A kot el tekoi el locha bo moker er ngii er a chad el soam el mo medengelii a, “Ngtecha ngklem?” Okmo koker er a Dios er tia el ker, e ngmo dmu el kmo ngerang?

“Ngak a Jehovah. Tiakid a ngklek.”​—Isaia 42:8, NW.

Tia el ngakl a klou a ultutelel er a Dios. Ngdimlak a chad el msang a ngklel ngdi mle ngii el ngiltii tia el ngakl. A Jehovah dilu el kmo: “Tiakid a ngklek el mo cherechar, e tiakid a ngklek el bo lomekedong er ngii a ikel rokui el dirk mei el telecheroll.” (Exodus 3:15) A ngklel a Dios a debetik er ngii er a Biblia el lmuut el betok er a dial el ua Olab a Bek el Klisiich, Chedam, Rubak, me a Dios e lmuut el betok er a ngklir a rechad el ua Abraham, Moses, David, me a Jesus. Me a lmuut kung, a Jehovah a soal a rechad a bo lodengelii a ngklel. A Biblia kmo: “Bo lodengei el kmo, ng di kau el tang a RUBAK [Jehovah, a doltirakl er a kot el omelechesel a Biblia], ke ngarbab el merreder er a beluulchad el rokir.”​—Psalm 83:18.

Tia el ngakl a klou a ultutelel er a Jesus. Ngar er a nglunguuch el lomekedong er ngii el Delal a nglunguuch, e a Jesus a ullisechakl er a rultirakl er ngii el mo meluluuch el kmo: “Bo le modanges a chedaol ngklem.” (Mateus 6:9) A Jesus a dirrek el milluluuch el kmo: “Chedam, mkebkellii a ngklem.” (Johanes 12:28) Ngmle klou a ultutelel er a klengar er a Jesus a longebkall er a ngklel a Dios a uchul me ngmle sebechel meluluuch el kmo: “Kmla ochotii a ngklem er tir, e lmuut lolecholt er ngii.”​—Johanes 17:26, BT.

Tia el ngakl a klou a ultutelel er tirke el medengelii a Dios. A rechedal a Dios er a irechar a mle medengei el kmo a osobel me a osebechakl a mle ulekuak er a ngklel a Dios. “A ngklel a RUBAK [Jehovah] a mesisiich el cheuatel; a melemalt a remurt el mor ngii e mo selebechakl.” (Osisechakl 18:10) “Tirkel rokui el mo olengit a ngesou er a RUBAK [Jehovah] a mo suobel.” (Joel 2:32) A Biblia ochotii el kmo a ngklel a Dios a mo meleakl er tirke el mesiou er ngii. “A derta er a ikel beluu a mengull el meluluuch e  olengesenges er a di chedul, ngdi kid a mo mengull el meluluuch e olengesenges er a RUBAK [Jehovah] el Dios er kid el mo cherechar el diak a ulebengelel.”​—Mika 4:5; Rellir 15:14, BT.

Tia el ngakl a ochotii a Dios. A rebetok el chellimosk a melekoi el kmo a ngklel a Dios a belkul a kmo “Ngike el Uchul e Omekdubech.” A Jehovah ochotii er kid a belkul a ngklel er a losaod el kirel el mora Moses el kmo: “Ngak a Ngak.” (Exodus 3:14) A omelechesel el tekoi er a Hebru a sebechel moiuid el “Ak Mo Ngii Di el Ngerang Me Kutaut a Moktek er Ngak.” Me a belkul a ngklel a lmuut el dmolech, ngdiak di lochotii el kmo ng Ulemeob e uchul a rokui el tekoi el ngar ngii. A ngklel ochotii el kmo ngsebechel mo ngii di el ngerang e sebechel remuul a blebelel el mo ngii di el tekoi el mo otutii a moktek er ngii. A dui a mesaod er a deruchellel me a lechub e ngklisichel engdi ngklel el Jehovah a smodii el kmo ngngii ngua ngerang e sebechel mo ngii di el ngerang.

Tia el ngakl a ochotii a klemeriarreng er a Dios er kid. A belkul a ngklel a ochotii el kmo ngbetik a rengul er a blebelel, el kid uldimukl er ngii. Me a lmuut kung, a Dios el mla ouchais er a ngklel ochotii el kmo ngsoal a bo dodengelii. Ngika ulechotii a ngklel er a uchei er a doker er ngii. Me ngbleketakl el kmo a Dios a diak el soal a bo domdasu el kmo ngchelid el cheroid er kid ngbai soal a domes er ngii el mera el Chad el sebeched el mo kmeed er ngii.​—Psalm 73:28.

Usbeched er a ngklel a Dios ochotii a klemeriarreng er kid er ngii. Ngsebeched lomekesiu er ngii er tiang: ke dmu er a chad el soam el mo sechelil me ngoleker er kau lousbech er a ngklem. Ngmo uangerang a uldesuem omko ngkmal diak lekengei lousbech er a ngklem? Cherengel a taem e ke locha mo melechedech el kmo ngika el chad ngmera el soal mo sechelim me a lechub e ngdiak. A Dios me ngdi osisiu. A Jehovah mla ouchais er a ngklel el mora rechad e melisiich er kid el mo ousbech er ngii. Sel doruul el uaisei e kede ochotii er a Jehovah el kmo ngsoad el mo kmeed er ngii. A Jehovah mesterir “tirke el melebedebek [me a lechub, “mengreos,” footnote] er a ngklel”!​—Malakai 3:16, NW.

A mo medengelii a ngklel a Dios a kot el bakes el doruul er ngii a lsoad el mo medengelii a Dios. Engdi ngdiak di debo er tiang e stob. Ngkired el mo medengelii ngike el loungakl er tia el ngakl. Ngkired el mo medengei el kmo ngngua ngera blekerdelel.