Uchelel a rak er a 1940 e a rechad er a blik a milsuub lobengterir a Resioning er a Jehovah. Te dimlak lolemolem el mesuub engdi a delak a millemolem el melai a Ongkerongel me a Awake!. E sera 1950 e ngmlo er ngii a international convention er a New York City me a telungalek er ngak a mlong.

Kedeb el taem er uriul er tiang e a odam el Lawrence Jeffries a ulemuchel loldingel er kemam. Ngmillasem lolengeseu er ngak el mo medengelii a klemerang. A uchelel a kulemdasu el kmo a Resioning er a Jehovah a kirir el teloi a balatiks me a mekemad. Ak dilu er ngii el kmo a lsekum a rokui el chad er a beluu er a Merikel a diak lekengei el mo oumekemad e a recherrouir a soiseb el nguu a beluu el rokir. Odam el Jeffries uleba kllourreng el lolengeseu er ngak el merriter a tekoi. Ngdilu el kmo: “Ngmo mekerang a Jehovah a lsekum a rokui el chad er a Merikel a mesiou er ngii e a recherrouir a me oumekemad er tir?” A tekingel kirel tiang me a lmuut el bebil er a tekoi a ngilsukak el mo mesa el kmo ngkmal cheleuid a uldesuek. Ngrirellak el mo soak el mesuub a klemerang er a Biblia.

Ak milengoit er a klou el taem el menguiu a mechut el Ongkerongel me a Awake! el ble el save a delak. Cherengel a taem e ak mlo mtebengii el kmo tia klemerang me ak kilengei el mo mesuub lobengkel a odam el Jeffries. Ak dirrek el mlora rokui el miting. Ngkmal mle soak a tekoi el kusuub me ak mlo publisher el omerk er a klumech. Ngmlengodech a turrekong er ngak er a kutebengii el kmo “a kloul sils er a [Jehovah] a kmedang.” (Sef. 1:14) Ngmlo diak kullatk a mora daingak.  Ngbai mlo soak lolengeseu er a rechad el mo medengelii a klemerang er a Biblia.

Ak tilobed er a high school er a June 13, 1956. Edei el klebesei er uriul e ak miltecholb er a circuit assembly. Ngkmal dimlak kudengei el kmo a telbilek el mo ousbech er a klengar er ngak el mesuub el kirel a Jehovah e olisechakl er a rechad el kirel, a mo uchul a betok el klengeltengat.

Elolem el buil er uriul er a kmetecholb e ak mlo regular pioneer. A Kingdom Ministry er a December 1956 a mla er ngii a suobel er ngii el dai er ngii a “Can You Serve Where the Need Is Great?” Tia mle sebechek el meruul er ngii. E mle soak el mo olengeseu aike el basio lousbech er a ruumerk er a ungil chais.​—Mt. 24:14.

Ak millukl el mora Edgefield, South Carolina. Te di mle teua publisher er a ongdibel er ngii e ngak a mlong me a kungeim. Aki mirruul er a miting er a medal a blil a ta el odam. Bek el buil e ak milengoit er a 100 el sikang lomerk. Ak kmal mle mechesang loltobed er odingel e meruul a part er a miting. Betok el ureor el kuruul a uchul me ngmlo betok ak suub el kirel a Jehovah.

A ta el redil el kulsuub a Biblia lobengkel a mla er ngii a funeral home er ngii er a Johnston, el beluu el mle sesei el mael a cheridel er ak mla er ngii. Ngika milskak a part-time lurerek e milchikemam me aki ousbech er a kekerei el building er ngii el Blil a Ongdibel.

A odam el Jolly Jeffries, el ngelekel ngike el lodam el milsuub lobengkek, a millukl er a Brooklyn, New York el me pioneer partner er ngak. Aki kiliei el terung er a kekerei el trailer el odam a milskemam me aki ousbech er ngii.

Ngmle kekerei a udoud er a beluu el kim ngar ngii. Aki mesuk er a teblo me a lechub ngkldei el kluk er a ta el sils. A ta el taem e ak chiloit a di mle sesei el ududek el rokui el mechar a kall. Sera ktobed er a stoang e a ta el chad a ulsiueklak e kmo: “Ngsoam a ureor? Ak mo harau er kau el chimo kluk er a hour.” A kuluureor el edei el klebesei el mengetmokl er a site er a construction. Ngkmal mle bleketakl el kmo a Jehovah ullengeseu er ngak el melemolem el ngar er a Edgefield. E mle sebechek el mora international convention el mla er ngii er a New York City er a 1958.

