Kede Mereng a Sulel a Jehovah e le Ngii a Ulemeob er Kid
“Kau a Demmam e RUBAK. . . . Kulemeob er kemam.”—ISA. 64:8.
CHELITAKL: 11, 26
1. Ngera me a Jehovah a ngike el kot el ngarbab el Ulemeob?
SERA November 2010, e ngmla er ngii a bekai er a beluu er a Sina er a kmal irechar el mloterau er a London el beluu er a England el mle bekord el 70 el miliol a cheral. Ngkmal mengasireng el tekoi a lsekum a chad a sebechel el ousbech a klekedall el ua chutem el mebii a kmal klebokel e meringel a cheral el bekai. A Jehovah a di ua chad el omeob a klalo engdi nglmuut el cheroid el meduch er a ngii di el chad. E a Biblia a mesaod el kmo, a Jehovah a milebii a cherrungel el chad el uluusbech a di “sesel chutem.” (Gen. 2:7) E ngika el chad a “ngelekel a Dios,” e ngii a ulebeob el sebechel el olecholt a blekerdelel a Dios.—Lk. 3:38.
2, 3. Kede mekerang e mo oukerebai er tirke el ulebult er a kngterir el chad er a Israel?
2 A Adam er sera bo lomtok er a Ulemeob er ngii e ngmlo diak el ngelekel a Dios. Engdi, a rebetok el uldidellel a rsechel a mla ngiltii a Jehovah el mo Merredelir. (Heb. 12:1) Me tir el kongei el olengesenges er ngika el Ulemeob er tir a uchul me te ochotii el kmo ngsorir ngii a bo el Demerir e losmechokl er tir, el diak el Satan. (Jn. 8:44) Me a blakerreng er tir el mo er a Dios a mekltkid er a omerellir tirke el ulebult er a kngterir el chad er a Israel el dilu el kmo: “Ngdi kau a Demmam e RUBAK. Kemam a ua chutem e kau a ua omeob olekang. Kulemeob er kemam.”—Isa. 64:8.
3 A remera el mengull er a Jehovah er chelechang a blak a rengrir el melasem el mo ngariou a rengrir e mo bekongesenges. Te omes er tia el techellir el mo Ouchedam er a Jehovah el kmal chetengakl me ngsorir a lolemolem el mesmechokl er tir. Me kid, kede kongei el mo ua medemedemek el chutem me bo el sebechel a Dios el omeob er kid el mo ua klebokel el bekai? Kede omes er a rudam me a rudos er kid el dirrek el melasem el mecherei a Dios me ngomeob er tir? Kede mo mesaod er a rolel e a Jehovah a melilt er tirke el losmechokl er tir, e ngera uchul me ngmesmechokl er tir, me sel rolel a loruul er tia el tekoi, el ngosukid me ngmo tabesul a uldesued el kirel aika el tekoi.
A JEHOVAH A MELILT ER TIRKE EL LOSMECHOKL ER TIR
4. Ngmekerang a Jehovah a lolilt er tirke el kongei er ngii me ngmesmechokl er tir? Mosaod.
4 A Jehovah a kmal ngodech a rolel a lomes er a rechad el diak uai kid. Ngsebechel el omes er a rengud e mo medengei el kmo kede ua ngera el chad. (Monguiu er a 1 Samuel 16:7b.) Me a Jehovah a ulechotii tiang er sera loleketek er a ongdibel er a Rekristiano. Ngmillilt er a rebetok el chad el mo er ngii me a Ngelekel el tir a mla er a kemikr er osengir a rechad. (Jn. 6:44) El ua ta el Farisi el Saul el “millekoi a mekngit el kirel, e uleldechelakl, e uleltuub” er a Dios. (1 Ti. 1:13) Engdi Jehovah a ulemes er a rengul a Saul e mle medengei el kmo ngsebechel el mo er ngii a ultutelel el chad. (Osi. 17:3) Me ngmle sebechel el ‘ngiltii el mo mesiou er ngii, e mo olecholt er a ngklel er a re Chisentael ma re king ma re chad er a Israel.’ (Rel. 9:15) A Jehovah a dirrek el sebechel el melilt er a rebebil el “mo osongel er a klebekelel,” el tir alta e te di mle cheltelaol er a rrom me a rengar er a deleboes me a remerechorech. (Rom 9:21; 1 Ko. 6:9-11) Me a cherengel a taem el losuub a Bades e nglmuut el smisichii a klaumerang er tir er a Jehovah me te mo kongei el mecherei me ngomeklemalt er tir.
