“A LSEKUM e ngngar ngii a ta er kemiu el diak el kengei el mo oumekemad er a France me a England, e kom rokui el mo mad!” Aika mle tekingel a ta el ofiser er a Nazi el mora group er a Resioning er a Jehovah er a temel a Ongeru el Mekemad. E alta te mla er ngii a resoldau er a Nazi el dechor lolab a boes, me nguaisei engdi ngdimlak a ta er a odam er kid lotngeklii a klaumerang er ngii. Te kmal ulechotii a blekeu! Tia ungil lolechotel a uldesuir a Resioning er a Jehovah el kirel a mekemad: Ngkmal diak dekengei el mo teloi a mekemad er tia el beluulechad. Mo lmuut me a lomekdakt er kid er a kodall, me ngdiak dekengei el mo omekbitang er a tekoi er a balatiks.

1. A RECHEDAL A DIOS EL ROKUI A MLE CHAD ER A TA EL RENGED

A ngar er a mong, e a Jehovah ngileltii a di chimo el renged el mo chedal, el ngii a renged er a Israel. Ngmillekoi el kirir a rechad er a Israel el kmo, “A beluulchad el rokir a kloklek, e ngdi kemiu a mo ngellitel chedak.” (Exo. 19:5) A Dios a dirrek el milsterir a ileakl el beluu. Me sel ledu er tir el mo oumekemad er aike el bebil er a renged, e te dimlak loldechelakl me a lechub e lomekoad er a remengull er a Jehovah. a

Chelecha el taem e a remengull er a Jehovah a “chad er a bek el beluu, ma kebliil, ma bek el bedengir a re chad ma omelekoi.” (Och. 7:9) A lsekum a  rechedal a Dios a mo teloi a mekemad e te mo oumekemad me a lechub e te omekoad er tirke el dirrek el mengull er a Jehovah.

2. A JEHOVAH DILU ER A RECHAD ER A ISRAEL ME BO LOUMEKEMAD

A ngar er a mong, e a Jehovah millilt er a taem el bo loumekemad a rechad er a Israel me a uchul me te oumekemad. El ua tiang, a Jehovah dilu er tir me bo lotutii a kerrekerilel el mora rechad er a Kanaan, el tir a mle merael chisir el kirel omengull er tir er a remekngit el anghel, mekikiongel el rolel a deleboes, me a omelenget er a rengalek. A Jehovah dilu er a rechad er a Israel me bo lokngemedeterir er a beluu el letilbir el kmo ngmo omesterir, me lak bo longesuseu er tir el mo meruul aika el mekngit el tekoi. (Lev. 18:24, 25) A rechad er a Israel er a lebo lekiei er a Beluu er a Nglat e ngngar ngii aike el taem el Jehovah dilu er tir el mo oumekemad er a recherrouir, el omekerreu er a rechedal. (2 Sa. 5:17-25) Me nguaisei engdi a Jehovah dimlak lekengei er a rechad er a Israel me di le tir el melilt el mo oumekemad. Aike el taem el lurruul el uaisei a mlo uchul a klou el tellemall.​—Ule. 14:41-45; 2 Kr. 35:20-24.

Chelecha el taem e a Jehovah diak lolekoi er a rechad me bo loumekemad. Aika el renged a kaumekemad el kirel aike el sorir a rechad, el diak el soal a Dios. Te omuchel a mekemad e le ngsorir el melai a beluu, mengereker a betok el udoud, me a lechub e te melisiich a uldesuir er a balatiks. Engdi ngkuk mekerang el kirir tirke el leko te oumekemad lousbech er a ngklel a Dios e mesebechakl a omengull er tir me a lechub a leko te oumekemad er a recherrouel a Dios? A Jehovah mo omekerreu er a remera el mengull er ngii e mo okngemedeterir a recherrouel er a mekemad er a Armakedon el mo er ngii er a ngar medad. (Och. 16:14, 16) Ngar tia el mekemad e a Dios a mo ousbech er a rechanghel loumekemad el diak el rechad el mengull er ngii.​—Och. 19:11-15.

3. A RECHAD ER A ISRAEL A DIMLAK LOMEKOAD ER TIRKE EL ULLECHOLT A KLAUMERANG

A ngar er a mong, e a rechad er a Israel ullecholt er a klechubechub el mo er tirke el lulechotii  a klaumerang er a Dios, e di ulemekoad er tirke el Jehovah kmo ngkirir el mad. Molatk eru el olechotel. Alta Jehovah dilu er a rechad er a Israel me lokngemedii a beluu er a Jeriko, me nguaisei te ulsebelii a Rahab me a telungalek er ngii le tir el uluumerang. (Jos. 2:9-16; 6:16, 17) Uriul e te dimlak lokodeterir a rechad er a Gibeon le te ulechotii omeluu er a Dios.​—Jos. 9:3-9, 17-19.

