KE LOCHA kmal mengreos aike el kakerous el sengk el lomeskid a Jehovah, luldimukl er a ilmeklem el melilt er a rolel omousbech aika el sengk. A Biblia melekoi el kmo a bilong a sengk el mlara Dios. Ngdirrek el melekoi el kmo: “A ungilklebesei a rullau el mo dmeu a rengum ma bilong a rullii a rengum.” (Oli. 10:19; Psa. 104:15) Engdi ke locha mla mesa el kmo a rebebil er a rechad a ngar ngii a problem er tir er omelim el rrom. Me a lmuut kung, a rechad el meliuekl er a beluulechad el rokir a kakerous a uldesuir el kirel omelim el rrom. Me ngngera sebechel ngosuir a Kristiano el mo ungil melilt er a rolel a tekoi er omelim el rrom?

Alta kede kie kakerous el beluu el kakerous a siukang er kid engdi sel debecherei a osengel a Dios me lomekrael er a uldesued me a omelilt er kid e ngmo uchul a klungioled e mo ungil a klengar er kid.

Ke locha mla mtebengii el kmo a rebetok el chad er a beluulechad a blechoel el melim e melim el mo imis. A rebebil a melim a rrom le ngrulleterir el mo relax. A rekuk bebil a melim me bo lak lomdasu a mondai er tir. E ngar er a lmuut el bebil er a beluu, e te omdasu el kmo a chad el sebechel nguim a betok el rrom a mera el sechal.

Engdi a Rekristiano a oltirakl a ulekrael el mlara betik a rengul el Ulemeob. El ua tiang, ngmla ouchais er kid a kngtil a dolim a rrom el mo imis. Kede locha mla menguiu el kirel a komakai el omesodel a chad el imis el melim a rrom el losaod er ngii a Osisechakl 23:​29-35 me a mondai el dilubech el mo er ngii. a Daniel el ta er a remechuodel el ngar er a Europe a mesaod el kirel a klengar er a uchei er a lebo lemera el Kristiano el kmo, “Imis el omelim el rrom er ngak a mlo uchul a betok el mekngit el omelilt me a mekngit el experience el sel bo kullatk e ngkmal mo mekngit a renguk.”

Ngmekera sebechel a Kristiano el lousbech er a ilmeklel el melilt e oibngii er aike el mondai el duubech el imis el omelim el rrom a uchul? Ngkired el lousbech er a osengel a Dios lomekrael er a uldesued me a omerelled.

Ka me dosaod aike el lolekoi a Biblia el kirel a rrom me a bebil er a uchul me a rechad melim.

A Tekingel a Dios a diak lolekebai a omelim el rrom. A Biblia melekoi el kmo a omelim el bilong a uchul a deurreng. Ngkmo: “Mongang el ngar er a deurreng, e molim er a imelem el bilong el lungil a rengum.” (Oli. 9:​7, NW) A Jesus a mle ta el taem el lolim a bilong me a rebebil er a blak a rengrir el mesiungel a Jehovah me te dirrek el millim.—Mt. 26:​27-29; Lk. 7:34; 1 Ti. 5:23.

Engdi Biblia a melekoi el kmo ngngar ngii a klekakerous er a melim a sesei me a mo cheltelaol. Ngkmo: “Lak bo mchetelaol er a bilong.” (Efe. 5:18) E dirrek el melekoi el kmo te “diak bo le siseb er a Rengedel a Dios . . . [a] re di cheltelaol.” (1 Ko. 6:​9, 10) Chochoi a Jehovah ouketui omelim el mo imis me a mo cheltelaol. Ngdiak el soad el meche siukang er kid me lomekrael er kid kede bai kmal oba omereng el saul el mla nguu osengel a Dios el kirel.

