SUOBEL EL BO DOSUUB 40
‘Olisechakl er a Re Betok el Chad el Meruul er a Melemalt’
“Tirkel ullisechakl er a re betok el chad el meruul a melemalt a mo dmiich el ua btuch el mo cherechar.”—DAN. 12:3.
CHELITAKL 151 Ngmo Omekedong
NGAR TIA EL SUOBEL *
1. Ngera el tekoi a kmal desemeriar el kirel er a temel a Ta el Telael el Rak er Omerreder?
NGMERA EL mo ileakl el sils sel lomuchel okiis el me kiei er tia el chutem er a temel a Ta el Telael el Rak el Omengederederel a Kristus! Tirke el mla mad a rebetik a rengrir a kmal omes el kirel sel taem el lluut el mo meseterir. A Jehovah me ngkmal dirrek el uaisei a uldesuel. (Job 14:15, NW) Ka di molatk er a deurreng el mo er ngii sel lebekiis a rebetik er a rengud. Ngua lulsaod er ngii sel uleak uchei el suobel, a re “ungil” el llechukl a ngklir er a babier er a klengar a mo “mekiis el mo nguu a klengar.” (Rel. 24:15; Jn. 5:29, BT) A rebetok er a rebetik er a rengud a locha mo mekiis er a kedeb el taem er uriul er a Armakedon. * Me a lmuut kung, tirke el “re mekngit” el tir a dimlak a techellir el mo medengelii a Jehovah e mesiou er ngii loba blakerreng er a uchei er a lemad, a mo “mekiis el mo nguu a kerrekeriil.”
2-3. (a) Ngua losaod a Isaia 11:9, 10, ngngera el klou el prokuram er osisechakl a mo er ngii? (b) Ngera kede mo mesaod er tia el suobel?
2 Tirke el rokui el mo mekiis a kirir el mo mosisechakl. (Isa. 26:9; 61:11, NW) Me ngmo meketmokl sel kot el klou el prokuram er a osisechakl er tia el chutem. (Monguiu er a Isaia 11:9, 10.) E ngerang? A ta er ngii a tirke el rungil mo mekiis a kirir el mo suubii el kirel a Jesus Kristus, Rengedel a Dios, olubet, me a klungel a ultutelel a ngklel a Jehovah me a uchul e ngdi ngii el tang a ngar ngii a llemeltel mengedereder. Te dirrek el kirir el suub aike el ble lokekokil a Jehovah lolisechakl el kirel a moktek er ngii er tia el chutem. A rebebil er a reblak a rengrir el mlad, a mlad er uchei er a lemecherrungel a Biblia. A rungil me a remekngit el mo mekiis a kmal betok a kirir el mo suub.
3 Ngar tia el suobel e kede mo mesaod aika el ker: Ngmekera mo meketmokl tia el klou el prokuram er osisechakl? Tia el prokuram ngerang mo meruul er ngii el kirel a kmo a chad ngllechukl a ngklel el permanent er a babier er a klengar me a lechub e ngdiak? A nger er aika el ker a kmal klou a ultutelel er chelecha el taem. Kede mo mesaod a bebil ulaoch el llechukl er a babier er a Daniel me a Ocholt el ngosukid el mo medengei el kmo ngngera mo duubech sel lebekiis a rulekoad. A kot, e me dosaod er a ulaoch el ngar er a Daniel 12:1, 2.
“TIRKEL MLA MAD A LMUUT EL ME CHAD”
4-5. Ngera ngouchais a Daniel 12:1 el kirel a taem er a ulebongel?
4 Monguiu er a Daniel 12:1. A babier er a Daniel ouchais a blechebechel a tekoi el mo duubech er a taem er a ulebongel. El ua tiang, a Daniel 12:1 a kmo a Mikael, el ngii a Jesus Kristus, a “mengkar er a [rechedal a Dios].” Tia el telengtengil a ulaoch a ulemuchel otutel er sel taem er a lebo el King a Jesus er a Rengedel a Dios el ngar er a eanged er a 1914.
5 A Daniel a dirrek el mesaod er a Jesus el kmo ngmo “mengkar” er a rechedal a Dios er a “taem er a chelebuul el kot el meringel el dirkak a ua ingii er ser a le kot el mor ngii a beluu el me lmuut er chelechang.” Tia el “taem er a chelebuul el kot el meringel” a “kloul ringel” el losaod er ngii a Mateus 24:21 (BT). A Jesus a mo mengkar er a rechedal a Dios, me a lechub e ngmesebechakl er a rechedal a Dios er a ulebengelel tia el taem er a chelebuul el kot el meringel, el ngii a Armakedon. A babier er a Ocholt a mesaod er tirka el chad el kmo te kloul seked el “tirikel uleak sel kloul ringel.”—Och. 7:9, 14, BT.