A ongeru el sils er a convention e ngmla er ngii a ileakl el tekoi el dilubech. Ak mle meet er a Ruby Wadlington el mle regular pioneer er a Gallatin, Tennessee. Ngmle somam el mo missionari me aki mlora miting er a Gilead el mla er ngii er tia el convention. Uriul e aki mlo keluches. E te invite er ngak el mo oltobed er a cheldecheduch el mora buai er a Gallatin. Me a kuluusbech er tia el techall el mo melekoi chebechiil er ngii. Ak millukl el mora ongdibel er a Ruby, e a 1959 aki mlo bechiil.

Ak miltutk el mo congregation servant (chelecha ngokedongall el tebechelel a chelechad er a  remechuodel) er a Gallatin er a le 23 a rekik. A Charles Thompson a kmal dirk mlo circuit overseer er a be loldingel er a ongdibel er kemam. Ngika kmal mle betok a experience er ngii engdi ngullengit a uldesuek el kirel aike el lousbech a rudam e mekera re circuit overseer e sebechir el remuul aikang. Ak silubii er ngii el kmo ngungil doker a ker e bo dodengei a rokui el tekoi er a uchei er a doruul omelilt.

Te mle invite er ngak er a May 1964 el mora Skuul el Kirir a Rudam el Oldingel a Ongdibel me a Remechuodel me a Remesiou er a Ongdibel, el mla er ngii el ta el buil er a South Lansing, New York. A rudam lullisechakl er tia el skuul a rirellak el mo soak el lmuut el mo medengei a betok el kirel a Jehovah e mo kmeed er ngii.

A January 1965 e te mle invite er ngak me a Ruby el mo teloi er a circuit work. Ngmle klou a circuit el ki mulsiou er ngii. Aki milsiou aike el ongdibel el mlara Knoxville, Tennessee, el mo kmeed er a Richmond, Virginia. Aika mle uldimukl er aike el ongdibel el ngar er a North Carolina, Kentucky, me a West Virginia. Ak di milsiou ongdibel er a remechedelekelek el chad le seikid el taem aike el beluu el mlara dimes er a Merikel a milleakl er a rebecheleleu me a remechedelekelek. A rudam a mle mechebuul me aki mle share aike el mla er ngii er kemam er tirke el luluusbech a ngeso. A odam el meketeketa el circuit overseer ulsisecheklak er a ta er a kmal klou ultutelel el tekoi: “Bom odam. Lak mrellau el mo kora boss sel moldingel a ongdibel. Ngsebechem el ngosuterir a lsekum te feel el kmo ke odam er tir.”

A ta el taem er a ki moldingel er a kekerei el ongdibel e a Ruby milechelii omesubel a Biblia lobengkel a redil el ngar ngii a ngelekel redil el ta rekil. Sel bo lak a chad er a ongdibel el sebechel el mesuub lobengkel e a Ruby milsuub lobengkel loeak a lodurokl a tengami el mo er ngii. Ongingil odngelam e ngika el redil a mlei er a rokui el miting. E sera lemei a reteru el special pioneer el odos e te millemolem er omesuub lobengkel, me ngmiltecholb. E a 1995 el bekord el 30 el rak er uriul, e aki mlara Patterson Bethel e a kekerei el redil a mle mengedecheduch er a Ruby. Ngngelekel ngika el redil el milsuub lobengkel a Ruby. Ngii me a bechil a mle ngalek er a skuul er a 100 el klas er a Gilead.

A ongeru el circuit er kemam a mlara belngel a Florida. Tiakid el taem e aki mlo ousbech a mlai me aki milecherar a chimong el kmal mle ungil a cheral. Me nguaisei engdi chelsel sel sandei er a ki mnguu e ngmiltemall a bomb er a ralm. Ngdimlak a ududam el mo meruul er ngii. Me a kulemekedong er a odam el kulemdasu e ngsebechel ngosukemam. Ngdilu er a ta er a chad luluureor el kirel me ngrullii e dimlak el lekengei el melai a ududam. Ngdi dilu el kmo: “Ngdi ungil a rokui el tekoi.” Ngika dirrek el milskemam a ududam! Tia ulemeklatk er kemam el kmo ngkiram el mo bekururau el mora rebebil.

Sel ki moldingel ongdibel e aki kie blirir a rudam me a rudos. Tiakid a uchul me ngmlo betok a rungil sechelimam. A ta el taem e a kulebes er a report er ngak er a ongdibel er a typewriter. Sel kesus er a kluut el mo remei e a edei a rekil sechal ngelekir tirke el kim kiliei lobengterir a leko ngmle help er ngak el finish er ngii el report. A kulemekako er ngii el kirel tiang el betok el rak.

Sera 1971 e a kngiluu a beches el assignment el mo district overseer er a New York City. Ngkmal mle mechas a rengmam! Ngmle 34 a rekik er aki molukl. A rudam a kmal luluutkeu er ngak, el kot el chedelekelek el district overseer er tir.

