1. Ngera uchul me a di ta el rolel e ngsebeched el metik er a deurreng, a bo dodengei el kmo kede “chebuul a lak dousbech er a Dios”?

 A MERA EL deurreng a diak di le sel feeling el lungil a rengud, el ngii a mo er ngii e mo diak. Ngsebechel a chad el melechesiu er a deurreng er a klemengetel a klengar er ngii el rokir. Ngmekera uaisei? A Jesus a silodii tiang er a Cheldecheduch el Ngar er a Rois el kmo: “Ngdmeu a rengrir a remedengei el kmo te chebuul a lak lousbech er a Dios.” (Mt. 5:3, NW) Jesus a mle medengei el kmo a rechad a ulebeob el ngar ngii a mesisiich el urungulir el mo medengelii e mengull er a Jehovah el Dios el Ulemeob. Me a Jehovah el “dmeu a rengul el Dios” a uchul me a remengull er ngii me te dirrek el dmeu a rengrir.​—1 Ti. 1:11, NW.

2-3. (a) A doltirakl a tekingel a Jesus e ngtecha sebechel mera el mo dmeu a rengul? (b) Ngera kede mo mesaod er tia el suobel, e ngera uchul me kede kmal ousbech el mo medengei?

² Ngdi sebechel mo dmeu a rengud a lsekum e ngungil a rokui el tekoi er a klengar er kid? Ngdiak. Ngar er a Cheldechedechal a Jesus er a Rois e ngdilu a tekoi el kora mechas a rengud er ngii. Ngdilu el kmo tirke el “ngar a klengiterreng” e le tir el ouuchel a rengrir er a kngterir me a lechub e ngngar ngii a meringel el mondai er a klengar er tir, a sebechir el mo dmeu a rengrir. A Jesus a dirrek el millekoi a osisiu el tekoi el kirir tirke el “modechelakl el kirel a llemalt” me tirke el “motuub” le te oltirakl er a Kristus. (Mt. 5:4, 10, 11, NW) Engdi ngmekera sebechel a chad e mera el dmeu a rengul er a chelsel chouaika el blekeradel?

³ A Jesus ullisechakl er kid el kmo, a deurreng a diak el sel lungil a rokui el tekoi er a klengar er kid, e ngbai sel dolekeed er kid er a Dios e lebo er ngii a mesisiich el deleuill er kid me ngii. (Jak. 4:8) Ngmekera doruul el uaisei? Ngar tia el suobel  e kede mo mesaod edei el tekoi el mo uchul a mera el deurreng.

4. Ngera sel kot el tekoi el kired el meruul er ngii me debetik er a mera el deurreng? (Psalm 1:1-3)

⁴ KOT: Ngkired el menguiu e mesuub er a Tekingel a Dios, e seikid e ngsebeched el metik er a mera el deurreng. A Jesus ulemekesiu er a Tekingel a Dios el mora kall. A rechad me a charm a ousbech a kall el melemolem el ngar. Engdi te di rechad a sebechir el menguiu er a Biblia, me kid ousbech er tiang. Sei a uchul me a Jesus a dilu kmo: “A klengar er a chad a diak di lultuil er a kall e le merekong; ng dirrek el ultuil er a bek el tekoi el tuobed er a ngerel a Dios.” (Mt. 4:4) Me ngdiak el kired el mecherei a ta el sils me lengelakl e lak donguiu er a Tekingel a Dios el Biblia. A ta er a milluches er a Psalm a kmo: ‘Ngeltengat [dmeu a rengul, NW] ngikel chad el semeriar er a llechul a RUBAK, me ng mesuub er ngii er a llomes me a klebesei.’​—Monguiu er a Psalm 1:1-3.

5-6. (a) Ngera sebeched el suub er a Biblia? (b) Ngoeak a ngera el rolel e a omengiuel a Biblia sebechel ngosukid?

⁵ A Jehovah betik a rengul er kid me ngouchais er kid loeak a Tekingel el Biblia aike el kired el meruul me lebo er ngii a deurreng er a klengar er kid. Kede suubii a moktek er ngii el kirel a klengar. Kede suubii a rolel e ngsebeched el mo kmeed er ngii e nguu a klausubes er ngii el kirel a kngtid. E suubii a ungil omelatk el kirel a ngar medad el bla letibir el kired. (Jer. 29:11) Aika el klemerang el bla desuub er a Biblia meskid a klou el deurreng!