5, 6. Ngmekerang a klaumerang er kid er a Jehovah, el ngii a Ulemeob er kid e ngmodech a uldesued el kirir a (a) rechad el ngar er a basio el domerk er a klumech er ngii? (b) me a rudam me a rudos er kid?
5 Kede oumerang el kmo a Jehovah a sebechel el melilt er a remelemalt a rengrir el chad. Sei a uchul me ngkmal diak el kired el oukerrekeriil er a rechad el ngar er aike el basio el doldingel er ngii me a lechub e te ngar er a ongdibel. A ta el chad el Michael a kmal mle mekngit a omerellel el mo er a Resioning er a Jehovah sel bo loldingel er ngii. Ngdmu el kmo: “Ak di mechititerir me te di melngod er a chesimer e kmal diak kulai er ngii. Ngkmal mle mekngit a omerellek el mo er tir! Engdi uriul e ak mlo medengelii a ta el telungalek e kmal mlo soak tir el ungil el blekerdelir a uchul. Engdi ak kmal kilebetiekl er sera bo kudengei el kmo te Sioning er a Jehovah! Me aika el ungil el blekerdelir a rirellak el mo omdasu er tia el blekerdelek el mengetukel er a rechad, e mlo medengei el kmo a uldesuek a mle ultuil er a di tekingir a rechad el dimlak lultuil er a mera el tekoi.” Me ngkilengei el mo mesuub, e a uriul e ngmlo metecholb, e mlo teloi er a mui el taem el omesiou.
6 Me kid el kongei el kmo a Jehovah a ngike el Ulemeob er kid a uchul me kede kongei el ngmodech a uldesued el bedul a rudam me a rudos er kid. Kede medengei el kmo te dirrek el oureor el kirel a uldesuir. E tiaikid a osengel a Jehovah el bedul tir, e le ngmera el sebechel el omes er a rengul a chad e dirrek el medengei el kmo tirkang a diak lemecherrungel. Ngdirrek el medengei el kmo a derta er tir a sebechel el mengodech a blekerdelel. (Psa. 130:3) Kid me ngsebeched el oukerebai er a Jehovah e mo oureor el obengkel a lsekum ngmo ungil a uldesued el bedul a rudam me a rudos er kid. (1 Th. 5:14, 15) Me a remechuodel er a ongdibel a dirrek el kirir el mo ungil kerebai el kirel tia el tekoi.—Efe. 4:8, 11-13.
NGERA UCHUL ME A JEHOVAH A MESMECHOKL ER KID?
7. Ngera me kede oba omereng a saul el kirel a omellach er a Jehovah?
7 A rebebil a locha mo melekoi el kmo: ‘Ngkmal dimlak el soak sel lollach er ngak a rechad er a blik el mo lmuut er sel taem er a bo kuungalek.’ Me sel bo demeklou el chad e kede mo kongei a omellach e le kede medengei el kmo ngolechotel a bltikerreng. (Monguiu er a Hebru 12:5, 6, 11.) Nguaisei, a Jehovah a kmal betik a rengul er kid el ngelekel, sei a uchul me ngoba kllourreng el mellach me a lechub e ngmesmechokl er kid. Ngkmal soal a bo lemellomes a rengud e bo ledeu a rengud e bo lebetik a rengud er Ngii. (Osi. 23:15) Ngkmal chetil el omes er kid el chuarm e dirrek el diak el soal a demad el ua tirke el diak lekengei el obult er a mekngit el omerellir.—Efe. 2:2, 3.
