1. Ngera kirel a Kristiano el sechal el meruul er ngii me bo lungilbesul?

 KING David a dilu er a Salomon el kmo: “Bo lemesisiich a rengum e mochotii el kmo ke mera el sechal.” (1 Ki. 2:​1-3, NW) Ngklou a ultutelel a rokui el Kristiano el sechal a loltaut aika el tekoi. A bo lungilbesrir e ngkirir el suubii el mo olengesenges a llechul a Dios e oltaut omellach er a Biblia el ngar er a bek el tekoi el loruul. (Lk. 2:52) Ngera uchul me ngklou a ultutelel a bo el Kristiano el mla mukeroul a remekekerei el odam?

2-3. Ngera uchul me ngklou a ultutelel a kekerei el odam a bo le Kristiano el mla mukeroul?

² A Kristiano el sechal a betok a meklou a ultutelel el ngerachel el lolab er a chelsel a telungalek me a dirrek el ongdibel. E kemiu el mekekerei el odam a ulterekokl el mla melatk el kirel a ngerachel el bo molab er a ngar medad. Nglocha ngar ngii a turrekong er kau el mo pioneer, ministerial servant, e a uriul e ngsoam el mo mesiou el ta er a remechuodel er a ongdibel. Nglocha dirrek el soam el mo bechiil e oungalek. (Efe. 6:4; 1 Ti. 3:1) A lsoam el otaut aika el turrekong e mo ungil kutmokl, e ngkirem el mo Kristiano el mla mukeroul. b

³ Ngera sebechel ngosukau el mo Kristiano el mla mukeroul? Ngngar ngii a meklou a ultutelel el duch el kirem el suub. Me ngngera sebechem el meruul er chelechang el prepare el kirel a ngii di el ngerachel el bo molab er a ngar medad e mo ungil kutmokl ngii el ngerachel?

4. Ngsebechem el metik er a rungil kerebai er ker? (Dirrek el momes er a siasing.)

⁴ Moukerebai er a rungil kerebai. A Biblia mesaod er a rebetok lungil kerebai el sebechir a remekekerei el sechal loukerebai  er tir. Tirka el sechal el kiliei er a irechar a mle betik a rengrir er a Jehovah e ullab a kakerous el ngerachel el omekerreu er a rechedal a Dios. Ngdirrek el sebechiu el metik er a rungil el kerebai er a rudam el mla mukeroul el Kristiano er a chelsel a telungalek er kemiu me a ongdibel. (Heb. 13:7) E ngar ngii a cherrungel el kerebil a Jesus Kristus. (1 Pe. 2:21) Sel mkerekikl el mesuub ngii el kerebai, e momtab aike el blekerdelir el kmal soam. (Heb. 12:​1, 2) E mngiltii a rolel e ke mo oukerebai er tir.

5. Ngmekera sebechem el mo ungil omtab a tekoi, e ngera uchul me tia kmal klou a ultutelel? (Psalm 119:9)

⁵ Msuubii e “morekedii a . . . utebengel a tekoi.” (Osi. 3:21) A chad lomtab a tekoi a melatk a rokui el tekoi er a uchei er a loruul a tekoi. Me ngmeringel el loureor el mo suubii el mo meduch lomtab a tekoi e molemolem el meruul el uaisei. E ngerang? Tia el beluulechad a mui er a remekekerei el chad el tir a meruul a tekoi loltirakl er a di uldesuir me a rengrir. (Osi. 7:7; 29:11) A media a dirrek el klou a lerellii er a rolel omomdasu e moruul a tekoi. Engdi ngmekera omsubii el mo meduch lomtab a tekoi? Momuchel loeak omsuub a omellach er a Biblia e moltak er a rolel e aikang a uchul a klungiolem. E mousbech ngii el omellach el olengeseu er kau el meruul omelilt el ngii a odeuir a rengul a Jehovah. (Monguiu er a Psalm 119:9.) Sel omsubii el mo omdasu el uaisei, e ngkmal mo ngosukau el mo Kristiano el mla mukeroul. (Osi. 2:​11, 12; Heb. 5:14) Molatk er a rolel e a omsubii el mo omtab a tekoi a mo ngosukau er aika el eru el blekeradel: (1) omerellem el bedul a rudos, me (2) sel molilt el mengetmokl er kau.

