1, 2. Ngera me a Dios a mle “betik a rengul” er a Daniel? E kede mekerang e mo bekongesenges el ua Daniel?

 SERA lemengai a rechad er a Judea el mo blebaol er a Babilon, e te mlo soiseb er a beluu el mui er a bleob el chelid me a rechad el mengull er a remekngit el anghel. Me nguaisei, engdi a rebebil el blak a rengrir el ua Daniel me tirke el tedei el sechelil a dimlak lekengei el mechetikaik er a omerellir a rechad er tia el beluu. (Dan. 1:6, 8, 12; 3:16-18) Ngii me tirka el tedei el sechelil a kilengei er a Jehovah el mo ua ngike el Ulemeob er tir e millemolem el mengull er Ngii, el di ngii el tang. Me alta e a Daniel a kiliei el iliuekl er a kmal mekngit el blekeradel er a klengar, engdi a anghel er a Dios a milsaod er ngii el kmo, a Dios “a betik a rengul” er ngii.​—Dan. 10:11, 19.

² Sel taem er a Biblia, e a chad el omeob a chutem a metir a chutem el lotungii er a kata el soal. E chelechang e a remera el mengull er a Dios a medengei el kmo ngdi ta el Jehovah a ngike el Mengedereder er a eanged me a chutem e ngar er ngii a klisichel el mesmechokl a rokui el beluu. (Monguiu er a Jeremia 18:6.) Ngdirrek el ngar er ngii a klisichel el mesmechokl er a derta er kid. Me nguaisei, engdi a Jehovah a kmal diak lorrimel er a ngii di el chad el mo melodech a blekerdelel. Ngbai soal a di lekid el kongei er ngii me losmechokl er kid. Me ngar tia el suobel e kede mo suubii a rolel e ngsebeched el melemolem el ua medemedemek  el chutem el ngar er a chimal a Dios. Me kede mo mesaod a edei el ker el: (1) Kede mekerang e oridid er a tekoi el sebechel rullid el mo medecherecher a rengud e mo oltngakl a ulekrael er a Dios? (2) Kede mekerang e mekeroul a blekeradel el ngosukid el melemolem el olengesenges er a Dios, e mo ua medemedemek el chutem? (3) Te mekerang a ruungalek el Kristiano e olengesenges er a Dios sel losmechokl er a rengelekir?

3. Ngera el tekoi a sebechel rullid el mo medecherecher a rengud? Mosaod.

³ A Osisechakl 4:23 a kmo: “Bo mkerekikl er a uldesuem, ele uldesuem a omtebechel er a klengar er kau.” Me a lsoad el melemolem el medemedemek a rengud e ngkmal kired el mengeroid er kid er a blekeradel el ua kldidairreng me a mekngit el omeruul me a bleot el reng. A lsekum ngdiak dekerekikl e aika el tekoi a sebechel rullid el mo diak dolengesenges er a Dios e mo omtok er ngii. (Dan. 5:1, 20; Heb. 3:13, 18, 19) Tia el omeruul a dilubech el mo er a King el Usia er a beluu er a Juda. (Monguiu er a 2 Kronika 26:3-5, 16-21.) A uchei e ngika el Usia a ullengesenges er a Dios e mle ungil a deleuill er ngii el obengkel, me a Dios a milsa klisichel. Engdi “ser a loleketek a klisichel a Usia e ng mlo kedidai a rengul.” Ngkmal mlo imis el kedidai a rengul me ngmillasem el mo melul a ochod er a templo, e tia el omeruul a di kirir a reprist el meruul er ngii. Me sera lolasem a reprist el mesmechokl er ngii e ngkmal ngilasech a rengul! Me a Jehovah a milelsii ngika el kedidai a rengul el king me ngmlo chebedes el mo lmuut er a kodellel.​—Osi. 16:18.

4, 5. Ngera mo duubech a lsekum ngmo kedidai a rengud? Ka msodii.

