1. Ngera el omelatk a bla lebeskid a Jehovah?

 A JEHOVAH mla meskid a ungil omelatk er a diak a ulebengelel el klengar. Te ngar ngii a rebebil loba omelatk el mo kiei el mo cherechar er a eanged el mo anghel el diak el lengemed a klengar tir. (1 Ko. 15:50, 53, NW) Engdi oumesingd el chad oba omelatk el mo kiei el mo cherechar er tia el chutem, el cherrungel a klisichel a bedengir me a deurreng er tir. (Och. 21:3, 4) Me a omeltked a kmal mekreos er a rengud, a doba omelatk el mo kiei el mo cherechar er a eanged me a lechub e ngdi ngar tia el chutem.

2. A omeltked ngmengai a uchetemel er a ngerang, e ngera uchul me ngsebeched el melekoi el uaisei?

² A tekoi el “omelatk” lousbech er ngii a Biblia, a sebechel moiuid el “omes el beduluchei el kirel a ungil tekoi el mo duubech.” A omeltked el kirel a ngar medad a ulterekokl e le ngmla er a Jehovah. (Rom 15:13) Kede medengei a telbilel e medengei el kmo ngoltaut a tekingel. (Ule. 23:19) Ngulterekokl a rengud el kmo a Jehovah a ngar ngii a urungulel me a klisichel el mo oltaut aike el ledu el kmo ngmo meruul. Me a omeltked a diak lak a uchetemel. Kede mla mes, e oumerang aike el tekoi el omeltked a mengai a uchetemel er ngii.

3. Ngera kede mo mesaod er tia el suobel? (Psalm 27:14)

³ A Demad el ngar er a eanged a betik a rengul er kid, e soal a bo doumerang er ngii. (Monguiu er a Psalm 27:14.) Sel lemesisiich a klaumerang er kid er a Jehovah e ngmo sebeched loutekangel a ringel e omes el beduluchei loba blekeu me a deurreng. Me dosaod a rolel e a omeltked a omekerreu er kid. Me a kot e kede mo mesaod er a uchul me a omelatk a uai a uak me a lkou. E a uriul e kede mo mesaod er a rolel e ngsebeched el smisichii a omeltked.

4. Ngmekera omelatk e uai a uak? (Hebru 6:19, BT)

⁴ Ngar er a babilengel a apostol Paulus el mora rechad er a Hebru e ngulemekesiu er a omelatk el mora uak. (Monguiu er a Hebru 6:19, BT. b) Ngika mle blechoel lomais a beluu el ngar er a diall me ngmle medengei el kmo a uak a lousbech lomtebechel er a diall me ngdiak lobechakl. A ta el taem e ngmlara diall e ngmo er ngii a meses el eolt. Ngulemes er a rechad loltengel a uak e le te mle bekikl er a diall a lsbechii a risois. (Rel. 27:29, 39-41) Ngdi ua uak lomtebechel er a diall, a omeltked omtebechel er kid me ngdiak dobechakl el mo cheroid er a Jehovah er a chelsel aike el blekeradel el ua teletelel a ses el eolt. A omeltked a cholleklid sel dechelebangel a ringel le kede medengei el kmo a blekeradel a mo ungil er a ngar medad. Lak dobes el kmo, a Jesus a dilu el kmo kede mo modechelakl. (Jn. 15:20) Me sel dolebedebek a telbilel a Jehovah e ngngosukid el melemolem el mesiou er ngii.

5. Ngmilekera omelatk e melisiich er a Jesus er a lechebengelii a kodall?

⁵ Molatk er a rolel e a omeltkel a Jesus a ngilsuir el melemolem loba blakerreng alta ngmle medengei el kmo ngmo mad er a meringel el kodall. A apostol Petrus ulemelekl er a ulaoch er a babier er a Psalm el mesaod er a uldesuel a Jesus er a Pentekost 33 C.E. Ngika mle chelellakl e ulterekokl a rengul. Ngdilu el kirel a Jesus el kmo: “[Ak] oba omelatk el mengiil, e le kau el Dios a diak bo mchitak er a belurir a rulekoad; ng diak bo becherei a blak a rengul el mesiungem me bo le mechut er a debull. . . . Ke ngar bita er ngak me ng dmeu a renguk.” (Rel. 2:25-28; Psa. 16:8-11) Alta Jesus a mle medengei el kmo ngmo mad, engdi ngmle ulterekokl a rengul el kmo a Demal a mo okisii el lmuut el mo obengkel er a eanged.​—Heb. 12:2, 3.

