1-2. (a) Ngera te meruul a bebil kabelment el mora rechedal a Jehovah, engdi ngngera uldesuir a rechedal? (b) Ngmekera odechelakl e sebechel mo uchul a deurreng? (Dirrek el mosaod er a siasing er a medal tia el babier.)

 CHELECHA EL taem e a betok er a 30 el beluu er a beluulechad a omtok a urered. E ngar er a bebil er aika el beluu e te mengelebus er a rudam me a rudos er kid. Ngera el mekngit a leriruul? Ngar osengel a Jehovah e ngdirkak a ngera el mekngit el bla leruul. Tirka di menguiu e mesuub a Biblia er tir, ouchais a klaumerang er tir el mora rechad, e ngar er a miting lobengterir a rekldemir er a klemerang. Te dirrek el kmal diak lekengei el mo omekbitang er a rolel a balatiks. Alta te chuarm a meringel el odechelakl me nguaisei engdi te melemolem loba blakerreng el mora Jehovah. E kmal dmeu a rengrir el meruul el uaisei!

² Ke locha mla mes a siasing er a rebebil er tirka el Sioning e mtebengii el kmo te kmal di smile. Tirka dmeu a rengrir le te medengei el kmo a Jehovah a dmeu a rengul er tir el melemolem loba blakerreng el mo er ngii. (1 Kr. 29:17a, NW) A Jesus a dilu el kmo: “Ngdmeu a rengrir tirke el modechelakl el kirel a llemalt . . . Moldeu, e lodeu a rengmiu, e ngklou el omeksaul el bo mnguu.”​—Mt. 5:10-12, NW.

3. Ngua losaod a Rellir 4:19, 20, te milekera rechapostol er a lemodechelakl, e ngera me te mirruul el uaisei?

³ A rudam me a rudos er kid a chelebangel er a tekoi el blo lechebangel a rechapostol er a taem er a rekot el Kristiano. Te mlodechelakl le te ulemerk el kirel a Jesus. A rechedal a blil olbiil er a Rechijudea a dilu er tir el kmo, “Ng kmal diak  komluut el mengedecheduch ma lechub e molisechakl el oba ngklel a Jesus.” (Rel. 4:18; 5:27, 28, 40) Me te milekera rechapostol? (Monguiu er a Rellir 4:19, 20.) Te mle medengei el kmo ngike el lmuut el ngarbab a klisichel a dilu er tir el “mo omerk er a klumech el mo er a rechad e mo mesterir a cherrungel el ocholt” el kirel a Kristus. (Rel. 10:42, NW) Me a Petrus me a Johanes ulemtechei er tir el mengedecheduch e mle bekeu el melekoi el kmo te mo olengesenges er a Dios el kuk ngaruchei er tir, e dilu el kmo ngkmal diak bo lestob el omerk el kirel a Jesus. Me ngua ledilu er tirka el chad el kmo, ‘Kemiu ko momdasu el kmo, ngkuk ngarbab a klisichiu er a Dios?’

4. Ngua losaod a Rellir 5:27-29, ngera el kerebai a lekiltmeklii a rechapostol el kirir a rokui el mera el Kristiano, e mekera sebeched loukerebai er tir?

⁴ A rechapostol a kiltmeklii a ungil kerebai el rokui el mera el Kristiano a oltirakl er ngii er seikid el taem el mei. Te “olengesenges er a Dios el kuk ngar uchei er a [lolengesenges] er a re chad.” (Monguiu er a Rellir 5:27-29.) Me a uriul er a lemechelebed a rechapostol el kirel a blakerreng er tir e letobed er a blil olbiil er a Rechijudea, e “ng kmal mle dmeu a rengrir, ele te miltik er tir el redemelel a mo chuarm er otuub el kirel a Jesus,” e mirrael el mo melemolem el omerk!​—Rel. 5:40-42.

5. Ngera el ker a kired longer?

⁵ A kerebai er a rechapostol a mekdubech a bebil ker. El ua tiang, te milekera rechapostol e olengesenges er a Dios el kuk ngaruchei er a rechad e a osisiu el taem e te oltirakl er a Bades el kmo, ng “kirir el oltirakl er a re merreder er a beluu”? (Rom 13:1) Ngmekera “[doltirakl] a tekingir tirkel merreder ma rulab a dereder” el ua lolekoi a apostol Paulus, e dolemolem loba blakerreng el mora Dios, el ngike el kot el ngarbab el merreder?​—Titus 3:1.