6. Ngera mo duubech sel lesobel er a kloul ringel a kloul seked? Mosaod. (Mdirrek lomes er a “A Ker el Mla er a Remenguiu” el kirel okiis el mo er ngii er tia el chutem, el ngar tia el Ongkerongel.)
6 Monguiu er a Daniel 12:2. Ngera duubech er a uriul er a lsobel a kloul seked er a taem er a chelebuul el kot el meringel? A uchei e kede ulemdasu el kmo a Daniel 12:2 a melutk el kirel a okiis el mora eanged me a lechub e ngngelsecheklel a ureor er a berkel a klumech er uriul er a rumtok a kilo te torebengii er a 1918. * Me nguaisei engdi chelecha kede mla mo medengei el kmo tia melutk el kirel a okiis el mo er ngii er a beches el blekeradel. Tia el okiis a mo er ngii sel bo lemerek a uriul sils me a mekemad er a Armakedon.
7. (a) Te mekera rebebil e mo mekiis el “mo ngar el mo cherechar”? (b) Tia ngmekera e “lmuut el ngarbab lokiis”?
7 Ngera belkul sel ledu el kmo a rebebil a mo mekiis el “mo ngar el mo cherechar” el ngar er a Daniel 12:2? Ngbelkul a kmo a chelsel a 1,000 el rak e tirke el mekiis el mo medengelii a Jehovah me a lechub e te mo melemolem el medengelii e olengesenges er ngii me a Jesus, a mo nguu a diak a ulebengelel el klengar. (Jn. 17:3) Tia “lmuut el ngarbab lokiis” er sel okiis er a irechar. (Heb. 11:35, BT) E ngera uchul? E le tirke el milekiis er a irechar a liluut el mad.
8. Te mekera rebebil e mo mekiis el “mo motuub e mo merur el diak a ulebengelel”?
8 Me nguaisei, te diak el rokui el mo mekiis a mo sorir el mosisechakl er a Jehovah. A ulaoch er a Daniel a kmo a rebebil a mo mekiis el “mo motuub e mo merur el diak a ulebengelel.” Tir el mo omtok, a uchul me a ngklir a diak bo llechukl er a babier er a klengar me tir a diak bo lenguu a diak a ulebengelel el klengar. Te bai mo “merur el diak a ulebengelel” me a lechub e te mokngemed. Me a Daniel 12:2 a mesaod el kirel a ulebongel el mo duubech el mo er tirke el mekiis. E tia di mo oltirakl aike el bo loruul er a uriul er a lebekiis. * (Och. 20:12) A rebebil a mo nguu a diak a ulebengelel el klengar e a rebebil a diak.
‘OLISECHAKL ER A RE BETOK EL CHAD EL MERUUL ER A MELEMALT’
9-10. Ngera dirrek el mo duubech er a uriul er a kloul ringel, e techa “mo dmiich el ua dichel a melidiul sel ungil a eanged”?
9 Monguiu er a Daniel 12:3. Ngera dirrek el mo duubech er a uriul er a “taem er a chelebuul el kot el meringel”? A 3 el kekerei el bades er a Daniel a dirrek el louchais er a mo duubech er a uriul er a kloul ringel.
10 Ngtecha “mo dmiich el ua dichel a melidiul sel ungil a eanged”? A Mateus 13:43 a ngosukid longer er tiang. Ngkmo: “Isei e a re chedal a Dios a mo ngar a Rengedel a Demerir e mo medidiich el ua sils.” Sel domes er a belkul a tekingel a Jesus e ngmesaod el kirir “tirkel chad el mo chad er a Rengedel a Dios,” el tir a ngellitel lodam er ngii el mo mesiou lobengkel er a Renged el ngar er a eanged. (Mt. 13:38) Me a Daniel 12:3 a mesaod el kirir a rengellitel me a ureor el bo loruul er a Ta el Telael el Rak er Omerreder.
A re 144,000 a mo oureor el lobengkel a Jesus el omekrael er a prokuram er osisechakl el mo meketmokl er tia el chutem er a temel a 1,000 el rak (Momes er a parakurab 11)
11-12. Ngngera el ureor a bo loruul er ngii a re 144,000 er a 1,000 el rak?
