A Blekeradel el Kuk Mekreos er a Diamond
A rechad a omes a diamond el kmal mekreos, e a bebil er ngii a kmal meringel a cheral. Engdi a ker a kmo, ngar er ngii a kuk ta er a tekoi el Dios a omes er ngii el kmal mekreos, el kuk ngaruchei er a diamond me a lmuut el bebil er a mekreos el bad?
A Haykanush el ta er a dirkak lemetecholb el publisher er a beluu er a Armenia, a miltik er a passport er a chad er bita er a blil, el mla er ngii a bebil el debit card me a kmal betok el udoud er a chelsel. Me ngulechotii er a bechil el ngii a dirrek el dirkak lemetecholb.
Tirka el obekel a mla er ngii a mondai er tir el kirel a udoud e le te mle blals. Engdi te bai kilengei el ngmai aika el udoud el mo er ngike el chad el ouklalo er tia el passport. Me ngkmal mlo imis el mechas a rengul ngika el chad me a telungalek er ngii. Me a Haykanush me a bechil a silodii el mo er tir el kmo ngmelemalt a omerellir el omesubir er a Biblia a uchul. Me te uluusbech er tia el techall e ouchais er tir el kirir a Resioning er a Jehovah, e dirrek el milsterir a bebil el babier.
Me tirka el telungalek a millasem el omsang a Haykanush a udoud el omeksullir engdi ngdimlak lekengei el melai. Me a bo lekukuk e a bechil ngike el chad el ririid a passport er ngii, a mlo oldingel er a Haykanush me a bechil e ulerrimel er tir me lekengei el nguu a diamond el kebkab el lomesterir, el olechotel a omereng el saul er tir.
Te betok a rechad el ua tirka el telungalek el mo mechas a rengrir er a melemalt el omeruul el ua omerellel a Haykanush me a bechil. Engdi a Jehovah, ngmlo mechas a rengul? Ngua ngera uldesuel el kirel a melemalt el omerellir? Tia el omerellir ngmlo er ngii a ultutelel?
A BLEKERADEL EL KUK MEKREOS ER A KLALO
Ngkmal beot a nger er aika el ker. E ngera uchul? E le remesiungel a Dios a ungil medengei el kmo sel loukerebai a blekerdelel a Jehovah e te lmuut el mo mekreos er osengel el kuk mekreos er a diamond me a kolt me a dirrek el klalo. Nguaisei, a osengel a Jehovah el kirel a mekreos el klalo a kuk ngodech er a osengir a rechad. (Isa. 55:8, 9) Me a remesiungel a medengei el kmo a blakerreng er tir el oukerebai a blekerdelel a Jehovah a kmal mekreos el tekoi.
Me ngsebeched el mesang a klungel a ultutelel a llomeserreng me a sekutaberreng el ngar er a Biblia. A Osisechakl 3:13-15 a kmo: “Ngeltengat ngikel chad el mo mellomes a rengul, el ngikel nguu a sekutaberreng. A sekutaberreng a kuk bai klou a ultutelel er kau er a silber ma kolt. A llomeserreng a kuk klou a ultutelel er a ngisel a chesiuch; ng diak a ngeral mo soam el sebechel el mekesiur.” Me ngkmal bleketakl el kmo a Jehovah a dmeu a rengul er chouaika el blekeradel el kuk ngaruchei er a ngii di el mekreos el klalo.
E ngerang a melemalt el omeruul?
A Jehovah a melemalt a omerellel, e le ng “Dios el diak lomulak.” (Tit. 1:2) Ngulemekrael er a apostol el Paulus me ngmeluches el mo er a Rekristiano el chad er a Hebru er a irechar el kmo: “Moluluuch el kiram. Aki kmal medengei el kmo ng diak a metacherbesul el ngar a rengmam, ele ng somam el di blechoel el meruul a ungil.”—Heb. 13:18.
A Jesus Kristus a ulechotii a kot el ungil kerebai el kirel a melemalt el omeruul. Sera ledu er ngii a Ngarbab el Prist el Kaifas el kmo: “Chelechang e a kuba ngklel a di ngar el Dios me ke mo melekoi a klemerang. Mouchais er kemam a lsekum ke Mesias el Ngelekel a Dios.” Me a Jesus a di mle bleketakl el ouchais el kmo ngii a Mesias. Nguluuchais a klemerang alta ngmle medengei el kmo tia el olbiil el rokir a mo otelecheklii el kmo ngoltuub er a Dios el mo uchul a kodellel.—Mt. 26:63-67.
E kid a kuk mekerang? A lsekum ke mo chelebangel er a blekeradel el mo kirem el mart a bebil el tekoi er a chad me a lechub e ke ngmodech a bebil er a omesodel a tekoi, e ke mo mekerang? Ke melemolem el meruul a llemalt?
A OMELSEMAI EL KIREL A MELEMALT EL OMERUUL
Ngsebechel el mo meringel er kid el meruul a llemalt er chelecha el taem er a uriul sils el “re 2 Ti. 3:2) Me sel lebo er ngii a telemellel a keizai me a lechub e bo lemeringel er a rechad el metik a urerir, e ngmo beot er a rebetok el omulak e merechorech me a lechub e te meruul a diak lemelemalt el tekoi. E tia el uldasu a kmal klou er chelechang el uchul me a rechad a omdasu el kmo ngmo uchul a klungiolir a lsekum te mengeblad. A rebebil el Kristiano a mlo mekngit el melilt a tekoi el rulleterir me te mlo “ngemokel a rengrir er a udoud” e mla tomellii a ungil chisir er a chelsel a ongdibel.—1 Ti. 3:8; Tit. 1:7.