6. (a) Te ngera “re merreder er a beluu” el losaod er tir a Rom 13:1, e kirel uangerang a omerelled el bedul tir? (b) Ngera el tekoi a klemerang el kirir a rokui el chad el merreder?

⁶ Monguiu er a Rom 13:1. A tekoi el “re  merreder er a beluu” el losaod er ngii tia el bades a melutk el kirir tirke el lolab a klisiich. A Rekristiano kirir el lolengesenges er tirka el merreder er a beluu. Tirka el merreder olterekokl el kmo a beluu a budech, rechad oltirakl a llach, e ngar ngii aike el taem el losebechakl e omekerreu er a rechedal a Jehovah. (Och. 12:16) Sei a uchul me ngkired el mesterir a tax, omengull, me a odanges el longerechir er kid. (Rom 13:7) Me nguaisei engdi tirka di ngar ngii a klisichir e le Jehovah mechititerir me te olab aika el klisiich. A Jesus a ulemeketakl er tiang er a loukerrekeriil er ngii a Kabernor er a Rom el Pontius Pilatus. Sera ledu er a Jesus el kmo ngngar ngii a klisichel lolsobel er ngii me a lechub e ngmecherei me ngmad, e a Jesus a dilu er a Pilatus el kmo: “A lemlak le beskau a klisiich a Dios e ng diak a klisichem er ngak.” (Jn. 19:11) Me a klisiich lolab a remerreder me a rechad er a balatiks a telkael, el di ua klisichel a Pilatus.

7. Chelsel a ngera el blekeradel e ngdiak dekengei lolengesenges er a remerreder er a beluu, e ngera kirir a remerreder el mo medengelii?

⁷ A Rekristiano olengesenges a llach er a kabelment el diak lomtok a llechul a Dios. Me nguaisei engdi ngdiak bo dolengesenges er a rechad a lsekum te dmu er kid el mo meruul a tekoi el Jehovah diak el soal me a lechub e te tomer er kid a meruul a tekoi el Jehovah a soal a doruul. El ua tiang, te locha mo mengerechir er a resechal el mo oumekemad el kirel a beluu. b Me a lechub e te merrob er a usbechel a New World Translation el Biblia er kid me aike el babilenged el mengai er a Biblia, e merrob er a berkel a klumech me a omengull er kid. A remerreder a mo onger er a Dios el kirel a mekngit lusbechir er a klisiich el lolab, el uai sel lomekcharm er a redisaiplo er a Jesus. A Jehovah omes er tir!​—Oli. 5:8.

8. Ngera klekakerous er a Jehovah me a rechad el mengedereder, e ngera uchul me ngkired el mo medengelii tiang?

⁸ A “remerreder er a beluu” a ngar ngii a klisiich el lolab, sebechir remuul a betok lungil, e ngar ngii a klisichir er a rebebil. Engdi tia diak lebelkul a kmo te cherrungel lungil e lmuut el ngarbab. Ngngar ngii a kot el ngarbab e cherrungel lungil er a rechad el rokui, e ngika Jehovah el Dios. Eua el taem el Biblia melekoi el kirel a Jehovah el kmo ng “Kot el Ngarbab.”​—Dan. 7:18, 22, 25, 27.

9. Ngera ngmiles er a ues a Daniel?

⁹ A profet Daniel a miles er a ues a olechotel a kmo a Jehovah lmuut el ngarbab a klisichel er aika el rokui el dereder. A kot e a Daniel a miles a kleua el charm. Aika omtechei omerreder er a irechar el mei el Babilon, Media me a Persia, Gris, me a Rom, me a omerreder er chelecha el taem el Britain me a Merikel. (Dan. 7:1-3, 17) A uriul e a Daniel a milsa Jehovah el dengchokl er a kingall er omerreder er a eanged. (Dan. 7:9, 10) A tekoi el lilsang er a uriul er tiang a uleklatk el mora rechad el mengedereder er chelecha el taem.

10. A doltirakl er a Daniel 7:13, 14, 27, e a Jehovah ngnguu a omerreder er a beluulechad el mesterir a rua techang, e tiang ngera ngochotii?