8, 9. Ngmekera Jehovah a lolisechakl er kid er chelechang, e mekera tia el osisecheklel e lmuut el meleketek?
8 Me a uchei er a bo dodengelii a Jehovah, e nglocha mla er ngii a betok el mekngit el blekerdeled. Engdi Jehovah a milsmechokl er kid e ullengeseu er kid a uchul me chelechang e ngar er ngii a kmal ungil el blekerdeled. (Isa. 11:6-8; Kol. 3:9, 10) Me chelechang, e kede kiei er a chelsel a ungil el blekeradel er a klengar el di meleketek, me kede melechesuar a ulekerreu alta e kede kiei er a chelsel tia el mekngit el beluulechad. A rebebil el mlukeroul er a chelsel a telungalek el dimlak a bltikerreng er ngii a melechesuar a mera el bltikerreng er a delongelir a rudam me a rudos er tir. (Jn. 13:35) Kede dirrek el mla mo meduch el oubltikerreng el mo er a rechad. Engdi sel kot el ngarbab er ngii el rokui a kid el mla mo medengelii a Jehovah e mo melechesuar a klou el bltkil a rengul.—Jak. 4:8.
9 Me ngar er a chelsel a beches el beluulechad, e kede mo chormii sel cherrungel el klungiolel tia el ungil el blekeradel er a klengar. Ngdirrek el mo dmeu a rengud el kiei er a chelsel a mera el baradis el longedereder er ngii a Rengedel a Dios. E ngar seikid el taem e a Jehovah a melemolem el mesmechokl e olisechakl er kid el ngar er a kot el ungil el rolel. (Isa. 11:9) Ngdirrek el mo meskid a cherrungel el bedenged me a uldesued. Ngoeak tiang e ngmo beot er kid el mo medengei a ulekrael er ngii e mo cherrungel el oltirakl. Mada dolemolem el mecherei a Jehovah me losmechokl er kid, e dochotii el kmo kede omes er tia el omerellel el olechotel a bltkil a rengul el bedul kid.—Osi. 3:11, 12.
A ROLEL A LOSMECHOKL ER KID A JEHOVAH
10. Ngmilekera Jesus e oukerebai a omerellel a Kot el Ngarbab el Ulemeob?
10 A Jehovah a di ua chad el meduch el omeob a chutem el kmal ungil el medengelkid. Ngungil medengei a chelitechetud me aike el diak el sebeched el remuul me aike el bla deruul me ngmesmechokl er a derta er kid el oltirakl er tiaikid el klemedengei er ngii. (Monguiu er a Psalm 103:10-14.) Ngsebeched el mo medengelii a uldesuel a Jehovah el bedul kid el okiu sel dolatk er a blekerdelel a Jesus el bedul a rechapostol er ngii el tir a dimlak lemecherrungel. Ngmla er ngii a ta el taem e te mlo kaititekangel el kmo ngtecha kuk ngarbab er a delongelir. Me oleko ke mla er isei, e ngmo uangera uldesuem el bedul tir? Ke locha mo omdasu el kmo tirka kmal diak leua medemedemek el chutem. Engdi Jesus a mle medengei el kmo ngsebechel el mesmechokl a blekerdelir a lsekum te kongei el remenges a ungil el tekingel, e nguu a osmechokl er ngii, e dirrek el mo oukerebai er a klengariourreng er ngii. (Mk. 9:33-37; 10:37, 41-45; Lk. 22:24-27) Me sera lebekiis er a kodall a Jesus e a rechapostol er ngii a mlukeek er a chedaol reng er a Dios, me ngmlo blak a rengrir el meruul er a ureor el lebilsterir a Jesus, e mlo diak lekaititekangel el kmo ngtecha er a delongelir a kuk ngarbab.—Rel. 5:42.
