1, 2. Ngera me a rengellitel a kmal semeriar er a 8 el bliongel er a Rom?

 KE LOCHA mla ta el monguiu er a Rom 8:15-17 er sel taem er a Chedaol Belsoil el kirel a kodellel a Jesus. Aike el bades a mesaod er a rolel e a rengellitel el Kristiano a mo medengei el kmo, te oba omelatk el mo kiei er a eanged el mo cherechar. A Rom 8:1 a mesaod er a rengellitel el kmo, tirka “tirkel oltirakl er a Kristus.” Engdi tia el 8 el bliongel, ngdi melutk el kirir a rengellitel? Me a lechub e ngdirrek el sebechel el ngosuterir tirke el oba omelatk el mo kiei er a chutem el mo cherechar?

² A 8 el bliongel er a Rom a milluches el kirir a rengellitel. Ngmlo er tir a ‘reng’ me te ‘mengiil er a Dios el mo rodelterir el mo ngelekel e osebelii a cherrungel el klengar er tir.’ (Rom 8:23) Me a ngar medad el klebesei, e te mo ngelekel a Dios el ngar er a eanged. Ngulekiu a olubet el tenget e a Jehovah a uluusubes a kngterir, e chelechang e ngomes er tir el melemalt el chad, me ngomasech er tir el ngelekel.​—Rom 3:23-26; 4:25; 8:30.

3. Ngera me tirke el oba omelatk el mo kiei er a chutem a dirrek el semeriar er a 8 el bliongel er a Rom?

³ Me nguaisei, engdi ngar er a uchelel a babier er a Rom, e a  Paulus a milluches el kirel a chad el dimlak lengellitel, engdi ngar er a osengel a Jehovah e ngmle melemalt el chad. E ngikang a Abraham. Ngika el chad a kiliei er a betok el rak er uchei er a lemei a Jesus el mo tongetengii a klengar er ngii el mo olubet. (Monguiu er a Rom 4:20-22.) Me chelechang, e a Jehovah a sebechel el omes er tirke el blak a rengrir el Kristiano el oba omelatk el mo kiei er a chutem el mo cherechar el melemalt el chad. Te dirrek el sebechir el ngmai a klungiolir er a ulekrael el medung er a 8 el bliongel er a Rom.

4. Ngera kired el melatk er ngii, sel donguiu er a Rom 8:21?

⁴ Ngar er a Rom 8:21, e kede menguiu er a ulterekokl el uldesuel a Jehovah el kmo, ngmo er ngii a beches el beluulechad, e a rechad a mo mimokl er a belsel a klengit me a kodall. Tia el bades a mesaod el kmo, a rechad a mo dmeu a rengrir el mo soiseb er a “mededaes el klebkellir a re ngelekel a Dios.” Me kau, ngsebechem el mesekau el ngar er a chelsel a beches el beluulechad? Me bo dosaod a tekoi el kired el meruul me bo el sebeched el mo kiei er a chelsel a beches el beluulechad er a Dios.

5. Ngera el blekeradel a lulsaod er ngii a Paulus el ngar er a Rom 8:4-13?

⁵ Monguiu er a Rom 8:4-13. Ngar er a 8 el bliongel er a Rom, e a Paulus a milsaod el kirel a eru el rolel a klengar er a rechad el tirke el kiei el di oltirakl er a “klechad” er tir, me tirke el kiei el oltirakl er a ‘reng.’ Me a rebebil a mlo omdasu el kmo, a Paulus a milsaod el kirir tirke el Kristiano me a rediak el Kristiano. Engdi a Paulus a milluches el mo er a Rekristiano el tir a mle okedongall el “chedaol.” (Rom 1:7, BT) Me ngbelkul a kmo, tirke el kiliei el oltirakl er a “klechad” er tir, me tirke el kiliei el oltirakl er a ‘reng’ er a Dios a dul mle Kristiano. Me ngera mle klekakerous er tir?

6, 7. (a) Ngera bebil er a omesodel a “klechad” el ngar er a Biblia? (b) Ngmekerang a Rom 8:4-13 a lousbech er a tekoi el “klechad”?

