1, 2. (a) Ngmekera bltikerreng me a klaumerang e dmak el tekoi? (b) Ngera el ker a bo dosaod?

 A DEMAD el Jehovah a mla tibir el mo omekngeltengat er a reblak a rengrir el mesiungel. Tiaikid a ta er a rolel e ngolecholt er a bltkil a rengul el bedulkid, me kid a betik a rengud er ngii e le ng “mle kot el oubltikerreng el mer kid.” (1 Jn. 4:19) Me sel lemukeroul a bltkil a rengud el mo er Ngii, e a klaumerang er kid a mengal mo mesisiich, me kid a mo ulterekokl a rengud el kmo, ngmo omekngeltengat er tirke el betik er a rengul.​—Monguiu er a Hebru 11:6.

² A Jehovah a ngike el uchul a sengk! E tiang a ta er a kot el klou a ultutelel el blekerdelel el meketeklii el kmo, ngua ngera blekerdelel el Dios. Me a klaumerang er kid a diak el sebechel el mecherrungel a lsekum, ngdiak doumerang er a tekoi el kmo ngmo mesterir a sengk tirke el mera el osiik er ngii. E ngera uchul? E le “chad el oumerang a kmal medengei a ikel tekoi el lolatk e mengiil.” (Heb. 11:1) A klaumerang a sel lulterekokl a rengud el kmo, a Dios a mo omekngeltengat er tirke el blak a rengrir el chedal. Engdi ngmekerang a omelatk el kirel a sengk e mo uchul a klungioled? Ngmilekera Jehovah er a lomekngeltengat er a  remesiungel er a irechar me chelechang? Me bo dosaod.

3. Ngera el telbiil a medung er a Malakai 3:10?

³ A Jehovah a mla tibir el mo omekngeltengat er a reblak a rengrir el mesiungel. Me ngomekedong er kid el mo msang aike el kot el ungil er kid, e mo oumerang el kmo ngmo omekngeltengat er kid. Ngdmu el kmo: “Ka molasem er ngak, e mesal kmo ng diak bo kbkais a mado er a eanged e kuiitel a klungiaol el ekor kemiu el olsesibes?” (Mal. 3:10) Me kede ochotii a omereng el saul er kid el kirel tia el tekoi sel dekengei er a okedongel a Jehovah el mo melasem er ngii.

4. Ngera me ngsebeched el oumerang er a telbilel a Jesus el ngar er a Mateus 6:33?

⁴ A Jesus a tilbir el mo er a redisaiplo er ngii el kmo, a lsekum te nguu a Renged el mo kot er a klengar er tir, e a Dios a mo olengeseu er tir. (Monguiu er a Mateus 6:33.) Ngmle sebechel el melekoi el uaisei, e le ngmle ungil medengei el kmo a telbilel a Dios a di blechoel el mo tmaut. (Isa. 55:11) Me kid me ngulterekokl a rengud el kmo, a lsekum kede mo mui el oumerang er a Jehovah, e ngmo lomelemii a telbilel el mei er kid el kmo: “Ng kmal diak bo kchitau ma ka bo kubes er kau.” (Heb. 13:5) Tia el telbilel a Jehovah a ngosukid el mo mui el oumerang a tekingel a Jesus el ngar er a Mateus 6:33.