6. Ngmekera ungil ultebengel a tekoi e ngosuir a kekerei el odam el mo olecholt omengull el bedul a rudos?

⁶ Chad el mla suubii el mo omtab e omdasu el ua Jehovah a mo ochotii omengull el mora redil. Ng normal a lsekum a kekerei el odam a soal a odos e soal lebo el kasisiik. Me nguaisei engdi a chad el mla suubii el mo omdasu el ua Jehovah a diak bo lolekoi, loluches, me a lechub e loruul a ngii di el ngerang el mora odos el rullii el mo omdasu el kmo ngsoal date er ngii, a lsekum e ngdiak lolatk a mo bechil. (1 Ti. 5:​1, 2) E a lsekum e ng date er a odos, e ngkmal diak bo letemellii a ungil chisel a odos  loeak a di el tir el terung el dmak e diak a chad el chaperone er tir.—1 Ko. 6:18.

7. Ngmekera ungil ultebengel a tekoi e ngosuir a kekerei el odam el melilt a rolel a loubail e longetmokl er ngii?

⁷ A dirrek el ta er a rolel e a kekerei el odam ochotii el kmo ngmla mo meduch lomtab a tekoi a sel loubail e longetmokl er ngii. Oumesingd er a taem e a bail el haeri a ble le design e promote a rechad el diak longull er a Jehovah e kiei el ngar er a deleboes. Me a bail el loruul a kmes e kosekes e rulleterir a resechal el mo ua teletelel a redil. Me a kekerei el odam el mesuub el mo Kristiano el mla mukeroul a ousbech omellach er a Biblia me a rungil el kerebai er a ongdibel el omekrael er a rolel a longetmokl er ngii. Ngsebechel di ngii el oker: ‘A omelilt er ngak, ngochotii el kmo a kungil el omdasu e dirrek el melatk a uldesuir a rebebil? A rolel a kuubail ngrullii el mo beot er a rechad a mtebengii el kmo ngak a mesiungel a Dios?’ (1 Ko. 10:​31-33; Tit. 2:6) A kekerei el odam el mla suubii el mo omdasu el ua Jehovah a diak di lenguu omengull er a rudam me a rudos er ngii, ngdirrek a Demal el ngar er a eanged.

8. Ngmekera kekerei el odam e sebechel suubii el mo sebeched lultuil er ngii?

⁸ Lsebeched el lultuil er kau. A kekerei el chad el sebeched lultuil er ngii a kerekikl el meruul a ngerechelel. (Lk. 16:10) Molatk er a cherrungel el kerebil a Jesus. Ngdimlak el lemeterekakl a ngerechelel ngbai kiltmokl a rokui el ngerachel el Jehovah milsang mo lmuut er aike el taem el meringel er ngii. Ngmle betik a rengul er a rechad tokubets a redisaiplo er ngii, e kilengei el tongetengii a klengar er ngii el kirir. (Jn. 13:1) Moukerebai er a Jesus e bo meringel loureor el kutmokl a ngii di el ngerachel el mngai. E a lak modengelii a rolel a doruul er ngii, e bo lengariou a rengum e molengit a ngeso er a rudam el mla mukeroul el Kristiano. Lak moruul er sel kot el kekerei el sebechel meketmokl. (Rom 12:11) E bai mcherrengelii a ngerechelem e lak moruul el “kirir a re chad, e ng [bai] kirel a Rubak.” (Kol. 3:23) Nguaisei, ngdiak mcherrungel me sel bo mecheuid e leboriou a rengum e mouchais cheleuid el mriruul.—Osi. 11:2.

9. Ngera uchul me a kekerei el odam a kirel suub a usbechall el duch?

⁹ A bom Kristiano el mla mukeroul e ngkirem el suub a duch. Aika mo ngosukau el kongei a ngerachel er a ongdibel, metik a ureor e mo blak a rengum loureor el mesiou er kau me a lechub e ngtelungalek er kau, e mo er ngii a ungil deleuill er kau me a rebebil. Molatk a bebil er aika el usbechall el duch.

10-11. Ngmekera mo klungiolel a kekerei el odam me a ongdibel sel lesubii el mo meduch el menguiu e meluches? (Psalm 1:​1-3) (Dirrek el momes er a siasing.)

¹⁰ Msuubii el mo meduch el menguiu e meluches. A Biblia melekoi el kirel a chad el dmeu a rengul e ungilbesul el kmo ngmengoit a taem er a bek el sils el menguiu e melebedebek er a Tekingel a Dios. (Monguiu er a  Psalm 1:​1-3.) Sel longuiu er a Biblia er a bek el sils e ngmo medengelii a rolel a Jehovah omdasu, e tia ngosuir el mo ungil omdasu e mo meduch loltaut a Bades. (Osi. 1:​3, 4) Kede ousbech er a chouaitirka el sechal er a ongdibel. E ngerang?