11 Te mekera rengellitel e mo ‘olisechakl er a re betok el chad el meruul er a melemalt’? A rengellitel a mo oureor el lobengkel a Jesus el omekrael er a prokuram er osisechakl el mo meketmokl er tia el chutem er a temel a 1,000 el rak. A re 144,000 a diak di bo longedereder el king, te dirrek el mo mesiou el prist. (Och. 1:6; 5:10; 20:6) Te mo olengeseu el “chomekungil a bek el renged” el meruul er a rechad el lmuut el mo cherrungel. (Och. 22:1, 2, BT; Ese. 47:12) Ngmera el mo taem er a deurreng el kirir a rengellitel!
12 Ngtecha uldimukl er tirke el “betok el chad” el bo lolisechakl er tir el mo meruul er a llemalt? Tirka tirke el mo mekiis me tirke el suobel er a kloul ringel me a rengalek el mo mechell er a beches el blekeradel. A ulebengelel a 1,000 el rak e a rokui el chad el kiei er tia el chutem a mo mecherrungel. Me a ngklir er tiakid el taem, ngmo llechukl er a babier er a klengar er a pen me a lechub e ngoluches?
ULEBONGEL EL OMELSEMAI
13-14. Ngera kirir a rokui el cherrungel el chad lochotii er a uchei er a lenguu a diak a ulebengelel el klengar?
13 Ngdiak el kired lobes el kmo a bo decherrungel e ngdiak lebelkul a kmo kede mo automatic el nguu a diak a ulebengelel klengar. Molatk er a Adam me a Eva. Tirka mle cherrungel, engdi ngmle kirir lochotii a blekongesenges er tir el mora Jehovah e seikid e te mo nguu a diak a ulebengelel el klengar. Ngklengiterreng, e le te dimlak lolengesenges.—Rom 5:12.
14 Ngmo uangera teletael er a ulebengelel a 1,000 el rak el kirir tirke el ngar tia el chutem? A rokui el chad a mo cherrungel. Me tirka el rokui, te mo oltirakl er a omengederederel a Jehovah el mo cherechar? Me a lechub a rebebil er tir te mo ua Adam me a Eva, el alta te mle cherrungel engdi te mlo diak loba blakerreng? Aika el ker a kirel monger, engdi ngmekera donger?
15-16. (a) Oingerang e a rechad a mo er ngii a techellir lochotii a blakerreng er tir el mora Jehovah? (b) Ngera mo rsel a ulebongel el omelsemai?
15 A Satan a mo mekelebus el 1,000 el rak. Chelsel tiakid el taem e ngdiak el sebechel mengeuid er a ngii di el chad. Me nguaisei engdi a ulebengelel a 1,000 el rak e ngmo mekedoked. Ngmo melasem el mengeuid er a remecherrungel el chad. Tia el omeasem a mesterir a rokui el cherrungel el chad a techellir el mo bleketakl lochotii el kmo, te mengebkall er a ngklel a Jehovah e oltirakl er a omengederederel. (Och. 20:7-10) Aike el bo loruul a derta el chad a mo oterekeklii el kmo a ngklir ngmo permanent el ngar er a babier er a klengar me a lechub e ngdiak.
16 A Biblia ouchais er kid el kmo te ngar ngii a rebebil el mo ua Adam me a Eva el mo diak loba blakerreng e otngeklii omengederederel a Jehovah. Ngera mo duubech el mo er tir? A Ocholt 20:15 a kmo: “A ngii di le chad el dimlak le llechukl a ngklel er a babier er a klengar a ulebidokl er a diosech el ngau.” Chochoi, tirka el omtok a mo mokngemed el mo cherechar. Me nguaisei engdi a ruumesingd el chad a mo mesisiich er a ulebongel el omelsemai. A ngklir a mo permanent el llechukl er a babier er a klengar.
“TAEM ER A ULEBONGEL”
17. Ngera nguluuchais a anghel er a Daniel el kirel chelecha el taem er kid? (Daniel 12:4, 8-10, NW)
17 Kede kmal semeriar el kirel aika el tekoi el mo duubech er a ngar medad! Me nguaisei engdi a anghel a uluuchais er a Daniel a klou a ultutelel el tekoi el mo duubech er chelecha el taem er kid, el “taem er a ulebongel.” (Monguiu er a Daniel 12:4, 8-10, NW; * 2 Ti. 3:1-5) Ngdilu er ngii el kmo: “A mera el klemedengei a mo obdois.” Nguaisei, a rechedal a Dios a mo ungil medengei a belkul a ulaoch er tia el babier. Anghel a dirrek el dilechelir el kmo “a re dengerenger a diak bo lomtab a ikal tekoi e di melemolem a delengerengerir.”