¹⁰ Monguiu er a Daniel 7:13, 14, 27. A Dios a ngilai aike el rokui el klisiich me a omerreder er a kabelment er a rechad el mesterir a rechad el rredemelel e lmuut el mesisiich. Ngngilai el mesterir a rua techang? Ngngilai el msa “ua ngelekel a chad,” el Jesus Kristus me tirke el “re chedal a Kot el Ngarbab,” el tir tirke el 144,000 el mo mengedereder el “mo cherechar.” (Dan. 7:18) Me ngbleketakl el kmo a  Jehovah ngike el “Kot el Ngarbab,” e le ngdi ngii el tang a ngar ngii a klisichel el meruul el uaisei.

11. Ngera ngdirrek el liluches a Daniel lolecholt el kmo a Jehovah lmuut el ngarbab a klisichel er aika el renged?

¹¹ A tekoi el lilsa Daniel a omeketakl er a tekoi el ledillii er a uchelel. Ngdilu el kmo: “A Dios el ngar a eanged . . . [a] melalem er a re king e orrebet er tir er a kingellir. . . . Ngii el Kot el Ngarbab el Dios oba klisiich el chodereder a renged er a beluulchad. Ma ngii di le chad el lolatk er ngii, . . . ng sebechel rullii el mo king.” (Dan. 2:19-21; 4:17) Ngngar ngii a taem el Jehovah urrebet e melalem er a remengedereder? Chochoi!

12. Mouchais er a ta er a olechotel a Jehovah el orrebet er a reking er a deruchellir. (Momes er a siasing.)

¹² A Jehovah mla bleketakl lochotii el kmo ngii a lmuut el ngarbab a klisichel er a “re merreder er a beluu.” Molatk edei er ngii. A Farao er a Ekipten a uluusibai er a rechedal a Jehovah e mle betok el taem el diak lekengei el mechititerir me lorael. Engdi Dios ultebedeterir e ursngii a Farao er a Bekerkard el Daob. (Exo. 14:26-28; Psa. 136:15) King Belsasar er a Babilon a rirellii a mur e “milengebkall er [ngii] el ngaruchei er a Rubak er a eanged” e “oldanges a chelid el rruul er a silber me a kolt” er a bai loldanges er a Jehovah. (Dan. 5:22, 23, NW) Engdi Dios a urrebetii ngika el kmal kedidai a rengul el chad. Ngar tiakid el “osisiu el kesus” e te milekodir a Belsasar e a rengedel a lengiluu a rechad er a Media me a Persia. (Dan. 5:28, 30, 31) King Herodes Agripa I er a Palestine a milekodir a apostol Jakobus e kilebsengii a apostol Petrus le ngmle soal lomekoad er ngii el dirrek. Engdi Jehovah uchul me ngdimlak el sebechel meruul el uaisei. “A anghel er a Rubak a ulsecherii” me ngmlad.​—Rel. 12:1-5, 21-23.

13. Mouchais er a ta er a olechotel a Jehovah el mlo mesisiich er a cheldellel a betok el renged.

¹³ A Jehovah dirrek el mla ochotii el kmo nglmuut el klou a klisichel er a cheldellel a betok el renged. Nguluumekemad el kirel a Israel e ngilsuterir el mo mesisiich er a re 31 el king er a Kanaan e ngilai a betok el beluu el mle ulsiseb er a Beluu er a Nglat. (Jos. 11:4-6, 20; 12:1, 7, 24) Jehovah dirrek el ngilsuterir a rechad er a Israel el mo mesisiich er a King Benhadad me a re 32 el king er a Siria.​—1 Ki. 20:1, 26-29.

14-15. (a) Ngera ngdilu King Nebukadnesar me a Darius el kirel omengederederel a Jehovah? (b) Ngera ngdilu ta er a milluches er a Psalm el kirel a Jehovah me a rengedel?

 ¹⁴ Ngmla mo betok el taem el Jehovah ochotii el kmo ngkot el ngarbab a klisichel! Sel taem el King Nebukadnesar er a Babilon a di mle ngii el chemat er a ‘klisichel omerreder, ma klebkellel ma chetengel’ er a bai lolekoi el kmo ng Jehovah a rredemelel a odanges, e a Jehovah rirellii el mo kebelung. Sera lluut er a smechel a uldesuel e ng ‘nguleldanges er [a] Kot el Ngarbab el Dios’ e dilu el kmo a “[Jehovah] mengedereder el mo cherechar.” E dilechelir el kmo: “Ng diak a sebechel el omtok er a uldesuel a rengul.” (Dan. 4:30, 33-35) E kuk sel taem er a lemeasem a blakerreng er a Daniel e losebelii a Jehovah er a blil a laion, e a King Darius a dilu el kmo: “Rokui el chad el ngar a rengedek . . . mongdekudel e mongull er a Dios er a Daniel. ‘Ngii a di ngar el Dios, me ng mo merreder el mo cherechar. A rengedel a diak bo le metemall ma klisichel omerrederel me ng diak a ulebengelel.’”​—Dan. 6:7-10, 19-22, 26, 27.

