A lsoam el mo ungil medengelii a chad, e ngmo ngosukau obo modengei aike el bla leruul me a omelsemai el blo lemesisiich er ngii. Ngdi osisiu, a lsoam el mo ungil medengelii a Dios e ngkirem el mo medengei aike el bla leruul. Ngmo mechas a rengum e le ke mo metik el kmo, a betok er aike el leriruul er a ngar er a mong a uchul a klungioled er chelechang me a deurreng el klengar el kired er a ngar medad.

A Jehovah el Dios a Ngarbab el Ulemeob me a “ikel diak el moues el blekerdelel a Dios . . . a mla moues el bleketakl; kede mes el ngar a ikel le bileob a Dios.” (Rom 1:20) “A RUBAK a milebii a beluulchad el di uleba klisichel. Ng milekedbechii a beluulchad e merekii a eanged er a di llemesel ma duch er ngii.” (Jeremia 10:12) A bleob a dirrek el lochotii a klemeriarreng er a Dios el kired a rechad.

Mutebengii a rolel e ngrirellid el kmal ileakl loeak a lomeob er a rechad el “okesiul.” (Genesis 1:27) Tia belkul a kmo ngmilebid el sebeched el lolecholt a blekerdelel. Ngmilebid el sebeched el mtab a uldesuel me aike el tekoi el meklou a ultutelel er ngii. Sel doruul aikang e nglmuut el mo dmeu a rengud e ngar ngii a belkul a klengar er kid. A ngaruchei er ngii, ngmilskid a techall el sebeched el toketekii a deleuill er kid me ngii.

A beluulechad ochotii a uldesuel a Dios el kired. Ngua lolekoi a apostol Paulus, a Dios “a mle blechoel el olecholt er ngii el oeak a ikel ungil tekoi el loruul. Ng oltengel er a chull er a eanged el ekor kemiu e meskemiu a dellomel er sel ungil belsechel, e meskemiu a keliu e omekeek a rengmiu er a deurreng.” (Rellir 14:17) A Dios a diak di lomeskid aike el dousbech el mo melemolem el ngar. Ngmilskid a lmuut el betok el bek el bedengel me bo lsebeched loldeu a rengud er a klengar. Engdi ngngar ngii a lmuut el betok el Dios a soal el kired.

 A Jehovah milebii a beluulechad me bo lsebechir a rechad el kiei er ngii el mo cherechar. A Biblia kmo: “Beluulchad a le bilsterir a re chad” “ng dimlak le rellii el di bechachau el beluu, ng bai basio el kirir a re chad el kiei er ngii.” (Psalm 115:16; Isaia 45:18) Te mo kiei er ngii a rua techang el ua klteketel a ngerang? “A re melemalt a mo ungilbesrir el kiei er a chelsel a beluu e mo oubeluu er ngii el di blechoel.”​—Psalm 37:29.

Me a Dios a milebii a kot el sechal me a redil el Adam me a Eva, e milsterir el delengcheklir a baradis me te “mo mengedmeklel e mengkerengel.” (Genesis 2:8, 15) A Dios a milsterir a ngerechelir el teblo tedebechel: “Bo le betok a re ngelekiu, ma ruldidellel a rsechiu bo le kiei er ker me ker er a beluulchad e bo lorreder er ngii.” (Genesis 1:28) Me a Adam me a Eva mla er ngii omeltkir el mo kiei el diak a ulebengelel. Ngklengiterreng e le te millilt el mo diak lolengesenges er a Dios sei a uchul me te urridii a techall el mo “melemalt” e “oubeluu er [a beluulechad] el di blechoel.” Me nguaisei, ngua bo desang, a omerellir a dimlak lengedechii a moktek er a Jehovah el kired me a beluulechad. Engdi kot e me dosaod er a lmuut el ta er a tekoi el bla lerellii a Dios.

A Biblia dirrek lokedongall el kmo ng Tekingel a Dios. Ngera me a Jehovah milskid a Biblia? Ngaruchei er ngii, a me bo lsebeched el mo medengelii. (Osisechakl 2:1-5) Nguaisei a Biblia a diak longer a rokui el kerid el kirel a Dios, e diak a babier el sebechel rullii tiang. (Olisechakl 3:11) Engdi rokui el tekoi el ngar er a Biblia a ngosukid el mo medengelii a Dios. Kede mo medengelii loeak omerellel el mora rechad. Kede mo medengelterir a rechad el soal me a chetil. (Psalm 15:1-5) Kede suubii a uldesuel el kirel omengull, ungil me a mekngit, me a klalo er tia el beluulechad. A Biblia meskid a bleketakl el omesodel a kmo a Jehovah ngngua ngera el chad loeak a tekingel me a omerellel a Ngelekel el Jesus Kristus.​—Johanes 14:9.

A lmuut el ta er a uchul me a Jehovah milskid a Tekingel el Biblia a me bo lsebechel mo er ngii a deurreng er a klengar er kid e mo er ngii a belkul. Ngoeak a Biblia e a Jehovah ouchais er kid a rolel e ngmo er ngii a deurreng er a telungalek er kid, mo ungil a rengud er aike el ngar ngii er kid, me a rolel e ngsebeched loutekangel a sebekreng. E ua bo losaod er ngii tia el Ongkerongel er uriul, a Biblia onger aike el meklou a ultutelel el ker er a klengar el uai a: Ngera uchul me ngkmal betok a ringel? Ngmo uangerang a ngar medad el klebesei? Ngdirrek el louchais aike el bla leruul a Dios me bo letaut a dimla moktek er ngii.