chad a di mo omdasu er a di tir, e di sorir a udoud.” (A ruumesingd el Kristiano a bai oukerebai er a Jesus me te melemolem el meruul a llemalt er a bek el taem. Te ungil medengei el kmo a olechotel a blekeradel el ua blekerdelel a Dios a lmuut el klou a ultutelel er a ngii di el kerruul me a klungiaol. Tiaikid a uchul me a remekekerei el Kristiano a diak el cheat er a skuul el di melasem el mo ungil a teng er tir. (Osi. 20:23) A melemalt el omerelled a diak el belkul a kmo ngmo bek el taem el denguu a omeksuled el kirel, el ua tekoi el dilubech el mo er a Haykanush. Me nguaisei, engdi a Dios a kmo ngmelemalt el tekoi a bo deblechoel el meruul a llemalt, e le ngrullid me ngklikiid a ukltked el ngii a tekoi el diak lemochar.
A omerellel a Gagik a kmal ungil el olechotel tia el tekoi. Ngdmu el kmo: “A uchei er a bok Kristiano, e ak uluureor er a ta el klou el kombalii el merreder er ngii a ulumulak sel loruul a tax report er ngii me ngdi harau er a kekerei el udoud. E a urerek a mle managing director, me ngmle soal a bo kungeluch er ngike el chad el melai a tax e krellii a ‘telbiil’ el obengkel me bo lak louchais a blulak el loruul tia el kombalii. Me tiang a mlo uchul me ngkmal miltemall a chisek. Me sera bo kudengelii a klemerang e ngmlo diak kengei el meruul er tia el tekoi, alta ngkmal mle ungil a ududek. Me ak tilobed er tia el kombalii e mlo rullii a siobai er ngak, me ngar er a uchelel a urerek e ak mlo register er a kombalii er ngak, e harau a rokui el tax er ngak.”—2 Ko. 8:21.
A Gagik a dirrek el dilu el kmo: “A ildisel a ududek er tia beches el urerek a di tedobech er sel kulsuk er ngii er a uchei, me ngmle meringel er ngak el mesiou er a telungalek er ngak. Engdi chelechang e ngdmeu a renguk e le ngklikiid a ukltkek er medal a Jehovah. Me a omerellek a ungil kerebai el kirir a reteru el ngelekek el sechal, me ngak a mla mo er ngii a ngerechelek er a chelsel a ongdibel. E tirke el chad er a tax me a redi chad el kuusiobai lobengterir er chelechang, a omes er ngak el melemalt el chad.”
A JEHOVAH A NGOSUKID
A Jehovah a kmal betik a rengul er tirke el uchul a odanges el mo er ngii, e le te oukerebai a kot el ungil el blekerdelel, el uldimukl er a melemalt el omeruul. (Tit. 2:10) Ngtibir el kmo ngmo ngosukid a lsekum ngmelemalt a omerelled. Ngulemekrael er a King el David el mo melekoi el kmo: “Ngak a dikea kbuik ele kchudelal chad, ngdi kmal dirkak kisa tal ungil chad el mechoit er a RUBAK, ma lechub e a re ngelekel di lolengetngit a kall.”—Psa. 37:25.
A tekoi el dilubech el mo er a blak a rengul el Ruth a dirrek el olechotel tia el tekoi. Ngmillemolem el blak a rengul el mo er a Naomi el delal a bechil, e dimlak lechitii er a lechudelang. Ngmillukl el mo kiei er a beluu er a Israel me bo el sebechel el mengull er a mera el Dios. (Rut. 1:16, 17) Ngmle melemalt a omerellel e mle meduch a rengul el oureor el mengudel a redechel a wheat, el oltirakl er a Llach el mileketmokl el kirir a remechebuul. Me a Jehovah a dimlak a ta el lechitii ngii me a Naomi, el ua tekoi el dilubech el mo er a David er a uriul. A Jehovah a dirrek el riruul a betok el tekoi el mo er a Ruth el diak di el ike el lousbech er a klechad e lemerekong. Ngdirrek el ngileltii el mo ta er a chedal a klengelakel er a King el David me ngike el telbiil el Mesias!—Rut 4:13-17; Mt. 1:5, 16.
Ngsebechel el mo meringel er a rebebil el mesiungel a Jehovah el korker a ungil el ildisel a udoud el kirel aike el lousbech. Me nguaisei, engdi te meduch a rengrir e blak a rengrir el oureor, e diak lekengei el mengeblad. Me sel loruul el uaisei, e te bai olecholt aike el ungil blekerdelel a Dios el uldimukl er a melemalt el omeruul, el ngii a lmuut el mekreos er a ngii di el klalo.—Me a Rekristiano el meliuekl er a beluulechad a di ua omerellel a Ruth el ochotii el kmo te oumerang er a klisichel a Jehovah el lolengeseu er tir. Me te mui el oumerang er Ngike el tilbir el kmo: “Ng kmal diak bo kchitau ma ka bo kubes er kau.” (Heb. 13:5) Ngmla mo betok el taem el Jehovah a ochotii el kmo ngsebechel e kongei el ngosuterir a remelemalt a omerellir el chad. Me ngmelemolem el oltaut er tia el telbilel el omesterir a remesiungel aike el lousbech er a bek el sils.—Mt. 6:33.
Me a rechad a locha mo omes a diamond me a lmuut el bebil er a klalo el mekreos. Engdi kid a ulterekokl a rengud el kmo a Demad el ngar er a eanged a omes er a melemalt el omerelled me a lmuut el bebil el ungil el blekerdeled, el kuk mekreos er a ngii di el mekreos el bad!
Sel lemelemalt a omerelled e ngmo uchul a klikiid el ukltked, e dirrek el diak demerur el meruul er a omesiunged