6. Ngera ngdilu ta el odam el kirel omelatk?

⁶ A omeltked a Rekristiano mla ngosuterir a rebetok er a rudam me a rudos er kid el outekangel. Molatk er a Leonard Chinn, el blak a rengul lodam el kiliei er a England. Sera temel a Kot el Mekemad e ngmlekelebus le ngdimlak el kengei el mo soldau. Ngmle eru el buil el lekelebus. A uriul er tiang e te kilebsengii el mo meruul a kmal meringel lureor. Ngmilluches el kmo: “A experience er ngak a ngilsukak el mo mtebengii el kmo, a omelatk a uchul me ngsebeched loutekangel. Ngngar ngii a kerebil a Jesus, rechapostol, me a reprofet me a telbiil er a Biblia. Aika el rokui a meskid a omelatk el kirel a ngar medad e smisichid loutekangel.” A omelatk a mle okul a rengul a Leonard, e dirrek el sebechel mo uaisei el kired.

7. Ngmekera ringel e smisichii a omeltked? (Rom 5:3-5; Jakobus 1:12)

⁷ Sel doutekangel a ringel e desa Jehovah lolengeseu er kid, e kede mo melechesuar el kmo kede oba kengei er ngii. Tia smisichii omeltked. (Monguiu er a Rom 5:3-5; Jakobus 1:12.) A omeltked a lmuut el mo mesisiich er sel taem er a dekot el kongei er a ungil chais. A Satan a soal a demeeleb er a ringel el bo dechelebangel, engdi ngoeak a ngelsuil a Jehovah e ngsebeched el mtekangel.

8. Ngmekera omelatk e ua lkou? (1 Thesalonika 5:8, BT)

⁸ A Biblia dirrek lomekesiu er a omeltked el mora lkou. (Monguiu er a 1 Thesalonika 5:8, BT. c) A soldau oulkou el omekerreu er a bdelul er a temel a mekemad. Ngar er a mekemedid er a klereng, e ngkired lomekerreu er a uldesued er a odelecheklel a Satan. Ngika ousbech a  betok el tekoi el mengesuseu er kid e melemall er a uldesued. Ngdi ua lkou lomekerreu er a bdelul a soldau, ngdi osisiu a omeltked omekerreu er a uldesued me ngsebeched el melemolem el loba blakerreng el mora Jehovah.

9. Ngera duubech sel lak a omeltkir a rechad?

⁹ A omeltked er a diak a ulebengelel el klengar a ngosukid el moba llomeserreng me a sekutaberreng sel doruul a tekoi. Me nguaisei, engdi a lsekum tia el omeltked a mo mechitechut me a uldasu er a klechad a mo omtebechel er a uldesued, e ngsebechel mo diak lulturk osenged er a diak a ulebengelel el klengar. Molatk er a rebebil er a Rekristiano er a Korinth. Te mlo diak loumerang er a kmal klou a ultutelel el telbilel a Dios, el ngii omelatk er a okiis. (1 Ko. 15:12) Paulus a milluches el kmo, tirke el diak loumerang er a okiis a di kiei lotirakl aike el soal a rengrir. (1 Ko. 15:32) A rechad er chelecha el taem el diak a omeltkir er a telbilel a Dios a di meruul aike el sorir, el ike el lomdasu el kmo ngmo uchul a deuil a rengrir er chelechang. Engdi kid a ngodech e le kede otuil a omeltked el kirel a telbilel a Dios er a ngar medad. A omeltked a ua lkou el omekerreu er a uldesued me ngdiak bo doruul a tekoi el di melatk er a di kid, e bo luchul a telemellel a deleuill er kid me a Jehovah.​—1 Ko. 15:33, 34.