⁶ Kede medengei el kmo a Biblia a betok a ulekrael er ngii el kirel a klengar er a bek el sils. Sel doltirakl, e ngmo dmeu a rengud. Sel bo lemechitechut a rengum er a mondai er a  klengar, e mongoit er a klou el taem el menguiu e melebedebek er a Tekingel a Jehovah. A Jesus a dilu el kmo: “Ngdmeu a rengrir tirke el rongesii a tekingel a Dios e mo oltirakl!”​—Lk. 11:28, NW.

7. Ngera sebechel ngosukau el mui el ngmai a klungiolem er a omengiuem er a Biblia?

⁷ Sel monguiu er a Biblia e mongoit a taem el enjoy a tekoi el monguiu. Ngsebeched lomekesiu er ngii er tiang. Ngmla ta el leduubech tia el tekoi el leko er kau? A chad a rullii a ta er aike el kot el soam el kall. Me nguaisei engdi nglocha diak a kmal temem lomengur me a lechub e ngngar ngii a tekoi el mengesang er kau me ke di orrechereched lomengur e diak mera el mengarm er ngii el kall. Uriul er a obo merek, e ko mocha ouuchela er a rengum e oureng ulekum e ngdimlak morreched e mlo ungil a rengum lomengur. Ngsebechel duubech osisiu el tekoi sel donguiu er a Biblia. A lebebil e kede di mo orrechereched el menguiu me ngdiak de enjoy er a tekoi lolisechakl er ngii. Me mongoit a taem el menguiu er a Biblia. Moluches er a uldesuem a tekoi el monguiu, imagine oto er a ngerir a rechad, e molatk obla mchuiu. Sel moruul el uaisei e nglmuut el mo dmeu a rengum.

8. Ngmekera “blak a rengul e mellomes a rengul el mesiou” e meruul er a ngerechelel? (Dirrek el momes er a footnote.)

⁸ A Jesus a tiltkii a “blak a rengul e mellomes a rengul el mesiou” el mo omeskid a kall er a klereng er sel blsechel, e kmal obdois a kall er a klereng el bla lebeskid. b (Mt. 24:45) A Biblia sel main ingredient er aike el rokui el kall er a klereng el loltobed. (1 Th. 2:13) Aika el kall er a klereng a ngosukid el mo medengelii a uldesuel a Jehovah louchais er ngii a Biblia. Sei a uchul me kede menguiu a Ongkerongel me a Awake! me aike el suobel el tuobed er a jw.org. Kede mengetmokl er kid el kirel a miting er a ongdibel. E omes a broadcast er a bek el buil. Sel donga betok el kall er a klereng e ngmo ngosukid el mo meruul er sel ongeru el tekoi el luchul a mera el deurreng.

9. Ngera sel ongeru el tekoi el doruul er ngii e kede metik er a mera el deurreng?

⁹ ONGERUNG: Ngkired el kiei el oltirakl a llechul a Jehovah, e seikid e ngsebeched el metik er a mera el deurreng. A ta er a milluches er a Psalm a dilu el kmo: “Ngdmeu a rengrir tirke el meluu er a Jehovah, el tirke el merael er a rolel.” (Psa. 128:1, NW) A bo doluu er a Jehovah e ngbelkul a kmo kede kmal mengull er ngii me ngdiak el soad el mo rullii a ngii di el ngerang el diak el soal. (Osi. 16:6) Me kede blak a rengud el oltirakl a llechul a Jehovah el kirel a ungil me a mekngit el losaod a Biblia. (2 Ko. 7:1) Ngmo dmeu a rengud sel doruul a tekoi el soal a Jehovah e dotngakl aike el louketui.​—Psa. 37:27; 97:10; Rom 12:9.