5. Ngera me a nger er a Jesus el mo er a Petrus a kmal melisiich er kid?

⁵ A apostol el Petrus a mle ta el loker er a Jesus el kmo: “Mesang, aki mla chemoit a rokui el tekoi e oltirakl er kau. Ng ngera bo kimngai?” (Mt. 19:27) A Jesus a dimlak losmechokl er a Petrus el kirel a keril. Ngbai dilu er a redisaiplo er ngii el kmo, te mo mukngeltengat el kirel aike el tekoi el lechiloit. Me tirka el apostol me a relmuut el bebil el blak a  rengrir, a mo obengkel a Jesus el mengedereder el ngar er a eanged er a ngar medad el taem. Engdi a Jesus a dirrek el milsaod el kirel chelecha el taem el kmo, ngdirrek el dirk ngar er ngii a klengeltengat er a ledu el kmo: “Ngikel chiloit a blai ma lechub a re bebil er ngii el sechal ma redil ma lechub [e] ng demal ma delal, ma lechub e te ngelekel ma chetemel el ngak a uchul, a mo ngmai el 100 el chachisois er a ikel le chiloit e dirrek el mo nguu a diak a ulebengelel klengar.” (Mt. 19:29) Me tirke el rokui el oltirakl er a Jesus a mo er ngii a redemerir me a rederrir, me a rudam me a rudos er tir, me a rengelekir er a chelsel a ongdibel er chelecha el taem. Me ngdiak a ngii di el mekreos el klalo el sebechel el mo mekesiur aike el klengeltengat el dengai, sel denguu a Rengedel a Dios el mo kot er a klengar er kid.

6. Ngera me a Jehovah a tibir el mo omekngeltengat er a remesiungel?

⁶ A lmuut el ta er a klengeltengat el doba techall el mo nguu, a sel omeltked el kirel a lmuut el betok el klengeltengat er a ngar medad. (1 Ti. 4:8) A Jehovah a tibir el mo omekngeltengat er a reblak a rengrir el mesiungel, me a klemedengei er kid er tia el tekoi a ngosukid el mo outekangel sel bo dechelebangel a meringel el blekeradel. Me a mui el klaumerang er kid a uchul, me ngsebeched el melemolem el oumerang el kmo a Jehovah a “omesterir omeksullir tirkel osiik er ngii.”​—Heb. 11:6.

7. Ngera me a omeltked a di ua uak?

⁷ Ngar sel Cheldecheduch el Ngar er a Rois, e a Jesus a dilu el kmo: “Bo lungil e ledeu a rengmiu, ele klou el omeksulliu a kldmokl er a eanged el kiriu. A re profet el mle chad er uche er kemiu a dirrek el ble le ua ise er tir.” (Mt. 5:12) Me a rebebil el mesiungel a Dios a mo nguu a sengk el mo kiei er a eanged. E a rebebil a mo nguu a diak a ulebengelel klengar el ngar er a baradis el chutem. E tiang a dirrek el ta er a uchul me ngkirel el mo dmeu a rengud. (Psa. 37:11; Lk. 18:30) Me nguaisei, engdi ngkirel a omeltked el rokui el mo ua “uak” el “ultebechel el diak lolmesim.” (Heb. 6:17-20, BT) Me a ulterekokl el omeltked a meskid a klisiched el mo outekangel a meringel el blekeradel me ngdiak doberius el mo cheroid, el ua okul a diall el sebechel el mtebechelii me ngdi chelellakl el diak lemekesakl sel lebo er ngii a ses el eolt.

8. Ngmekera omeltked e kosadel a sebekreng er a rengud?

⁸ A omelatk el dobang a sebechel el ngosukid el kosadel a sebekreng er a rengud. A telbilel a Dios a sebechel el cholleklii a sebekreng, el di ua chilt el sebechel rullii a bedenged el mo meaiu. Me nguchul a ongelaod sel dodengei el kmo, a Jehovah a mo omekerreu er kid sel debsa rokui el berraod er a rengud. (Psa. 55:22) Me ngkmal ulterekokl a rengud el kmo, a Dios a “sebechel kudmokl a lmuut el kmal obdois el tekoi er a ikel sebeched el olengit.” (Efe. 3:20) Me a Jehovah a ngosukid el diak di el kirel aike el ‘dolengit,’ e ngdirrek el meskid a “lmuut el kmal obdois el tekoi”!

