Sel desuub a lmuut el betok el blekerdelel a chad, e kede lmuut el mo ungil medengelii me a klausechelei er kid me ngii a lmuut el mo dmolech. Ngdi osisiu, sel desuub a lmuut el betok el blekerdelel a Jehovah e kede lmuut el mo ungil medengelii me a deleuill er kid me ngii a lmuut el mo mesisiich. Alta ngkmal betok a ungil blekerdelel a Dios engdi kleua er ngii a kmal ileakl: klisichel, llomeserreng, llemalt, me a bltikerreng er ngii.

“Rubak el DIOS, ng kau ia rirellii a eanged ma chutem el di uleba klisichem.”​—JEREMIA 32:17.

Kede mesa klungel a klisichel a Dios er a blebelel. El ua tiang, ngngera ke mo melechesiu er ngii sel lemeringel a sils e mdechor er rikl? Kleldelel a sils. Ke melechesuar er a klisichel a Jehovah. Ngngua ngera klungel a klisichel a sils? Sel kot el mekeald el part er a sils a 27,000,000 degrees Fahrenheit. A ralm el omrechorech a 212°F. Engdi sel kot el mekeald el part er a sils a 127,000 el lmuut el mekeald er tiang. Bek el bio e a sils oltobed a klisiich el osisiu a klisichel er a betok el dart el miliol el dub.

Engdi sel domekesiu er a sils el mora betok el trillion el diak el mochur el btuch e a sils a kekerei. A re scientist a melekoi el kmo a chaibibengel a ta er a kot el klou el btuch el ngklel a UY Scuti, a 1,700 el taem el klou er a chaibibengel a sils. Me a lsekum a UY Scuti a mtechir a sils e ngnguu a basio er a beluulechad me a Jupiter. Tia ngosukid el mo mtebengii  a delechel a tekingel a Jeremia er a ledu el kmo a Jehovah el Dios a milebii a melidiul me a chutem loba klou el klisiich.

Ngera el klungiaol a dengai er a klisichel a Dios? A klengar er a rechad a ultuil er a blebelel a Jehovah el ua sils me a betok el tekoi el debetik er a beluulechad. Me a lmuut kung, a Dios ousbech er a klisichel el mo uchul a klungiolir a rederta el chad. Ngmekerang? Chelsel aike el rak er a AD 1 el mora AD 100 e a Dios a milsa Jesus a klisiich el mo meruul a mengasireng el tekoi. Kede menguiu el kmo: “A re meiko a mla mo sebechir el omes, ma re chitechut ocherir a mla mo sebechir el merael, me tirkel chebedes a mla mo klikiid, ma re mechad a mla mo orrenges, ma re mlad a mla lmuut el mo chad.” (Mateus 11:5) E kuk mekerang er chelecha el taem? A Biblia kmo: “Ng melisiich er tirkel mechitechut e mesulang. . . . Ngdi tirkel oumeral ulsirs er a RUBAK el kirel a ngesou, a mo metik a klisichir el mukbeches.” (Isaia 40:29, 31) A Dios a sebechel meskid a “diak lemetuk el klisiich” el ngii a mo ngosukid loutekangel a ringel me a mondai er a klengar. (2 Korinth 4:7, BT) Kau, ngdiak el soam el mo kmeed er a Dios el kmal betik a rengul er kid e ousbech er a klisichel lolengeseu er kid?

“RUBAK, ke mla remuul a kmal betok el tekoi! Ke meral mlo ungil remuul el rokui el oba llemesel a rengum.”​—PSALM 104:24.

Sel dosuub a lmuut el betok el kirel aike el bla lebeob a Dios e ngmera el mo mechas a rengud er a llemesel. El ua tiang, a rebebil el scientist a mesuub a blebelel a Jehovah e ousbech aike el lesuub er ngii el meruul a design er tir el lmuut el mo ungil. Aika el design er tir a mekekerei el klekedall el ua uid er a bail me a klalo el mora skoki.

