1. Ngera uchul me ngsebeched el melekoi el kmo a omeltkel a Abraham a diak lak a ultutelel?

 JEHOVAH tilbir el mora sechelil er a Abraham el kmo a bek el beluu er a beluulechad a mo mukngeltengat loeak a uldidellel a rsechel. (Gen. 15:5; 22:18) Abraham el mle mesisiich a klaumerang er ngii er a Dios a uchul me ngmle ulterekokl a rengul el kmo a telbilel a Dios a mo tmaut. Me nguaisei a Abraham a mle 100 a rekil me a bechil a mle 90 a rekil e dirk diak a ngelekir. (Gen. 21:​1-7) Engdi Biblia melekoi el kmo: “A Abraham a di uluumerang e mengiil el mo lmuut er ser a bol lak a ungil el uchul e longiil, misei ia uchul me ngmlo ‘demal a betok el beluu’ . . . [el] di ua lolekoi a Chedaol Llechukl.” (Rom 4:18) E kau a medengei el kmo a omelatk el lulebang a Abraham a tilaut. Ngmlo er ngii a ngalek el kmal luluureng er ngii, el Isak. Ngera uchul me a Abraham a mle ulterekokl a rengul el kmo a Jehovah mo otutii a telbilel?

2. Ngera uchul me a Abraham a mle ulterekokl a rengul el kmo a telbilel a Jehovah mo tmaut?

² Abraham a mla er ngii a mesisiich el deleuill er ngii me a Jehovah a uchul me ng “mle ulterekokl loumera el kmo, a ikel le tilib a Dios” a mo tmaut. (Rom 4:​21, BT) Klaumerang er a Abraham a uchul me a Jehovah ulemasech er ngii el melemalt e oba kengei er ngii. (Jak. 2:23) Ngua losaod a Rom 4:​18, a klaumerang er a Abraham me a omelatk el lulebang a mle ulekuak. Me dosaod aike el lolekoi a apostol Paulus er a 5 el bliongel er a Rom el kirel a klaumerang.

3. Ngera ngmesaod er ngii a Paulus el kirel a omelatk?

³ A Paulus a smodii a uchul me ngsebechel mo ulterekokl a rengud el kmo “[omeltked] a diak el rellid el mo metirm a rengud  er ngii.” (Rom 5:5) Ngdirrek el ngosukid el mo medengelii a rolel e a omeltked a Rekristiano a sebechel lmuut el mo mesisiich. Sel dorriter er a Rom 5:​1-5, e molatk er a klengar er kau. Sel moruul el uaisei e ke mo mtebengii el kmo a omerollel a taem e a omeltkem el kirel a ngar medad a liluut el mo mesisiich. Tia el omesaod el bo doruul er ngii a dirrek el mo ochotii a rolel e ngsebechem el rullii a omeltkem er chelechang el lmuut el mo mesisiich. Me a kot e me dosaod er a klebokel el omelatk el Paulus a melekoi el kirel el kmo ngdiak el lerellid el mo metirm a rengud.

4. Ngera ngmesaod a Rom 5:​1, 2?

⁴ Monguiu er a Rom 5:​1, 2. A Paulus a liluches aika el tekoi el mora ongdibel er a Rom. A rudam me a rudos er a Rom a mla suub a betok el kirel a Jehovah me a Jesus, e ulechotii a klaumerang e mlo Kristiano. Me te “muklemalt er medal a Dios ele [tir] el oumerang” e ngiluu a chedaol reng. Chochoi, te ngiluu a mera el ungil omelatk el kmal sebechir loumerang el kmo te mo nguu.

5. Ngera el omelatk a lobang a rengellitel?

⁵ A Paulus a uriul e ngmilluches el mora rengellitel el Kristiano el ngar er a Efesus el kirel omelatk el Dios a mla mesterir. A uldimukl er tia el omelatk “a diukes ra Dios el ngarar mechedaol.” (Efe. 1:​18, BT) A Paulus a dirrek el luluuchais er a Rechad er a Kolose el kmo ngngar ker a lebo lenguu a dikesir er ngii. Ngulemekedong er ngii el “chomelatk er kemiu el bedul sel medechel ra eanged el omech er kemiu.” (Kol. 1:​4, 5, BT) Me a omelatk el lobang a rengellitel el Kristiano a mo mekiis el mo nguu a diak a ulebengelel el klengar er a eanged e mo mengedereder lobengkel a Kristus.—1 Th. 4:​13-17; Och. 20:6.