9. Ngmekera e mo ulterekokl a rengud el kmo, kede mo mukngeltengat er a Jehovah?

⁹ Kede ousbech er a cherrungel el klaumerang me a blekongesenges el mo er a Jehovah me bo lsebeched el mukngeltengat. A Moses a dilu er a rechad er a Israel el kmo: “A RUBAK el Dios er kemiu a mo omekngeltengat er kemiu er sel beluu el bo lomeskemiu . . . a lsekum kom morrenges a lolekoi a RUBAK el Dios er kemiu e mo blak a rengmiu el oltaut a ikel llechul el kumeskemiu er chelechal sils. A RUBAK el Dios er kemiu a mo omekngeltengat er kemiu el di ua sel le tilbir.” (Dut. 15:4-6) Me kau, ngulterekokl a rengum el kmo, a lsekum ngblak a rengum el mesiou er ngii e ngmo omekngeltengat er kau? A leuaisei, e ngkmal ungil a uchetemel a klaumerang er kau.

10, 11. A Jehovah, ngmilekera er a lomekngeltengat er a Josef?

¹⁰ A Biblia a milluches el mo uchul a klungioled. Ngar er a chelsel, e kede metik a betok el tekoi el ochotii a rolel e a Dios a ulemekngeltengat er a remesiungel er a irechar. (Rom 15:4) E a Josef a ta er a kmal ungil kerebai el kirel tiang. A kot, e a rubekul  a ulterur me ngmlo sibai. E a uriul, e a bechil a mastang er ngii a ultelecheklii me ngmlo kelebus er a Ekipten. Me sera lengar er a kelebus a Josef, e ngmlo cheroid er a Jehovah? Ngkmal dimlak! A Biblia a mesaod el kmo a Jehovah “a ulebengkel a Josef, e mle bekokuii el bedul ngii.” E dirrek el mesaod el kmo: A “RUBAK a ulebengkel e riruul a bek el tekoi el lurruul el di mlo ungil.” (Gen. 39:21, 23) Me a Josef a kmal mle klou a rengul el mengiil er a Dios el mo lmuut er aike el kmal mle meringel blekeradel el lechilarm er ngii.

¹¹ Me a betok el rak er a uriul, e a Farao a ultebedii a Josef er a kelebus, e rirellii ngika el ngariou a rengul chad el mo ongeru el merreder er a Ekipten. (Gen. 41:1, 37-43) Me sera lebo er ngii a reteru el ngelekel el sechal, e “ng milengklii a kot el ngelekel el Manase.” Ngdirrek el dilu el kmo, “A Dios a mla rullak el obes a rokui el ringelek ma telungalek er a demak el rokir.” E a uriul e ngmilengeklii a ongeru el ngelekel el sechal el Efraim, e dmu el kmo: “A Dios a milskak a re ngelekek el ngar a beluu er a chelebulek.” (Gen. 41:51, 52) Me a Jehovah a ulemekngeltengat er a Josef el blakerreng er ngii a uchul, e mlo sebechel el osobelterir a rechad er a Israel, me a Ekipten er a taem er a klou el bosech er a beluu. Me ngmle ungil medengei el kmo, a Jehovah a ngike el ulemekngeltengat er ngii e milsa omeksulel.​—Gen. 45:5-9.

12. Ngmilekera Jesus e melemolem el blak a rengul er sera lecharm?

¹² A Jesus Kristus a dirrek el millemolem el olengesenges er a Dios er a chelsel a betok el omelsemai, me a Jehovah a ulemekngeltengat er ngii. Ngera ngilsuir el mo melemolem el blak a rengul? Ngar er a Tekingel a Dios e ngmesaod el kmo: “Sel deurreng el dirk merael el mei a uchul me ng dimlak a belkul er ngii a rrengel a mo mad.” (Heb. 12:2) Me a Jesus a miltik er a deurreng er a loldanges er a ngklel a Dios. Tiang a mlo uchul, e ngiluu a kengei er a Demal e dirrek el ngilai a kmal betok el klengeltengat. A Biblia a dmu el kmo, “chelechang e ng mla mo nguu a kingellel er a kadikm er a kingellel a Dios.” Ngdirrek el mesaod el kmo: A “Dios a ulengesecheklii el mor sel kot el ngarbab el deruchall e milsa ngakl el kuk ngarbab er a rokui el ngakl.”​—Fil. 2:9.