¹⁵ A ta er a milluches er a Psalm a dilu el kmo: “A RUBAK a melemall a telbilir a re beluu, ng merrob er tir me ng diak lotaut a uldesuir.” Ngdirrek el dilu el kmo: “Ngdmeu a rengul ngike el renged loudios er a Jehovah, el tirke el chad el bla lengiltiterir el mo ileakl el kloklel.” (Psa. 33:10, 12, NW) Ngmera lungil luchul me ngkired el melemolem loba blakerreng el mora Jehovah!

16. Ngera sebechel mo ulterekokl a rengud er ngii el kirel a “kloul ringel,” e ngerang? (Momes er a siasing.)

¹⁶ Kede mla smaod aike el leriruul a Jehovah er a ngar er a mong. Me ngngera mo duubech er a ngar medad? Ngsebechel mo ulterekokl a rengud el kmo a Jehovah mo olsobel er a reblak a rengrir el mesiungel er a temel a “kloul ringel.” (Mt. 24:21, BT; Dan. 12:1) Ngmo meruul er tiang er sel taem el cheldellel aika el renged el rokui el lokedongall el Kok er a Makok, a mo meringel loldechelakl er a reblak a rengrir el mesiungel er a beluulechad el rokir. Mo lmuut me a lsekum e tia el cheldellel aika el  renged a mo uldimukl er aike el 193 el beluu el ngar er a cheungel a United Nations, me ngii a di diak a klisichir er ngike el kot el ngarbab me a resoldau el anghel er ngii! A Jehovah tibir el kmo: “Ak mo ochotii a klou el klisichek ma cheledolek ma betok el beluu a mo omes er a medal. Te mo medengelkak el kmo, ngak a RUBAK.”​—Ese. 38:14-16, 23; Psa. 46:10.

17. Ngera ngomlaoch a Biblia el kirir a reking er a beluulechad me tirke el melemolem loba blakerreng el mora Jehovah?

¹⁷ A odelecheklel a Kok a mo mechelii a mekemad er a Armakedon, el ngii a bo lousbech er ngii a Jehovah lolekngemed er a “re king er a beluulchad el rokir.” (Och. 16:14, 16; 19:19-21) Te di tirke el “melemalt a mo kiei er a beluulechad, me tirke el loba blakerreng a mo melemolem el ngar ngii.”​—Osi. 2:21, NW, ftn.

18. Ngera te mla kongei a remera el Kristiano el meruul, e ngera uchul? (Daniel 3:28)

¹⁸ Chelsel a reksi e te betok el mera el Kristiano a kilengei el oriid a ilmeklir el meruul a tekoi e oriid a klengar er tir le ngbltkil a rengrir el mora merredelir el Jehovah a uchul. Te oba blakerreng me a osisiu el uldasu el luleba tirke el tedei el buik er a Hebru, el silobel er a kmard el ngau le tir el millemolem loba blakerreng el mo er ngike el kot el ngarbab.​—Monguiu er a Daniel 3:28.

19. A Jehovah ngmo oukerrekeriil er a rechedal lultuil er a ngerang, e ngerang ngmengerechir er ngii er kid er chelechang?

¹⁹ A David el ta er a milluches er a Psalm, a milsaod er a klungel a ultutelel a dolemolem loba blakerreng el mora Dios el kmo: “Moukerrekeriil er ngak e Jehovah, loltirakl er a llemeltek me a blakerreng er ngak.” (Psa. 7:8, NW) Ngliluut el meluches el kmo: “A blakerreng er ngak me a llemeltek lomekerreu er ngak.” (Psa. 25:21, NW) Sel kot el lungil rolel a klengar a bo dolemolem loba cherrungel el blakerreng el mora Jehovah er a chelsel a ngii di el blekeradel! Seikid e kede mo ua ngike el ta er a milluches er a Psalm el dilu el kmo: “Ngdmeu a rengrir tirke el loba blakerreng . . . , tirke el merael lotirakl a llechul a Jehovah.”​—Psa. 119:1, NW, ftn.