6. Ngera ngdilu ta el ngellitel el odam el kirel omelatk?

⁶ A rengellitel el Kristiano a mengreos er tia el omelatk. A ta er tir er a odam el Frederick Franz a mlara rengul el melekoi el kmo: “A omeltkam a ulterekokl, e mo tmaut el kirir a rederta er a re 144,000 el chedal a kekerei el  delebechel e tia mo engelakl er sel ki momdasu er ngii.” Uriul er a betok el rak el losiou er a Jehovah el loba blakerreng a Brother Franz e ngdilu er a 1991 el kmo: “[Aki] kmal dirk omes er tia el omelatk el kmo ngkmal mekreos. . . . Klteketel a taem el ki mongiil e aki lmuut el menga el mo oba omereng el saul el kirel. Aki kongei el mengiil er ngii, mo lmuut me aki mongiil el betok el miliol el rak. A kumes er a omeltkam el kmal mekreos el lmuut ngaruchei er a ngar er a mong.”

7-8. Ngera el omelatk a lobang a ruumesingd el mesiungel a Jehovah? (Rom 8:​20, 21)

⁷ Oumesingd er a remengull er a Jehovah er chelecha el taem a ngodech a omeltkir. Ngosisiu el omelatk el lulebang a Abraham el mo kiei er tia el chutem el mo cherechar el ngar cheungel a Rengedel a Dios. (Heb. 11:​8-10, 13) A Paulus a milluches el kirel aike el medechel el kirir tirke el loba tia el omelatk. (Monguiu er a Rom 8:​20, 21.) Kau er sera omkot el suub a telbiil er a Biblia el kirel a ngar medad, e ngera kmal mle soam er ngii? Ngsoam omelatk el kmo a ta er a klebesei e ke mo cherrungel e mo diak mngar er a klengit? Me a lechub e ngkmal mlo dmeu a rengum el mo medengei el kmo a rebetik er a rengum el mla mo smecher a lmuut el mo ngar er a baradis el chutem? Tia el “omelatk” el bla lebeskid a Dios a uchul me ngbetok a domes el beduluchei el kirel.

⁸ Me a doba omelatk el mo kiei el mo cherechar er a eanged me a lechub e ngchutem, me kid oba omelatk el luchul me ngkirel dmeu a rengud. E kmal sebechel lmuut el mo mesisiich a klaumerang er kid er a omeltked. A Paulus a milsaod er a rolel e ngsebeched el meruul er tiang. Me dorriter a tekoi el lulluches el kirel a omelatk el dobang. A tekingel a mo ngosukid el mo ulterekokl a rengud el kmo a omeltked a mera el mo tmaut.

9-10. Ngua desa er a dilubech el mora Paulus, ngera te medengei a Rekristiano el kmo ngmo duubech? (Rom 5:3) (Dirrek el momes a siasing.)

⁹ Monguiu er a Rom 5:3. Mutebengii el kmo aike el bo decharm a rullii omeltked el lmuut el mo mesisiich. Ngkora mechas a rengud  er tiang. Me nguaisei engdi a rokui el oltirakl er a Jesus a mo chuarm odechelakl. Molatk er a Paulus. Ngdilu er a rengar er a Thesalonika el kmo: “[Sera] kim ngar tilechang e aki di mla subedemiu el kmo, kid a kired el mo modechelakl; me kid tial mlo chuarm.” (1 Th. 3:4) E milluches el mora rengar er a Korinth el kmo: “Kemiu el bebil er kemam, ng diak el somam a lak modenge ikel blo kimcharm er ngii . . . Ng mlor ngii er a rengmam a kmo aki di mo mad.”—2 Ko. 1:8; 11:​23-27.

¹⁰ Me a Rekristiano er chelecha el taem me te dirrek el medengei el kmo te mo metik a bedengel odechelakl. (2 Ti. 3:12) E kau? Ke mla modechelakl lekau el oumerang er a Jesus e mla mo oltirakl er ngii? A resechelim me a rechedam a locha mla dmu mekngit er kau. Te locha dirrek el mekngit omerellir el mo er kau. Me a lechub kau el soam el mo honest er a bek el tekoi ngmla muchel a mondai el kirem er a ureor? (Heb. 13:​18, BT) Me a lechub e ke chelebangel a ultok er a kabelment lekau louchais er a omeltkem el mora rebebil? Alta ngkakerous a bedengel a odechelakl el bo dechebangel, me nguaisei engdi Paulus a kmo ngkirel dmeu a rengud. E ngerang?