Engdi a kot el mengasireng el tekoi el lochotii a llemesel a rengul a Dios a bedenged a rechad. Ka molatk er a rolel a lobeob a ngalek. Sel lebo el dioll a redil e ngkmal di kekerei el ngimech a ngalek. Omerollel a taem e a chiuis, muscles, budel, veins, me a organs a mo er ngii er sel telutk el temel. E sel bo lechetiu el buil e ngmechell a ngalek el cherrungel a klekedellel a bedengel. A llomeserreng el desang er tia el design er a rechad a odbecheterir a rebetok el mo kongei a tekingel a ta er a milluches er a Biblia el kmo: “Ak uldanges er kau ele ke rirellak el ileakl ngodech e mengasireng.”​—Psalm 139:14.

Ngera el klungiaol a dengai er a llomeserreng er a Dios? A Ulemeob a medengei aike el dousbech el mo dmeu a rengud. Ngklou a klemedengei me a sekutaberreng er ngii a uchul me ngomeskid a mellomes el ulekrael er a Tekingel el Biblia. El ua tiang ngmelisiich er kid el kmo: “Bo mkausubes a mlo mekngit er a delongeliu.” (Kolose 3:13) Tia ngungil el ulekrael? Chochoi. Omesuub a mla metik el kmo a klausubes a rullii el mo ungil a cheliued e nguu a blood pressure er kid el moriou. Ngdirrek el ngosukid me ngdiak bo de depressed e dengai a lmuut el bebil er a secher. A Dios a di uai a mellomes a rengul el sechelid el lomekerreu er kid e diak el stob lomeskid a ulekrael, el ngii a ngosukid e mo uchul a klungioled. (2 Timothy 3:16, 17) Kau, ngdiak el soam chouaisei el sechelei?

“RUBAK a betik a rengul er a melemalt.”​—PSALM 37:28.

A Dios a meruul a llemalt. “Ngkmal diak el sebechel a mera el Dios el meruul a mekngit, ngdiak el sebechel Olab a Bek el Klisiich el meruul a cheleuid!” (Job 34:10, NW) Ngmelemalt a kerrekerilel, el ua lolekoi a ta er a milluches er a Psalm el kirel a Jehovah el kmo: “Koukerrekeriil er a re chad er a bek el beluu el oba llemalt.” (Psalm 67:4) A Jehovah el “omes er a rengul a chad” a diak lemecheblad ngbai sebechel mtebengii a klemerang, e melemalt loukerrekeriil. (1 Samuel 16:7) Me a lmuut kung, a Dios a medengei a rokui el chelebirukel lomeruul er a beluulechad e mla tibir el kmo ngdi kmedung e a “remekngit a mo mekimd el mo diak er a chutem.”​—Osisechakl 2:22, NW.

Me nguaisei engdi a Dios a diak el meringel a tekingel el chad er a kerrekeriil el soal lomals. Ngolecholt er a klechubechub sel lebo el sebechel meruul el uaisei. A Biblia kmo: “A RUBAK a chubechub” mo lmuut er a remekngit me ngochotii a klechubechub el mo er tir sel lobult. Tiang, ngdiak el mera el llemalt?​—Psalm 103:8; 2 Petrus 3:9.

Ngera el klungiaol a dengai er a llemeltel a Dios? A apostol Petrus a dilu el kmo: “A Dios a diak longetukel rar chad, me tirikel meluu ra Dios e meruul a llemalt a le ngiiteterir ra bek el beluu.” (Rellir 10:34, 35, BT) Kede melai a klungioled er a llemeltel a Jehovah lengii el diak longetukel er a rechad. Ngsebeched el nguu a kengei er ngii e mengull er ngii el diak loltirakl er a beluu el dechad er ngii, chiro er a bedenged, skuled, me a lechub e ngderuchelled er a buai.