⁴ A lsekum kede melemolem er a kldidiul a rengud, e ngsebeched el mo omdasu el kmo kede kuk ungil er a rebebil e mo oltngakl a uleklatk el dengai lokiu a Biblia. (Rom 12:3; Osi. 29:1) Tia el omeruul a dilubech el mo er a ta er a remechuodel el Jim. Ngdimlak lekengei er a uldesuir a rebebil el mechuodel er a ongdibel el kirel a tekoi el dilubech. Ngdmu el kmo, “Ak dilu er a rudam el kmo tia el omeruul a diak lolechotel a bltikerreng, e tilobed el merael er a temel tia el miting er a remechuodel.” Elolem el buil er a uriul e ngmillukl el mo er a ta er a ongdibel, engdi ngdimlak lemengilt el mo ta er a remechuodel er isei. Me ngkmal ngilasech a rengul. Ngkmal mle mesisiich a uldesuel el ulemdasu el kmo, ngmelemalt a omerellel me ngmlo chetil el mesiou er a Jehovah el teruich el rak. E chelechang e ngdmu el kmo ngkmal mle kedidai a rengul me ngmlo oltelechakl er a Jehovah el kmo ngii a uchul aika el tekoi el dubecha el mo er ngii. Me ngmle betok el rak el lomais a rudam el mo oldingel er ngii e melasem el olengeseu er ngii, engdi ngdimlak lekengei er tir.

⁵ A Jim a dmu el kmo, “Ngkmal mle mesisiich a uldesuek el kmo a rechad a meruul a cheleuid.” Me tia el blekerdelel a ochotii el kmo, a kldidairreng a kmal sebechel el rullid el mo omdasu el kmo, a cheleuid el uldesued a melemalt. Me ngera mo duubech sel bo lemedecherecher a rengud? (Jer. 17:9) Ngmla ta el mesibas er a omerellel a odam me a lechub e ngodos er kau? Ngmlo mekngit a rengum e le ke urridii a techellem er omesiou? Ngmlo uangera uldesuem? Ngmlo kedidai a rengum me a lechub e ke mlo melechesuar el kmo a budech er a delongelem kau me a rudam er kau me a blakerreng er kau el mo er a Jehovah a kot el klou a ultutelel?​—Monguiu er a Psalm 119:165; Efesus 4:32.

6. Ngera sebechel mo duubech a lsekum kede meruul a klengit?

⁶ A lsekum a chad a melemolem el meruul er a klengit e omart er ngii e ngmo meringel er ngii el kongei er a osmechokl er a Jehovah. Seikid e ngmo beot er ngii el meruul a klengit. A ta el odam a mesaod el kmo ngmlo er ngii a taem el mekngit el omerellel a di mlo ua lungil er a uldesuel. (Oli. 8:11) E a ta er a odam el kmal mle soal el omes a siasing er a remeau, a dilu er a uriul el kmo, “Ak mlo metik el kmo ngkmal mo mekngit a uldesuek el bedul a remechuodel.” Me tia el omerellel a tilemellii a deleuill er ngii me a Jehovah. Engdi sera lebetik er ngii, e a remechuodel a mlo ngosuir. Me ngmera  el tekoi, kid el rokui a diak demecherrungel, engdi a lsekum ngmo mekngit a uldesued, e di mesaod er kid er sel taem el derellii a mekngit, e bai diak dolengit a klausubes me a ngeso er a Dios, e ngulterekokl el mo kedidai a rengud.

7, 8. (a) Te milekerang e ochotii a rechad er a Israel el kmo ngmedecherecher a rengrir, e diak a klaumerang er tir? (b) Ngera klubeled el denguu er tiang?

⁷ Sel taem el Jehovah a ultebedeterir a rechad er a Israel er a beluu er a Ekipten, e te miles a mengasireng el tekoi el lurruul. Me nguaisei, engdi sera lolekeda er a Beluu er a Nglat e ngmlo medecherecher a rengrir. E ngera uchul? Ngmlo diak loumerang er a Dios, e bai mlo medakt e mlo mengeremrum el kirel a Moses. Te dirrek el mlo oureng el lmuut el mo er a Ekipten el beluu el ble lesibai er ngii! Me ngkmal mlo mekngit a rengul a Jehovah el kirel a omerellir me ngdilu el kmo: “Ng ua ngera klteketel el di loltngakl er ngak tirkal chad?” (Ule. 14:1-4, 11; Psa. 78:40, 41) Tiaikid a uchul me te mlad er a lengar er a ked e le ngdelecherecherel a rengrir a uchul, me tir el mlo diak a klaumerang er tir er a Dios.