Ngar ngii a lmuut el betok luchul me a Biblia a kmal ileakl el babier el di sebechel el babilengel a Dios. A re 40 el chad a milluches er ngii er a chelsel a 1,600 el rak, me nguaisei engdi ngdi ta tekoi el losaod er ngii e le Dios ngike el milskid tia el babier. (2 Timothy 3:16) Ngdiak el ua betok el chuodel el babier e le ngmla mukerreu er a irechar el mei el ua lochotii a betok el telael el manuscript er a Biblia er a irechar. Me a lmuut kung, alta ngmla er ngii omerrob er a oidel, omerusel, me a omengiuel engdi ngmelemolem el ngar ngii er chelecha el taem. Ngsel kot el betok oidel me a omerusel el babier. Me a Biblia el melemolem el ngar ngii er chelecha el taem ochotii el kmo a “tekingel a Dios er kid a kmal diak bo le metom!”​—Isaia 40:8.

A lmuut el ta er a tekoi el lerirellii a Jehovah a ngii ulterekeklii el kmo a moktek er ngii el kired a mo tmaut. Ngua dulsaod er ngii er a uchei, ngmle moktek er a Dios el kmo a rechad bo lekiei er a beluulechad el mo cherechar. Me nguaisei a Adam er a lengiltii el mo diak lolengesenges er a Jehovah e ruebet er a klengit, e ngurridii a techall el kiei el mo cherechar el kirel me a redirkak lemechell el ngelekel. “A klengit a siliseb er a beluulchad el okiu a tal chad, ma kodall a ulekiu a klengit el mei, ma kodall a ulemerk el mor a re chad el rokui, ele rokui a mlor a klengit.” (Rom 5:12) Me a Adam el mlo diak lolengesenges a uchul me a moktek er a Dios a ua lak bo letekoi. Ngmilekerang a Jehovah?

A omerellel a Jehovah a kmal loltirakl er a blekerdelel. Ngulemekngerachel er a Adam me a Eva er a kngterir engdi milsterir a rengelekir el dirkak el mechell a omelatk. Ngoeak a llemesel a rengul a Jehovah e ngkiltmeklii a rolel e ngmo mesmechokl tia el  tekoi e di mle mereched louchais er a semecheklel. (Genesis 3:15) A Ngelekel a Dios el Jesus Kristus a mo melubet er tir er a klengit me a kodall. Ngera ngmle kirel el meruul er ngii?

A Jehovah bo lolsobel er a rechad er a medal omerellel a Adam, e ngulderechii a Jesus el mei er tia el chutem el mo olisechakl er a rechad er a rael el mora klengar e “mengkengkii a klengar er ngii el ngbetir ar betok.”  a (Mateus 20:28, BT; Johanes 14:6) A Jesus a mle sebechel meskid olubet e le ngua Adam el mle cherrungel. Engdi a Jesus a millemolem lolengesenges el mo lmuut er a kodall. A Jesus el dimlak el leredemelel a mad a uchul me a Jehovah ulekisii el mora eanged. Me a Jesus a mlo sebechel rullii a tekoi el dimlak leketmeklii a Adam. Ngmilsterir a rebekongesenges el chad a techall el mo kiei el mo cherechar. “Ng oeak a orrengesmengoit er a di tal chad, e a re betok el chad a mlo mekngit; me ng dirrek el ua isei el oeak a blekongesenges er a di tal chad e a re betok el chad a mo muklemalt er medal a Dios.” (Rom 5:19) Ngoeak a olubet el tengetengel a Jesus, e a Dios a mo otutii a telbilel el rechad a mo kiei el mo cherechar er tia el chutem.

Kede suub a betok el kirel a Jehovah loeak omerellel el bedul a mondai el dilubech le Adam a mlo diak loba blekongesenges. Kede mesa el kmo ngdiak a ngii di el ngera el sebechel torebengii a tekoi el luchelii a Jehovah, “ng diak le iit el rullii sel [lomdasu] er ngii.” (Isaia 55:11) Kede dirrek el mesa klungel a bltkil a rengul a Jehovah el mei er kid. “A Dios a ulechotii a bltkil a rengul er a loderchii a di tal Ngelekel el mer a beluulchad, me bo dokiu ngii el mo nguu a klengar. Tiakid a bltikerreng el kmo, ng diak le kid a mle betik a rengud er a Dios; ng bai Dios a mle betik a rengul er kid me ng ulderchii a Ngelekel, el doeak ngii e ng musubes a kngtid.”​—1 Johanes 4:9, 10.

A Dios a “dimlak le kiresii a Ngelekel, e uldersii el kired el rokui,” me ngsebechel mo ulterekokl a rengud el kmo a Dios a ‘mo meskid a rokui’ el tekoi el bla letib. (Rom 8:32) Ngera ngmla tibir a Dios el mo meruul el kired? Molemolem el menguiu.