13, 14. Ngua ngera uldesuel a Jehovah el kirel a tekoi el doruul el mo er ngii?

¹³ Ngsebechel el ulterekokl a rengud el kmo, a Jehovah a omes er a omesiunged el mo er ngii el kmal mekreos. Ngungil el medengei sel bo lerrau a rengud me a lechub e kede mo bekikl. Ngkmal lomekerreu er kid sel lsebek a rengud el kirel a urered me a lechub aike el lousbech a telungalek er kid. Ngdirrek el kmal ungil el medengei el kmo, ngdikea lsebeched el meruul aike el durruul er a uchei, e le ngsechered me a lechub e ngringelel a uldesued a uchul. Me ngkmal kirel el mo ulterekokl a rengud el kmo, ngomes er a blakerreng er kid el kmal mekreos, alta e ngbetok a mondai el dechelebangel.​—Monguiu er a Hebru 6:10, 11.

¹⁴ Lak mobes, a Jehovah a ngike el ‘Onger a nglunguuch.’ Me ngulterekokl a rengud el kmo sel doluluuch el mo er ngii e ngorrenges er kid. (Psa. 65:2) Ngika el “Chedam er a klechubechub e Dios el olengeseu a rokui el tekoi,” a mo meskid a rokui el dousbech me bo el sebeched el melemolem el kmeed er ngii. A lebebil er a taem e ngousbech er a rudam me a rudos er kid el olengeseu er kid. (2 Ko. 1:3) A Jehovah a kmal soal a dolecholt er a klechubechub el mo er a rebebil. “Ngikel bekokuii el mor a chebuul chad a rullii a Dios el mo belsel, ma Dios a mo omtechei a sulel el kirel omerellel.” (Osi. 19:17; Mt. 6:3, 4) Me sel debekururau e dolengeseu er a rudam er kid, e a Jehovah a mo omes aika el ungil el omerelled el ua doruul el mo er ngii. Me ngtibir el kmo, Ngii a mo omekngeltengat er kid.

15. Ke semeriar el omes el beduluchei el kirel a ngera el sengk? (Momes er a siasing er a uchelel a suobel.)

¹⁵ A rengellitel el Kristiano a oba omelatk el mo nguu a “krone ra llemalt,” el ngii a klengeltengat el mla er a Jesus. (2 Ti. 4:7, 8) Me nguaisei, engdi kau  a dirrek el kmal mekreos er a rengul a Dios alta e ke oba kuk ngodech el omelatk. A rebetok el miliol el “kuk bebil el sib” a kmal semeriar el mengiil er a klengeltengat el bo lolai er ngii el klengar er a baradis el chutem el mo cherechar. Ngar isei e te mo “ungilbesrir el kiei el ngar a beluu el ungil a rengrir er a cherrungel budech.”​—Jn. 10:16; Psa. 37:11.

16. Ngera el ongelaod a debetik er ngii er a 1 Johanes 3:19, 20?

¹⁶ A lebebil er a taem e kede mo omdasu el kmo, ngdirk ngesonges a omesiunged el mo er a Jehovah, me a lechub e kede mo melatk el kmo, a Jehovah locha diak ledeu a rengul er aika el kuruul el mo er ngii. Kede dirrek el locha mo melatk el kmo, ngdiak derredemelel a mo ngmai a ngii di el klengeltengat er Ngii. Engdi ngkmal diak el kired el lobes el kmo a “Dios a lmuut el chubechubchad er a rengud e medengei a rokui el tekoi.” (Monguiu er a 1 Johanes 3:19, 20.) Me sel dosiou er a Jehovah el klaumerang me a bltkil a rengud el mo er ngii a uchul, e ngmo ulterekokl a rengud el kmo, ngmo omekngeltengat er kid, alta kede mo omdasu el kmo aike el doruul el mo er ngii a diak a ultutelel.​—Mk. 12:41-44.