⁸ Me chelecha el taem e kede dirrek el kmal kmeda er a beches el beluulechad, me a klaumerang er kid a dirrek el mo measem. Sei a uchul me ngkired el blechoel el merriter er a klaumerang er kid. Me kede mekerang e mo medengei el kmo ngmesisiich a klaumerang er kid? Ngsebeched el merriter er a tekingel a Jesus el ngar er a Mateus 6:33, e melatk el kmo: ‘A omelilt el kuruul me a turrekong er ngak, ngochotii el kmo a kuumerang aika el tekingel a Jesus? Ngak, ak mo mengoit a miting me a odingel e le ngsoak a lmuut el betok el udoud? Ak mo mekerang a lsekum ngmo kirek el mengoit er a klou el temek me a klisichek el oureor? Ngak, ak mecherei tia el beluulechad me ngomekrael er ngak me a lechub e ngmerrob er ngak me ngmo diak kusiou er a Jehovah?’

9. Ngera me ngkired el blechoel el “merriter” er a klaumerang er kid? E mekerang a doruul er tiang?

⁹ A lsekum ngdiak doltirakl a ulekrael er a Biblia el kirel a mekngit el klausechelei, me a omesuld el ngakl, me a ongelaod e ngsebechel el mo medecherecher a rengud. Ke mo mekerang a lsekum ngmo uaisei a uldesuem? Ngkmal kirem el mereched el merriter er a klaumerang er kau! A Biblia kmo: “Bo mungil el merriter er kemiu e mosekemiu el kmo kom ungil el oltirakl a cho moumeral tekoi?” (2 Ko. 13:5) Mada bo mungil el merriter er a rengum, e bo blechoel el ousbech er a Tekingel a Dios el mesmechokl er a uldesuem.

10. Ngera sebechel ngosukid el mo ua medemedemek el chutem el ngar er a chimal a Jehovah?

¹⁰ A Dios a mla meskid a Tekingel me a ongdibel er a Rekristiano, me a omesiunged el sebechel ngosukid me kede melemolem el ua medemedemek el chutem. Me sel donguiu e dolatk a tekoi el dechuiu er a Biblia er a bek el sils e ngrullid el mo ua medemedemek el chutem el ngar er a chimal a Jehovah me ngmo beot er ngii el mesmechokl er kid. Tiaikid a uchul me a Jehovah a di blechoel el melekoi er a remesiungel el kmo ngklou a ultutelel el kirir el menguiu a Bades er a bek el sils. Ngmilengelechel er a reking er a Israel el mo meluches a Llechul a Dios e menguiu er a bek el sils. (Dut. 17:18, 19) Me a rechapostol a mle medengei el kmo ngklou a ultutelel el kirir el menguiu e melebedebek a Bades me bo lungil kltmokl el kirel a omesiungir. Te uluusbech a bebil el Bades el tekoi er a Hebru el betok el taem sel loluches a babilengir, me sel lolisechakl er a rechad, me a dirrek el sel taem el lolisiich er tir el mo ousbech a Bades. (Rel. 17:11) Me ngdi osisiu, kid me kede dirrek el medengei el kmo ngklou a ultutelel el donguiu e dolebedebek a Tekingel a Dios er a bek el sils. (1 Ti. 4:15) Tiang a ngosukid me kede melemolem el oba klengariourreng me ngbeot er a Jehovah el mesmechokl er kid.

11, 12. Ngmekera Jehovah e ousbech er a ongdibel er a Rekristiano el mesmechokl er a rokui el oltirakl aike el lousbech a derta er tir? Mosaod.