11. Ngmilekerang a David e ochotii el kmo ngkongei a osmechokl, e kede mekerang e mo oukerebai er ngii?
11 Me chelechang, e a Jehovah a ousbech er a Biblia me a chedaol reng er ngii me a ongdibel el mesmechokl er kid. Ngmekerang a Biblia a losmechokl er kid? Ngkired el menguiu er ngii, e melebedebek a tekoi el dechuiu, e dirrek el olengit er a Jehovah me lengesukid el mo oltaut a tekoi el desuub. A King el David a milluches el kmo: “Sel kmechiuaiu er a dukllek e ak melebedebek er kau; ng cherrungel kesus el di kumdasu er kau.” (Psa. 63:6) Ngdirrek el milluches el kmo: “Ak uldanges er a RUBAK ele ng mengetikaik er ngak, ma le klebesei e a ukltkel a renguk omeklatk er ngak.” (Psa. 16:7) Me a David a millebedebek a ulekrael er a Jehovah, e milechei me ngmesmechokl er a uldesuel me a rengul el mo lmuut er a taem el kmal mle meringel er ngii el kongei a osmechokl. (2 Sa. 12:1-13) Me ngmilecherei a kmal ungil kerebai el kirel a klengariourreng me a blekongesenges el kired el oltirakl er ngii. Me ngungil a dolatk el kmo: ‘Sel kunguiu er a Biblia, e ak melatk a tekoi el kunguiu e mechei a ulekrael er a Dios me ngmesmechokl er a renguk me a uldesuek? Ngera lmuut el bebil el sebechek el remuul?’—Psa. 1:2, 3.
12, 13. Ngmekera Jehovah a losmechokl er kid el okiu a chedaol reng er ngii me a dirrek el ongdibel?
12 A chedaol reng a sebechel el mesmechokl er kid el okiu a betok el rolel. Ngsebechel el ngosukid el mo oukerebai er a blekerdelel a Jesus el ullecholt a rodech er a reng. (Gal. 5:22, 23) E a ta er aika el blekeradel a bltikerreng. Ngbetik a rengud er a Dios e soad lolengesenges er ngii e kongei er ngii me ngmesmechokl er kid, e le kede medengei el kmo a llechul a di mo uchul a klungioled. Me a lmuut el tang, a chedaol reng er ngii a sebechel el meskid a klisiched el mo oltngakl a mekngit el blekeradel er tia el beluulechad. (Efe. 2:2) A apostol el Paulus er a dirk lekekerei el chad, e ngdi mle ua uldesuir a remekedidai a rengrir el mengeteklel a klechelid er a rechad er a Judea. Engdi a chedaol reng er a Dios a ngilsuir el ngodechii a blekerdelel, me a uriul e ngmilluches el kmo: “Ng ngar ngii a klisichek el remuul a ikel rokui el mer ngak el okiu a klisiich el lomeskak a Kristus.” (Fil. 4:13) Kid me ngdirrek el kired el meluluuch el olengit er a chedaol reng, e medengei el kmo a Jehovah a mo onger a nglunguched.—Psa. 10:17.
A Jehovah a ousbech er a remechuodel er a ongdibel el mesmechokl er kid me ngkmal kired el olengesenges er tir (Momes er a parakurab 12, 13)
13 A Jehovah a dirrek el ousbech er a ongdibel me a remechuodel el mesmechokl er kid el rokui. Me a lsekum a remechuodel a mtebengii el kmo ngar er ngii a tekoi el kired el oureor er ngii, e te melasem lolengeseu er kid. Engdi ngdiak el kirir el mesaod el kmo ngera kired el meruul er ngii me a lechub e loltobed a uldesuir el sorir a bo doltirakl. (Gal. 6:1) Te bai mo blak a rengrir el olengit er a Jehovah me lebesterir a llomeserreng me a duch me bo lungil el omekrael er kid. Te dirrek el merriter a tekoi el ousbech er a Biblia me aike el babilenged me bo lsebechir el mo ungil ngosukid. Me a lsekum te oba bltikerreng e mo ungil el ngosukau, e lak mobes el kmo a ulekrael el lulemeskau a olechotel a bltkil a rengul a Dios el bedul kau. Me sel mkengei el oltirakl aika el uleklatk e ke mo ua medemedemek el chutem me ngsebechel a Jehovah el mesmechokl er kau el di mo uchul a klungiolem.