Ngmle dmeu a renguk el district overseer lolisechakl el kirel a Jehovah er a bek el weekend er a circuit assembly. A rebetok er a re circuit overseer a mle lmuut el meklou a klemedengei er tir er ngak. A ta er tir a ultebedii a cheldecheduch er a techolb er a kmetecholb. A ta er a odam el Theodore Jaracz, a uriul e ngmlo ta er a chedal a Governing Body. Te dirrek el mla er ngii a rebetok el odam el klou a experience er tir el milsiou er a Brooklyn Bethel. Ak kmal oba omereng el saul le tirka el bethelite me a circuit overseer a rirellii el mo beot er ngak el obengterir. Ngmle sebechek el mesa er a medak el kmo tirka ungil mengkerengel a sib el mle ultuil er a Tekingel a Dios e support er a cheldebechel. A klengariourreng er tir a uchul me ngmle beot er ngak el mesiou el district overseer.

Sera 1974 e a Governing Body mle assign er a rekuk bebil er a circuit overseer el mora district work me a kliluut el mo circuit overseer, e mlo mesiou er a South Carolina. Tiakid el taem e te mla mo diak loleakl er a rebecheleleu me a remechedelekelek me a rudam a kmal mle dmeu a rengrir el kirel tiang.

E sera ulebengelel a 1976 e ak mlo mesiou er a beluu er a Georgia er aike el ongdibel el ngar er a Atlanta me a Colombus. Ngkmal diak kubes er sel taem er a kutebedii a cheldecheduch el kirir a reteim el mechedelekelek el ngalek el mlad le rechad el silsebii a blirir. A derrir tirka el ngalek a mle kirel el mo niuing el kirel a telemellel a bedengel. Te betok el becheleleu me a mechedelekelek el Resioning er a Jehovah a mlora osbitar el mo mengelaod er tir. Ngkmal ileakl a bltkil a rengrir a rudam. A rechedal a Dios sel lolecholt er chouaitia el klechubechub er a delongelir, e ngsebechir loutekangel a kmal meringel el blekeradel.

Sera 1977 e tullengit er kemam el mora Brooklyn Bethel el sesei el buil lolengeseu er a ta el project. Sera bocha el merek ngii el project e a reteru el chedal a Governing Body a milengedecheduch er ngak me a Ruby lolengit me ki di mkiei el mesiou el ngar er a Bethel. Me aki kilengei.

A kuluureor er a Service Department el 24 el rak el oumesingd el taem e a rudam a kirir el olengeseu el longer a kmal meringel el ker. Aika el betok el rak e a Governing Body mla otobed a ulekrael el loltirakl a omellach er a Biblia. Aki ousbech aikang el onger a ker, e dirrek lousbech el train er a re circuit overseer, remechuodel, me a re pioneer. Aika mla ngosuterir a rebetok el mukeroul er a tekoi er a klereng. Tia mla smisichii a cheldebechelel a Jehovah.

Ngar er a delongelel a 1995 el mora 2018 e a kulemtechei er a headquarters loldingel obis er a branch el ngike el odam el merriter a ureor er a branch. Aki milengoit a taem el mengedecheduch er a Branch Committee, re Bethelite, me a remissionari el melisiich er tir e olengeseu er tir er a ngii di el tekoi el meringel er tir. Aki dirrek el kmal ngilai omelisiich ngak me a Ruby er aike el experience el share lobengkemam a rudam. El ua tiang, sera 2000 e aki mlo oldingel er a Rwanda. Ngkmal rirtechii a rengmam lorrenges er a rudam me a telungalek er a Bethel el mesaod er a rolel a luluutekangel er a taem er a klou el okodellir a rechad el mla er ngii er a 1994. A rebetok er tir a mlad a rebetik er a rengrir. Alta ngkmal betok a blo lechebangel engdi te ulechotii a klaumerang, deurreng, me a omelatk.

Chelecha ngokai me a derengel a rekmam. Chelsel aika el mereko el 20 el rak e ak mesiou el chedal a Branch Committee er a beluu er a Merikel. Ngdimlak kbora daingak, engdi ak mla nguu sel kot lungil bedengel a osisechakl me a klemedengei er a Jehovah me a cheldebechelel. Tia uchul me ngsebechek lolisechakl er a rechad a klemerang er a Biblia el sebechel ngosuterir el diak a ulebengelel. (2 Ko. 3:5; 2 Ti. 2:2) Ak mla mesa klumech er a Biblia el ngosuterir a rechad el mo ungil a klengar er tir e mo er ngii a deleuill er tir me a Ulemeob. (Jak. 4:8) Sel sebechek ngak me a Ruby e aki melisiich er a rebebil el mo mengreos er a ileakl el techall lobang el mesuub el kirel a Jehovah e olisechakl a klemerang er a Biblia el mora rechad. Tiakid sel kot el ileakl el techall el sebechel a mesiungel a Jehovah el nguu!