¹¹ A rudam me a rudos er kid a omes el bedul a rudam el kirel a ulekrael el mengai er a Biblia. (Tit. 1:9) A lsekum ngsebechem el menguiu e meluches, e ngsebechem el prepare a cheldecheduch me a comment el ngii a mo klungiolir a rechad er a ongdibel e smisiich a klaumerang er tir. Ngdirrek el mo sebechem el meluches a notes sel mosuub me sel omorrenges a cheldecheduch er a miting, assembly, me a convention. Aika el notes er kau a mo ngosukau el meleketek er a klaumerang er kau e melisiich er a rebebil.

12. Ngera sebechel ngosukau el mo meduch lorrenges e ungil mengedecheduch?

¹² Msuubii el mo meduch lorrenges e ungil mengedecheduch. A odam el Kristiano a kirel suubii el mo meduch el meruul er tiang. A chad el meduch el meruul er tiang orrenges e melasem el mo understand aike el ngar er a uldesuel me a rengul a chad. (Osi. 20:5) Ngsebechel suubii el mo meduch el menguiu er a medal a chad, me a bedengel me a delecherul a ngerel. Ngdiak el sebechem el suubii tiang olak mongoit a taem lobengterir a rechad. A lsekum ke ousbech a electronics el mengedecheduch er a rechad el ua email me a text, e ngmo meringel er kau a mengedecheduch er a chad sel omchelebangel er ngii er a medal. Me molasem losiik a rolel a mengedecheduch er a chad er a medal.—2 Jn. 12.

13. Ngera dirrek el kirel a kekerei el sechal el suubii? (1 Timothy 5:8) (Dirrek el momes er a siasing.)

¹³ Msuubii el mo meduch el di kau el support er kau. A Kristiano el sechal el mla mukeroul a kirel sebechel support er ngii me a delengcheklel. (Monguiu er a 1 Timothy 5:8.) Ngar er a bebil beluu e a remekekerei el odam a locha suub a ileakl el duch er a demerir me a lechub e ngta er a chederir. E ngar er a kuk bebil er a beluu e a kekerei el odam a locha mo suubii a ileakl el duch me a lechub e ngureor er a high school. Me nguaisei el klou a ultutelel omsubii a ileakl el tekoi el mo ngosukau el metik a ureor. (Rel. 18:​2, 3; 20:34; Efe. 4:28) Bo le ngar ngii a chisem el chad er a ureor e dirrek el chad el mechelii a tekoi e rokir. Omoruul el uaisei e ngmo sebechem el metik er a urerem e diak moridii. Aika el blekeradel me a duch el bla desaod a dirrek el meklou a ultutelel el kirel a Kristiano el sechal me bo el sebechel kutmokl aike el locha mo ngerechelel er a ngar medal. Ka me dosaod a bebil er ngii.

14. Ngmekera kekerei el odam a longetmokl er ngii el mo mesiou el mui el taem?

¹⁴ Mui el taem el mesiou. Te betok er a Rekristiano el sechal el mla mukeroul ulemuchel el mesiou er a Jehovah el mui el taem er a ledirk mekekerei. A kekerei el odam sel bo le pioneer e ngngosuir el mo meduch lobengterir a rekakerous el chad. Ngdirrek el ngngosuir el mo meduch el ousbech a udoud el longereker. (Fil. 4:​11-13, NW) Ungil rolel e a odam omuchel er a mui el taem el omesiou a auxiliary pioneer. A rebetok omuchel el auxiliary pioneer el telkib el taem e tia ngosuterir el mo regular pioneer. Sel bo de pioneer e ngdirrek el mekengii a rael el mora lmuut el bebil er a omesiou el mui el taem el ua mui el taem el lolengeseu lomekedechor me a lechub e ngmora Bethel.

15-16. Ngmekera sebechel a kekerei el odam el qualify el mo mesiou er a ongdibel?

¹⁵ Ministerial servant me a lechub e ngta er a remechuodel. A Rekristiano el sechal a kirir el ngar ngii a turrekong er tir el mo mesiou er a rudam me a rudos er tir el ta er a remechuodel. A Biblia kmo a resechal el oureor el mo melai er tia el ngerachel a “osiik er a kot el ungil el ureor.” (1 Ti. 3:1) Uchei er a bo losiou a odam el ta er a remechuodel e ngkirel mo ta er a ministerial servant. A re ministerial servant olengeseu er a remechuodel er a betok el rolel. A remechuodel me a re ministerial servant a ngariou a rengrir el mesiou er a rudam me a rudos er tir e blak a rengrir el omerk er a klumech. A remekekerei el odam a sebechir el mo ministerial servant er a le dirk ngeasek. E a re ministerial servant a sebechir el mo mesiou ta er a remechuodel er a ledirk bo le lluich me a derengel a rekrir.