17. Ngera bebil el klengeltengat el doldeu a rengud er ngii er chelechang?

¹⁷ A Jehovah a omekngeltengat er a rechedal alta e te kiei er a uriul el sils er tia el beluulechad er a Satan. Ngkerekikl el meleketek a klemedengei er kid e meskid a budech, me kede mo chedal tia el telungalek er ngii el meliuekl er a beluulechad. (Isa. 54:13) Me ngdi ua letilbir a Jesus, a Jehovah a mo omekngeltengat er kid er chelechang el okiu a rudam me a rudos er kid el betik a rengrir er kid el meliuekl er a beluulechad el rokir. (Mk. 10:29, 30) Me tirke el mera el osiik er a Dios a mo budech a uldesuir, e dirrek el mo dmeu a rengrir.​—Fil. 4:4-7.

18, 19. Ngua ngera uldesuir a remesiungel a Jehovah el kirel aike el klengeltengat el bla lengai?

¹⁸ A remesiungel a Jehovah el meliuekl er a beluulechad a mla ngmai a betok el klengeltengat el mla er ngika el Demad. A Bianca el kiei er a Dois a kmo: “Ak mera el mereng a sulel a Jehovah el lolengeseu er ngak el kirel a sebekreng er ngak, e dirrek el di blechoel el obengkek er a bek el sils. A beluulechad a klou a uldikel er a chelsel, e dirrek el diak a omelatk er ngii. Engdi sel kuureor el obengkel a Jehovah, e ak mo melechesuar a ulekerreu er Ngii. Me sel kengei el chemoit a klisichek me a temek el mesiou er Ngii, e ngomekngeltengat er ngak.”

¹⁹ E a 70 a rekil el Paula a ngar er ngii a rektel el spina bifida, el telemellel a ulkel. Ngmesaod el kmo, a ringelel a ulkel a uchul me ngmeringel er ngii el ouedikel, engdi tiang a diak leterebengii er a omesiungel. Ngdmu el kmo: “Ak melasem a betok el rolel a domerk er a klumech el ua sel kuusbech a dengua me a lechub aike el bek el techall el sebechek el mengedecheduch er a rechad. Ngdirrek el di ngak el melisiich er a renguk loeak sel kuluches aike el bades me a tekoi el losaod aika el babilenged er a notebook, me ngmo sebechek el menguiu sel bo kuusbech a omelisiich. E ak kumekedong er tia el babilengek el ‘Babilengek el Uchul a Osebelek.’ Aike el tekoi el uchul a chelitechetul a rengud a di tedeb a lsekum kede ultaut a osenged er aike el telbilel a Jehovah. E Ngii a blechoel el olengeseu er kid er a chelsel a ngii di el blekeradel.” Me alta tekoi el mchelebangel er ngii a kuk ngodech er aike el lechelebangel er ngii a Bianca me a Paula, engdi ngsebechem el melatk er a rolel e a Jehovah a mla omekngeltengat er kau me a rechad el meliuekl er kau. Me ngmera el uchul a klou el deurreng, sel molatk aike el rolel e a Jehovah a omekngeltengat er kau er chelechang, me a ngar medam el klebesei!

20. Kede omes el beduluchei el kirel a ngera el tekoi, a lsekum ngblak a rengud el mesiou er a Jehovah?

²⁰ Lak mobes el kmo, a dmolech el nglunguchem a mo uchul a ‘klou el omeksullem.’ Me bo lulterekokl a rengum el kmo a lsekum ke “meruul a soal a Dios” e ke mo “ngmai a ikel le dilu er a telbilel.” (Heb. 10:35, 36) Mada, dolemolem el melisiich er a klaumerang er kid, e debo er a tkurrebab el sebeched el mesiou er a Jehovah. Seikid e ngmo ulterekokl a rengud el kmo, ngmo meskid a omeksulled!​—Monguiu er a Kolose 3:23, 24.