10. Ngmekera omeltked e mekerreuid er a cheleuid el uldasu?

¹⁰ A omeltked a dirrek el sebechel mekerreuii a uldesued me ngdiak bo domdasu el kmo ngdiak a ultutelel dolasem el loldeu er a rengul a Jehovah. El ua tiang, a rebebil a locha mo melatk el kmo: ‘Ngak a kmal diak bok ta er tirke el mo kiei el mo cherechar. Ngkmal diak rredemelel. Ngkmal diak el sebechek el remuul aike el soal a Dios a kuruul.’ Mutebengii el kmo a Elifas el ta er tirke el leko te mlo mengelaod er a Job uluusbech aika el osisiu el uldasu. Ngdilu el kmo: “Ng sebechel a di chad el meral mo klikiid?” Ngdirrek el dilu el kirel a Dios el kmo: “A Dios a diak loumerang er a re anghel er ngii; tir me ng diak le klikiid er osengel.” (Job 15:14, 15) Aika kmal mekngit el blulak! Lak mobes el kmo a Satan a soal obo momdasu el uaisei. Ngmedengei el kmo a lsekum kede melemolem lomdasu el uaisei e ngmo mechitechut a omeltked. Me motngakl chouaika el blulak e bo lulturk osengem er a telbilel a Jehovah. Lak moumededenger el kmo a Jehovah kmal soal obo mkiei el mo cherechar, e ngii a mo ngosukau el rullii tiang.​—1 Ti. 2:3, 4.

11. Ngera uchul me ngkired loba kllourreng el mengiil er a otutel omeltked?

¹¹ Ngdiak leblechoel el beot a lolemolem el mesisiich a klaumerang er kid. Ngsebechel mo kekerei a rengud el mengiil a otutel a telbilel a Dios. Me nguaisei, a Jehovah a diak a uchelel me a ulebengelel, me a osengel er a taem a ngodech er kid. (2 Pe. 3:8, 9) Ngmo otutii a moktek er ngii el ngar sel kot lungil rolel, me nguaisei engdi tia locha diak el sel taem el dolatk er ngii. Ngera sebechel ngosukid el mo melemolem el mesisiich a klaumerang er kid e oba kllourreng el mengiil er a Dios el mo oltaut a telbilel?​—Jak. 5:7, 8.

12. A doltirakl er a Hebru 11:1, 6, e ngmekera omelatk e ulekuak er a klaumerang?

¹² A omeltked a mo melemolem el mesisiich a lsekum e kede melemolem el kmeed er a Jehovah, el ngii ngike el mo otutii a omeltked. A Biblia melekoi el kirel a omelatk el kmo, ngulekuak er a klaumerang er kid el kmo ngmera el ngar ngii a Jehovah, e ngii “omesterir omeksullir tirkel osiik er ngii.” (Monguiu er a Hebru 11:1, 6.) A Jehovah sel lebo lemera el chad er a rengud, me ngii a mo ulterekokl a rengud  el kmo ngmo otaut a rokui el telbilel. Me dosaod a rolel e ngsebechel lmuut el mo dmolech a deleuill er kid me a Jehovah, me lolemolem el mesisiich a klaumerang er kid.

13. Ngmekera dolekeed er kid er a Dios?

¹³ Moluluuch el mora Jehovah, e monguiu er a Tekingel. Alta ngdiak el sebeched el mesa Jehovah, me nguaisei engdi ngsebeched el mo kmeed er ngii. Ngsebeched el mengedecheduch er ngii loeak a nglunguuch, lulterekokl a rengud el kmo ngorrenges er kid. (Jer. 29:11, 12) Ngsebeched lorrenges er ngii loeak sel donguiu er a Tekingel e dolebedebek er ngii. Sel donguiu el kirel a rolel e a Jehovah ulemekerreu er tirke el mle blak a rengrir er a irechar, e a omeltked a lmuut el mo mesisiich. A rokui el tekoi el llechukl er a Tekingel a Dios a “melluches el kirel chosisechakl el mer kid, el kirel me bo doba chomelatk loeak a ducherreng ma chongelaod el lomeskid a chedaol Llechukl.”​—Rom 15:4, BT.