10. A doltirakl er a Rom 12:2, e ngera ngerecheled el meruul er ngii?

¹⁰ Monguiu er a Rom 12:2. A chad a locha medengei el kmo a Jehovah ngar ngii a llemeltel lolterekokl er a ungil me a mekngit, engdi ngkirel dirrek el kongei el mo oltirakl. El ua tiang, a chad a medengei el kmo a kabelment a ngar ngii a llemeltel lolterekokl a speed limit er a beluu. Engdi nglocha diak lekengei el oltirakl. Me ngomekall lengelakl er a speed limit. Me ngoeak a omerelled e kede ochotii el kmo kede oumerang el kmo a kot lungil rolel a klengar a sel doltirakl a llechul a Jehovah. (Osi. 12:28) Tiakid a mle uldesuel a David. Ngmillekoi el kirel a Jehovah el kmo: “Ke mo ochotii er ngak a rael el mor a klengar; ele kau omekeek er ngak er a deurreng, e a ngelsuim a  uchul a deuil a renguk el mo cherechar.”​—Psa. 16:11.

11-12. (a) Sel lengar ngii a mengesang er a uldesued me a lechub e sel lebo lemechitechut a rengud, e ngera kired el mo kerekikl er ngii? (b) Ngmekera Filipi 4:8 e sebechel ngosukid sel dolilt a rolel ongelaod?

¹¹ Me sel lengar ngii a mengesang er a uldesued me a lechub sel lebo lemechitechut a rengud, e kede mo omelechesiu el kmo ngkired el meruul er a kmung ngerang el mengesang er a uldesued me ngdiak di domdasu er ngii. Nguaisei engdi ngkired el mo kerekikl me ngdiak bo doruul er a tekoi el louketui er ngii a Jehovah.​—Efe. 5:10-12, 15-17.

¹² A apostol Paulus a millisiich er a Rekristiano el ngar er a babilengel el mora rechad er a Filipi el kmo, molebedebek aike el tekoi el “melemalt, e klikiid, e olechau a bltikerreng, e kuoll.” (Monguiu er a Filipi 4:8.) Me alta Paulus a dimlak loluches el specifically el kirel a tekoi er ongelaod, me nguaisei engdi ngkirel ngar ngii a lerellii er a omelilt er kid el kirel a rolel a dongoit a temed. Molasem er tiang: Sel mesa “tekoi” er a bades, e btechir er a “chelitakl,” “mubi,” “book,” me a lechub e ng “game.” Sel moruul el uaisei e ngsebechel ngosukau el mo mtab aike el ungil er osengel a Jehovah er aike el diak. Ngsoad a klengar er kid a bo loltirakl a ngarbab el llechul a Jehovah. (Psa. 119:1-3) E seikid e ngsebeched el meruul er sel ongingil tekoi el mo uchul a mera el deurreng e klikiid a ukltked.​—Rel. 23:1.

13. Ngera sel ongedei el tekoi el mo uchul a mera el deurreng? (Johanes 4:23, 24, BT)

¹³ ONGEDEI: Moterekeklii el kmo omengull er kau el mora Jehovah a kot er a klengar er kau. A Jehovah el Ulemeob a rredemelel a omengull er kid. (Och. 4:11; 14:6, 7) Me ngkirel omengull er kid el mo er ngii el mo kot el klou a ultutelel el tekoi er a klengar er kid e mo mengull er ngii el ngar er a rolel el soal, loba “reng ma klemerang.” (Monguiu er a Johanes 4:23, 24, BT. c) Ngsoad a chedaol reng er a Dios a lomekrael er a omengull er kid me bo loltirakl a klemerang el debetik er a Tekingel. A omengull er kid a kirel kot er a klengar er kid, mo lmuut me a dekiei a beluu el merrob a urered. Chelecha el taem e te betok er a 100 el rudam me a rudos er kid a kelebus e le tir el Sioning er a Jehovah. d Me nguaisei, engdi ngdmeu a rengrir el meruul aike el rokui el sebechir el meluluuch, mesuub, e ouchais er a rebebil kirel a Dios me a Rengedel! Sel demotuub me a lechub e demodechelakl e ngsebechel dmeu a rengud e le kede medengei el kmo a Jehovah a obengked e mo omekngeltengat er kid.​—Jak. 1:12; 1 Pe. 4:14.

