1, 2. (a) Msodii a okesiu er a Jesus el kirel a chad el ngar er ngii a sersel er a bilong. (b) Ngmekera tia el cheldecheduch e smodii a belkul a klechubechub er a Dios?

 A CHAD el ngar er ngii a sersel er a bilong a ulemkokl er a ta el tutau el mo er a blil a makit, el mo osiik er a rechad el mo oureor el obengkel. Ngulechotii a klungel a udoud el bo lomesterir me te kilengei er ngii. Engdi ngika el chad a liluut el mo ousbech er a rebetok el chad er a ureor, me ngulemais el mo er a makit el betok el taem er isel sils el melai er a rechad el mo oureor. Ngdilu er tir el kmo, ngmo mesterir a ungilbesul a ildisel el udoud. Me sera lemereko ureor er a kebesesengei, e ngulemekedong er tir el rokui el mei e omdoud er tir. Me tirke el uluureor el ta el sils me tirke el di mle ta el sikang el loureor a di mle osisiu a ildisel a ududir. Me nguaisei, engdi tirke el uluureor el ta el sils a milengeremrum me ngika el ousers el chad a dilu er tir el kmo: “Kemiu a kilengei el mo mudoud er a chimol silber er a tal sils . . . ngak ng diak a llemeltek el mengedereder a ududek? Ma lechub e kau ke mechechei er ngak a kbekerurau?”​—Mt. 20:1-15.

² A cheldechedechal a Jesus a osisecheklid er a lmuut el klou a belkul  el tekoi el kirel a “krasia er a Dios.” ^[1] (Monguiu er a 2 Korinth 6:1.) El okiu a ngera el rolel? A rebebil a locha mo omdasu el kmo, tirke el uluureor el ta el sils a rredemelel a ngmai a betok el udoud er tirke el di mle tedobech el sils el oureor. Engdi ngike el ousers a ulechotii a klou el klechubechub er ngii el mo er tirke el di uluureor el tedobech el sils. Me a ta el chellimosk el chad a mesaod er a belkul a “krasia er a Dios” el ngar er a Biblia el kmo: “A belkul tia el tekoi a ua lolekoi el kmo a chad a ngiluu a sengk el ngii a dimlak lerredemelel a melai er ngii.”

3, 4. Ngera uchul me a Jehovah a ulechotii a klou el klechubechub er ngii el kirir a rokui el chad? E milekerang er a loruul er ngii?

³ A Biblia a mesaod er a krasia er a Dios el “ileakl el ulengesuil a Dios.” (Efe. 3:7) Me kid el diak el sebeched el mo cherrungel el olengesenges er a Jehovah a uchul, me ngdiak derredemelel a nguu tia el krasia er a Dios. Kede bai rredemelel a mo mad. Me a King el Salomon a dilu el kmo: “Ng meral diak a tal chad er a beluulchad el di ungil omerellel el diak a tal le mekngit er ngii.” (Oli. 7:20) E a uriul e a apostol el Paulus a dilu el kmo: “Ele rokui el chad a mlor a klengit me te mlo cheroid er a klebkellel a Dios” e dirrek el dilu el kmo, “ele omeksullel a klengit a kodall.”​—Rom 3:23; 6:23a.

⁴ A Jehovah a kot el betik a rengul er a rechad a uchul me ngulderechii a “di tal Ngelekel” el me mad el kired el rokui. Me tiang a olechotel a klou el klechubechub er ngii. (Jn. 3:16) A Paulus a dilu el kmo, “a Jesus el mlo tedeb el le kuk ngariou er a re anghel, me loeak krasia er a Dios e le mad el kirir a rokui el chad.” (Heb. 2:9) Nguaisei, a “diak el ocheraol el sengk er a Dios, a diak a ulebengelel klengar el ngar a Kristus Jesus el Rubak er kid.”​—Rom 6:23a.

5, 6. Ngera mo rsel a lsekum e ngmengedereder er kid a (a) klengit? (b) krasia er a Dios?

⁵ Me ngera uchul me kede mo er a klengit e mad? A Biblia a mesaod el kmo: “Ng oeak a kngtil a tal chad e a kodall a mlo omuchel el mengedereder.” Me kid el uldidellel a rsechel a Adam a uchul me ngdiak demecherrungel e dirrek el mo mad. (Rom 5:12, 14, 17) Me nguaisei, engdi kid a dirk ngar er ngii a llemelted el kongei el mo chederedall er a klengit me a lechub e ngdiak. Ngmekerang e mo uaisei? Sel dochotii a klaumerang er kid er a olubet el tengetengel a Kristus e ngmo sebeched el nguu a klungioled er a krasia er a Jehovah. A Biblia a mesaod el kmo: “E ngdi sel bo lobdois a klengit e a krasia er a Dios a lmuut el mengal mo obdois. Ma le ua isei el klengit a ulekiu a kodall el mengedereder a klengar er a re chad, e ng ua isei el krasia er a Dios a mengedereder el oeak a llemalt el omekrael er a re chad el mor a diak a ulebengelel klengar el okiu a Jesus Kristus el Rubak er kid.”​—Rom 5:20, 21.