14. Ngera uchul me ngungil dolatk aike el bla leruul a Jehovah el kirir a rebebil?

¹⁴ Molebedebek er a rolel e a Jehovah mla otaut a telbilel. Molatk a lurruul a Jehovah el mora Abraham me a Sara. Tirka kmal mlo chuodel me ngdimlak el sebechir el mo oungalek. Engdi a Dios a tilbir el kmo ngmo er ngii a ngelekir. (Gen. 18:10) Ngmilekera Abraham? A Biblia kmo: “[Ngdi millatk] e uluumerang, misei a uchul e ngmlo demal a betok el renged.” (Rom 4:18, BT) Me alta ngngar osengir a redi chad e ngdimlak omelatk el kirel a blekeradel el lemla er ngii a Abraham, me nguaisei engdi ngii a mle ulterekokl a rengul el kmo a Jehovah mo otutii a telbilel. Ngtilaut a tekingel a Jehovah. (Rom 4:19-21) Chouaika el cheldecheduch osisecheklid el kmo ngkmal sebechel mo ulterekokl a rengud el kmo a Jehovah oltaut a telbilel, mo lmuut me a domes a blekeradel e ngua lak el sebechel mo uaisei.

15. Ngera uchul me ngungil dolatk aike bla leruul a Dios el kired?

 ¹⁵ Molatk aike el bla leruul a Jehovah el kirem. Molatk a klungiaol el bla mngai er aike el telbiil er a Biblia el mla tmaut. El ua tiang, a Jesus a tilbir el kmo a Jehovah a mo meskau aike el mousbech. (Mt. 6:32, 33) Jesus a dirrek el mla oterekeklii a rengum el kmo a Jehovah mo meskau a chedaol reng sel molengit er ngii. (Lk. 11:13) A Jehovah mla otirakl aika el telbilel. E locha sebechem el melatk a lmuut el bebil er a telbiil el bla lotaut el kirem. El ua tiang, ngtibir el mo ousubes er kau, mengelaod er kau, e meskau aike el mousbech el mo melemolem el kmeed er ngii. (Mt. 6:14; 24:45; 2 Ko. 1:3) Sel molebedebek el kirel aike el bla leruul a Dios el kirem, e ngmo smisichii omeltkem el kirel aike el bo loruul el kirem er a ngar medad.

16. Ngera uchul me a omelatk a kmal mekreos el sengk?

¹⁶ A omeltked er a diak a ulebengelel el klengar a mekreos el sengk er a Jehovah. Kede kmal omes el beduluchei el kirel a ungil el klengar er a ngar medad, el dodengelii el kmo ngmera el mo tmaut. Tia uai a uak, el omtebechel er kid me ngsebeched loutekangel a ringel, mo mesisiich odechelakl, e diak demedakt el mad. Ngua lkunged, lomekerreu er a uldesued me lsebeched lotngakl a cheleuid el uldasu e mo melemolem lurrekodel er a klemerang. A omeltked el mengai a uchetemel er a Biblia olekeed er kid er a Dios e ochotii a dmolech el bltkil a rengul el mei er kid. Nguchul a klungioled sel lolemolem el mesisiich omeltked.

17. Ngera uchul me a omeltked a uchul a deurreng?

¹⁷ A apostol Paulus a millekoi el ngar er a babilengel el mora rechad er a Rom el kmo, “A omeltkiu le rellemiu me di ledeu a rengmiu.” (Rom 12:12) A Paulus a mle sebechel dmeu a rengul e le ngmle ulterekokl a rengul el kmo a le lemelemii a blakerreng er ngii, e ngmo nguu a diak a ulebengelel el klengar er a eanged. A omeltked a dirrek el sebechel mo uchul a deuil a rengud e le ngulterekokl a rengud el kmo a Jehovah mo otaut a telbilel. Ngua lolekoi a ta er a milluches er a Psalm: “Ngdmeu a rengul ngikel chad el . . . omeltkel a ngar er a Jehovah el Dios, . . . el ngike el blechoel oltaut a telbilel.”​—Psa. 146:5, 6, NW.