A rebebil a feel el kmo ngsebechir el nguim a betok e diak el bo el cheltelaol. Engdi tia kmal kengaol. A Biblia bleketakl el melekoi el kmo a chad el ‘sibil a chomelim el bilong’ a sebechel mo uchul e ngremuul oberaod el klengit e tomellii a deleuill er ngii me a Jehovah. (Tit. 2:​3, BT; Osi. 20:1) Jesus a dirrek el dilu el kmo a “cheltelaol ra rrom”  a sebechel mo uchul me a chad a diak el siseb er a beches el blekeradel er a Dios. (Lk. 21:​34-36, BT) Me ngngera sebechel ngosuir a Kristiano el choridii er aike el mondai el luchul me a rechad a mo melim a rrom?

Ngkengaol el tekoi a lsekum a chad a di ousbech er a siukang el lemlukeroul er ngii lomekrael er a uldesuel el kirel omelim. A Rekristiano meruul aike el mo odeuir a rengul a Jehovah er a rolel a tekoi er a kall me a ilumel. A Biblia omeklatk er kid el kmo: “Cho monga ma cho molim ma cho moruul er a ngii di le ngerang, e moruul el rokui el mo kirel odengesel a Dios.” (1 Ko. 10:31) Aikakid a bebil er a ker me a omellach el sebechem el melatk:

Ngak ak melim le ngsoak a bo le sorir ngak a rechad me a lechub e lak lolekoi er ngak? A Exodus 23:2 a kmo: “Kele moltirakl er a re betok el chad.” Ngar tiang e a Jehovah ulemeklatk er a rechad er a Israel me lak bo loltirakl er a rechad el tir a dimlak lodeuir a rengul. Tia dirrek lungil ulekrael el kired er chelecha el taem. A lsekum e kede mechititerir a rechad me te omekrael a uldesued me a omelilt er kid el kirel a rrom, e ngsebechel cherengel a taem e ngmo diak doltirakl a llechul a Jehovah e mo cheroid er ngii.—Rom 12:2.

Ngak ak melim lolecholt er ngak er a rechad el kmo ak mesisiich? Ngar er a bebil el beluu e ngdi ungil a oblechoel el melim me a omolim el mo imis. (1 Pe. 4:3) Engdi momtab a lolisiich er kid er ngii a 1 Korinth 16:13 (BT): “Mongkar, e bo misisiich el dechor ra kloumerang, bora klsechal, e bo misisiich.” A rrom ngmera el sebechel ngosuir a chad el mo mesisiich? Ngdiak, a rrom a rullii a chad el mo diak lungil omdasu e diak lungil melilt. Me a imis el omelim el rrom a diak lerellii a chad el mo mesisiich e ngbai ochotii a klebelngul. A Isaia 28:7 a mesaod er a chad el rrau a rengul el diak lomtab e mla mesibas el imis el lomelim a uchul.

A mera el klisiich a oeak a Jehovah e ousbech er kid el mo ‘klekar e mesisiich el dechor er a klaumerang.’ (Psa. 18:32) A Kristiano sebechel meruul er tiang loeak a lolemolem el klekar e lolilt aike el tekoi el mo omekerreu er a deleuill er ngii me a Jehovah. A Jesus ulechotii tia el klisiich er a lengar tia el chutem me a rechad a kmal milengull er ngii le ngulechotii a blekeu e rirellii er a rengul el mo meruul a llemalt.

 Ngak a kuusbech er a rrom el chemiis a mondai er ngak? A ta er a milluches er a Psalm a mlukreng el mo meluches el kmo: “Sel lesal mo ouedikel a renguk, e ng kau a cholodak e rullii a renguk el mo ungil.” (Psa. 94:19) A lsekum e ngmo omekberaod er kau a mondai er kau e momes el bedul a Jehovah el diak el rrom. A ungil rolel e kede meruul er tiang oeak sel bo de betok el meluluuch el mora Jehovah. Me a rebebil a dirrek el mla metik el kmo ngmla ngosuterir sel losiik a ulekrael er a resechelirir er a ongdibel el mla mukeroul. A chad el melim me lsebechel loutekangel a mondai er ngii a bai rullii el mo diak el meduch a rengul el meruul er a melemalt. (Hos. 4:11) A Daniel el dulsaod er ngii er a uchei a kmo: “Ngmle blechoel el mo suebek a renguk e ouuchel a renguk el kirel a tekoi. Me ak millim me lak bo leuaisei a uldesuek engdi tia bai mlo uchul a lmuut el betok el mondai. Ak dirrek el tilemall a deleuill er ngak me a rechad e mlo mekngit a uldesuek el kirek.” Me ngngera ngilsuir a Daniel? Ngkmo: “Ak mlo mtebengii el kmo ngkirek lultuil er a Jehovah el diak el rrom. Ngoeak a ngelsuil a Jehovah e ngmlo sebechek lotekau e sumechokl a mondai er ngak.” Me a Jehovah kmal kltmokl el olengeseu er kid mo lmuut me a bo de feel el kmo ngdiak el sebeched el mekerang.—Fil. 4:​6, 7; 1 Pe. 5:7.