⁶ Me alta e kede ngar er a klengit, engdi ngdiak debecherei me longedereder er kid. Me sel derellii a klengit e kede olengit er a Jehovah me ngousubes er kid. A Paulus a mengelechel er kid el kmo: “Ng diak le kirel a klengit el mengedereder er kemiu, ele ng dikea mngar el ngar eungel a llach e ko bai ngar eungel a krasia er a Dios.” (Rom 6:14) Me ngmekerang e mo sebeched el ngmai a klungioled er a klou el klechubechub er a Dios? A Paulus a dilu el kmo: “A Dios a ulechotii a klou el krasia er ngii . . . e dirrek el olisechakl er kid el mo imikr a blekerdelel a klechad el diak leko Dios, ma ngibeserreng er tial beluulchad, e mo kiei el ultebechel a rengud, e melemalt, e mengull er a Dios er tial beluulchad.”​—Tit. 2:11, 12.

7, 8. Ngera belkul a “bek el bedengel a grazia er a Dios”? (Momes er a siasing er a uchelel a suobel.)

⁷ A apostol el Petrus a milluches el kmo: “Kemiu a mla mo chemur a ngat el grazia, me ngkiriu lolab el kesiou, el ua ungil tebechelel a bek el  bedengel a grazia er a Dios.” (1 Pe. 4:10, BT) Me ngera belkul a krasia er a Dios el ua losaod er ngii el kmo, “bek el bedengel”? Tiang a belkul a kmo a Jehovah a mo meskid aike el tekoi el dousbech me bo el sebeched el outekangel a ngii di el meringel el tekoi er a klengar er kid. El belkul a kmo ngmo blechoel el ngosukid el outekangel a ngii di el omelsemai el bo dechelebangel.

⁸ A apostol el Johanes a milluches el kmo: “Ng okiu a klou el klechubechub er ngii e di blechoel el omekngeltengat er kid el rokui.” (Jn. 1:16) Me kede ngmai a betok el klengeltengat er a Jehovah el okiu a bek el bedengel a krasia er Ngii. Me ngera bebil er aika el klengeltengat?

9. Kede mekerang e ngmai a klungioled er a klou el klechubechub er a Jehovah? E mekerang a dochotii a omereng el saul er kid el kirel?

⁹ A Jehovah a ousubes a kngtid. A klou el klechubechub er a Jehovah a uchul me ngsebechel el ousubes a kngtid. Engdi ngmeruul er tia el tekoi a lsekum kede mera el obult er a klengit el durruul, e melemolem el diak deluut el meruul er ngii. (Monguiu er a 1 Johanes 1:8, 9.) A Paulus a silodii el mo er a rengellitel el Kristiano sel rolel e a Jehovah a ousubes a klengit er a ledu el kmo: “Ng mla osebelid er a klisichel a rengedel a ilkolk, e ngoikid el mor a rengedel a Ngelekel el betik er a rengul, el uchul osebeled, el melubet er kid er a klengit.” (Kol. 1:13, 14) Me kid el kmal oba omereng el saul el kirel tia el klechubechub er a Dios a uchul me ngsoad el oldanges er ngii. Me a Jehovah el kongei el ousubes a kngtid a uchul me ngmo sebeched el ngmai a betok el klengeltengat er ngii.

10. A krasia er a Dios, nguchul a ngera el deuil a rengud?

¹⁰ Ngkmal sebechel el mo er ngii a ungil deleuill er kid me a Dios. Kid el diak demecherrungel a uchul me kede di mechell el cherrouel a Dios. Me nguaisei, engdi a Paulus a dilu el kmo: “Ser a dirk de cherrouel a Dios e ng rirellii a delongeled kid me ngii el mo ungil el okiu a kodellel a Ngelekel.” (Rom 5:10) Me ngokiu a olubet el tenget e ngsebechel el mo er ngii a deleuill er kid me a Dios el belkul a kmo, ngmo budech a delongeled kid me Ngii e dirrek el mo sechelil. E a Paulus a milsaod er tia el krasia er a Jehovah er a longedecheduch er a rengellitel el odam er ngii el kmo: “Chelechal bla de muklemalt er medal a Dios ele kid el oumerang, e ng budech a delongeled kid ma Dios el oeak a Rubak er kid el Jesus Kristus. Ng kid el oumera er a Kristus a uchul, me ng milkrolid el mo medengelii a krasia er a Dios el de ngar ngii er chelechang.” (Rom 5:1, 2) Me ngkmal dmeu a rengud e le ngar er ngii a budech er a delongeled kid me a Jehovah!