11. Ngera uchul me ngkired el rullii er a rengud el mo outekangel a ngii di el ringel?

¹¹ Aike el tekoi lukdubech a odechelakl el dechelebangel a uchul me ngsebechel mo dmeu a rengud sel dechuarm. A Rom 5:3 a kmo, “a ringel a rullid el mo meduch a rengud.” A rokui el Kristiano a mo chobangel a odechelakl me ngkired el rokui el rullii er a rengud el mo meduch a rengud loutekangel. E seikid e ngsebeched el mo mesa otutel omeltked. Ngdiak el soad el mo uai tirke el lulemekesiu er tir a Jesus el mora tane el rirebet er a bedbeduul el chutem. Tirka mle dmeu a rengrir el kongei er a klumech engdi a “le me ringel ma lechub e ng odechelakl” e te di mle mereched el mesibas. (Mt. 13:​5, 6, 20, 21) Nguaisei el diak el beot sel dechebangel a ringel me a lechub e ngultok, engdi ngmo uchul a klungiaol sel doutekangel. Ngoeak a ngera el rolel?

12. Ngera el klungiaol a dengai sel bo lemeduch a rengud loutekangel a ringel?

¹² A disaiplo el Jakobus a mesaod a klungiolel sel doutekangel a ringel. Ngmilluches el kmo: “Molemolem el outekangel el mor a ulebongel, me bo mungil el cherrungel el diak a telemelliu, ma diak olengesonges er kemiu.” (Jak. 1:​2-4) Me a Jakobus a mesaod el kmo ngngar ngii a moktek er a ducherreng. Ngsebechel ngosukau el lmuut el mo klou a rengum, e dochelir a klaumerang er kau, e rullau el lmuut el mo ultuil er a Dios. Me nguaisei, ngngar ngii a lmuut el ta er a klungiaol el denguu er a ducherreng.

13-14. Ngera ngmekdebechii a ducherreng, e tia ngera ngrullii el mora omeltked? (Rom 5:4)

¹³ Monguiu er a Rom 5:4. A Paulus a kmo a ducherreng a “mekdbechii a ungil blekeradel.” A ducherreng er kau a uchul me ke nguu a kengei er a Jehovah. Tia diak el belkul a kmo a Jehovah dmeu a rengul sel omchelebangel a ringel. E ngbai dmeu a rengul le ngkau loutekangel loba blakerreng. Tia mera el ileakl el klengeltengat!—Psa. 5:12.

¹⁴ Lak mobes el kmo a Abraham uluutekangel a ringel e ngiluu a kengei er a Jehovah. A Jehovah ulemes er ngii el sechelil e ulemasech er ngii el melemalt. (Gen. 15:6; Rom 4:​13, 22) Tia dirrek el sebechel mo klemerang el kired. A Jehovah diak lolebodeb er a kengei er ngii er kid loltirakl er a idisel a tekoi el doruul el ngar er a omesiunged me a lechub e ngidisel a ileakl el techall el dolab. Kede nguu a kengei er ngii loeak sel doutekangel loba blakerreng. Me kid el rokui a sebeched el loutekangel, e tia diak el ior er a rekid, blekerdelel a klengar er kid, me a lechub e ngduch er kid. Kau, ke  oba blakerreng loutekangel a ringel er chelechang? A leuaisei e lemechelaod a rengum le koba kengei er a Dios. Ngkmal klou el klisiich sel dodengei el kmo kede oba kengei er a Dios. Ngsebechel smisichii omeltked.

15. Ngera ngdirrek el melekoi a Paulus, e ngera uchul me a rebebil a locha mo rrau a rengrir?

¹⁵ Ngua lesilodii a Paulus, kede nguu a kengei er a Dios loeak sel dolemolem loba blakerreng sel doutekangel a ringel. Molatk er a ongingil tekingel a Paulus: “A ungil blekeradel a mekdbechii a omelatk, e a omelatk a diak el rellid el mo metirm a rengud er ngii.” (Rom 5:​4, 5) Tia locha rulleterir a rebebil el mo rrau a rengrir. E ngerang? E le Paulus a dilu er a uchei el ngar er a Rom 5:2 el kmo a Rekristiano el ngar er a Rom a ngar ngii omeltkir, el ngii a “melatk e mengiil er a dikesed er a klebkellel a Dios.” Sei a uchul me a chad a locha mo oker el kmo, ‘A lsekum tirka el Kristiano a ngar ngii omelatk el lobang, e ngera uchul me a Paulus a liluut el mesaod er a omelatk er a uriul?’

