes el ulekrael er ngii?

¹³ A Jehovah omesterir a rokui el chad a llomeserreng er ngii, engdi ngdiak lorrimel er a rechad el mo oltirakl er ngii. Me nguaisei ngouchais aike el mo duubech el mo er tirke el diak lekengei lorrenges er a llomeserreng er ngii. (Osi. 1:29-32, NW) Tirke el melilt el diak lolengesenges a llechul a Jehovah a mo “chormii a kngtil a omerellir.” Cherengel a taem e a klengar er tir a di mo uchul a ringel, me tir a mo nguemed. Me nguaisei engdi Jehovah a tibir el mo er tirke el orrenges e oltirakl a mellomes el ulekrael er ngii el kmo: “Ngdi ngikel orrenges er ngak a mo ungilbesul. Ng mo selebechakl, ele ng diak a ngeral uchul me bo le medakt.”​—Osi. 1:33.

14-15. Ngera kede suubii er a Osisechakl 4:23 (NW)?

¹⁴ Sel doltaut a llomeserreng er a Dios e ngdi mo uchul a klungioled. Ngua bla desaod, a Jehovah mla rullii el mo beot er kid a metik a mellomes el ulekrael. El ua tiang, ngar er a babier er a Osisechakl e ngmla meskid a betok el ulekrael el bo doltirakl e ngmo ungil a klengar er kid. Ka me dosaod a eua er ngii.

 ¹⁵ Momekerreu er a rengum. A Biblia kmo: “Ngaruchei er a rokui el tekoi e mongkar er a rengum, e le ngomtebechel er a klengar er kau.” (Osi. 4:23, NW) Molatk er a rolel a domekerreu er a chaidirengud. Ngkired el menga kall el ungil er a bedenged, exercise, e mengeroid er kid er aike el omeruul el melemall er a bedenged. Ngdi osisiu el kirel a rengud. Ngkired el bek el sils e kede melai okelel a reng er a Tekingel a Dios. Kede mengetmokl er kid el mora miting e mui el teloi er ngii. Kede melemolem el active loeak a blakerreng er kid lomerk er a klumech. E mengeroid er kid er aike el tekoi el sebechel kikingelii a uldesued, el ua mekngit el klausechelei me a rolel a ongelaod el ngar ngii a deleboes er ngii.

16. Ngera uchul me a Osisechakl 23:4, 5 a kmal ngosukid er chelecha el taem?

¹⁶ Bo lungil a rengum er aike el ngar ngii er kau. A Biblia meskid tia el ulekrael: “Lak di le kau el mengitechut a bedengem el melasem el mo merau. A ududem a sebechel di mereched el nguemed, el ua bla le redem osebekel el sebek el mo cheroid el ua uasi.” (Osi. 23:4, 5) A rechad a kmal sebechel di beot er tir oriid a ududir me a kloklir. Me nguaisei engdi a remerau me a remechebuul a di diul di sorir el mengereker a betok el udoud. Tia uchul me te blechoel el mo meruul a tekoi el ngii a tomall chisir, deleuill er tir me a rechad, me a dirrek el health er tir. (Osi. 28:20; 1 Ti. 6:9, 10) Me nguaisei engdi llomeserreng a ngosukid el moba tabesul el uldasu el kirel a udoud. Tia mo ngosukid me ngdiak lebo el merechorech a rengud e mo dmeu a rengud er aike el ngar ngii er kid.​—Oli. 7:12.

17. Ngmekera sebeched el ‘ungil dobedebek a tekoi el dolekoi’ el ua losaod er ngii a Osisechakl 12:18?

¹⁷ Momdasu er a uchei er a omongedecheduch. A lsekum e ngdiak dekerekikl e ngsebechel a tekinged el mo uchul a klou el telemall. A Biblia kmo: “A lak dungil el dobedebek a tekoi e dolekoi e ng ua saider el merus, e a dungil el dobedebek a tekoi e dolekoi e ng sebechel el omekungil.” (Osi. 12:18) Kede melisiich er a budech sel lak dosaod a kngterir a rebebil. (Osi. 20:19) A lsoad a tekinged a lak bo lolemall er a rechad e bai bo luchul olisiich, e ngkired lomekeek er a rengud er a Tekingel a Dios. (Lk. 6:45) Sel dolebedebek aike el lolekoi a Biblia, e a tekinged  a mo ua “madedok er a llomeserreng” el melisiich er a rechad.​—Osi. 18:4.

18. Ngmekera e ngosukid er a urered er a berkel a klumech a Osisechakl 24:6?

¹⁸ Moltirakl a ulekrael. A Biblia meskid tia el kmal ungil el ulekrael: “Uchei er cho bor a mekemad e ke kmal ungil el omdasu e mochung, ma ildisel a ungil uldasu el mngai a sebechel ngosukau el mo mesisiich.” (Osi. 24:6) Molatk er a rolel e a doltaut er a omellach er tia el bades a ngosukid sel domerk e dolisechakl. Ngdiak doruul er a berkel a klumech el di oltirakl er a soad, kede bai melasem loltaut aike el ngeso er a uldasu el bla lebeskid. Kede ngmai aika el ulekrael er a miting, el debo er ngii e te oltobed a cheldecheduch me a presentation el train er kid. Dirrek el cheldebechelel a Jehovah meskid a betok el dongu, el babier me a video, el ngii a ngosuterir a rechad el mo medengelii a Biblia. Ke locha mla mesuub el mo meduch lousbech aika el dongu.

19. Ngua ngera uldesuem el kirel a llomeserreng lomeskid a Jehovah? (Osisechakl 3:13-18, NW)

¹⁹ Monguiu er a Osisechakl 3:13-18 (NW). c Kede mera el oba omereng el saul el kirel a ungil ulekrael el ngar er a Tekingel a Dios! Kede mo kirel ker a lemlak aika el ulekrael? Ngar tia el suobel e kede mla smaod a bebil er a ungil ulekrael el debetik er a babier er a Osisechakl. Me kid a medengei el kmo a Biblia el rokir a mui er a mellomes el ulekrael er a Jehovah. Mada derellii er a rengud el mo oltaut a mellomes el ulekrael lomeskid a Jehovah. A ruumesingd el chad a diak lutebengii a kerresel a llomeserreng er a Dios, engdi kid ulterekokl a rengud el kmo “tirke el urrekodel er [a llomeserreng] a okedongall el dmeu a rengrir.”