14. Ngera dilubech el mora ngeasek lodam er a Tajikistan, e ngera uchul?

¹⁴ A experience er a rechad ochotii el kmo aika el edei el tekoi el dirk dulsaod a uchul a mera el deurreng, alta te chelebangel a kmal meringel el blekeradel. Molatk a tekoi el dilubech el mora Jovidon Bobojonov, el 19 a rekil lodam er a Tajikistan. Ngika dimlak el kengei el mo soldau. Sera October 4, 2019 e te mle kidnap er ngii er a blil, e kulebsengii el betok el buil, e treat er ngii el ua dengerenger el chad. Tia el chais ulebriid el mora bebil er a beluu. A report a kmo te chillebedii el melasem lorrimel er ngii el mo soldau e mo oubail a bilir a resoldau. Uriul er tiang e te uldureklii el mora blil a kelebus, el mo er sel taem el president er a belurir a mle pardon er ngii e  dmu er tir me te release er ngii. Chelsel tia el taem el rokir, e a Jovidon a millemolem loba blakerreng e dmeu a rengul. Ngmilekerang? Ngmle blechoel el kerekikl er a klereng er ngii.

15. Ngmilekera Jovidon e melemolem el melai a okelel a reng er a lekelebus?

¹⁵ Sera lekelebus a Jovidon e ngmillemolem el melai a okelel a reng, el mo lmuut er aike el taem el dimlak a Biblia er ngii me aike el babilenged. Ngmekera uaisei? A rudam me a rudos sel bo lomsa kelel e te luchesii a days text er a tutuu el lemla er ngii aika el kall. Me ngmle sebechel menguiu er a Biblia e melebedebek er ngii er a bek el sils. Uriul er a letobed er a kelebus, ngmle advice er tirke el dirkak el bo lechebangel a meringel el odechelakl el kmo: “Ngkmal klou a ultutelel omousbech er a ilmeklem er chelechang el menglou a klemedengei er kau el kirel a Jehovah loeak sel monguiu er a Tekingel me aike el babilenged.”

16. Ngera ngmle ulturk osengel er ngii a Jovidon?

¹⁶ A odam a kiliei el oltirakl a llechul a Jehovah. Ngika dimlak lolemolem el melatk a mekngit el uldasu me a lechub e bo leteloi a mekngit el omeruul e bai mle ulturk osengel er a Jehovah me aike el meklou a ultutelel er a Jehovah. Ngmillebedebek a blebelel a Jehovah. Bek el tutau e ngmilekiis e orrenges a charm el suebek el mengitakl. E sel leklebesei e ngulemes er a buil me a btuch. Ngkmo: “Aika el  sengk er a Jehovah a mle uchul a deuil a renguk e millisiich er ngak.” Sel bo doba omereng el saul el kirel a blebelel a Jehovah me a ulekrael el lebeskid loeak a Tekingel, e ngmo dmeu a rengud. E tia el deurreng a mo smisichii a ducherreng er kid loutekangel.

17. Ngmekera bades er a 1 Petrus 1:6, 7 e melutk el kirel a chad el chelebangel er a osisiu el blekeradel lemla er ngii a Jovidon?

¹⁷ A Jovidon a dirrek el ngiluu omengull er ngii el mora Jehovah el mo kot. Ngmle medengelii a klungel a ultutelel a lolemolem loba blakerreng. A Jesus a dilu el kmo: “Mongull el meluluuch er a Rubak el Dios er kau, e di le ngii el tang cho mosiou er ngii!” (Lk. 4:8) A remerreder er a resoldau me a resoldau a mle sorir a Jovidon a lotngeklii a klechelid er ngii. Me nguaisei, engdi ngbai mle blak a rengul meluluuch er a bek el sils me a bek el kesus, lolengit er a Jehovah me lengesuir me lak el give up e lolemolem loba blakerreng. Alta ngmlo chobangel a diak el melemalt el omeruul, me nguaisei ngdi millemolem loba blakerreng. Me chelechang e ngkmal dmeu a rengul le ngar ngii a lengiluu el dimlak lobang er a uchei er a le kidnap er ngii, lechelebedii, e le kilebsengii. Omeasem el blo lechebengelii a uchul me ngngar ngii a mesisiich el klaumerang er ngii.​—Monguiu er a 1 Petrus 1:6, 7.

18. Ngmekera sebechel melemolem el dmeu a rengud?

¹⁸ A Jehovah medengei aike el dousbech me bo ledeu a rengud. A omoltirakl aika el edei el tekoi el mo uchul a mera el deurreng e ngsebechem el melemolem el dmeu a rengum, mo lmuut er a omchelebangel a meringel el blekeradel. Seikid e ngmo sebechem el dirrek el melekoi el kmo: “Ngdmeu a rengrir a rechad el ou Dios er a Jehovah!”​—Psa. 144:15, NW.