A lsekum a lebebil e ke melim a rrom, e nglocha sebechem el di kau el merriter er a omelmem lousbech aika el ker: ‘Ngar ngii a chedal telungalek er ngak me a lechub e ngsechelik el mla melekoi er ngak el kirel a omelmek?’ A leuaisei e tia sebechel lochotii el kmo ngngar ngii a mondai er kau el kirel e diak modengei. ‘Sel kumelechesiu er ngak e ngmla betok a kulim?’ Tia locha uaisei el kirel a chad el diak el secher er a omelim el rrom engdi ngomechela el uaisei. ‘Ngmeringel er ngak a diak kulim el sesei el klebesei me a lechub e nglmuut el kemanget er tiang?’ A leuaisei e tia locha mla mo blekerdelem el di melim. Ngsebechel belkul a kmo kousbech er a retoktang el help er kau el mo mesisiich er ngii.

Omelim el sebechel mo uchul a betok el mondai a uchul me a rebebil a melilt el diak lolim. A rebebil a kuk diak lolim le ngchetirir a chazi er ngii. A lsekum a chad a melilt el diak lolim e mongull er omelilt er ngii e lak moukerrekeriil er ngii.

 Me a lechub e ke mtebengii a llomeserreng er a om set er a limit er a ildisel a imelem. Me a lechub e ke rullii a llach el kirem el kmo ngdi ta er a chelsel a ta el sandei el molim me a lechub e ngsebechem el melim sel momengur engdi ke mesebech er ngii. A rekuk bebil a mla oterekokl a bedengel a rrom el lolim el ua ngsebechir el melim a bilong me a lechub e ngbiang engdi ngdiak lolim a mesisiich el ilumel mo lmuut me a lsekum e te mix. A chad sel lebeketakl aike el sebechel meruul me a diak e ngmo beot er ngii oltirakl. E a Kristiano el mla mukeroul a diak bo lemerur el kirel omelilt er ngii e le ngmla rullii er a rengul el mo oltirakl.

Ngdirrek el lungil omolatk a uldesuir a rechad. A Rom 14:21 (BT) a kmo: “Ngungil tekoi a lak monga techel a charm, ma lak molim a bilong, ma lak moruul a ikel bebil ra melibas er chodam er kau.” Ngmekera sebechem loltaut er tia el bades? Molecholt er a bltikerreng. A lsekum ke feel el kmo a omolim e ke mo soibesengii a chad, e a bltikerreng a rullau me ngdiak bo molim. Sel moruul el uaisei e kochotii omengull el kirel a uldesuir a rebebil e osiik aike el mo ungil er a rebebil el ngaruchei er kau.—1 Ko. 10:24.

Me a lmuut kung, a kabelment a dirrek el mla remuul a llach el kirir a Rekristiano el loltirakl. Aika el llach a locha olterekokl er a rekrir a rechad el sebechir el melim me a lechub ngolekebai er a rechad me ngdiak lolim e lomekall me a lechub e le operate a bebil el mesil.—Rom 13:​1-5.

A Jehovah mla meskid a betok lungil sengk e a ta er ngii a ilmekled el melilt a rolel a dousbech aika el sengk. Tia uldimukl er ngii omelilt er a kall me a ilumel. Me a omelilt er kid lochotii el kmo kede mengreos er a ilmekled loeak a dousbech er ngii el odeuir a rengul a Demad el ngar er a eanged.