11. Te mekerang a rengellitel e ngosuterir a ‘rekuk bebil el sib’ el mo melemalt a omerellir er medal a Dios?

¹¹ Ngsebechel el mo melemalt a omerelled er medal a Dios. A profet el Daniel a milluches el kmo, ngar er a taem er a ulebongel e “tirkel mellomes a rengrir” el tir a rengellitel a mo omekedong er a “re betok el chad el meruul a melemalt.” (Monguiu er a Daniel 12:3.) Me te mekerang a loruul er tiang a rengellitel? Te omerk er a klumech er a ungil chais e olisechakl er a rebetok el miliol el ‘rekuk bebil el sib’ el kirel a llechul a Jehovah. (Jn. 10:16) Te ngosuterir el mo medengelii a rolel a bo lemelemalt a omerellir er medal a Dios, el ngii a di ta el rolel e ngmo sebechir el nguu a klou el klechubechub er a Jehovah. A Paulus a milsaod er tia el tekoi el kmo: “E ngdi tir a muklemalt el oeak a krasia, e tia sengk er a Dios el okiu a Jesus Kristus el ngii a rulleterir el mo mimokl.”​—Rom 3:23, 24.

12. Ngmekerang a nglunguuch e mo uchul e kede nguu a krasia er a Dios?

¹² Ngsebeched el mo kmeed er a Dios el okiu a nglunguuch. Ngokiu a klou el klechubechub e ngmo sebeched el meluluuch el mo er a Jehovah. A Paulus a mesaod er a klechubechub er a Jehovah el kmo ng “kingall er a krasia” e Ngii a omekedong er kid el okiu a klaumerang er kid. (Heb. 4:16a) Me ngsebeched el meluluuch el mo er a Jehovah er a bek el taem el okiu a Jesus,  e tiang a kmal ileakl el techall el dobang! Me a Paulus a dilu el kmo: “Ng kid el chedal a Kristus e oumera er ngii a uchul me ng ngar ngii a blekenged el mor a medal a Dios el diak de bekikl.”​—Efe. 3:12.

13. Ngmekerang a krasia er a Dios e ngosukid er sel taem el “dousbech er ngii”?

¹³ Ngsebeched el nguu a ngeso er sel ungil temel. A Paulus a melisiich er kid el mo meluluuch el mo er a Jehovah sel dousbech a ngeso, “me bo de nguu er ngii a klechubechub e de betik er a krasia el mo ngosukid sel dousbech er ngii.” (Heb. 4:16b) Me sel bo dechelebangel a omelsemai me a ringel er a klengar e ngsebeched el olengit er a Jehovah me ngolengeseu er kid. Ngmo onger a nglunguched alta e ngdiak derredemelel a nguu a ngelsuil. Ngblechoel el ousbech er a rudam me a rudos er kid el mo ngosukid. Me a Jehovah a onger a nglunguched me “ng sebeched el oumerang e melekoi el kmo, ‘A Rubak a olengeseu er ngak me ng diak bo kmedakt. Ng ngera sebechel a chad el rullii el mer ngak?’”​—Heb. 13:6.

14. Ngmekerang a krasia er a Jehovah e mengelaod a rengud?

¹⁴ Ngsebeched el metik a ongelaod. Ngkmal klou el klengeltengat a lebeskid a Jehovah el oeak sel longelaod er kid er a taem el lemeringel a uldesued. (Psa. 51:17) Sel taem el Rekristiano er a Thesalonika a kmal chilarm er a odechelakl e a Paulus a milluches el mo er tir el kmo: “Ma Rubak er kid el Jesus Kristus ma Dios el Demad el mle betik a rengul er kid me ng uleak a krasia er ngii el meskid a klisichel a rengud ma ultebechel el omelatk, lukduch e lesisiich a rengmiu.” (2 Th. 2:16, 17) Me ngkmal mengelaod a rengud sel dodengei el kmo a Jehovah a kmal betik a rengul e omekerreu er kid el oeak a krasia er ngii!