¹¹ A Jehovah a ungil medengei aike el dousbech el bek el chad, me ngousbech er a ongdibel er a Rekristiano el mesmechokl er kid. A Jim el dulsaod er ngii er a uchei a ulemuchel el melodech er a uldesuel er a taem el ta er a remechuodel a  ulechotii a klemeriarreng er ngii el bedul ngii. Me ngdilu el kmo: “Ngdimlak a ta el oltelechakl me a lechub e lolekoi a mekngit el kirek. Ngbai di mle blechoel el melisiich er ngak e ulechotii el kmo ngsemeriar el ngosukak.” Me a edei el buil er a uriul, e ngii el odam a milengemedaol er a Jim el mo er a miting. Me a Jim a melekoi el kmo a ongdibel a kmal uluuetkeu er ngak, me sel bltkil a rengrir a ngilsukak el mo ngodechii a uldesuek. Me ngmlo medengei el kmo a uldesuel a diak el kirel el mo ngaruchei er a rokui el tekoi. Me tirke el mechuodel er a ongdibel, me a dirrek el bechil a millisiich er ngii me a cherengel a taem e ngliluut el mo mesiou er a Jehovah. Ngdirrek el kmal ngilai a klungiolel er a suobel el ua “Ngdiak Motelecheklii a Jehovah” me a “Bo Mosiou er a Jehovah el Oba Llemalt,” el debetik er a Ongkerongel er a May 1, 1993.

¹² Me a cherengel a taem e a Jim a liluut el mo mesiou el ta er a remechuodel. Me chelechang, e ngmla ngosuterir a rebebil el odam el mo sumechokl a mondai er tir el ua mondai er ngii, e dirrek el smisichii a klaumerang er tir. Ngulemdasu el kmo ngkmes a deleuill er ngii me a Jehovah engdi mera er ngii ngkmal dimlak! Ngkmal louuchel er a rengul el milecherei a kldidairreng me ngrullii el di mo omdidm a chelitecheterir a rechad me ngmlo diak el sebechel el omtab a meklou a ultutelel el tekoi.​—1 Ko. 10:12.

13. A berkel a klumech, ngsebechel ngosukid el mekeroul a ngera el blekeradel? E ngera mo klungiolel?

¹³ A berkel a klumech a dirrek el sebechel el omeklemalt er kid me kede mo ungil chad er a beluu. El okiu a ngera el rolel? Sel dosaod er a ungil chais, e ngkmal kired el olecholt a blekeradel el ua klengariourreng me a dirrek el rodech er a reng. (Gal. 5:22, 23) Ka molatk a ungil blekeradel el berkel a klumech a mla ngosukau el mekeroul. Me a doukerebai er a Kristus, e a rechad a mo semeriar er a klumech el domerk er ngii e locha mo mengodech  a uldesuir el bedul kid. A reteru el Sioning er a beluu er a Australia a millasem el mengedecheduch er a redil el mla er a blil, engdi ngkmal mlo kesib a rengul, me ngmlo mekngit a tekingel el mo er tir. Engdi tir a di ullerrenges er ngii e ulechotii a omengull el mo er ngii. Me a uriul, e ngii el redil a kmal mlo ouuchel er a rengul er a omerellel, me ngmilluches el mo er a obis er a Resioning er a Jehovah el olengit a klausubes. Ngdilu el kmo: “Ak kmal di ua kebelung el chad el dechor er a mederir a reteru el chad el omerk er a Tekingel a Dios e melasem el oldik er tir.” Me ngokiu tia el tekoi, e kede mo medengelii a klungel a ultutelel a bo lungil a omerelled sel doldingel a obliil. Me ngmera el tekoi, a berkel a klumech a ngosuterir a rebebil, engdi ngdirrek el ngosukid el mekeroul a ungil blekeradel.