18. Ngera di kmedu el mo duubech el mora remedengerenger?
18 Chelecha el taem e a redengerenger a ua lak lomals er tir el kirel a mekngit el omerellir. (Mal. 3:14, 15) Me nguaisei engdi ngdi kmedung e a Jesus a mo oukerrekeriil er a rekaming e mo meleakl er tir er a resib. (Mt. 25:31-33) Tirka el medengerenger a diak bo lsobel er a kloul ringel, e diak bo lebekiis er a beches el blekeradel. A ngklir a diak el llechukl er sel “babier” losaod er ngii a Malakai 3:16.
19. Chelecha e ngtaem el kired el mekerang, e ngera uchul? (Malakai 3:16-18)
19 Chelechang e ngtaem el kired lochotii el kmo ngdiak deteloi er a remedengerenger. (Monguiu er a Malakai 3:16-18.) Jehovah chelecha e ngmengudel er tirke lomes er tir el kmo te ‘meral chedal,’ el tir a kmal mekreos er osengel. Ngkmal soad el mo ta er tir.
Ngmera el mo dmeu a rengud el mesa Daniel, rebetik er a rengud, me a relmuut el betok el “mekiis” er a beches el blekeradel! (Momes er a parakurab 20)
20. Ngera el ulebongel el telbiil a mlora Daniel, e ngera uchul me komes el beduluchei el kirel?
20 Kede mera el kiei er a ileakl el taem! Ngkmal betok a ungil tekoi el di kmedung e ngmo er ngii! Di kmedung e te mo mokngemed a remedengerenger. A uriul er tiang e kede mo mesa otutel a telbilel a Jehovah el mora Daniel el kmo: “Ke mo mekiis el mo melai omeksullem er sel ulebongel taem.” (Dan. 12:13) Kau, ke kmal lomes el kirel tia el taem el Daniel me a rebetik er a rengum a “mo mekiis”? A leuaisei, e bo moba blakerreng, e seikid e ngsebechel mo ulterekokl a rengum el kmo a ngklem a melemolem el llechukl er a babilengel a Jehovah er a klengar.
CHELITAKL 80 “Di Lekau Losiik el Kmo Nguangera el Ungil a Jehovah”
^ Tia el suobel a mo mesaod er a ngeldechel a klemedengei er kid el kirel a klou el prokuram er osisechakl el losaod er ngii a Daniel 12:2, 3. Kede mo mesaod el kmo tiang ngmo er ngii er oingerang e rua techang a mo teloi er ngii. Kede dirrek el mo mesa rolel e tia el prokuram er osisechakl a mo mengetmokl er tirke el ngar tia el chutem el kirel sel ulebongel el omelsemai el mo er ngii er a ulebengelel a Ta el Telael el Rak el Omengederederel a Kristus.
^ A okiis a locha omuchel er tirke el mlad loba blakerreng er a temel a uriul sils e merael el bedul uriul. A lsekum e tia mo uaisei e a rechad a mo er ngii a techellir el outkeu er tirke el luledengelterir el mekiis er a kodall. Alta ngdiak dodengei el kmo ngkmal mo uangerang engdi a Bades a mesaod a okiis el mora eanged el kmo ‘ngoltirakl er a blechebechel,’ me ngsebeched el oumerang el kmo a okiis el mei er tia el chutem me ngmo uaisei a teletelel.—1 Ko. 14:33; 15:23.
^ Tia el omesaod a ngeldechel a klemedengei er kid el ngar er a 17 el bliongel er a book el Pay Attention to Daniel’s Prophecy! me a The Watchtower er a July 1, 1987, er a 21-25 el llel.
^ Tia ngodech er a re “ungil me a re mekngit” el losaod er ngii a Rellir 24:15 me a re “merruul a ungil” me a re “merruul a mekngit” losaod er ngii a Johanes 5:29 (BT) e le aika mesaod el kirel omerellir a remekiis er a uchei er a lemad.
^ Daniel 12:4, NW: “Mada Daniel btekii ngii el babier e mlia semosem el olangch er ngii el dimerekmo le me taem er a ulebongel. A rebetok a mo merriter er ngii, me a mera el klemedengei a mo obdois.”