A Dios a mla meskid a ukltked le ngsoal a bo dodengelii a llemeltel e dengai a klungioled er ngii. A Bades a mesaod er a ukltked el kmo ngllach el ‘llechukl er a rengud’ el ngii “ochotii el kmo” a omerelled ngmelemalt me a lechub e ngdiak. (Rom 2:15) Ngmekera mo uchul a klungioled? A lsekum a ukltked a mla mosisechakl e ngsebechel lodbechid el mo olechib er kid er a tekoi el diak el melemalt me a lechub ngmo uchul a telemelled. E sel derellii  a cheleuid e ngmo odbechid el mo obult er a mekngit el omerelled e sumecheklii. Nguaisei sel bo dodengelii a llemeltel a Dios e ngmo ngosukid e okedid er ngii!

“Dios a bltikerreng.”​—1 JOHANES 4:8.

A Dios olecholt er a klisichel, llemesel, me a llemeltel engdi Biblia diak ledu el kmo a Dios a klisiich, llomeserreng, me a llemalt. Ngmelekoi el kmo ngii a bltikerreng. E ngerang? Ngsebeched el melekoi el kmo a klisichel a Dios a uchul me ngsebechel remuul a tekoi e a llemeltel me a llomeserreng er ngii omekrael a omerellel. Engdi bltikerreng er a Jehovah odbechii el mo meruul a tekoi. Bltikerreng orrael a rokui el tekoi el loruul.

Me alta Jehovah a diak a lengesonges er ngii, engdi bltikerreng a uldbechii el mo omeob er a remellomes el blebelel er a eanged me a chutem el sebechir el melai a klungiolir e oldeu a rengrir er a bltikerreng er ngii me a ulekerreuil. Nguleba bliochel el bltikerreng el mengetmokl er a beluulechad el mo delengcheklir a rechad. E melemolem lolecholt er a bltikerreng el mora rokui el chad le “ng meruul er a sils er ngii me ng dmiich el mor a re chad el di osisiu a re mekngit ma re ungil, e oltengel er a chull el mor a re meruul a ungil ma re meruul a mekngit.”​—Mateus 5:45.

Me a lmuut kung a Jehovah a “mui er a bltikerreng me a klechubechub.” (Jakobus 5:11, BT) Ngolecholt er a bltkil a rengul el mo er tirke el melasem el mo medengelii e olekeed er tir er ngii. A Dios omes er a rederta me a derta er tir. ‘Ng kerekikl el omekerreu er kau.’​—1 Petrus 5:7.

Ngera el klungiaol a dengai er a bltikerreng er a Dios? Ngdmeu a rengud lomes er a klebokel el sunset. Ngsoad lorrenges er a tolechoi locherchur. Kede mengreos er a bltkil a rengul a chedal a telungalek er kid. Alta ngdiak dousbech aikang el mo melemolem el ngar, engdi ngrullii a klengar er kid el kmal mo ungil.

Kede dirrek el ngmai a klungioled er a ta er a olechotel a bltkil a rengul a Jehovah: nglunguuch. A Biblia melisiich er kid el kmo: “Lak el sebek a rengmiu er a ngii di le ngerang, e bai molengit er a Rubak er a bek el nglunguchiu, a ikel mousbech, el di blechoel el mereng a sulel.” Ngdi uai a kmal ungil chedam a Jehovah soal a debo er ngii el kirel a ngeso er aike el tekoi el kmal suebek a rengud el kirel. E ngii el lolecholt er a bliochel el bltikerreng a tibir el kmo ngmo meskid a “budech er a Dios, el diak el sebechel a chad el mo cherrungel el medengelii.”​—Filipi 4:6, 7.

Tia el kedeb el omesoded el kirel aike el kleua el ileakl el blekerdelel a Jehovah el klisiich, llomeserreng, llemalt, me a bltikerreng ngmla ngosukau el mo medengei el kmo a Dios ngngua ngerang a blekerdelel? Aki mengemedaol er kau el mo menguiu el kirel aike el bla leruul me a bo loruul a Dios, el mo kilungii a omereng el saul er kau er ngii.