Chelecha el taem e aika el renged el kaumekemad a diak lolsobel er tirke el lolecholt a klaumerang. E a rechad er aika el beluu el diak a telemellir a blechoel el mad er aika el mekemad.

4. RECHAD ER A ISRAEL A MLE KIRIR LOLTIRAKL A LLECHUL A DIOS EL KIREL A MEKEMAD

A ngar er a mong, e a Jehovah milsterir a resoldau er a Israel a ulekrael el kirir loltirakl. El ua tiang, a Dios a mla er ngii aike el taem el ledu er tir el mo msa beluu el bo loumekemad er ngii a “techall er a budech.” (Dut. 20:10) A Jehovah dirrek el milengerechir er a resoldau er a Israel el mo mengikiid er tir e mo oltirakl a llechul el kirel a ungil me a mekngit. (Dut. 23:9-14) Alta aike el bebil er a renged a mle blekerdelir lolterebek er a redil er aike el beluu el blo lemesisiich er ngii, engdi Jehovah dimlak lekengei er a rechad er a Israel me leuaisei. E ngbai dimlak el sebechir el mo bechil a redil er a beluu leblo lemesisiich er ngii el dimerekmo bo lemerek a ta el buil.​—Dut. 21:10-13.

Chelecha el taem e a oumesingd el beluu a saing a babier el kongei er a mla moterekokl el rolel a klaumekemad. Me alta ika loruul lomekerreu er a rechad er a beluu me nguaisei engdi te blechoel oleiit aika el llach.

5. A DIOS ULUUMEKEMAD EL KIRIR A RECHEDAL

A ngar er a mong, e a Jehovah uluumekemad el kirir a rechad er a Israel, e mle blechoel mo mesisiich er a mekemad loeak a mengasireng el rolel. El ua tiang, ngmilekera Jehovah ngosuterir a rechad er a Israel el mo mesisiich er a Jeriko? A Jehovah dilu el kmo sel “[loldiu] el klou a ngerir, ma cheuatel a [mongkangk]” me ngmo beot er tir a soiseb el nguu a beluu. (Jos. 6:20) Te milekera mo mesisiich er a re Amorait? “A RUBAK a urrebet a meklou el chull el kori er a eanged el mekodeterir. Te bai mle betok a re mlad er a chull el kori er a re mad er a re soldau er a Israel.”​—Jos. 10:6-11.

A REMERA EL KRISTIANO A CHAD ER OMERUUL EL BUDECH

Me kede mla mesa el kmo a blekeradel er chelecha el taem a kmal diak el ua rechad er a Israel er a ngar er a mong. Me nguaisei engdi ngdiak di le ikakid a uchul me ngdiak doumekemad. Ngar ngii a lmuut el bebil. El ua tiang, a Dios ulemlaoch el kmo a uriul sils e tirke el mo mosisechakl er ngii a “diak lluut el mengedmokl el kirel a mekemad” e bo leteloi a mekemad. (Isa. 2:2-4) Me a lmuut kung a Kristus a dilu el kmo a redisaiplo er ngii a “diak [el] chedal a belulechad” me te diak lomekbitang er a rolel aika el mondai er tia el beluulechad.​—Jn. 15:19, BT.

A Kristus a dirrek el millisiich er a rultirakl er ngii el mo meruul a lmuut el betok. Ngullisechakl er tir el mo mengoit a blekeradel el ngii a mo uchul a omengemekl a mekngit, ngasecherreng, me a mekemad. (Mt. 5:21, 22) Me a lmuut kung, ngullisechakl er a rultirakl er ngii el mo “meruul a budech” e mo betik a rengrir er a recherrouir.​—Mt. 5:9, 44.

Ngmekera doruul er tiang? Nglocha diak el soad el mo teloi a mekemad, engdi ngngar ngii a chad er a ongdibel el douketui er ngii? Dolemolem el oureor el meringel el mengoit aika el mekngit er a rengud.​—Jak. 4:1, 11.

Ngdiak deteloi aika el mondai er a beluulechad, kede bai melisiich er a budech me a bltikerreng er a delongeled. (Jn. 13:34, 35) Mada derellii er a rengud el mo melemolem el diak domekbitang e domes el beduluchei el mo er sel sils el Jehovah mo okngemedii a mekemad me ngmo diak el mo cherechar.​—Psa. 46:9.