⁶ A Biblia sel lousbech er a tekoi el “klechad” e ngsebechel el melutk el kirel a kakerous el tekoi. A lebebil e ngmesaod el kirel a bedengel a chad. (Rom 2:28; 1 Ko. 15:39, 50) Ngdirrek el sebechel el mesaod el kirel a deleuill er a telungalek. El ua tiang, a Biblia a  mesaod el kmo a Jesus a “mlechell el rsechel a David,” e a Paulus a ulemekedong er a rechad er a Judea el, “re chedak el kim tal rasech.”​—Rom 1:3; 9:3.

⁷ Me ngera mle belkul a tekingel a Paulus er sera losaod er tirke el kiei el “oltirakl er a di klechad er tir,” el ngar er a Rom 8:4-13? Me a bo debetik a nger er tiang e ngsebeched el lomes er a Rom 7:5. Ngmilluches el kmo: “Ele ser a dirk doltirakl er a di klechad er a klengar er kid, e a ngibes er a klengit el okiu a Llach el me duubech, a uluuedikel er a bedenged.” Me a tekingel a smodii el kmo, a rechad el kiei el di oltirakl er a “klechad” er tir a di melatk a sorir, e di oltirakl a ngelbesel a rengrir, e di melemolem a rengrir.

8. Ngera me a Paulus a milengelechel er a rengellitel el Kristiano el kirel a klengar el di oltirakl er a “klechad”?

⁸ Ngera me a Paulus a milengelechel er a rengellitel el Kristiano el kirel a klengar el di oltirakl er a “klechad”? Ngera me a rokui el Kristiano er chelecha el taem a ousbech er tia el omengelechel? E le ngsebechel a blak a rengul el mesiungel a Dios el ngmai a soal el tekoi el mo meklou a ultutelel er a klengar er ngii. El ua tiang, a Paulus a milluches el kmo, a rebebil el rudam er a Rom a di mle “mechesang el omdasu a kelir.” Ngmle sebechel a belkul a tekingel el mesaod a tekoi er a durs me a kall me a bebil el tekoi el mle meklou a ultutelel er a klengar er tir. (Rom 16:17, 18; Fil. 3:18, 19; Jud. 4, 8, 12) E dirrek el mla er ngii a ta el taem, e ngmla er ngii a tekoi el dilubech er a ongdibel er a rechad er a Korinth, el ta er a odam a mlo er a laokreng el “obengkel a bechil a demal.” (1 Ko. 5:1) Me ngkmal bleketakl el kmo, a rekot el Kristiano a uluusbech a omengelechel er a Paulus el kirel a dekiei el di oltirakl er a “klechad.”​—Rom 8:5, 6.

9. Ngera el tekoi a diak el losaod er ngii a Rom 8:6?

⁹ Tia el omengelechel a dirrek el ngar er ngii a belkul er chelecha el taem. Ngmo lmuut er a chad el mla mesiou er a Jehovah el betok el rak me ngsebechel el omuchel a klengar er ngii el mo oltirakl er a “klechad.” Me a tekingel a Paulus ngmle belkul a kmo, ngkmal diak el kired el di omdasu a tekoi el ua kall me a ureor me a omilil me a dirrek el tekoi er a ultoir? Ngdiak el uaisei, e le aika el tekoi a blekerdelel a klengar er a bek el sils. A Jesus a dirrek el uleldeu er a rengul er a  kall e ulemeka er a rebebil. Ngdirrek el mlo melechesuar el kmo ngkirel el olengull. E a Paulus a milluches el kmo, a tekoi er a durs a kmal klou a ultutelel er a chelsel a chebechiil.

10. Ngera belkul a tekoi el “lomesiur a rengud”?

¹⁰ Ngera mle belkul a tekingel a Paulus el kirel a tekoi el “lomesiur a rengud”? A tekoi er a Grik el luluusbech er ngii a Paulus a melutk el kirel a doturk a rokui el uldesued me a telbiled er a tekoi. A ta er a mellomes a rengul el chad a silodii el kmo, tiang a melutk el kirir tirke el chad el “kmal semeriar er a tekoi e di blechoel el mesaod er ngii,” e dirrek el di melatk aike el sorir. Te mechei aike el sorir el tekoi me ngmo mengedereder a klengar er tir.