16. Ngmekera omelatk e mukeroul el mo mesisiich er a rengul a chad? (Dirrek el momes a siasing.)

¹⁶ Kede mo mtebengii a belkul a tekingel a Paulus sel dorriter el kmo a omelatk a tekoi el sebechel mukeroul el lmuut el mo mesisiich. Ngsebeched lomekesiu er ngii er tiang: Ke dirk medengelii sel taem er a omkot el rongesii omelatk el ngar er a Biblia? Ke locha mlo melatk el kmo ngmera el lungil engdi uldasu el mo kiei el mo cherechar er a baradis el chutem a di berrous el tekoi. Me nguaisei engdi sera lemukeroul a klemedengei er kau er a Jehovah me a telbiil er a Biblia, e ngmlo ulterekokl a rengum el kmo tia el omelatk a mera el mo tmaut.

17. Ngmekera omeltkem e melemolem el meleketek a klisichel er a uriul er a omtibir a rengum e metecholb?

¹⁷ Mo lmuut er a uriul er a omtibir a rengum e metecholb me ke millemolem el mesuub e mukeroul el Kristiano. E tia silsichii omeltkem. (Heb. 5:13–6:1) Ke locha mla experience aike el lolekoi a Rom 5:​2-4. Ke mlo chobangel a kakerous el ringel engdi ke millemolem loba blakerreng el loutekangel e mlo melechesuar  er a kengei er a Dios. Me kau lulterekokl a rengum el kmo koba kengei er a Dios a uchul e ngulterekokl a rengum el kmo ke mo ngmai aike el bla letib. A omeltkem a mesisiich er sel kot el taem er omrengesii omelatk er a Biblia. Ngmera el mla mo mera el tekoi er a rengum. Ngngar ngii a klisichel er kau. Ngomekrael a bek el tekoi er a klengar er kau e mla ngodechii a blekerdelem el bedul a telungalek er kau, e ngar ngii a lerellii er a omelilt el moruul, me a dirrek el rolel omousbech a temem.

18. Ngera el lulterekokl el tekoi a lebeskid a Jehovah?

¹⁸ A apostol Paulus a dirrek el dochelir a klou a ultutelel el tekoi el kirel a omelatk el mobang er a uriul er a omnguu a kengei er a Dios. Ngolterekokl er a rengum el kmo a omeltkem a mo tmaut. Ngera uchul me ngsebechel mo ulterekokl a rengum? A Paulus a mlukreng el mo meluches er tia el lulterekokl el tekoi el Dios a mesterir a Rekristiano el kmo: “A omelatk a diak el rellid el mo metirm a rengud er ngii, ele bltikerreng er a Dios a mla moitel er a rengud el okiu a Chedaol Reng el bla le beskid.” (Rom 5:5) Me ngngar ngii a ungil luchul me ngulterekokl a rengum er a omeltkem.

19. Ngera sebechel mo ulterekokl a rengum er ngii el kirel omeltkem?

¹⁹ Morriter er a telbilel a Jehovah el mora Abraham me a rolel e ngngiluu a kengei er a Dios me a Dios omes er ngii sechelil. A omeltkel a Abraham a diak el lak a ultutelel. A Biblia a kmo: “A Abraham a uleba kllourreng el mengiil, me ngngiluu sel telbiil.” (Heb. 6:​15, BT; 11:​9, 18; Rom 4:​20-22) Me a Abraham a dimlak louuchel er a rengul. Kau me ngdirrek el sebechem el mo ulterekokl a rengum el kmo a omolemolem loba blakerreng e ke mo nguu otutel omeltkem. A omeltkem a mera el tekoi el luchul a deurreng e kmal diak bo louuchel a rengum er ngii! (Rom 12:12) A Paulus a milluches el kmo: “Ma Dios, el uchul e kom melatk e mengiil er ngii, le beskemiu a klou el deurreng ma budech, ele kemiu el oumera er ngii, me bo le sebechiu el mesisiich el melatk e mengiil er ngii el ultuil er a klisichel a Chedaol Reng.”—Rom 15:13.