14. Ngkirir el mekerang a ruungalek a lsekum ngsorir el mo ungil mesmechokl er a rengelekir?

¹⁴ A ruumesingd el mekekerei el ngalek a ngariou a rengrir e semeriar el mesuub a tekoi. (Mt. 18:1-4) Me nguchul a llomeserreng a lsekum a ruungalek a ngosuterir a rengelekir sel dirk lemekekerei el mo medengelii a klemerang e mo betik a rengrir er ngii. (2 Ti. 3:14, 15) Ngkmal kirir el mo betik a rengrir er a klemerang, e dirrek el mo oltaut a omellach er a Biblia, a lsekum ngsorir el mo ungil osisecheklterir a rengelekir. Me a omerellir a rulleterir a rengelekir el mo betik a rengrir er a klemerang. Me a rengalek a dirrek el mo medengei el kmo a omellach er a redemerir me a rederrir a ochotii el kmo, ngbetik a rengrir er tir me a Jehovah me ngdirrek el betik a rengul er tir.

15, 16. Te mekerang a ruungalek e ochotii el kmo te oumerang er a Dios a lsekum a ngelekir a mo diak el ta er a Sioning er a Jehovah?

¹⁵ Me alta e a ruungalek a osisecheklterir a rengelekir er a klemerang, engdi a rebebil el ngalek a mo cheroid er a Jehovah me a lechub e ngmo diak el ta er a Sioning er a Jehovah. Sel bo leuaisei e a telungalek a kmal mo chuarm. A ta el odos er a beluu er a South Africa a dmu el kmo: “Sera bo lak el ta er a Sioning er a Jehovah a ochedak, e ngua lemlad. Ngkmal mlo mekngit a rengmam!” Me te milekerang a rechad er a blil? Te ullengesenges a ulekrael er a Biblia. (Monguiu er a 1 Korinth 5:11, 13.) Te mle ungil medengei el kmo a lolengesenges a ulekrael er a Dios e ngmo uchul a klungiolir el rokui. Te dirrek el mle medengei el kmo tia el omellach a olechotel a bltikerreng er a Jehovah. Me ngdi sel lebo er ngii a tekoi er a siobai er a telungalek er tir el kirir el mesaod, e seikid a taem el longedecheduch er a ngelekir.

¹⁶ Ngmlo uangera uldesuel ngika el ngelekir? A uriul e ngdilu el kmo, “Ak mle ungil medengei el kmo a rechad er a blik a diak louketui er ngak, te bai sorir el oltirakl a ulekrael er a Jehovah me a cheldebechelel.” Ngdirrek el dilu el kmo, “Sel bo mutebengii el kmo ngkirem el olengit er a Jehovah me ngousubes a kngtim e ngosukau, e ke mera el mo medengei el kmo ke kmal ousbech er ngii.” Ka di molatk er sel deuil a rengrir tirka el telungalek er a lluut a ngelekir el mei er a Jehovah! Nguaisei, ngmo dmeu a rengud e ungil a klengar er kid sel deblechoel el olengesenges er a Dios.​—Osi. 3:5, 6; 28:26.

17. Ngera me ngkired el olengesenges er a Jehovah er a chelsel a klengar er kid? E tiang mekera e mo uchul a klungioled?

¹⁷ A profet el Isaia a ulemlaoch el kmo a rechad er a Judea el ngar er a Babilon a mo ouuchel er a rengrir e mo dmu el kmo: “Ngdi kau a Demmam e RUBAK. Kemam a ua chutem e kau a ua omeob olekang. Kulemeob er kemam.” Te dirrek el mo mengeluch er a Jehovah el kmo: “Lak lesal mo kesib a rengum er kemam, ma lechub e di moreked a kngtmam me lomtok er kemam el diak a ulebengelel. Kemam a chedam; bo mchebkemam.” (Isa. 64:8, 9) Me a lsekum e ngmo ngariou a rengud e mo blechoel el olengesenges er a Jehovah, e kede kmal mo mekreos er osengel el ua Daniel. Me a Jehovah a mo melemolem el mesmechokl er kid el ousbech er a Tekingel me a chedaol reng er ngii me a dirrek el cheldebechelel. Me a ngar medad el taem e kede mo cherrungel el “ngelekel a Dios.”​—Rom 8:21.