11. Ngera bebil el tekoi el sebechel el kmal mo meklou a ultutelel er kid?

¹¹ A Rekristiano er a Rom a mle kirir el merriter er tir el kmo, ngera el tekoi a omesiul a rengrir? Ngtekoi er a “klechad”? Chelecha el taem, e ngdirrek el kired el melatk aike el lmuut el meklou a ultutelel el tekoi el kired. Kede semeriar el mesaod a ngerang? Ngkmal soad el mekerang? A rebebil a locha mo mtebengii el kmo, te blechoel el melatk a mo mengarm a kakerous el bedengel a bilong e omesiich a blirir e omechar a beches el bail e mengudel a ududir, e dirrek el melatk a melai a ulengellir e mo er a omerael. Aikang a diak el mekngit e le ngblekerdelel a klengar er a bek el sils. El ua tiang, a Jesus a mirruul a bilong er a merengel a chebechiil, e a Paulus a millekoi er a Timothy me ‘lolim a sesei el bilong’ el kirel a klisichel a bedengel. (1 Ti. 5:23; Jn. 2:3-11) Engdi bilong a dimlak el klou a ultutelel el tekoi er a klengar er tir. E kid a kuk mekerang? Ngera sel klou a ultutelel el tekoi er a klengar er kid?

12, 13. Ngera uchul me ngkired el kerekikl el kirel aike el tekoi el dolatk?

¹² A Paulus a mengelechel el kmo: “A lomesiur a rengud a di klechad, e ng mekrolid el mor a kodall.” (Rom 8:6) Ngera mle belkul a tekingel? A lsekum kede kiei el oltirakl er a “klechad,” e ngsebeched el oridii a deleuill er kid me a Jehovah er chelechang, e dirrek el oridii a klengar er kid er a ngar medad el klebesei. Engdi tiang a diak el kirel el mo duubech. A chad a sebechel el obult. Ke dirk melatk er ngike el chad er a Korinth el mlo kirel el mesuld a ngklel, e le ngmlo er a laokreng? Ngulebult er a mekngit el omerellel e mlo diak el oltirakl er a ngelbesel a rengul. E liluut el mo mesiou er a Jehovah el oltirakl er a klikiid el rolel a klengar.​—2 Ko. 2:6-8.

¹³ Ngike el chad er a Korinth a mera el kiliei el di uleltirakl er a “klechad” er ngii, engdi ngmle sebechel el obult. Me a Kristiano el kiei er chelechang el di oltirakl er a ngelbesel a rengul e diak loltirakl a llechul a Jehovah, a dirrek el kmal sebechel el obult. Me sel deblechoel el melatk er a omengelechel el ledillii a Paulus, e ngmo ngsebeched el kongei el melodech a blekerdelel a klengar er kid.

14, 15. (a) Ngera el tekoi a lulengelechel er ngii a Paulus el kired el melatk er ngii? (b) A tekoi el ‘lomesiur a rengud a reng,’ ngdiak lebelkul a ngerang?

¹⁴ A Paulus er a uriul er a lesodii a mo telemellel a “lomesiur a rengud a di klechad,” e ngdilu el kmo: ‘A lomesiur a rengud a reng, e ng mekrolid el mor a klengar ma budech.’ Me ngmera el dmeu a rengud er tia el klengeltengat el sebeched el mo nguu!

¹⁵ A ‘lomesiur a rengud a reng’ a diak el belkul a kmo, a chad a diak a ngodech el tekoi el loruul e ngbai di kiei el di mesaod e di melatk el kirel a Jehovah me a Biblia. El ua tiang, a  remesiungel a Dios er a irechar a kiliei el di ua klengar er a rebek el chad. Te uleldeu a rengrir er a kall me a ilumel e mlo bechiil, e oungalek, e dirrek el uluureor.​—Mk. 6:3; 1 Th. 2:9.