14. Ngera diak el sebechel a Jehovah el rullii alta e ngar ngii a llemeltel el mesmechokl er kid?
14 Sel bo dungil medengelii a rolel a losmechokl er kid a Jehovah, e ngmo uchul a ungil deleuill er kid me a rudam me a rudos er kid. Ngdirrek el rullid el mo melemalt e tabesul a uldesued el bedul a rechad el doldingel er tir, el uldimukl er tirke el dosuub a Biblia lobengterir. Sel taem er a Biblia, e a chad el omeob a chutem a kirel el omuchel el michii a chutem me ngmo diak a bad me a besbas er ngii. Me a Jehovah el ngike el Kot el Ngarbab el Ulemeob, a olengeseu er tirke el kongei a osmechokl er ngii. Ngkmal diak lorrimel er tir el mo melodech a blekerdelir, ngbai di ocholt er tir a melemalt el llechul, e tir a di tir el melilt el kmo ngsorir el melodech a blekerdelir me a lechub e ngdiak.
15, 16. Ngmekera chad el mesuub er a Biblia e ochotii el kmo ngsoal a Jehovah a losmechokl er ngii? Mosaod.
15 Ka molatk er a tekoi el dilubech el mo er a Tessie el odos er kid el ngar er a Australia. Ngkmal mle beot er ngii el mesuub aike el tekoi el ngar er a Biblia, engdi ngdimlak el sebechel el olengeriakl e dirrek el dimlak a ta el lebo er a miting. Ngike el odos el milsuub lobengkel a milluluuch el mo er a Jehovah e tilbir el mo diak losuub el obengkel. Engdi ngkmal mlo mechas a rengul er sera lluut el mo mesuub el obengkel, e a Tessie a silbedii er a uchul me ngdiak el sebechel lolengeriakl er a omesubel. Ngmesaod er ngii el kmo ngdi ua cheblad el chad e le ngkmal mle soal el oubakutsi. Me chelechang e ngmla tibir er a rengul el mo diak loubakutsi.
16 Ngdi mle telkib e a Tessie a mlo omais el mo er a miting e mlo olecholt a blekerdelir a Rekristiano alta e tirke el mle sechelil er a uchei a millenguul er ngii. Me a cherengel a taem e ngmlo metecholb e mlo regular pioneer, alta e ngmla er ngii a remekekerei el ngelekel. Me ngkmal bleketakl el kmo a chad el mesuub er a Biblia sel lomuchel el melodech a blekerdelel el mo oldeu er a rengul a Dios, e a Dios a mo olekeed er ngii er tir e omeob er tir el mo ua klebokel e mekreos el bekai.
17. (a) Ngera rullau el kmal mo soam a losmechokl er kau a Jehovah? (b) Ngera el tekoi el kirel a osmechokl a bo dosaod er a ongingil el suobel?
17 Me chelecha el taem e te dirk ngar ngii a rebebil el kmal kerekikl sel lomeob a chutem el mo klebokel el bekai. Me ngdi osisiu, a Jehovah a oba kllourreng el mesmechokl er kid el ousbech a ulekrael er ngii e kerekikl el omes a omerelled. (Monguiu er a Psalm 32:8.) Me ngsebechem el melechesuar a klemeriarreng er a Jehovah el bedul kau? Ngsebechem el mtebengii a rolel e a Jehovah a kerekikl el mesmechokl el kau? A leuaisei, e ngera el blekeradel a sebechel el rullau me ngmo beot er a Jehovah el mesmechokl er kau? Ngera el blekeradel a kirem el mengeroid er kau er ngii me lak bom ta er tirke el chad el meringel el mesmechokl? Te mekerang a ruungalek e oureor lobengkel a Jehovah el mesmechokl er a rengelekir? A ongingil el suobel a mo onger aika el ker.