15. Ngokiu a krasia er a Dios, e ngera el omelatk a dobang?

¹⁵ Me kid a oba omelatk el mo kiei el mo cherechar. Engdi kede dirk ngar er a klengit, me a lsekum ngdiak denguu a ngelsuil a Jehovah e ngmo diak a omeltked. (Monguiu er a Psalm 49:7, 8.) Engdi a Jehovah a mla meskid a kot el ungil el omelatk. E tiang ngerang? A Jesus a dilu  el kmo: “A Demak a soal a rokui el chad el mesa Ngalek e mo oumera er ngii me bo le nguu a diak a ulebengelel klengar.” (Jn. 6:40) Me ngokiu a krasia er a Jehovah e ngmo er ngii a omeltked el mo kiei el diak a ulebengelel. Me a Paulus a dilu el kmo: “A Dios a ulechotii a klou el krasia er ngii el mo uchul e bo lesobel a rokui el chad.”​—Tit. 2:11.

16. Te milekerang a rebebil el Kristiano er a irechar e otubii a krasia er a Dios?

¹⁶ Me ngokiu a krasia er a Jehovah e ngomekngeltengat er kid er a betok el ungil tekoi. Me nguaisei, engdi ngkmal diak el kired el ousbech er tia el krasia er ngii el mo uchul e kede mo er a klengit. Sel taem er a rekot el Kristiano, e te mla er ngii a rebebil er a delongelir el millasem el “omult er a krasia er a Dios el mo rolir er omeruul el delengerenger.” (Jud. 4) Tirka el dimlak leblak a rengrir el Kristiano a ulemdasu el kmo ngsebechir el meruul a klengit, e a Jehovah a di mo blechoel el ousubes er tir. Te dirrek el millasem el mengesuseu er a rebebil el odam er tir el mo obengterir el meruul a klengit. Me chelecha el taem e a ngii di el chad el meruul a chouaika el tekoi a “oltuub er a Reng er a krasia.”​—Heb. 10:29.

17. Ngera el mesisiich el uleklatk a ledillii a Petrus?

¹⁷ A Satan a mla mengeblad er a rebebil Kristiano er chelechang me te omdasu el kmo ngsebechir el meruul a klengit e a Jehovah a di ousubes er tir. Ngmera el tekoi, a Jehovah a kongei el ousubes er a chad el mo er a klengit a lsekum ngouuchel er a rengul e obult er a mekngit el omerellel. Me nguaisei, engdi ngdirrek el mengerechir er kid el mo omtok aika el mekngit el urunguled. Me a Jehovah a ulemekrael er a Petrus el mo meluches el kmo: “Ngdi, kemiu el betik er a renguk, a cho modengei el ua isei, e bo le blak a rengmiu el mengkar er kemiu, me lak kom motuchakl er a cheleuid el osisecheklir a re diak le llechuul chad e moriid a tebechelel a rengmiu. Bai molemolem el mukeroul er a krasia ma klemedengei er kemiu er a Rubak er kid e Osobel el Jesus Kristus.”​—2 Pe. 3:17, 18.

18. Ngokiu a klou el klechubechub er a Jehovah, e ngera el ngerachel a mla moterekokl er kid?

¹⁸ Me kede kmal oba omereng el saul el kirel tia el klou el klechubechub er a Jehovah. Me bo dungil el ousbech a sengk el lomeskid el mengebkall er Ngii e dolengeseu er a rechad, e le kede belsel a Jehovah me a rechad. Me ngmekerang a dousbech aika el sengk er kid? A Paulus a dilu el kmo: “Kede olab a kakerous el sengk el de ngilai el oeak a krasia er a Dios, . . . ma lsekum ng kuk kirel omesiou, e ng kired el mesiou; ma le kirel osisechakl, e ng kired el olisechakl. Ma lsekum ng kuk kirel olisichel a reng, e ng kired el melisiich a rengrir a re chad . . . me ngikel kuk meruul a klechubechubchad, le rellii a medal el mo ungil.” (Rom 12:6-8) Me ngokiu a klou el klechubechub er a Jehovah, e ngmla moterekokl er kid a ngerachel el kirel el mo blak a rengud el meruul er a omesiunged el olisechakl er a rechad el kirel a Biblia, e melisiich er a rudam me a rudos er kid, e dirrek el ousubes er tirke el tomellii a rengud.

19. Ngera el ngerachel el mla moterekokl er kid a bo dosaod er ngii er a ongingil el suobel?

¹⁹ Me kid el mla mukngeltengat el okiu a klou el klechubechub er a Jehovah a kmal kired el mo er a tkurrebab el sebeched el omerk er a “Ebangkelio el kirel a krasia er a Dios.” (Rel. 20:24) Me a ongingil el suobel e kede mo mesaod el kirel tia el ngerachel el mla moterekokl er kid.