A Biblia a mle sebechel el meketmokl, el uchul me chelechang e ngsebechem el mo ouklalo er ngii e menguiu er ngii. Me sel mngiltii a ungil a oidel el Biblia, e ngsebechel el mo ulterekokl a rengum el kmo ke menguiu er a babier el mloiuid el oltirakl er sel dimla omelechesel. * Engdi ngera uchul me a Biblia a mle sebechel el meketmokl me ngdiak lemetemall, e bo lemechut, e lengemed, e lemecheuid a klumech er a chelsel, e melemolem el ngar er ngii el me lmuut er chelechang? Ngera uchul me tiang a kmal ileakl el babier?

A rebetok el mesuub er a Biblia a mla mo ulterekokl a uldesuir el ua uldesuel a apostol el Paulus el milluches el kmo: “Ele chedaol Llechukl el rokui a melluches luleak a Reng ra Dios.” (2 Timothy 3:16, BT) Te oumerang el kmo a Biblia a mle sebechel meketmokl e le ngileakl el Tekingel a Dios me a Dios a ulemekerreu er ngii el me lmuut er chelechang. A Faizal el dulsaod er ngii er a uchelel tia el suobel a di mle ngii el mo merriter e mesuub er a Biblia. Me a tekoi el lesiluub a kmal chilsir a rengul. Ngmlo medengei el kmo a Biblia a diak losaod a betok el tekoi el loumerang a klsuul el Klekristiano. Ngdirrek el kmal mlo dmeu a rengul er a bo lodengelii a moktek er a Dios el kirel tia el beluulechad el losaod er ngii a Tekingel el Biblia.

A Faizal a dirrek el dilu el kmo: “Ngkmal ulterekokl a renguk el kmo tia el Biblia a mera el sengk er a Dios. E le lsekum a Dios a mle sebechel el mebii a melidiul me a chutem, e omomdasu e ngdiak el sebechel el rullii a babilengel e longetmokl er ngii el kired? A lsekum kede omdasu el kmo ngdiak el uaisei, e ngbelkul a kmo a Dios a di telkael a klisichel el belkul a kmo ngii a diak el Ngike el Kot el Mesisiich el Dios! E ngak ak techang me ak meluk er a klisichel a Dios?”​—Isaia 40:8.