¹⁶ Ngmekera sebechem el qualify el mo ngmai aika el ngerachel? A Biblia ouchais a blekeradel el mousbech. Me nguaisei engdi ngkirem el diak mobes el kmo aika el blekeradel a mengai uchetemel er a Biblia me a dirrek el bltikerreng er kau el mora Jehovah, telungalek er kau, me a ongdibel. (1 Ti. 3:​1-13; Tit. 1:​6-9; 1 Pe. 5:​2, 3) Molasem el mo understand aike el kirem el meruul. E moluluuch el mora Jehovah lolengit er ngii me lengesukau el remuul aike el kirem el mo qualify. c

17. Ngmekera kekerei el odam e sebechel mengetmokl er ngii el mo bechiil el sechal e bdelul a telungalek? (Dirrek el momes er a siasing.)

¹⁷ Bechiil el sechal e bdelul a telungalek. A Jesus a dilu el kmo a rebebil el odam el Kristiano el mla mukeroul a locha mo melilt el di mesobil. (Mt. 19:12) Me nguaisei a lsekum ke  melilt el mo bechiil e ke mo ngmai a ngerachel el bechiil el sechal e bdelul a telungalek. (1 Ko. 11:3) A Jehovah expect er a bechiil el sechal el mo betik a rengul er a bechil e omsa aike el lousbech er a bedengel, uldesuel me a rengul, me a klereng er ngii. (Efe. 5:​28, 29) Aike el blekeradel me a duch el dulsaod er tia el suobel el ua mo meduch lomtab a tekoi, oba omengull el bedul a redil, e sebeched lultuil er kau, a mo ngosukau el mo ungil bechiil el sechal. Ke mo kltmokl el meruul a ngerechelem el bechiil el sechal e bdelul a telungalek.

18. Ngmekera kekerei el odam e sebechel mengetmokl er ngii el mo chedam er a ta er a klebesei?

¹⁸ Chedam. Uriul er a bo bechiil e ke locha mo oungalek. Ngera sebechem el suub er a Jehovah el kirel a mo ungil chedam? Ngkmal betok. (Efe. 6:4) A Jehovah uluuchais er a Ngelekel er a Jesus el kmo ngbetik a rengul er ngii me ngii odeuir a rengul. (Mt. 3:17) A lsekum ke mo oungalek e bo blechoel lolterekokl a rengrir a rengelekem el kmo ngbetik a rengum er tir. Mblechoel el chemat er tir er aike el ungil tekoi el loruul. A rechedam loukerebai er a Jehovah ngosuterir a rengelekir el mo resechal me a redil el mla mukeroul el Kristiano. Ngsebechem el mengetmokl er kau el kirel a ngerechelem el chedam loeak omolecholt er a bltikerreng el mora rechedal a telungalek er kau me a ongdibel e momekerreu er tir e mouchais er tir el kmo ngbetik a rengum er tir e appreciate er tir. (Jn. 15:9) Tia mo ngosukau el kirel aike el ngerachel el bo mngai er a ngar medad el ua bechiil el sechal e chedam. Engdi chelechang e bo lsebechel a Jehovah, telungalek er kau, me a ongdibel el lousbech er kau.

19-20. Ngera mo ngosuterir a remekekerei el odam el mo Kristiano el sechal mla mukeroul? (Momes er a siasing er a medal tia el babier.)

¹⁹ Remekekerei el odam, ngdiak di el automatic a bom Kristiano el mla mukeroul. Ngkirem el oukerebai er a rungil el kerebai, suubii el mo meduch lomtab a tekoi, e suub a usbechall el duch, e mengetmokl er kau el kirel a ngerachel el bo mngai er a ngar medad.

²⁰ Ke locha mo feel er a klou el berraod sel molatk aike el kirem el meruul. Engdi ngkmal sebechem el kutmokl. Lak mobes el kmo a Jehovah a kmal soal lolengeseu er kau. (Isa. 41:​10, 13) Nguaisei a rudam me a rudos er kau er a ongdibel a dirrek el mo ngosukau. Sel bom ngike el chad el Jehovah soal obo muai ngii, e ngmo dmeu a rengum er a klengar er kau. Ngkmal betik a rengmam er kemiu el odam! A Jehovah lomekngeltengat er kemiu el loureor el mo Rekristiano el sechal el mla mukeroul.—Osi. 22:4.