16. Ngera mle kot el klou a ultutelel el tekoi er a klengar er a Paulus?

¹⁶ A Paulus me a rebebil er tirke el kot el Kristiano, a dimlak lebechei a tekoi er a bek el sils me bo el meklou a ultutelel er a klengar er tir. El ua tiang, kede medengei el kmo a omeruul el tento a mle uchul a kerrekerengel. Engdi tiang a dimlak el klou a ultutelel el tekoi er a klengar er ngii, e ngbai omesiungel el mo er a Dios a mle kot el ngaruchei el tekoi er a rengul. Ngmle blechoel el omerk er a klumech e olisechakl er a rechad. (Monguiu er a Rellir 18:2-4; 20:20, 21, 34, 35.) Me kid me ngdirrek el kired el mo ua rudam me a rudos er kid er a Rom el oukerebai er a Paulus.​—Rom 15:15, 16.

17. Ngera el klengeltengat a bo dengai a lsekum ‘ngomesiur a rengud a reng?’

¹⁷ Ngmo uangera klengar er kid a lsekum kede oba blakerreng el mesiou er a Jehovah? A Rom 8:6 a kmo: ‘A lomesiur a rengud a reng, e ng mekrolid el mor a klengar ma budech.’ Me a doruul er tiang, e nguldimukl er ngii sel debecherei a uldesued me lomekrael er ngii a chedaol reng er a Jehovah e dosuub el mo omdasu el uai Ngii. E a Jehovah a tibir el kmo, ngmo dmeu a rengud er a klengar er kid er chelechang, me a diak a ulebengelel el klengar er a ngar medad el klebesei.

18. Ngmekera e mo er ngii a budech a lsekum ‘ngomesiur a rengud a reng’?

¹⁸ Ngera mle belkul a tekingel a Paulus er a ledu el kmo a, ‘lomesiur a rengud a reng, e ng mekrolid el mor a . . . budech’? A rokui el chad a sorir a budech, el ileakl sel le budech a uldesued, engdi te di kesai el chad a sebechir el metik er ngii. Me kede kmal mereng a sulel a Jehovah e le ngii a uchul me ngsebechel el budech a uldesued. Ngdirrek el sebechel el ngar er ngii a budech er a delongeled kid me a rechad er a blid, me a dirrek tirke el ngar er a ongdibel. Kid el diak demecherrungel a uchul me ngmo er ngii a mondai er a delongeled kid me a rudam me a rudos er kid. Me sel leduubech tia el tekoi, e ngkired el mo oltirakl er a tekingel a Jesus el kmo: “Mereched el mo rullii a delongelem kau ma odam er kau.” (Mt. 5:24) E lak mobes, a rudam me a rudos er kau me te dirrek el mesiou er a Jehovah el “Dios, el uchul a budech.”​—Rom 15:33; 16:20.

19. Ngera el budech a sebeched el oldeu a rengud er ngii?

¹⁹ A lsekum e ‘ngomesiur a rengud a reng’ e ngdirrek el mo er ngii a budech er a delongeled kid me a Dios. A profet el Isaia a milluches el kmo: “Kau e [Jehovah] a msa ngikel bereked a rengul er kau a cherrungel el budech ele ng oumerang er kau.”​—Isa. 26:3; monguiu er a Rom 5:1.

20. Ngera me kede mereng a saul el kirel a uleklatk er a 8 el bliongel er a Rom?

²⁰ Kid el rokui a sebeched el ngmai a klungioled er a 8 el bliongel er a Rom, alta kede mo kiei er a eanged me a lechub a chutem el diak a ulebengelel. Kede kmal oba omereng el saul e le Biblia a melisiich er kid el mo blak a rengud el mesiou er a Jehovah er a bai di dolemolem a soad el tekoi. Kede medengei el kmo a lsekum e ‘ngomesiur a rengud a reng,’ e ngsebeched el mo nguu a mengasireng el omeksaul. A Paulus a milluches el kmo: “Sengk er a Dios, [el] diak a ulebengelel klengar el ngar a Kristus Jesus el Rubak er kid.”​—Rom 6:23.