A doltirakl er a 1 Korinth 15:8, e a Paulus a dilu el kmo: “Sel kmal mlo uriul er ngii, e ng mle duum er ngak, ngak el kor a ngalek el cherellel a iliit er a belsechel.” A ngar er a mong e kede milsaod er tia el bades el kmo, a Paulus a millekoi el kirel sel taem er a lesa er a ues a Jesus el ngar er a klebkellel er a eanged. Ngua lengiluu chetengakl el mo mechell me a lechub e ngmekiis el mora klengar er a eanged, er a betok el dart el rak er uchei er a lebo er ngii chouaitia el okiis. Engdi a lmuut el dmolech el omesubel tia el bades ochotii el kmo ngkired el melodech er tia el klemedengei er kid.

Nguaisei el ngar tia el bades e a Paulus a mesaod el kirel a tekoi el dilubech el mo er ngii er sel taem er a lobult. Engdi ngngera mle belkul a tekingel er a ledu el kmo, ngkora “ngalek el cherellel a iliit er a belsechel”? Aikakid a locha sebechel belkul a tekingel.

A beltel a kmal mle mereched e kmal mle klou el tekoi. A ngalek el mechell el imiit er a blsechel el belkul a kmo ngngesonges a bilel, a tekoi el diak dolatk el kmo ngmo duubech. A Saulus (el uriul e ngmlo okedongall el Paulus) er a lorael el mora Damaskus el mo oldechelakl er a Rekristiano er isei, e ngdimlak lolatk el kmo ngmo mesa mla mekiis el Jesus. Ngdimlak lolatk el kmo ngmo obult me a Rekristiano el mle kirel el mo oldechelakl er tir me te dirrek el kmal mle mechas a rengrir. Tia dirrek el kmal mle klou el tekoi el dilubech er a klengar er ngii luchul e ngmlo diak el sebechel lomes el telkib el taem.​—Rel. 9:1-9, 17-19.

‘Ngdimlak el melemalt a temel’ lobult. A tekoi er a Grik el moiuid el “ngalek el cherellel a iliit er a belsechel” a dirrek el sebechel moiuid el “mechell er a diak el melemalt taem.” A The Jerusalem Bible a mesaod er ngii el kmo: “Ngua kmlechell er a taem el dimlak el expect er ngii a rechad.” Sel taem er a lobult a Paulus e a Jesus a mla mora eanged. Me a Paulus a diak el uai tirke el chad el lulsaod er tir er aike el oeak uchei el bades el milsa Jesus er a uchei er a lebora eanged. (1 Ko. 15:4-8) A Jesus el mlo duum er a Paulus a milsa techellel el mesang, alta ngua ‘lemlak el melemalt el taem.’

Nguleba ngariourreng el mesaod el kirel. A rebebil er a hakase mesaod el kirel tia el tekoi lousbech er ngii a Paulus el kmo ngdiak lungil a belkul. A lsekum tiakid a mle moktek er a Paulus e ngochotii el kmo ngmle medengei el kmo ngdiak lerredemelel a mo apostol. Ngika millekoi el kmo: “Mera er ngii e ngak a kot el ngar uriul er a re apostol, el diak lungil a kmokedong el apostol, ele kuleldechelakl er a Ikelesia er a Dios. Ngdi krasia er a Dios a uchul, e ak ua ingak er chelechang.”​—1 Ko. 15:9, 10.

Nguaisei, a Paulus a locha milsaod el kirel a Jesus el di mle kiul el mo duum er ngii, me a lechub e ngngii el dimlak el expect el kmo ngmo obult, me a lechub e ngngii el diak leredemelel a nguu chouaitia el ocholt. Alta ngdiak dodengelii a mera el belkul engdi ngbleketakl el kmo a tekoi el dilubech el mora Paulus a kmal mle mekreos er a rengul. Ngmileketeklii el mo er ngii el kmo a Jesus a mera el milekiis er a kodall. Sei a uchul me ngblechoel el mesaod er tia el experience er ngii sel lomerk el mora rechad el kirel a okisel a Jesus.​—Rel. 22:6-11; 26:13-18.